Read idoma 2 ĀCƐ UKƆ́RĪNTI 1 Bible Online

2 ĀCƐ UKƆ́RĪNTI 1 - idoma bible

2 ĀCƐ UKƆ́RĪNTI 1

¹Ami Upɔ́lu, ɔ̄cotɛ̄hɔ̄ nɛ̄ Ohɔ́nyɛtá Ujísɔ̄si tɛ̄hɔ̄ gɛcɛ ohígbū ɛ́gɛ́nɛ̄ Ɔwɔicō miya ɔ̄ lɛ ā. Ami mɛ́mla ɔyínɛ́ alɔ, Utímōti gē tɔ́kpá nyā gé lɛ icɔ́ɔci kú Ɔwɔicō nōo bá ipú igelī kú Ukrɔ́rīnti á. Mɛ́mla odúúdú ācɛ kú Ɔwɔicō ɔhá nēe bá odúúdú aígelī kú Akáya.

²Alɔ gē gbɔ̄ɔkɔ kú Ɔwɔicō Ádā alɔ mɛ́mla Óndú Ujísɔ̄si, Ohɔ́nyɛtá ā kéē je ɛhi kú eyīnyinyi kú nū lɛ aá, klla yá kú aá bá ɛbɔ́.

³Alɔ tá Ɔwɔicō ahínyá, anú nōo wɛ Ɔwɔicō mɛ́mla Ádā kú Óndú alɔ, Ujísɔ̄si Ohɔ́nyɛtá ā. Ó kē wɛ Ádā nōo ī ményinyi ɔ̄cɛ, nōo ī tú ɔ̄cɛ ɔtūlé ojigógó.

⁴Ó gē tú alɔ ɔtūlé ipú odúúdú unwalu kú alɔ, cɛ́ɛ́ alɔ lɔfú bī ɛdɔ kú ɔtū otúlé ɔ́ɔmā le tú ācɛ ɔhá nēe bá ipú ɛdɔ kú unwalu dóódu ā ɔtūlé.

⁵Ɛgɛ́nɛ̄ Ohɔ́nyɛtá móōwē ā, nɛ̄ alɔ abɔ̄yī alɔ móōwē á, ó lɛ ā, abɔ̄ Ɔwɔicō tú Ohɔ́nyɛtá ɔtūlé ā, ɛ́gɔ́ɔmā nōó tú alɔ ɔtūlé ohígbū Ohɔ́nyɛtá dúú á.

⁶Eko dúúmā nɛ̄ alɔ móōwē, ohígbū ō tú aá ɔtūlé, klla nyā aá tá nɛ. Eko dúúmā nɛ̄ Ɔwɔicō lɛ alɔ ɔtú túlé, ó gē tú aá ɔtūlé ɔwɛ ékpó ɔ́ɔmā dúú, ɛ̄nyā gē yá ká aá lɔtūlé abɔ̄ aá bá gē má ɛdɔ ōwē ékpó nɛ̄ alɔ má ā.

⁷Alɔ lɔtūce aá nɛ̄ɛ̄nɛ̄hi, alɔ jé ka ɛ́gɛ́nɛ̄ aá má ɛdɔ ōwē ékpó nɛ̄ alɔ má ā, Ɔwɔicō kē í tú aá ɔtūlé ɛ́gɛ́nɛ̄ ó tú alɔ ɔtūlé ā dúú.

⁸Ayínɛ́ alɔ nɔ̄nyā mɛ́mla ayínɛ́ alɔ nɔ̄nyīlɔ, alɔ tíne ō tá aá ɛlá kwu ōwē nɛ̄hi nɛ̄ alɔ má ipú ɔlɛ́ okwúbɔ̄há kú Ésīya ā. Ōwē ā le nwuné nɛ̄ɛ̄nɛ̄hi nɛ̄ alɔ gbɛlá ka alɔ í kōō gáā yēeyī glá gɛ ŋ́.

⁹Ɔkwɔ̄ɔ̄kwɛ̄yi, alɔ lɛ ɔtū kú alɔ yéékpó ka alɔ gáā kwú ɛɛ́. Ɛ̄nyā yá lɛ ā cɛ́ɛ́ ka alɔ gbolóce iyī alɔ ŋ́, amáŋ ka alɔ gbolóce Ɔwɔicō nōo ī je ɔ̄cɛ nōo gekwú héyī ŋmá ɔlékwū ā.

¹⁰Ó nyā alɔ tá ŋmá ɔdā nōo lɔfú ŋmó alɔ glá eko nōo yɛ ā. Ó kē í nyā alɔ ta ɛ̄cɔ̄bū. Alɔ lɔtūce ɔ́ kóō géē yɔ̄ ī nyā alɔ tá,

¹¹ɛ́gɛ́nɛ̄ aá géē bá ī tá alɔ abɔ̄ ī gbɔ̄ɔkɔ lɛ Ɔwɔicō ohígbū alɔ ā. Ācɛ alɛwa gē gbɔ̄ɔkɔ lɛ Ɔwɔicō ohígbū alɔ, Ɔwɔicō géē po ɔkɔ nēé gbā ā cɛ́ɛ́ ó lɛ ɔhā hɛ́ ce alɔ. Cɛ́ɛ́ ācɛ alɛwa géē tá Ɔwɔicō ahínyá kú ɔhā nōo hɛ́ ce alɔ ā.

