Read idoma 1 ĀCƐ UKƆ́RĪNTI 7 Bible Online

1 ĀCƐ UKƆ́RĪNTI 7 - idoma bible

1 ĀCƐ UKƆ́RĪNTI 7

¹Abālɔbányā, n tínē o tá ohi ɛlā nɛ̄ aá tá tū ipú ɔkpá gé um ā. Ó lɔhi ɔ́dāŋ ka ɔ̄cɛnyīlɔ ka anúɔ í lɛ ɔnyā ŋ́.

²Amáŋ o yá ɛ́ɛ́ kú ācɛ kéē híīī bīyíne kú ikpɔ́nyā ōce ŋ́ mā, ɛjɛ̄ɛ̄jī ācɛnyīlɔ dóódu, kéē lɛ ɔnyā abɔ̄yī uwā lɛ. Ɛjɛ̄ɛ̄jī ācɛnyā kóō kē lɛ ɔbá abɔ̄yī uwā lɛ.

³Ɔ̄cɛnyīlɔ cíkā ō yá ukpɛ̄ kú ɔdā nōo cíkā ō yá ā lɛ ɔnyā nū. Ɔ̄cɛnyā cíkā ō yá ukpɛ̄ kú ɔdā nōo cíkā ō yá ā lɛ ɔbá nū. Ɔnyɔɔnyɛ cíkā ō yá ɛgbá kú ɔ́mpa nū lɛ ɔ́.

⁴Ɔnyā í wɛ ɔkpani kú ɔkpíyē kú nū ŋ́. Amáŋ ɔbá nu wɛ ɔkpani nū á. Ɔwɛ ékpó ɔ́ɔmā, ɔbá í wɛ ɔkpani kú ɔkpíyē kú nū ŋ́, amáŋ ɔnyā nū wɛ ɔkpani nū á.

⁵Aá híīī tá ō lɛ iyē kwu iyī aá ŋ́, ń táafú ŋ́, ayíka aá ɛplɛ́ɛpa cɛ̄ tɔ̄há kú aá mlɛɛnyɔ̄ eko kpíi, ó yá ɛ́ɛ́ ká aá lɛ eko táajɛ le gbɔ̄ɔkɔ lɛ Ɔwɔicō. Amáŋ aá kóō kwúcē gbɔɔ́ ō gwutá mla iyī aá ɛ́gɛ́nɛ̄ ó cíkā ō lɛ ā. Aá í yá ɛ́gɛ́nyā cɛ́ɛ́ ka aá jɛga lɛ ebilíi yá aá ojámá ŋ́ ohígbū nɛ̄ aá gáā cē iyī aá bī glá ŋ́.

⁶Ń yɔ̄ gē je ɔ́da lɛ aá lɛyíkwu ɛ̄nyā ŋ́. Amáŋ n yɔ̄ ī nwū aá ɛlā icííci nɛ̄ n.

⁷Ó géē yɛ í he um ɔtū ɔ́dāŋ ka odúúdú ācɛ le lɛbɛ̄ɛka ami ā glá. Amáŋ ɔnyɔ̄ɔnyɛ lɛ ɛhi kú nū ŋmá abɔ̄ Ɔwɔicō. Ɔ̄cɛ éyi lɛ ɛhi éyi, ɔ̄cɛ ɔhá kē lɛ ɛhi ɔhá.

⁸Abālɔbányā, n gē ka ɛ̄nyā lɛ ācɛ nēé lɛ ɔnyā ŋ́ ámāŋ ācɛ nēé lɛ ɔbā ŋ́ mā, mɛ́mla anyōkwū ā, koó lɔhi fíyɛ́ lɛ aá kú aá yɔ̄ gē lā ofōōfu aá ɛ́gɛ́nɛ̄ n yɔ̄ ā.

