Read idoma 1 ĀCƐ UKƆ́RĪNTI 8 Bible Online

1 ĀCƐ UKƆ́RĪNTI 8 - idoma bible

1 ĀCƐ UKƆ́RĪNTI 8

¹Abālɔbányā, n tíne ō tóóhi ɔdā nɛ̄ aá tá tū ipú ɔkpá lɛyíkwu ɔdōlé nēé je lɛ ɛcí ā. Ó wɛ ɔkwɛ̄yi gbóó, kahíníī, “Odúúdu alɔ jɔ́ɔda,” ɛ́gɛ́nɛ̄ é ka lɛ ā. Ɛdɔ kú ɔdā nɛ̄ ācɛ jé ɔ́ɔmā, nááná gē cɛ̄ lɛ ācɛ gē nū pītii mla ɔbɔ́ɔ̄cɛ. Amáŋ ihɔtū gē cɛ̄ lɛ ācɛ jɛ̄ ipú alelékwū.

²Ɔ́dāŋ ka ɔ̄cɛ dúúmā gbɛlá ka anúɔ jé odée, ó jɔ́ɔdā ɛ́gɛ́nɛ̄ ó cíkā kóō jé ā ŋ́.

³Amáŋ Ɔwɔicō jé ɔ̄cɛ nōo yíihɔtū tá ɔ̄ ā.

⁴Abālɔbányā, ka n cīla ɔ̄kā lɛyíkwu ācɛ nēe gē lé ɔdōlé nēé le gwɛ́ɛya lɛ ɛcí gbɔbū ɛ́ɛ́ mā. Odúúdú alɔ jé ka ɛcí kwɛyí ɔdā nōó yēeyī ɔkwɔ̄ɔ̄kwɛ̄yi ŋ́. Alɔ jé ka Ɔwɔicō ékpónú yɔ̄ á.

⁵Ācɛ ōhī ka ka aɔ́wɔ alɛwa bá ɔkpáncō mɛ́mla ipú ɛcɛ. É kē cɛ̄ ka aɔ́wɔ alɛwa bá, ka aóndú alɛwa kē bá.

⁶Nááná alɔ nēe wɛ ācɛ kú Ohɔ́nyɛtá ā cɛ̄ ka Ɔwɔicō ékpó yɔ̄ á, nōo wɛ Ádā, nōo yá odúúdú aɔ́dā dóódu ā. Alɔ kē yēeyī lɛ ɔ́. Óndú ékpó kē yɔ̄ á, anú kē wɛ Ujísɔ̄si, Ohɔ́nyɛtá ā, anú yá odúúdú ɔdā dóódu á. O ŋ́má ɛgiyí nū ā nɛ̄ alɔ yēeyī á.

⁷Amáŋ ó wɛ odúúdú ācɛ jé ɛlā ɔkwɛ̄yi nyā ā ŋ́. Amáŋ ācɛ ōhī nɛ̄ iyī uwā lɛ ɛcí o pá jé jāā kwu abālɔbányā ā, ɔ́dāŋ kéē lɛ ɛdɔ ɔdōlé ɛ́gɔ́ɔmā lé, é gē gbɛlá kpɔ́ koó wɛ ɔdōlé nōo wɛ ákú ɛcí kpɔ́. Ɔtū kú uwā í lɔfú ŋ́ cɛ́ɛ́ eko nēé lɛ ɛbɛ́ nēé le ŋmó lɛ ɛcí lé nɛɛ, é gē gbɛlá ka aá gbɔɔ́ ō yá ucē bɛ̄ɛka ācɛ opɛ̄cí ā ɛɛ́.

⁸Ɔdōlé o yɔ̄ í lé í je alɔ pīya ācɛ olɔhi fíyɛ́ iyɔ̄bū Ɔwɔicō ŋ́, ɔ́dāŋ ka alɔ í lé ŋ́, ɔ́ɔmā í tá alɔ gɛcɛ ŋmá ɛgiyí Ɔwɔicō ŋ́. Ɛma kú alɔ mɛ́mla Ɔwɔicō í kē lɔhi fíyɛ́ ɔ́dāŋ nɛ̄ alɔ le lé ŋ́.

⁹Amáŋ aá leyī kwɛcɛ, cɛ́ɛ́ kú abɔ̄ a lɛ iyī aá, gē yá ɔdā dúú nōo he aá ɔtū ā, ɔ́ɔmā kóō yá kú ācɛ nɛ̄ ɔtū kú uwā í lɔfú ipú ɔtū nēé kpóce Ɔwɔicō ŋ́ mā kéē gwōtū ínoōbīya ŋ́.

¹⁰Ɔ̄cɛ í jé ŋ́ nɛ̄ ɔ̄cɛ nɛ̄ ɔtū kú nū í lɔfú ipú ɛlā nyā ŋ́ mā, lɛ awɔ nōo ka anúɔ je odée ā má yɔ̄ gē lé ɛbɛ́ ɛcí ipú inu ɛcí. Ɛ̄nyā í gáā lɔfú tū ɔ̄ iyē kóō lé ɔdōlé icɛ̄bɔ̄ ŋ́ nɛɛ?

¹¹Cɛ́ɛ́ ɔyínɛ́ uwɔ nyā nɛ̄ ɔtū kú nū í lɔfú ŋ́ mā, nɛ̄ Ohɔ́nyɛtá ā kwú ohígbū nū ā, kwú yíífi ohígbū ɔdā nɛ̄ a jé ā.

¹²Ɔwɛ ɛ́gɛ́nyā, a gē bɔ̄bíipú lɛyíkwu ācɛ kú Ohɔ́nyɛ́tá ā ɔ́mpa awɔ, a klla gē yá ɔtū kú uwā nōó lɔfú ŋ́ mā ágbe. A kē yɔ̄ gē bīyíne lɛyíkwu Ohɔ́nyɛtá ā abɔ̄ a gē yá ɛ̄nyā ā.

¹³Ohígbū ɔ́ɔmā, ɔ́dāŋ ka ɔdōlé í yá kú ɔyínɛ um kóō bīyíne, ń gáā lé ɛbɛ́ gbóógbóō gɛ ŋ́, o yá ɛ́ɛ́ ká ɔyínɛ um kóō híīī gwōtū ipú ínoōbīya ŋ́.