Read idoma 1 ĀCƐ UKƆ́RĪNTI 6 Bible Online

1 ĀCƐ UKƆ́RĪNTI 6 - idoma bible

1 ĀCƐ UKƆ́RĪNTI 6

¹Ɔ́dāŋ nɛ̄ ɔ̄cɛ dúú kú aá lɛ ɛpɔ̄ lɛ mla ɔ́mpa nū, ɔdíyá nōó jámá bī ɛpɔ̄ ā ga iyɔ̄bū ɔ̄cohɛ́pɔ̄ nōó jé Ɔwɔicō ŋ́ mā, ikɔkɔ nōó géē bī ɛpɔ̄ ā wā iyɔ̄bū ācɛ kú Ɔwɔicō kéē lɛ uwā kagwó ā?

²Aá jé ka ācɛ kú Ɔwɔicō ā gáā kɛpɔ̄ tū ɛcɛ ā ŋ́ nɛɛ? Abɔ̄ ó le lɛ ā mɛ́ɛ̄ ā, ɔ́dāŋ ka aá cíkā ō kɛpɔ̄ tū ɛcɛ á, aá lɔfú kɛlā ligíī gwó glá ŋ́ nɛɛ?

³Aá jé ka alɔ kōō í kɛpɔ̄ tū aálelékwū-ōtɛ̄hɔ̄ ā ŋ́ nɛɛ? Ó lɛ ā, alɔ cíkā o kɛpɔ̄ tū aɔ́dā kú ɛcɛ nyā fíyɛ́.

⁴Ɔ́dāŋ ka aá lɛ ɛlā ɛ́gɛ́nyā lɛ, aá gē je ɔ́ ga iyɔ̄bū ācɛ nēé wɛ ɔdā dúúmā ŋ́ ipú icɔ́ɔci ā ŋ́ mā nɛɛ?

⁵N ka ɛ̄nyā kú uwēyī kóō lɛ aá kwú. Ɔ̄cojéeyī éyi cíkā ō yɔ̄ ipú ojīleyī kú aá piíí nōo lɔfú ka ikpɛ́lā dúú nōo yɔ̄ ɔtāhɛ̄ kú ācɛ kú Ɔwɔicō gwó glá.

⁶Ikɔkɔ ɛ̄nyā ā, ɔyínɛ́ nōo kpɔ́tūce Ohɔ́nyɛtá ā éyi gē bī ɔyínɛ́ ɔhá ga únɛ́pɔ̄ kú ācɛ nēé kpɔ́tūce Ohɔ́nyɛtá ā, ŋ́ mā kéē kɛpɔ̄!

⁷Ɔdā nōo yá ɛ́ɛ́ nɛ̄ aá lɛ ɛlā kú únɛ́pɔ̄ ɔtāhɛ̄ aá ā, mafú ka aá le yá bɔ̄bí ɛɛ́. Ó lɔhi fíyɛ́ kéē pīya aá tū ŋ́ nɛɛ? Ó lɔhi fíyɛ́ kéē hɛ́ aá éjulúgwu ŋ́ nɛɛ?

⁸Amáŋ aá abɔ̄yī aá gē pīya ayínɛ́ aá nēe kpɔ́tūce Ohɔ́nyɛtá ā tū, klla gē hɛ́ uwā éjulúgwu.

⁹Aá jé ka ācobɔ̄bíipú ā í gáā lúgwū kú ajɔ̄ɔ̄cɛ́ kú Ɔwɔicō glá ŋ́. Aá híīī pllá iyī aá ŋ́, ācocikpɔ́nyā, ámāŋ ācopɛ̄cí, ámāŋ ācogbaja ámāŋ ācocikpó ācɛnyīlɔ,

¹⁰ámāŋ ācowūwī ā, ámāŋ ācɛ o yúnwū ɔdā ámāŋ ācogwéjé nɛ̄ɛ̄nɛ̄hi ā ámāŋ ācɛ nēe ī bī ācɛ ɔhá iyē ámāŋ aúwī dúú í gáā lúgwū kú ajɔ̄ɔ̄cɛ́ kú Ɔwɔicō glá ŋ́.