⁹Amáŋ ɔ́dāŋ ka aá cē únwū kú aá tū glá ŋ́, aá nyɔ̄ í lɛ ɔnyā ámāŋ ɔbá lɛ. Ó lɔhi fíyɛ́ kú aá lɛ ɔnyā ámāŋ ɔbá lɛ ikɔkɔ nɛ̄ ɔtū kú aá ī yá ā nwulanwula ohígbū unwū ɔnyā ámāŋ ka unwū ācɛnyīlɔ.

¹⁰N je ɔ́da nyā lɛ ācɛ nēe lɛ ɔnyā ámāŋ nēe lɛ ɔbá ā. Ɔ́da nyā í ŋmá ɛgiyí um ŋ́, amáŋ ó ŋmá ɛgiyí Óndú. Ɔnyā í gáā nyɛ̄ɛ̄ ŋmá ɔlɛ ɔbá nū ŋ́.

¹¹Amáŋ ɔ́dāŋ koó nyɛ̄ɛ̄, ó í yɔ̄ ōfōōfūnū, ámāŋ nɛɛ ayíka ó kē le kagwó mla ɔbá nū. Ɔbá kóō tá ɔnyā nū ŋ́.

¹²Ákú ācɛ ohile ā, ami abɔ̄yī um ka ɛ̄nyā á, ó wɛ Óndú ā nóó ŋ́. Ɔ́dāŋ ka ɔ̄cɛ kú Ohɔ́nyɛtá ā éyi lɛ ɔnyā éyi nōo wɛ ɔ̄cɛ nōo kpɔ́tūce Ohɔ́nyɛtá ā ŋ́, anɔ́ɔ ɔnyā ā cɛ̄ ka anúɔ géē yɔ̄ mla anú, ɔbá ā kóō híīī tá ɔ̄ ŋ́.

¹³Anɔ́ɔ ɔ́dāŋ ka ɔ̄cɛnyā nōo wɛ ɔ̄cɛ kú Ohɔ́nyɛtá, ā éyi lɛ ɔbá nōó wɛ ɔ̄cɛ nōo kpɔ́tūce Ohɔ́nyɛtá ā ŋ́, nɛ̄ ɔbá ā cɛ̄ ka anúɔ géē yɔ̄ tɔ̄há mla anú glá, ɔnyā ā kóō híīī tá ɔ̄ ŋ́.

¹⁴Ohígbū ka ɔbá nōó wɛ ɔ̄cɛ nōo kpɔ́tūce Ohɔ́nyɛtá ŋ́ mā, géē je pīya ɔ̄cɛ ɔlɛ́ Ɔwɔicō oŋmá le opīyatɔ̄ha kú nū mla ɔnyā nū. Ɔnyā nōó kē wɛ ɔ̄cɛ nōo kpɔ́tūce Ohɔ́nyɛtá ā ŋ́ mā géē je pīya ɔ̄cɛ ɔlɛ́ Ɔwɔicō ohígbū opīyatɔ̄há kú nū mla ɔbá nū. Ɔ́dāŋ ka ɛ̄nyā í lɛ ā ŋ́ nɛ̄ɛ, ayípɛ̄ ɔlɛ́ uwā géē yɛ í le pīya ayípɛ̄ nēe kwú tēelihɔ, amáŋ ɛ́gɛ́nɛ̄ ó lɛ nyā, ayípɛ̄ ā wɛ ákú Ɔwɔicō.

¹⁵Amáŋ ɔ́dāŋ ka ɔbá ámāŋ ka ɔnyā nōó wɛ ɔ̄cɛ nōo kpɔ́tūce Ohɔ́nyɛtá ā ŋ́ mā ka anúɔ í nyɛ̄ɛ̄ ŋmá ɛgiyí ɔ̄cɛ ɔ́mpa nōo wɛ ɔ̄cɛ nōo kpɔ́tūce Ohɔ́nyɛtá ā, jɛga lɛ ɔ́ kóō nyɔ̄. Ɔ́dāŋ ka ó le lɛ ā, ɔ̄cɛ ɔ́mpa nōo wɛ ɔ̄cɛ nōo kpɔ́tūce Ohɔ́nyɛtá ā, kwu ɔ̄cɛnyīlɔ ámāŋ ka ɔ̄cɛnyā lɛ ɛga ō miya ɔdā nōo he ɔ́ ɔtū. Ɔwɔicō hī alɔ igwú kú alɔ bá ɛbɔ́.

