Read idoma 1 ĀCƐ UKƆ́RĪNTI 9 Bible Online

1 ĀCƐ UKƆ́RĪNTI 9 - idoma bible

1 ĀCƐ UKƆ́RĪNTI 9

¹Ń wɛ abɔ̄ nōo lɛ iyī um ŋ́ nɛɛ? Ń wɛ ɔ̄cotɛ̄hɔ̄ ŋ́ nɛɛ? Ń le Ujísɔ̄si, Óndú ālɔ má ɛ́ɛ́ ŋ́ nɛɛɛ? Aá wɛ ācɛ kú Óndú ā ícɛ oŋmá lɛ úklɔ́ abɔ̄ kú um.

²Ɔ́dāŋ ka ācɛ ɔhá í kōō cɛ̄ ka n wɛ ɔ̄cotɛ̄hɔ̄ ŋ́, o lɛ áafú ŋ́, n wɛ ɔ̄cotɛ̄hɔ̄ ɛgiyí aá. Ohígbū ka aá nēe le pīya ācɛ kú Óndú ā wɛ ijáalí ka n wɛ ɔ̄cotɛ̄hɔ̄ ɔkwɔ̄ɔ̄kwɛyi.

³Ɛ̄nyā wɛ ɔwɛ nɛ̄ n gē kɔkɔ kú iyī um eko nɛ̄ ācɛ í ŋmó um okónu á.

⁴N cíkā ō mīyɛ ɔdōlé mɛ́mla ɔdōgwá ohígbū úklɔ́ kú um.

⁵N cíkā ō je ɔnyā nɛ̄ ō wɛ ɔ̄cɛ kú Ohɔ́nyɛtá ā mla iyī um ipú iyāwu kú um, ɛ́gɛ́nɛ̄ ācotɛ̄hɔ̄ ohile mɛ́mla ayínɛ kú Óndú ā mɛ́mla Upita gē yá ā.

⁶Ubánābasi mɛ́mla ami wɛ ācotɛ̄hɔ̄ nēe cíkā ō yúklɔ́ kú abɔ̄yī uwā kéē le lá ɔdōlé lé ā nɛɛ?

⁷Ícɔ́ɔ́ja nyá yɔ̄ gē yúklɔ́ klla gē gbā ulé lɛ iyī nū ā? Ɔgɛ́ɛji nyá í gē lé īkpɔ̄cí ŋmá ɛhɔ̄ kú ufáyin kú nū ŋ́ mā? Ogbāálá nyá í gē gwá enyāmɛ̄ kú aálá kú nū ŋ́ mā?

⁸Ń gáā lɔtūce ɛ́gɛ́nɛ̄ ācɛ gē gbɛlá ā ŋ́, ohígbū ka íne kú Ɔwɔicō ka ɔdā ékpó ɔ́ɔmā dúú.

⁹Alɔ jé ŋmá íne kú Umósīsi kahíníī, “Ā híīī gbō ɛna okónu eko nōó yɔ̄ ī yɛ ɛyí ikpɔ̄dɛ̄hɔ̄ kóō wú ɔ̄ ŋ́.” Abālɔbányā, ɛlā kú ɔbá ɛna kwú Ɔwɔicō ɔtū á nɛɛ?

¹⁰Ó wɛ alɔ nɛ̄ Ɔwɔicō bī ɔtū ɛ́ɛ nōó kɛlā ɔ́ɔmā ŋ́ nɛɛ? Īī gbóó, é tá ɔ́ɔmā ohígbū alɔ. Ācɛ nēe gē hɛ́hɔ̄ mɛ́mla ācɛ nēe gē cē í wú īkpɔ̄dɛ̄hɔ̄ ā, cíkā ō yúklɔ́ kú uwā yɔ̄ gē leyīce ka aá lɔfú lɛ ukpɛ̄ kú ɔdɛ̄hɔ̄ ā.

¹¹Eko nɛ̄ alɔ tɔ́ɔ́na kú ɔ̄kōolɔhi lɛ aá ā, alɔ yɔ̄ ī nyī ikpɔ̄dā kú alelékwū tū ipú aá ɛ́gɛ́nɛ̄ ɔ̄cɛ í kɛla ā. Ó wɛ ɔdā onwuné íbí ɔ́dāŋ ka alɔ cɛgbá ɔdā kú eyī cāā áncā ŋmá ɛgiyí aá nɛɛ?