¹²Ɔdā ékpó nɛ̄ alɔ gē bī le gwō ā, nɛ̄ alɔ kē jé lɔɔlɔhi ā wɛ ka alɔ gē yá uce olɔhi, ofíyɛ́ dúú ipú ɛma kú alɔ mɛ́mla aá, oŋmá ɔtū oyēŋēē mɛ́mla ɔtū ékpó nōo wɛ ucē nɛ̄ Ɔwɔicō ī dɔɔ̄kā ā. Ó wɛ íjééyī kú ɔ̄cɛ ɔlamu í bī alɔ jɔ́ɔwɛ ā ŋ́, amáŋ o ŋmá lɛ ɔfú kú eyīnyinyi kú Ɔwɔicō.

¹³Ɔkpá nɛ̄ alɔ gē tá fu aá ā wɛ ɛ̄nɛ̄ aá géē lɔfú jé klla í jɛ́ɛyí nū glá. Amáŋ ɔkwɔɔkwu nyā aá jɛ́ɛyí ucē kú alɔ dúúdú.

¹⁴Cɛ́ɛ́ eko nɛ̄ Óndú alɔ Ujísɔ̄si, Ohɔ́nyɛtá ā í kwúcē wā gaá kɛpɔ̄ tū ācɛ ā, aá géē bī alɔ gwō ɛ́gɛ́nɛ̄ alɔ kē ī bī aá gwō dúú ā.

¹⁵Abɔ̄ n lɛ ɛ̄nyā jé kpɔcíí ā, n le miya ka n wā í lɛ aá má gbɔbū, cɛ́ɛ́ ká aá lɔfú mīyɛ ɔhā ɔ́klɛ́ɛpa.

¹⁶N yɔ̄ í miya ká n̄ le yɛce aá abɔ̄ n yɔ̄ ī ga Umasɛdónīya ā, cɛ́ɛ́ n klla í yɛce aá kpɔ́ eko nɛ̄ n yɔ̄ ī pīyɛyí ŋmá abɔ́ɔ ā. Eko ɔ́ɔmā aá lɔfú tá um abɔ̄ ipú iyāwu kú um ga Ujudíya.

¹⁷Eko nɛ̄ n yɔ̄ gē miya ɛ̄nyā ā, aá gbɛlá ka ń lɛ ɔtū kú um yéékpó glá ŋ́ nɛɛ? Kɛ̄ɛ ka n lɛbɛ̄ɛka ācɛ ɛcɛ nēe lɔfú ka īī mɛ́mla ehée igbeékpónú glá ā?

¹⁸Ɔwɔicō gē kɛlā ɔkwɛ̄yi eko dóódu. Ɔwɛ ékpó ɔ́ɔmā ɛlā nɛ̄ alɔ ka lɛ aá ā í wɛ, “Īī mɛ́mla ehée ŋ́.”

¹⁹Ami mɛ́mla Usáyílāsi[1] mɛ́mla Utímōti kɛlā tɛ́ɛcɛ lɛyíkwu Ujísɔ̄si Ohɔ́nyɛtá, Ɔyínɔ̄nyīlɔ kú Ɔwɔicō. Olɛhɔ̄ ɔ́ɔmā í kē pīyabɔ̄ ŋmá īī ga ehée ŋ́. Ó wɛ ɛ́gɛ́nɛ̄ aá leyīce ā ŋ́, ó wɛ īī kú Ɔwɔicō eko dóódu.

²⁰Ohígbū ka anú ā wɛ ɔ̄cɛ nōo wɛ “Ohi” kú odúúdú okónu nɛ̄ Ɔwɔicō ce á. Ɛ̄nyā yá ɛ́ɛ́ nōo ŋmá iyē kú Ujísɔ̄si, Ohɔ́nyɛtá ā, alɔ gē ka ka “Aamí” ká alɔ je ojīlīmā ce Ɔwɔicō á.

²¹Ɔwɔicō le yá kú alɔ le jé ka alɔ wɛ ákú Ohɔ́nyɛtá. Anú klla fu alɔ tá ɛyɛ́ɛyɛ́yí á.

²²Ó klla kwú Alelékwū Ihɔ ú tá ipú ɔtū kú alɔ kóō wɛ ɔdā aflɛ́yí nōó le kwajɛ ŋmá ipú aɔ́dā ohile nōo í kpó lɛ alɔ ā.

²³N hī Ɔwɔicō, nōo jé ɔtū kú um ā ijáalí kú um, ka ń tíne kú aá pó ɛlā iwɔ́tū ŋmá ɛgiyí um gɛ ŋ́ mā yá ɛ́ɛ́ nɛ̄ ń wā Ukɔ́rīnti ɛgiyí aá gɛ ŋ́ má.

²⁴Ɔdā nōo kwu alɔ ɔtū ā í wɛ ka alɔ lɛ aá kwú tabɔ̄ cɛ́ɛ́ kú alɔ da aá ɔdā nɛ̄ aá cíkā o mīyɛ cɛ̄ ā ŋ́, ohígbū ka aá háyi lɔɔlɔhi ipú ɛlā nɛ̄ aá mīyɛ cɛ̄ ā lɔɔlɔhi. Ikɔkɔ ɔ́ɔmā alɔ tíne ō yúklɔ́ mla aá cɛ́ɛ́ kú ɔtū kóō he aá nwuné fíyɛ́.