¹⁶Awɔ nōo wɛ ɔnyā ɔ̄cōlóhɔ́nyɛtá ā cíkā ó jé ka ɔbá aá lɔfú pīyabɔ̄ ohígbū uwɔ glá. Awɔ nōo wɛ ɔ̄cōlóhɔ́nyɛtá ā cíkā ō jé ka ɔnyā uwɔ lɔfú pīyabɔ̄ glá ohígbū uwɔ.

¹⁷Ɔnyɔɔnyɛ kóō yɔ̄ ɛ́gɛ́nɛ̄ nɛ̄ Ɔwɔicō je ɔ́ tá lɛ ā, ɛ́gɛ́nɛ̄ ó tɛtɛ lɛ eko nɛ̄ Óndú ā hī ɔ̄ igwú ā. Ɛ̄nyā wɛ íne nɛ̄ n gē nwū ipú odúúdú aícɔ́ɔci á.

¹⁸Ɔ́dāŋ ka ɔ̄cɛ dúu lɛ apī hɛ́ gbɔbū ɛ́ɛ́ nōó mīyɛ ɛlā Ɔwɔicō á nɛ̄ɛ, óō híīī ka ka anúɔ gē pīya anú abɔ̄ ŋ́. Ɔ́dāŋ ka ɔ̄cɛ nōó hɛ́ apī ɛ́ɛ́ nōó mīyɛ ɛlā Ɔwɔicō ŋ́, kóō híīī nyɔ̄ gáā hɛ́ apī gɛ ŋ́.

¹⁹Ohígbū ka ɔ́dāŋ ka ɔ̄cɛ lɛ apī hɛ́ oo, ká ɔ̄cɛ í hɛ́ apī nóo, ɔ́ɔmā í wɛ ɔdā dúú iyɔ̄bū Ɔwɔicō ŋ́. Ɔdā nōo cɛgbá ā wɛ ācɛ kéē lɛyítáajɛ le aíne kú Ɔwɔicō.

²⁰Ɛjɛ̄ɛ̄jī ācɛ kéē yɔ̄ ɛ́gɛ́nɛ̄ é yɔ̄ lɛ eko nēé mīyɛ ɛlā Ɔwɔicō ā.

²¹A wɛ ɔfiyɛ eko nɛ̄ a mīyɛ ɛlā Ɔwɔicō ā ā? Ā lɛ ɛlā wu ɔ́ ŋ́. Amáŋ, ɔ́dāŋ ka a lɛ ɔwɛ má nɛ̄ a géē wɛ abɔ̄ nōo lɛ iyī uwɔ glá, ayíka a lɛ ɛga nū yá.

²²Ohígbū ka ɔfiyɛ nɛ̄ Óndú le hīgwú ɛɛ́, le pīya ɔ̄cɛ olɛ iyī nū kú ɔlɛ́ Óndú. Ɔwɛ ékpó ɔ́ɔmā, ɔ̄cɛ o lɛ iyī nū nɛ̄ Ujísɔ̄si lɛ ɔ́ hīgwú ɛɛ́ le pīya ɔfiyɛ kú nū.

²³Ɔwɔicō bī ɔdā nɛ̄hi le lá aá, ohígbū ɔ́ɔmā aá híīī je pīya ɔfiyɛ kú ācɛ ɔlamu ŋ́.

²⁴Ohígbū ɔ́ɔmā, ayínɛ́, ɛ́gɛ́ dúú nɛ̄ aá lɛ ɛ́ɛ́ nɛ̄ a mīyɛ ɛlā Ɔwɔicō ā, aá bá ɛ́gɔ́ɔmā kpɔ́ cɛ́ɛ́ ká áá lɛ íne kú Ɔwɔicō tū.