¹²Ācɛ ɔhá yɔ̄ ī dɔɔ̄kā aɔ́dā ɛ́gɛ́nyā ŋmá ɛgiyí aá. Alɔ ā kōō lɛ íkwu fíyɛ́ kú alɔ yá ɛ́gɔ́ɔmā. Amáŋ ń kē bī íkwu nyā le yúklɔ́ ŋ́. Ikɔkɔ ó yá ɛ́gɔ́ɔmā alɔ lɛ ɔtū kwu ōwē dóódu, o yá ɛ́ɛ́ kú ɔ̄kōolɔhi lɛyíkwu Ohɔ́nyɛtá ā ā kóō híīī le ɔdā nōo ī ŋmɔ́ɔwɛ tū ɔ̄ ŋ́.

¹³Aá jé kpɔ́cíi ka ācɛnyīlɔ nēe gē yúklɔ́ ipú agbla nɛ̄hi ā gē lɛ ɔdōlé kú uwā ŋmá abɔ́ɔ. Ācɛ nēe gē gwɛ́ɛya ɛyí ede ā gē lɛ ukpɛ̄ kú uwā ŋmá ɔdā nēé bī wā í le gwɛ́ɛya ā.

¹⁴Ɔwɛ ékpó ɔ́ɔmā, Óndú ā lɛ ɔ́da je ka, ācɛ nēe gē tɔ́ɔna kú ɔ̄kōolɔhi ā cíkā ō mīyɛ ulé kú uwā ŋmá abɔ́ɔ.

¹⁵Amáŋ ń bī odúú kú íkwu nyā yúklɔ́ ŋ́. Ń kē yɔ̄ ī tɔ́kpá nyā cɛ́ɛ́ kú n mīyɛ ukpɛ̄ ā lɛ iyī um ŋ́. Ikɔkɔ ɔ́ɔmā, n̄ gekwú gbɔbū! N gáā cɛ̄ lɛ ɔ̄cɛ dúú ci um íkwu ō bī iyī um gwō ŋ́.

¹⁶Ń lɛ íkwu kú n gwō ohígbū ka n gē tɔ́ɔna kú ɔ̄kōolɔhi ā ŋ́. É kōō pi um bá ɔ̄ kú n̄ yúklɔ́ ɔ́ɔmā. Ó géē bɔ̄bí gā um nɛ̄ɛ̄nɛ̄hi ɔ́dāŋ ka n tá ka ń tɔ́ɔna kú ɔ̄kōōlɔhi ā ŋ́.

¹⁷Ɔ́dāŋ ka n yúklɔ́ kú um ŋmá lɛ ɔdā nɛ̄ n je abɔ̄yī um, ó lɛ ā n cíkā ō leyīce ulé nēé í gbā gā um. Amáŋ n gē yúklɔ́ ohígbū kéē pī um bá ɔ̄. Ohígbū ka Ɔwɔicō abɔ̄yīnū je úklɔ́ nyā tū um abɔ̄ á.

¹⁸Ɔdí wɛ ulé kú um mɛ́ɛ́ ā? Ó wɛ ɛga nēé je gā um ká n̄ tɔ́ɔna kú ɔ̄kōōlɔhi ā lɛ ācɛ alahá ā. Abɔ̄ n yɔ̄ gē yá ɛ̄nyā ā, ń yɔ̄ gē dɔɔ̄kā odúúdú ukpɛ̄ kú um nɛ̄ n cíkā ō lɛ ohígbū ka n wɛ ɔ̄cotɔ́ɔna kú ɔ̄kōolɔhi ā ŋ́.

¹⁹Ɛ̄nyā cābɔ̄ ka n lɛ iyi um, ɔ̄cɛ dúú í wɛ ɔkpani um ŋ́. Amáŋ n je ɛjɛ̄ɛ̄jī ācɛ ka ɔkpani um, o yá ɛ́ɛ́ kú um lɛ ācɛ bī gé lɛ Ohɔ́nyɛtá ā.

