Read idoma 2 ĀCƐ UKƆ́RĪNTI 10 Bible Online

2 ĀCƐ UKƆ́RĪNTI 10 - idoma bible

2 ĀCƐ UKƆ́RĪNTI 10

¹Ami, Upɔ́lu, abālɔbányā, gbɔ̄ɔkɔ lɛ aá. Ācɛ ka ka eko nɛ̄ n yɔ̄ mla aá n gē yúwēyī, amáŋ ka n gē lɔtū eko nɛ̄ n yɔ̄ ligbó. N dɔɔ̄kā ō gbonɛnɛ bɛ̄ɛka Ohɔ́nyɛtá ā.

²Ohígbū ɔ́ɔmā n gē gbɔ̄ɔkɔ lɛ aá kú aá yá kú n̄ gwɔ̄tū eko nɛ̄ n gā abɔ́ɔ ŋ́! N jé ka n lɔfú gwɔ̄tū lɛ ācɛ nēe bá abɔ́ɔ nɛ̄ gē ka ka alɔ ī yá ɔdée bɛ̄ɛka ācɛ nēé jé Ohɔ́nyɛtá ŋ́ mā.

³Ó wɛ ɔkwɛ̄yi ka alɔ lā ipú ɛcɛ kú ācɛ nēé jé Ohɔ́nyɛtá ŋ́ mā, amáŋ alɔ í bī ɔtū kú ācɛ kú ɛcɛ nēé jé Ohɔ́nyɛtá ŋ́ mā le kpɛ́fú ŋ́.

⁴Iyɔ́fú nɛ̄ alɔ ī bī le kpɛ́fú kú alɔ ā í wɛ ɛdɔ kú iyɔ́fú kú ācɛ nēé je Ohɔ́nyɛtá ŋ́ mā ŋ́, amáŋ é wɛ iyɔ́fú olɔfú nɛ̄hi kú Ɔwɔicō, nɛ̄ alɔ gē bī le yá olɛɛlā lé ā. Alɔ gē bī iyɔ́fú nyā le ca áafú ɛ̄kɛ̄mgbɛ̄ dóódu tāajɛ.

⁵Alɔ gē ca odúúdú áafú nɛ̄ ācɛ o ka ɔbɔ́ɔ̄cɛ í tá nōó cɛ̄ lɛ ācɛ jé Ɔwɔicō ŋ́ mā tāajɛ. Alɔ gē bī iyɔ́fú nyā gē le ca ɛlóōgbo dóódu nōo gē bɛyíkwu ɛlā kú Ɔwɔicō ā tāajɛ, cɛ́ɛ́ kú alɔ nwū uwā kéē lɛyítáajɛ lɛ Ohɔ́nyɛtá.

⁶Eko nɛ̄ aá le mafú lɛ alɔ ka aá gbɔɔ́ ō lɛyítáajɛ lɛ alɔ ɛɛ́, alɔ le tútū ō yá ācɛ nēé lɛyítáajɛ ŋ́ mā italā.

⁷Unwalu nɛ̄ aá lɛ ā wɛ ka aá gē má eyīyɛɛcɛɛcɛ kú odée. Ɔ́dāŋ nɛ̄ ɔ̄cɛ dóódu kú ipú aá abɔ́ɔ gbɛlá ka anúɔ wɛ ákú Ohɔ́nyɛtá á. Ɔ̄cɛ ɔ́ɔmā cíkā ō gbɛlá igbō ɔ́mpa kpɔ́, cɛ́ɛ́ ó géē jé ka alɔ kōō wɛ ákú Ohɔ́nyɛtá ɛ́gɛ́nɛ̄ ó wɛ ā dúú.

⁸Ohígbū ka, ɔ́dāŋ nɛ̄ n kōō bī íkwu nɛ̄ alɔ lɛ ā le gwō ligíí nááná, uwēyī í gáā yá um ŋ́. Óndú Ujísɔ̄si, Ohɔ́nyɛtá ā je íkwu ā lɛ alɔ lɛyíkwu aá. Ó wɛ ka alɔ bī ɔ̄ lɛ aá yíífi ŋ́, amáŋ o bī le ma aá gicō nɛ.

