Read idoma ĀCƐ UGALÉSĪYA 1 Bible Online

ĀCƐ UGALÉSĪYA 1 - idoma bible

ĀCƐ UGALÉSĪYA 1

¹Ami Upɔ́lu ɔ̄cotɛ̄hɔ̄ tɔ́kpá nyā ā. Igwú nēé hī um ka n̄ wɛ ɔ̄cocɛ̄hɔ̄ ā í ŋmá abɔ̄ ācɛ ŋ́, ɛ̄nɛ̄ ó ŋmá ɛgiyí ɔ̄cɛ ŋ́, amáŋ ó ŋmá ɛgiyí Ujísɔ̄si Ohɔ́nyɛtá mla Ɔwɔicō Ádā ā, nōo je ɔ́ héyī ŋmá ɔlékwū ā.

²Ami mɛ́mla ayínɛ́ dóódu nēe bá mla ami ā hokónu tū odúúdú icɔ́ɔci kú Ugalésīya.

³Ɔwɔicō Ádā ā mla Ujísɔ̄si Ohɔ́nyɛtá nōo wɛ Óndú alɔ ā, kéē ma ogbonɛnɛ nɛ̄hi kú uwā fú lɛ aá, kéē yá kú aá bá ɛbɔ́.

⁴Ohɔ́nyɛtá cɛ̄ kā anúɔ gekwú ohígbū íne nɛ̄ alɔ bīya ā, kóō lɛ alɔ hɛ́tá ŋmá eko obɔ̄bí nyā, ɛ́gɛ́nɛ̄ ɔdā nɛ̄ Ɔwɔicō nōo wɛ Ádā alɔ miya ɔ́ lɛ āa.

⁵Ocɛ̄tra kóō yɔ̄ lɛ Ɔwɔicō eko dóódu. Aamí.

⁶Ɔdā nɛ̄ aá yá ā le hɛ́ um idáagó! Ɛ́gɛ́nɛ̄ eko kpií nɛ̄ aá yɔ̄ ī kwu ŋmá ɛgiyí Ɔwɔicō nōo yíihɔtū tá aá klla ményinyi aá lɛ aá hīgwú cɛ́ɛ́ kú aá lɛ oyēeyī nɛ̄ ó ī mɛ ŋ́ mā kɔ̄ mla Ohɔ́nyɛtá á, nɛ̄ aa i ī nyɔ̄ ɛgiyí Ɔ̄kōōlɔhi ɔhá ā. [1]

⁷Ɔ̄kōōlɔhi ɔhá í yɔ̄ ŋ́, amáŋ ācɛ ōhī gē junwalu lɛ aá, kē klla ī tíne kéē lɛ aá eyī pīya ŋmá ɔkōōlɔhi kú Ohɔ́nyɛtá.

⁸Ɔ́dāŋ́ nɛ̄ ó kōō wɛ alɔ ámāŋ alelékwū-ōtɛ̄hɔ̄ ŋmá ɔkpáncō wā í lɛ ɔna kú ɔkōōlɔhi nɛ̄ ó wɛ ékpónú mla ɛ̄nɛ̄ alɔ ka lɛ aá ā ŋ́, ń ba Ɔwɔicō kóō lɛ ōwē yá ɔ̄.

⁹Ɛ́gɛ́nɛ̄ alɔ tɛtɛ le da aá gbɔbū ā, ɛ́gɔ́ɔmā nɛ̄ n klla ī da aá abālɔbányā kpɔ́ á, ɔ́dāŋ ka ɔ̄cɛ dúúmā lɛ ɔna kú ɔkōōlɔhi nɛ̄ ó wɛ ékpónú mla ɛ̄nɛ̄ aá mīyɛ cɛ̄ ā ŋ́, ń ba Ɔwɔicō kóō lɛ ōwē yá ɔ̄.

¹⁰Abālɔbányā n gē tíne eyīyōlɔhi kú ācɛ kpɔ́ ɛ́ɛ́ nɛɛ? Ó lɔwɛ ŋ́! Ɔdā nɛ̄ n dɔɔ̄kā wɛ ka n téeyī-olɔhi kú Ɔwɔicō? Kɛ̄ɛ ka n̄ gē tíne ká n yá ká ɔtū um kóō he ācɛ? Ɔ́dāŋ ka n gē dɔɔ̄kā ō yá ká ɔtū kóō he ācɛ kpɔ́ nɛɛ, ó lɛ ā ń cíkā ká n̄ wɛ ɔ̄cocɛ̄hɔ̄ kú Ohɔ́nyɛtá ŋ́.

¹¹N tíne ká aá lɛ ɔ́ jé ayínɛ́ ka, ɔkōōlɔhi nɛ̄ n tɔ́ɔna kú nū ā í hútu ŋmá ɛgiyí ɔ̄cɛ ŋ́.