²⁰Eko nɛ̄ n lɛ ɔna kú ɔ̄kōōlɔhi ā tá lɛ ācɛ nēe gē lɛ íne kú Umósīsi ā tū ā, n gē yɔ̄ bɛ̄ɛka n gē lɛ íne ā tū dúú āa nááná nɛ̄ n lɛyítáajɛ lɛ íne ā ŋ́ mā. N yá ɛ̄nyā o yá ɛ́ɛ́ kú n lɛ ācɛ nēe gē lɛyítáajɛ lɛ íne ā bī gé lɛ Ohɔ́nyɛtá ā.

²¹Ɔwɛ ékpó ɔ́ɔmā, eko nɛ̄ n yɔ̄ ī yúklɔ́ mla ācɛ nēé gē lɛ íne tū ŋ́ mā, n gē cēyītīkwū ká n̄ lɛ íne kú ācɛ Ujíyu tū ŋ́. N gē yɔ̄ bɛ̄ɛka ācɛ nēé gē lɛ íne tū ŋ́ mā, o yá ɛ́ɛ́ ká n lɛ uwá bī gé lɛ Ohɔ́nyɛtá ā. N gē lɛ íne kú Ɔwɔicō tū ɔkwɔ̄ɔ̄kwɛ̄yi ohígbū ka n yɔ̄ gē yá ɛ́gɛ́nɛ̄ íne kú Ohɔ́nyɛtá ā ka lɛ ā ā.

²²Ɛgiyí ācɛ nɛ̄ ɔtōōce kú uwā í lɔfú ŋ́ mā, n le yá bɛ̄ɛka ɔdā nɛ̄ ɔtōōce kú um í lɔfú ŋ́ mā, o yá ɛ́ɛ́ kú n lɛ uwá bī gé lɛ Ohɔ́nyɛtá ā. Ohígbū ɔ́ɔmā n gē yá bɛ̄ɛka ɛdɔ kú ācɛ dóódu, o yá ɛ́ɛ́ ká n̄ lɛ ācɛ ōhī kú uwá nyatá bū ɔwɛ dúúmā nōo tɔ́ɔtɛ́ ā.

²³N yá odúúdú ɛ̄nyā o yá ɛ́ɛ́ kú ɔ̄kōōlɔhi ā kóō le nyīla ga ɛga dóódu, cɛ́ɛ́ kú n̄ mīyɛ ɔhā kú nū.

²⁴Ɔkwɔ̄ɔ̄kwɛ̄yi aá jé ka ācɛ alɛwa gē kweyī kú inya ō kwu á, amáŋ ɔ̄cɛ ékpónú ōfōōfūnū gē yálé á. Aá kwinya, ɔwɛ nɛ̄ aá lɔfú yálé glá ā.

²⁵Ɔ̄cɛ dúúmā nōo tíne ō kweyī kú ɔdā dóódu cíkā o lɛ iyī nu tútū táajɛ o yá ɛ́ɛ́ kóō géē mīyɛ ɔfla kú oyálé nōó gē lɛ́ɛcɛ ŋ́. Amáŋ alɔ gē yúklɔ́ ohígbū ɔfla nōo gē lɛ́ɛcɛ.

²⁶Ɔ́ɔmā yá ɛ́ɛ́, nɛ̄ n gē kwinya kpaakpa ga ɛga o ŋmɛyí kú ɔgbɔ inya āá. Ɔ́ɔmā kē yá ɛ́ɛ́ nɛ̄ n lɛbɛ̄ɛka ɔ̄cotákwū nōo gē lɛ akwū tū ɔ̄cɛ eko dúúmā nɛ̄ n tákwū á.

²⁷Lɛbɛ̄ɛka ɔ̄cotákwū ā, n gē tū iyē kú um akwū klla gē kwu ɔkpíyē kú um tū kóō yá ɔdā nɛ̄ n tíne ā. Ó lɛ ā ŋ́ nɛɛ, ufi í yá um, ohígbū nɛ̄ n le ɛlā Ɔwɔicō ka lɛ ācɛ ɔhá kwɛyí nēé géē tá um ka ń yá jīla ŋ́.