¹¹Ācɛ ōhī kú aá tɛtɛ lɛ ā dúú. Amáŋ é lɛ aá na ŋmá íne nɛ̄ aá bīya ā, kwú aá ú kpó pīya ákú Ɔwɔicō ɛɛ́. É lɛ aá kagwó mla Ɔwɔicō ohígbū ɔdā nɛ̄ Ujísɔ̄si, Ohɔ́nyɛtá ā mɛ́mla Alelékwū kú Ɔwɔicō yá ā.

¹²Ɔ̄cɛ éyi géē ka kahíníī, ‘N lɛ ikwú ō yá ɔdā dóódu glá!’ Īī. Amáŋ ó wɛ ɛjɛ̄ɛ̄jī ɔdā dóódu lɔhi ga awɔ ā ŋ́. N lɔfú ka kéē je ɛga gā um ká n̄ yá ɔdā dóódu, amáŋ ń gáā jɛga lɛ ɔdā dóódu kóō lɛ um pīya ɔfiyɛ kú nū ŋ́.

¹³Ɔ̄cɛ éyi géē ka kahíníī, “É yá ɔdōlé lɛ ipú, ipú kē yɔ̄ lɛ ɔdōlé”. Ɛ̄nyā wɛ ɔkwɛ̄yi, amáŋ ɛ̄cī éyi Ɔwɔicō géē bīya uwá ɛplɛ́ɛpa tāajɛ. Ɔ̄cɛ í cíkā ō bī ɔkpíyē kú nū le gbaajā ámāŋ bī ɔ̄ le cikpɔ́nyā ŋ́. Amáŋ ó cíkā ō bī ɔ̄ le cɛ̄ Óndú ā ɛhɔ̄. Óndú ā gē bī ɔkpíye ā yúklɔ́ lɛ iyī nū.

¹⁴Ɔwɔicō kwú Óndú ā ú héyī ŋmá ɔlékwū, ó kē géē bī ɔfú kú nū je alɔ héyī dúú.

¹⁵Aá jé ka ɔkpíyē kú aá wɛ āyā kú ɔkpíyē kú Ohɔ́nyɛtá ā ŋ́ nɛɛ? N̄ kwú āyā kú ɔkpíyē kú Ohɔ́nyɛtá ā ú cɛ́ɛ́ ká n̄ kwú ɔ̄ ú bɔ́há mla akwuna nɛɛ? Ó lɔɔwɛ ŋ́!

¹⁶Kɛɛ ka aá jé ŋ́ ka ɔ̄cɛ nōo kwú ɔkpíyē kú nū ú bɔ́há mla akwuna, le pīya ɔkpíyē ékpónú mla anú ŋ́ nɛɛ? Ɔkpíihɔ ā ka péélúú kahíníī, “Uwá ɛpɛlɛ́ɛpa géē je pīya ɔkpíyē ékpónú.”

¹⁷Amáŋ ɔ̄cɛ nōo kwú iyinū ú bɔ́há mla Ohɔ́nyɛtá ā le pīya ékpónú mla anú ipú alelékwū.

¹⁸Aá nēe wɛ ācɛnyīlɔ ā, aá le kwú ŋmá ikpɔ́nyā ō ce. Ine ɔhá dúú nɛ̄ ɔ̄cɛ gē bīya ā í lɛ abɔ̄ kwú ɔ́ ɔkpíyē ŋ́. Amáŋ ɔ̄cɛ nōo gē cikpɔ́nyā ā gē bīya ɔkpíyē kú nū.

¹⁹Aá jé ka iyē kú aá wɛ agbla kú Alelékwū Ihɔ nɛ̄ Ɔwɔicō je lɛ aá, nōo kē lā ipú aá ŋ́ nɛɛ?

²⁰Ɔdā nōó le lá aá ā nwuné íbí, ohígbū ɔ́ɔmā aá bī ɔkpíyē kú aá le je ojīlīmā lɛ Ɔwɔicō.