¹²Ohígbū koó wɛ ɔ̄cɛ je gā um ā ŋ́, ɛ́ɛ́ nēe kē nwū um ɔdā dúúmā, amáŋ Ujísɔ̄si Ohɔ́nyɛtá abɔ̄yī nū ma ɔ́ fú ga um á.

¹³Aá lɔfú le ɔ̄kā kú ɔdā nɛ̄ n yá eko nɛ̄ n gē gbā Ɔwɔicō ɛ̄gbā ɛ́gɛ́nɛ̄ ācɛ Ujíyu ī gbā ɔ̄ ɛ̄gbā a pó ɛɛ́. Ɛ́gɛ́nɛ̄ n yɔ̄ ī yá ɔdā dóódu nōo tɔ́ɔtɛ́ gā um kú n̄ yá kú ācɛ nēe cɛ̄ɛ̄lā Ɔwɔicō ā kéē móowē nwuné lɛ āa, ɛ́gɛ́nɛ̄ n klla cēyītīkwū kú n̄ klla lɛ uwā kpó yíífi lɛ āa.

¹⁴N tɔ́ɔbū lɛ ɛyínɛ̄hi aɛ́gɔ́ um kɔ́ɔ́ gē gbā Ɔwɔicō ɛ̄gbā ɔwɛ nɛ̄ ācɛ Ujíyu ī gbā ɔ̄ ɛ̄gbā a. Ɔtū kú um kwu ɔdā nɛ̄ aádáádā alɔ nwū alɔ ā nɛ̄ɛ̄nɛ̄hi.

¹⁵Amáŋ eko nōo he Ɔwɔicō ɔtū ā, o ŋmá eyīnyinyi kú nū, ó lɛ um fu céé ŋmá ipú kú ɛ́nɛ́ um, cɛ́ɛ́ kú n̄ cɛ̄ ɔ̄ ɛhɔ̄. Eko nɛ̄ ó le ɔ́ miya

¹⁶kóō lɛ Ɔyínɔ̄nyīlɔ kú nū mafú gā um cɛ́ɛ́ ká n̄ géē tɔ́ɔna kú Ɔ̄kōōlɔhi lɛyíkwu ɔ́ lɛ aílɔ́wá ā, ń kōō ga ɛgiyí ɔ̄cɛ dúú kóō nwū um ɛlā ŋ́.

¹⁷Ń kōō ga Ujerúsālɛm ɛgiyí ācɛ nēe wɛ ɔ̄cocɛ̄hɔ̄ gbɔbū gā um ā ŋ́, amáŋ n le tá éwo nēé hī Árābu ā. Anɔ́ɔ n klla kwúcē ga Udamáskɔsi á.

¹⁸Anɔ́ɔ igbīhi iháyí ɛtá n pīyɛyí ŋmá Udamáskɔ̄si ā n le tá Ujerúsālɛm gaá miya ɛlā mla Ukífāsi. Anɔ́ɔ n yɔ̄ mla anú ɛ̄cī igwɛ́ɛhɔ̄ á.

¹⁹Ń kōō má odúmā kú ɔ̄cocɛ̄hɔ̄ o hile ā abɔ́ɔ ŋ́, ń táafú ŋ́ ayíka Ujémīsi ɔyínɛ́ kú Óndú alɔ ā.

²⁰Ɔdā nɛ̄ n yɔ̄ ī da aá nyā wɛ ɔkwɛ̄yi nɛ̄ n. Ɔwɔicō je ka ń yɔ̄ ī kɛ̄mgbɛ̄ lɛ aá ŋ́.

²¹Igbīhi ɔ́ɔmā n le tá ajɛ kú Usiríya mla Usilísīya.

²²Amáŋ ó wɛ odúúdú ācɔ̄lóhɔ́nyɛtá nēe bá icɔ́ɔci kú Ujudíya ā jé um eyī ŋ́.

²³Ɔdā nɛ̄ uwá pó ofūūnū ā wɛ kahíníī, “Ɔ̄cɛ nōo yá alɔ ŋmó eko éyi ā, abālɔbányā ó gē tɔ́ɔna kú ɛ́gɛ́nɛ̄ ācɛ í lɔtūce Ohɔ́nyɛtá lɛ āa ɛɛ́, otɛɛtɛ ā ó tíne ō lɛ ācɛ nēe kpɔ́tūce Ohɔ́nyɛtá ā kpó yíífi.”

²⁴Anɔ́ɔ é cɛ̄tra Ɔwɔicō ohígbū ɔdā nɛ̄ ó yá ipú oyēeyī kú um ā á.