²⁵Abālɔbányā, ɔdā nɛ̄ aá tá tū ɔkpá fu um lɛyíkwu ācɛ nēé lɛ ɔbá ŋ́ ámāŋ ka ācɛ nēé le ɔnyā ɛ́ɛ́ ŋ́ mā ā. Ń mīyɛ íne dúú ŋmá ɛgiyí Óndú ā ŋ́. Amáŋ Óndú ā ipú eyīnyinyi kú nū ā lɛ íjééyī nɛ̄ ɔ̄cɛ lɔtūce ɔ́ glá je gā um, n kē í kɔ̄ ɔ̄ mla aá.

²⁶Ohígbū unwalu nōo yɔ̄ abālɔbányā ā, n gbɛlá koó lɔhi fíyɛ́ kú ɔ̄cɛnyīlɔ kóō yɔ̄ ɛ́gɛ́nɛ̄ ō yɔ̄ lɛ ā.

²⁷A lɛ ɔnyā nɛɛ? Ayíka ā híīī nū ɔ̄ ŋ́. Á lɛ ɔnyā ɛ́ɛ́ ŋ́ nɛɛ? Ayíka a híīī dɔɔ̄kā ɔnyā ká ā lɛ ŋ́.

²⁸Amáŋ ɔ́dāŋ ka a lɛ ɔnyā lɛ ɛ́ɛ́ nɛ̄, á bīya íne dúú ɛ́ɛ́ ŋ́. Ɔ́dāŋ ka ɔ̄cɛnyā nōó lɛ ɔbá jééjēē ɛ́ɛ́ ŋ́ lɛ ɔbá lɛ, ó bīya íne kú Ɔwɔicō ŋ́. Amáŋ ācɛ o lɛ ɔbá ā, lɛ unwalu alɛwa, ohígbū ɔ́ɔmā n gē lɛ aá tū ŋmá unwalu nɛ̄ ācɛ nēe lɛ ɔnyā amáŋ nɛ̄ ācɛ nēe lɛ ɔbá gē lɛ ā.

²⁹N gē da aá ɛ̄nyā, ayínɛ́ um, ohígbū ka eko ámōōmɛ ā ī wā fíyaa. Ohígbū ɔ́ɔmā, ācɛ nēe lɛ ɔbá ámāŋ ka ɔnyā, kéē bá bɛ̄ɛka ɔdā nēé lɛ ɔnyā ámāŋ ka ɔbá ŋ́ mā ā.

³⁰Ācɛ nēe gē jikwū ā kéē ya bɛ̄ɛka ɔdā nɛ̄ ɔtū í wú uwā ŋ́ mā. Ācɛ nēe gē yɛhɛ ā kéē yá bɛ̄ɛka ɔdā nɛ̄ ɔtū í he uwá ŋ́ mā ā. Ācɛ nēe gē lá ɔlá ā kéē yá bɛ̄ɛka ɔdā nēé lɛ ɔdā nēé lá ā ŋ́ mā ā.

³¹Ācɛ nēe gē bī aɔ́dā kú ɛcɛ nya í le yá odée ā, kéē bá bɛ̄ɛka ɔ́da nɛ̄ ɔtū kú uwā í tá ɔ̄ ŋ́ mā. Ohígbū ka ɛcɛ nyā ɛ́gɛ́nɛ̄ ó lɛ nyā géē mɛ eko kpiíí nōo ī wā ā.

³²Ń tínē ká aá lɛ ɔdā dóódu tá ɔtū kóō junwulu lɛ aá ŋ́. Ɔ̄cɛnyīlɔ nōó lɛ ɔnyā ŋ́ gē lɛ ɔtū kú nū tá úklɔ́ kú Ɔwɔicō ohígbū koó dɔɔ̄kā ō yá kú ɔtū kóō he Ɔwɔicō.

³³Amáŋ ɔ̄cɛnyīlɔ nōo lɛ ɔnyā gē lɛ ɔtū kú nū tá aɔ́dā kú ɛcɛ nyā, ohígbū koó dɔɔ̄kā ō yá kú ɔtū kóō he ɔnyā nū.

