Read idoma 2 ĀCƐ UKƆ́RĪNTI 4 Bible Online

2 ĀCƐ UKƆ́RĪNTI 4 - idoma bible

2 ĀCƐ UKƆ́RĪNTI 4

¹Ɔdā dúú í gáā yá kú alɔ pīya ɔtū kú alɔ eyī glá ŋ́, ohígbū ka alɔ jé ka ohígbū eyīnyinyi nɛ̄ Ɔwɔicō gē yá ā yá ɛ́ɛ́ nōó jé úklɔ́ o yá piíí nyā lɛ alɔ kú alɔ yá ā.

²Alɔ lɛ ucē otūwēyī nɛ̄ ɔ̄cɛ ī yá tayínū ā kpó bónū ɛɛ́, alɔ í kē yá kú alɔ plla ɔ̄cɛ dúúmā ŋ́, alɔ í kē pīya ɔ̄kōōlɔhi ā abɔ̄ ŋ́. Ɔwɔicō wɛ ijáalí kú alɔ ka alɔ gē kɛlā ɔkwɛ̄yi kú ɔ̄kōōlɔhi ā tɛ́ɛcɛ gēdēē. Abɔ̄ alɔ yɔ̄ gē yá ɛ̄nyā ā, alɔ leyīce ka ɛjɛ̄ɛ̄jī ācɛ géē bī ɔdā olɔhi ɔtū lɛyíkwu alɔ.

³Ákú ɛlā ɔkwɛ̄yi ā, ācɛ í jɛ́ɛyí kú olɛhɔ̄ nɛ̄ alɔ cɛ̄ tɛ́ɛcɛ ā ŋ́, amáŋ ígwu kú ācɛ nēe bá nyā wɛ ígwu kú ācɛ nēe bá gē yíífi ā nɛ.

⁴É cɛ̄lā kú ɔ̄kōōlɔhi ā ŋ́ ohígbū ka ebilíi, ɔwɔ obɔ̄bíipú kú ɛcɛ nyā lɛ uwá odo kpó gwū. É má ɔlá nōo ī fíyajɛ ce uwā eyī ā glá gɛ ŋ́. Ɛ̄nyā wɛ ofíyajɛ nōo wā ŋmá ɔ̄kōōlɔhi lɛyíkwu ɛgahi kú Ohɔ́nyɛtá nōo gbla Ɔwɔicō abɔ̄ dóódu ā.

⁵Alɔ í bī iyī alɔ le tɔ́ɔna ŋ́. Alɔ tɔ́ɔna ka Ujísɔ̄si wɛ Óndú ā, anɔ́ɔ alɔ abɔ̄yī alɔ wɛ ācotɛ̄hɔ̄ kú aá ohígbū Ujísɔ̄si á.

⁶Ɔwɔicō je ɔ́da eko nōo yɔ̄ gē yá ɛcɛ ā ka ɔlá ofíyajɛ kóō le bɛ̄cɛ ŋmá ipú ajodobū. Ɔwɔicō ékpó nyā yá kú ɔlá kú nū kóō fíyajɛ ipú ɔtū kú alɔ á. Ofíyajɛ nyā yá kú alɔ jé ɛgahi kú Ɔwɔicō nōo ī fíyajɛ ŋmá eyī kú Ohɔ́nyɛtá ā.

⁷Alɔ nēe lɛ agbénú kú Alelékwū nyā lɛbɛ̄ɛka ɛtɛ́ nēé ma ɔmɛ ā, o yá ɛ́ɛ́ kú ācɛ kéē je ka ɔfú nɛ̄ɛ̄nɛ̄hi ā wɛ ákú Ɔwɔicō, ó wɛ ákú alɔ ŋ́.

⁸Ācɛ je unwalu lɛ alɔ ŋmá áklō dóódu, amáŋ alɔ í kē cɔ̄nyā ŋ́, ɔda dóódu le yá alɔ jígbáá, amáŋ alɔ í kē je ɔtū tónū ŋ́.

