Read idoma 1 ĀCƐ UKƆ́RĪNTI 4 Bible Online

1 ĀCƐ UKƆ́RĪNTI 4 - idoma bible

1 ĀCƐ UKƆ́RĪNTI 4

¹Aá cíkā o je alɔ bɛ̄ɛka ācocɛ̄hɔ̄ kú Ohɔ́nyɛtá ā, nēé kwú ɛlɔ̄kwɛ̄yi otayínū kú Ɔwɔicō ú tā uwā abɔ̄ kéē tɔ́ɔna tɛ́ɛcɛ ā.

²Ɔdā ōcɛgbá fíyɛ́ dúú nēé gē dɔɔ̄kā ŋmá ɛgiyí ɔ̄cocɛ̄hɔ̄ ɔ́ɔmā wɛ ɛyí ō táajɛ lɛ ɔkpani kú nū eko dóódu.

³Á kú um ā, ń lɛ ɛlá wu ɔ́ nóó ɔ́dāŋ ka aá yɔ̄ ī kɛpɔ̄ tū um, ámāŋ ka únɛ́pɔ̄ kú ācɛ ɔlamu yɔ̄ ī kɛpɔ̄ tū um ŋ́. N kōō ī kɛpɔ̄ tū iyī um ipú ɛlā nyā ŋ́.

⁴Ɔtū kú um í kpɛ́lā ce um ŋ́, amáŋ ɔ́ɔmā í mafú ka ń je ɔkwu ɔdā dúú ŋ́ nɛɛ ŋ́. Óndú ā wɛ ɔ̄cɛ nōo gē kɛpɔ̄ tū um á.

⁵Ohígbū ɔ́ɔmā aá híīī kɛpɔ̄ tū ɔ̄cɛ dúúmā gbɔbū lɛ eko kú ɛpɔ̄ ā ŋ́. Ɛpɔ̄ ámōōmɛ nēé í ka ā géē gbēyī jāā gbéeko nɛ̄ Ujísɔ̄si í wā í kɛpɔ̄ tū odúúdu ācɛ ā. Ó géē kpó aɔ́dā nēe tayínu ipú ajɛ odobū ā bá ɛcɛ péee cɛ́ɛ́ kóō lɛ ɛlá nɛ̄ ɔ̄cɛ gē gbo tayínū ipú ɔtū kú nū ā bī wɛ̄ɛcɛ. Cɛ́ɛ́ eko ɔ́ɔmā Ɔwɔicō géē cɛ̄tra ɔnyɔɔnyɛ ɛ́gɛ́nɛ̄ o cíkā ā.

⁶O yá ɛ́ɛ́ kú aá jɛ́ɛyí kú ɔdā nɛ̄ n yɔ̄ ī ka ā, ayínɛ́ um, n bī Apólɔsi mɛ́mla ami abɔ̄yī um le yá ɔdōcābɔ̄ kú odúúdu ɔdā nɛ̄ n tɔ́kpá lɛyíkwu ɔ́ ā, cɛ́ɛ́ kú aá lɛyí kú ɛlā nēé ka ɔ́ɔma jé. É kahíníī, “Aá lɛ ine okpaakpa ā tū.” Ɔ̄cɛ dóódu kú aá kóō bī ɔ̄cɛ éyi le kɔbɔ́ɔcɛ klla leyī gwō ɔ̄cɛ ɔhá bónū ŋ́.

⁷Ɔ̄nyɛ yá uwɔ lɔhi fíyɛ́ ɔ̄cɛ ɔhá ā? Ó wɛ Ɔwɔicō kpó odúúdú ɔdā nɛ̄ a lɛ ā ga awɔ ā ŋ́ nɛɛ? Abɔ̄ ɔdā nɛ̄ a lɛ ā ŋmá ɛgiyí Ɔwɔicō ā, á le ɔdā ō bī gwō ŋ́.

⁸Aá le odúúdú ɔdā nōo cɛgbá ā lɛ ɛ́ɛ́ nɛɛ? Aá le jāgbénú ɛ́ɛ́ nɛɛ? Aá le pīya ɔcɛ́ nááná nɛ̄ alɔ í wɛ ŋ́ má ā? Ó lɔhi, eyī yá um kú aá le pīya ɔcɛ́ ɔkwɔ̄ɔ̄kwɛ̄yi, cɛ́ɛ́ kú alɔ wɛ aɔ́cɛ́ pīyatɔ̄ha mla aá.

⁹Ohígbū koó yá um bɛ̄ɛka Ɔwɔicō lɛ alɔ nēe wɛ ācotɛ̄hɔ̄ ā kpó bá ɛga ámōōmɛ kú ɔgba ā bɛ̄ɛka ācɛ nēé lɛ uwá ŋmɛpɔbí, nēé kē í kpó uwā ŋmó ipéyī ójīla kú aálelékwū-ōtɛ̄hɔ̄ mɛ́mla alɛɛcɛ ā.