³⁴Anɔ́ɔ ɔtū kú nū le kɔ̄ ɛga ɛpa á. Ɔ̄cɛnyā nōó lɛ ɔbá ŋ́ ámāŋ ka ɔ̄cɛnyā nōó jé ɔ̄cɛnyīlɔ jééjēē ɛ́ɛ́ ŋ́ gē lɛ ɔtū kú nū tá úklɔ́ kú Óndú ohígbū koó dɔɔ̄kā ō kwú iyī nū ú lɛ Ɔwɔicō, tu ɔkpiyē mɛ́mla alelékwū kú nū. Amáŋ ɔ̄cɛnyā nōo lɛ ɔbá gē lɛ ɔtū kú nū tá aɔ́dā kú ɛcɛ, ohígbū koó dɔɔ̄kā ō yá ɔdā nōo í he ɔbá nū ɔtū.

³⁵N yɔ̄ ī ka ɛ̄nyā ohígbū ka n tíne ō tá aá abɔ̄. Ń yɔ̄ gē ŋmá ɔwɛ tū aá ŋ́. Ikɔkɔ ɔ́ɔmā n tíne ká aá yá ɔdā olɔhi mɛ́mla ɔdā okpaakpa, cɛ́ɛ́ ká aá kwú iyī aá ú lɛ úklɔ́ kú Óndú ā dúúdú kú ɔdā dúú kóō hile ŋ́.

³⁶Ohígbū ɛlā kú ācɛ nēe lɛ iyī uwa kwelūbi nēe miya ká aá gáā lɛ iyī aá ŋ́ mā ā. Ɔ́dāŋ ka ɔ̄cɛnyīlɔ ā le má ka anúɔ í yá ucē olɔhi lɛyíkwu ɔ̄cɛnya ā ŋ́, ɔ́dāŋ koó má ka unwū ɔnyā ō lɛ le lɔfú tū anúɔ iye, nōo gbɛlá ka aá lɛ iyī aá lɛ nɛɛ, ayíka é lɛ iyī uwā lɛ, ɛ́gɛ́nɛ̄ ó tíne ō yá ā. Ínoōbīya dúú í yɔ̄ ipú ɔ́ɔmā ŋ́.

³⁷Amáŋ ɔ́dāŋ ka ɔ̄cɛnyīlɔ lɛ ɔtū kú nū yá ékpó ka anúɔ í gáā lɛ ɔnyā ŋ́, nɛ ɔ̄cɛ dúú í kē kwu ɔ́ bá ɔ̄ ŋ́, nōó kē cē únwū kú nū tū glá, ayíka ɔdā olɔhi nōo yá ka anúɔ í lɛ ɔ̄cɛnya ā ŋ́ má.

³⁸Ohígbū ɔ́ɔmā ɔ̄cɛnyīlɔ nōo lɛ ɔnya ā yá lɔhi, amáŋ ɔ̄cɛ ɛ̄nɛ̄ ó lɛ ɔnyā ŋ́ mā yá lɔhi fíyɛ́.

³⁹Ɔnyā olɛ ɔbá í lɛ iyī nū ŋ́ ɔdā nōo yá ɛ́ɛ́ nɛ̄ ɔbá nū yēeyī ā. Amáŋ ɔ́dāŋ nɛ̄ ɔbá nū gekwú, ó le hɛ́tá kóō lɛ ɔ̄cɛnyīlɔ dúú nōo he ɔ́ ɔtū ā. Amáŋ ɔ̄cɛnyīlɔ nōó ī lɛ ā kóō wɛ ɔ̄cɛ kú Ohɔ́nyɛtá ā.

⁴⁰Ó géē lɔhi ɔ́ fíyɛ́, ɔ́dāŋ koó klá ɛ́gɛ́nɛ̄ ó lɛ nyā ā. Ɔ́ɔmā wɛ ɛlā kú ɔtū kú um. N kē gbɛlá ka n lɛ Alelékwū kú Ɔwɔicō dúú.