⁹Alɔ lɛ aólɛlā alɛwa, amáŋ Ɔwɔicō í kē pīya igbīhi kwu alɔ ŋ́, eko nēé lɛ alɔ cē gwōnū ekoōhī, alɔ kē ī cāŋ́jɛ í gbɔɔ́ ō yɛ kpɔ́.

¹⁰Eko dóódu alɔ yɔ̄ ī kwú ɛdɔ̄ ikwú nɛ̄ Ujísɔ̄si kwú ipú iyē kú alɔ ŋmá lɛ ōwē nɛ̄ alɔ ī má ā. Alɔ ī yá ɛ̄nyā o yá ka alɔ kē lā ɛdɔ oyēeyī kú Ujísɔ̄si ā dúú.

¹¹Ipú oyēeyī kú alɔ ā, alɔ lɛyīce ikwu ojigógó ohígbū ka alɔ gē cɛ̄ Ujísɔ̄si ɛhɔ̄. Cɛ́ɛ́ kéē lɛ oyēeyī kú Ujísɔ̄si ma ipú iyē kú alɔ nōo yɔ̄ ī kwú ā.

¹²Ɛyí kú ɛ̄nyā wɛ ka alɔ lɛyí ce ikwū, amáŋ ɛ̄nyā le pīya oyēeyī opíyóó lɛ aá.

¹³É tá ɔ̄ tāajɛ ipú Ɔkpíihɔ ā kahíníī, “N kɛlā ohígbū ka n cɛ̄ ɛlā Ɔwɔicō.” Alɔ lɔtūce Ɔwɔicō ɔwɛ ékpó ɔ́ɔmā, anú yá nɛ̄ alɔ kē ī kɛlā ohígbū ka alɔ cɛ̄ ɛlɔ̄ɔwɔicō dúú á.

¹⁴Ohígbū ka alɔ jé ka Ɔwɔicō je Ujísɔ̄si héyī ŋmá ɔlékwū á. Alɔ kē jé kóō géē je alɔ héyī ŋmá ɔlékwū ɛ́gɛ́nɛ̄ o je Ujísɔ̄si héyī ŋmá ɔlékwū ā. Ó kē géē kpó alɔ mɛ́mla aá ga iyɔ̄bū Ujísɔ̄si.

¹⁵Ohígbū aá nēé yá odúúdú ɔdā nēe bá nyā á. Anɔ́ɔ abɔ̄ nɛ̄ Ɔwɔicō bī ɛhi kú eyīnyinyi kú nū lɛ ācɛ alɛwa fíyɛ́ nyatá ā, é géē tá Ɔwɔicō ahínyá klla í cɛ̄tra ɔ́.

¹⁶Ɔ́ɔmā yá ɛ́ɛ́ nɛ̄ alɔ í je ɔtū tónū ŋ́ má. Nááná nɛ̄ ɔkpíyē kú alɔ yɔ̄ ī wa ɛmɛɛma ā, amáŋ é kē yɔ̄ ī je alelékwū kú alɔ pīya ɛ̄yīpɛ̄ ɛ̄cī dóódu.

¹⁷Ōwē o ligii nɛ̄ alɔ ī má nyā nōo gáā gbojī ŋ́ mā, le nyɛ́ lɛ ɔdā nōo yɔ̄ ī wā ā. Ohígbū kéē géē bī ɔdā nɛ̄hi fíyɛ́ nōo í yɔ̄ piyóó gé lɛ alɔ, ɔ́ɔmā wɛ oyēeyī opiyóó mla Ɔwɔicō.

¹⁸Ohígbū ka alɔ í lɛ eyī kú alɔ kwu ɔdā nɛ̄ eyī gē má ā ŋ́, amáŋ alɔ gē kpó eyī kú alɔ kwu ɔdā nɛ̄ eyī í má glá ŋ́ mā ā. Ɔdā nɛ̄ eyī gē má glá ā í gē yɔ̄ piyóó ŋ́, amáŋ ɔdā nɛ̄ eyī í má glá ŋ́ mā gē yɔ̄ piyóó.