⁹Ń tíne kóō lɛbɛ̄ɛka n yɔ̄ ī bī ɔkpá le tū aá ufi ŋ́.

¹⁰Ohígbū ka ācɛ ōhī kú aá gē ka kahíníī, “Óó gē tá ɛlā olɔfú mla ɛlā o kwu ɔ̄cɛ ɔtū nyá tū ipú ɔkpá kú nū íbí. Amáŋ eko nɛ̄ anú abɔ̄yīnū yɔ̄ ɛgiyí alɔ nɛɛ, ó lɔfú iyē ō má eyī ŋ́. Ó klla jé o kɛlā olɔhi ŋ́.”

¹¹Ɔ̄cɛ ɛ́gɔ́ɔmā kóō jé ka eko nɛ̄ n yɔ̄ Ukɔ́rīnti abɔ́ɔ, ucē kú um géē wɛ ɛdɔ ékpó mla ɔdā nɛ̄ n gē tá ipú ɔkpá fu aá eko nɛ̄ n yɔ̄ mla aá ŋ́ mā.

¹²Īī gbóó, alɔ í bɔ́tū ka iyī alɔ tū ipú ācɛ ōhī nēe je iyī uwā gicō nɛ̄hi ā ŋ́, ámāŋ lɛ iyī alɔ gbla uwá ŋ́. Ɛ́gɛ́nɛ̄ é je iyī uwā lɛ̄ ā, nēé gē lɛ iyī gbla anú á. É lɛ ohílīpú ŋ́.

¹³Ákú alɔ ā, ó lɛ ɛjī nɛ̄ alɔ lɔfú gwō kwu. Alɔ gē gwō kwɛjī ɛgiyí úklɔ́ nɛ̄ Ɔwɔicō miya lɛ alɔ ā. Úklɔ́ nɛ̄ alɔ ī yá ipú aá ā wɛ dúú.

¹⁴Aá yɔ̄ ipú ɛga nōo wɛ ɛjī nɛ̄ Ɔwɔicō le tū alɔ abɔ̄ ā, ohígbū ɔ́ɔmā alɔ í yɛ gla ɛjī kú um eko nɛ̄ n nyɔ̄ ga Ukɔ́rīnti gaá tɔ́ɔna kú ɔ̄kōolɔhi kú Ohɔ́nyɛtá ā ŋ́.

¹⁵Ohígbū ɔ́ɔmā, alɔ í gē bī úklɔ́ nɛ̄ ācɛ ɔhá yá nōó yɔ̄ ipú ɛjī kú alɔ ŋ́ mā gwō ŋ́. Ikɔkɔ ɔ́ɔmā, alɔ leyīce ka ɔtū nɛ̄ aá le ce Óndú ā í nwuné, cɛ́ɛ́ alɔ lɔfú yúklɔ́ nɛ̄ɛ̄nɛ̄hi ɔtāhɛ̄ aá glá, alɔ gē yúklɔ́ eko dóódu ipú ɛjī nɛ̄ Ɔwɔicō tū lɛ alɔ ā.

¹⁶Ɔ́dāŋ nɛ̄ ɛ̄nyā le yá, alɔ lɔfú ga ajɛ éwɔhá iyɔ̄bū Ukɔ́rīnti gaá tɔ́ɔna kú ɔ̄kōōlɔhi ā abɔ́ɔ, cɛ́ɛ́ kú alɔ híīī bī úklɔ́ nɛ̄ ācɛ ɔhá yá ā gwō ŋ́.

¹⁷Amáŋ, ɛ́gɛ́nɛ̄ é ka ipú Ɔkpíihɔ ā, “Ɔ̄cɛ dúúmā nōo tíne ō gwō, kóō gwō kú ɔdā nɛ̄ Óndú ā yá ā.”

¹⁸Ɔwɔicō í gē mīyɛ ācɛ nēe gē cɛ̄tra iyī uwā ā ŋ́, ikɔkɔ ɔ́ɔmā ó gē cɛ̄tra ācɛ nōó mīyɛ ā.