¹⁰Ohígbū Ohɔ́nyɛtá ā, alɔ le pīya aólíla. Amáŋ aá wɛ ācojɔ́ɔdā ohígbū o pīyatɔ̄há kú aá mɛ́mla Ohɔ́nyɛtá ā! Alɔ le gbagbafú amáŋ aá le pīya ācɛ olɔfú! É leyī gwō alɔ bónū, amáŋ é le ojīlīmā je lɛ aá.

¹¹Jāā kwu eko nyā, ɛmiyɛ gē ŋmó alɔ, íjēenyi gē ŋmó alɔ, áhingílí nɛ̄ alɔ gē le wiiyē mɛ́ɛ̄ á, é gē gɔ́ alɔ, alɔ bá gē yɛ ŋmá ɛga éyi ga ɛga ɔhá.

¹²Alɔ gē yúklɔ́ nɛ̄ɛ̄nɛ̄hi o yá ɛ́ɛ́ kú alɔ yēeyī. Eko nɛ̄ ācɛ lɛ ɛcá cá alɔ nɛɛ, alɔ gē hɔ́hā ce uwá, eko nēé í yá alɔ ōwē nɛɛ, alɔ gē lɔ́tū.

¹³Eko nɛ̄ ācɛ lɛ ɔdā obɔ̄bí ka tá alɔ nɛ̄, alɔ gē bī ɛlā ō gbo ɔtū nɛɛ le tú uwā ohi. Alɔ le pīya īmū kú ɛcɛ nyā. Jāā kwu abālɔbányā alɔ ā wɛ áhingílí kú ɛcɛ á.

¹⁴Ń tá ɛ̄nyā fu aá o yá ɛ́ɛ́ kú uwēyī kóō lɛ aá kwú ŋ́, amáŋ n tíne ō nwū aá ɛlā bɛ̄ɛka ayí um ā.

¹⁵Ɔ́dāŋ ka aá kōō lɛ ācɛ ulá ofucɛhɔ̄ nēe gē nwū aá ɛla ipú oyēeyī kú aá nēe wɛ ācɛ kú Ohɔ́nyɛtá ā, náána aá kē lɛ ádā ékpónú. Amáŋ n le pīya ádā kú aá ohígbū ka ɔ̄kōolɔhi nɛ̄ n kā lɛ aá ā yá nɛ̄ aá je pīya ācɛ kú Ohɔ́nyɛtá ā á.

¹⁶Ohígbū ɔ́ɔmā, n gē gbɔ̄ɔkɔ lɛ aá kú aá yá ɔdā dúú nɛ̄ aá í yá ā gbla um.

¹⁷Ohígbū ɛ̄nyā yá ɛ́ɛ́ nɛ̄ n yɔ̄ gē tū Utímōti nōo lɛbɛ̄ɛka ɔyí abɔ̄yī um nɛ̄ n kpɔ́tūce ipú oyēeyī kú ācɛ kú Ohɔ́nyɛtá ā ɛhɔ̄ fu aá á. Ó géē tū aá ɛlá kwu ɔwɛ nɛ̄ n lā oyēeyī ɛ̄yīpɛ̄ ipú ōpīyatɔ̄há mla Ohɔ́nyɛtá Ujísɔ̄si ā, nɛ̄ n gē nwū ācɛ ipú odúúdú icɔ́ɔci ɛga dóódu ā.

¹⁸Ācɛ ōhī kú aá gē gɔ̄ ohígbū ka aá gbɛlá ka ń gáā wā í jila aá gɛ ŋ́.

¹⁹Amáŋ ɔ́dāŋ ka Óndú ā cɛ̄, n géē wā ɛgiyí aá eko kpiíí, cɛ́ɛ́ ká n̄ lɛ ɛga nɛ̄ ɔfú kú ācɛ nēe bá gē gɔ̄ ā ŋmá ā jé, kóō híīī wɛ ɔdā nēé ka ā ōfōōfūnū ŋ́.

²⁰Ohígbū ka eko nɛ̄ Ɔwɔicō cɔcɛ́ oyēeyī kú ɔ̄cɛ, ācɛ gē jé ɔ̄ ŋmá lɛ ɛdɔ úklɔ́ kú ɔfú nōó gē yá ā, ó wɛ oŋmá ɛlā nōó gē ka ā ŋ́.

²¹Ɛ̄nyá nɛ̄ aá dɔɔ̄kā ā? N wā í lɛ aá yá italā nɛɛ, kɛɛ ka n wā mla alelékwū kú ihɔtū mɛ́mla ogbonɛnɛ?