Read idoma 2 ĀCƐ UKƆ́RĪNTI 9 Bible Online

2 ĀCƐ UKƆ́RĪNTI 9 - idoma bible

2 ĀCƐ UKƆ́RĪNTI 9

¹Ó cɛgbá ɔkwɔ̄ɔ̄kwɛ̄yi ká n̄ tɔ́kpá gé lɛ aá lɛyíkwu ɔdā nēé yɔ̄ ī da gé lɛ ācɛ ɔlɛ́ Ɔwɔicō nēe bá Ujudíya ā.

²Ohígbū ka n jé ka aá cɛ̄ kú aá tábɔ̄, n kē lɛ aá bī gwō tá ācɛ o cɛ̄lā Ɔwɔicō kú Umasɛdónīya dúú ɛɛ́. N da uwá ka aá, ayínɛ́ kú Akáya húmáyī tútū kéē tábɔ̄ ŋmífī ɛyílánū. Ɔtūcaca kú aá tábɔ̄ kóō lɛ ɛyínɛ̄hi uwā ɔtū tū kwu.

³N yɔ̄ gē tū ayínɛ́ ɛtá ɛhɔ̄ fu aá, cɛ́ɛ́ kóō bī aá gwō kú um kóō le pīya ɔkwɛ̄yi. Ɛ́gɛ́nɛ̄ n yɔ̄ ī da ācɛ ɔlɛ́ Ɔwɔicō kú Umasɛdónīya, ká aá le tútū ā.

⁴Ohígbū ka ɔ́dāŋ nɛ̄ n gā abɔ̄ mla ācɛ ɔlɛ́ Ɔwɔicō ɔ́mpa nēe ŋmá Umasɛdónīya ā, ń tíne kéē wā í le jé ka ɔdā ɛhi kú aá í tútū ɛ́ɛ́ nɛɛ ŋ́. Ɔ́dāŋ ka ɛ̄nyā le yá lɛ ā, uwēyī géē kwú alɔ nɛ̄hi ohígbū ɔtū nɛ̄ alɔ kpóce aá ā. Ó lɛ ɛ̄nɛ̄ n géē ka uwēyī nōo géē kwú aá ā ŋ́.

⁵Anɔ́ɔ n gbɛlá koó cɛgbá kú alɔ lɛ ɔkɔ gbā lɛ ayínɛ́ nēe bā nyā kéē gā ɛgiyí aá cɛ́ɛ́ kú aá lɛ ɔdā ɛhi nɛ̄ aá cokónu ō je ā tútū báajɛ gbɔbū ká n̄ wā. Ɔwɛ ɛ́gɛ́nyā, ɔdā ɛhi ā géē le tútū báajɛ eko nɛ̄ n géē wā ā. Aá géē je ohígbū ka aá tíne ō je, ó híīī wɛ kéē pi aá bá ɔ̄ ŋ́.

⁶Aá blakwu ɛlā nyā, “Ɔglɛ́ɛjí nōo nyī ikpɔ́da téété ā, kē í cē ɔdɛ̄hɔ̄ téété. Ɔglɛ́ɛjí nōo kē ī fú tāajɛ nwuné ā kē ī cē ɔdɛ̄hɔ̄ nwuné nwuné.”

⁷Ɔnyɔ̄ɔnyɛ kóō je ɛ́gɛ́nɛ̄ ó miya ɔ́ ŋmá ɔtū kú nū lɛ ā. Kóō híīī je ɔ́ yɔ̄ gē híjémā ŋ́, ámāŋ bɛ̄ɛka ɔdā nēé yɔ̄ gē kwu ɔ́ bá ɔ̄ ā ŋ́. Ohígbū ka ɔ̄cɛ nōo gē je ɛhi mla éeyē ā, ī he Ɔwɔicō ɔtū á.

⁸Ɔwɔicō kē lɔfú je ɛhi lɛ aá fíyɛ́ ɛ́gɛ́nɛ̄ aá cɛgbá ā. Cɛ́ɛ́ abɔ̄ Ɔwɔicō yɔ̄ gē je aɔ́dā nēe ce aá ɛgbá ā lɛ aá ŋmá ɔwɛ dóódu ā, aá géē lɛ fíyɛ́ ɛ̄nɛ̄ aá cɛgbá ā, cɛ́ɛ́ kú aá géē je nwuné nwuné le tá úklɔ́ olɔhi dóódu abɔ̄ glá.

⁹Ɛ́gɛ́nɛ̄ Ɔpíihɔ ka ā, “Ó gē je ɛhi lɛ aógbɛhá nwuné nwuné. É géē blakwu ogbonɛnɛ kú nū ā eko dóódu.”

¹⁰Ɔwɔicō gē je ikpɔ̄dā lɛ ɔ̄cɛ kóō nyī á, anú klla ī je ɔdōlé lɛ ɔ́ kóō lé á. Ohígbū ɔ́ɔmā Ɔwɔicō géē kpó odúúdú ikpɔ̄dā nɛ̄ aá géē nyi glá ā lɛ aá. Ó kē í yá kú ɔdɛ̄hɔ̄ ā kóō jɛ̄. Cɛ́ɛ́ ó bī ɔwɛ ɛ́gɛ́nyā le yá kú ɛhi nɛ̄ aá je nwuné nwuné ā kóō lɛ ɔdɛ̄hɔ nɛ̄ɛ̄nɛ̄hi bī wɛ̄ɛcɛ

¹¹Ɔwɔicō géē yá kú aá lɛ agbénú nōo géē jɛ̄ aá, nɛ̄ aá kē géē yɔ̄ í je lɛ ācɛ eko dóódu. Cɛ́ɛ́ ācɛ alɛwa géē tá Ɔwɔicō ahínyá ohígbū ɛhi nēé mīyɛ ŋmá ɛgiyí alɔ ā.

¹²Ohígbū ka úklɔ́ nyā nɛ̄ aá yá ā, í yá ɛgbá kú ācɛ ɔlɛ́ Ɔwɔicō ofōōfú uwā ŋ́, ó géē cɛ̄ lɛ ācɛ gē bá ī tá Ɔwɔicō ahínyá.

¹³Ohígbū ka úklɔ́ nyā nɛ̄ aá ya ā géē cābɔ̄ ka aá lɛ alelékwū kú ācɛ ɔlɛ́ Ɔwɔicō, ācɛ kē géē cɛ̄tra Ɔwɔicō ohígbū ɔwɛ nɛ̄ aá ka tɛ́ɛcɛ klla lɛyítáajɛ lɛ ɔ̄kōokɔhi kú Ohɔ́nyɛtá ā. É klla géē cɛ̄tra Ɔwɔicō ohígbū ɔwɛ nɛ̄ aá kɔ̄ ɔdā nɛ̄ aá lɛ ā mla uwá mɛ́mla ācɛ ɔlɛ́ Ɔwɔicō ɔhá nwuné nwuné lɛ ā.

¹⁴É géē gbɔ̄ɔkɔ lɛ Ɔwɔicō ohígbū ihɔtū nɛ̄hi nōo lɛ a, ohígbū ɛhi kú eyīnyinyi nɛ̄ɛ̄nɛ̄hi kú Ɔwɔicō nōó mafú lɛ aá ā.

¹⁵Alɔ tá Ɔwɔicō ahínyá ohígbū ɛhi nɛ̄ okónu í ka ɔ́ glá ŋ́ nōó je lɛ alɔ ā.