Read idoma ĀCƐ UGALÉSĪYA 2 Bible Online

ĀCƐ UGALÉSĪYA 2 - idoma bible

ĀCƐ UGALÉSĪYA 2

¹Anɔ́ɔ iháyí igwɛ́ɛnɛ le gla ŋmá eko nɛ̄ n táaha ga Ujerúsālɛm ā, n le yɛ tá Ujerúsālɛm igbɔhá mla Ubánābasi. N kwú Utáyítɔ̄s ú tɔ́ɔkwu nyɔ̄ dúú.

²N nyɔ̄ ohígbū ka Ɔwɔicō le mafú gā um ká n̄ nyɔ̄. Ipú ojīla tɔ̄há nɛ̄ ami mla aótrɛ̄yí ā lɛ ōfōōfū alɔ ā, n le ɛ́gɛ́nɛ̄ n tɔ́ɔ́na kú ɔ̄kōōlɔhi lɛ aílɔ́wá lɛ ā kpó ka lɛ uwá. N yá ɛ̄nyā ká n̄ le jé lɔɔlɔhi ka úklɔ́ nɛ̄ n yɔ̄ ī yá ā kóō híī bónū ŋ́.

³Amáŋ ó kōō Utáyítɔ̄si nɛ̄ ó yɔ̄ mla um ā, nááná nɛ̄ ó wɛ ɔ̄cɛ ugríisi ā, é pi ɔ́ abɔ̄fú kóō lɛ apī hɛ́ ŋ́,

⁴Amáŋ ācɛ ōhī tíne kéē lɛ ɔ́ apī hɛ́. Ācɛ nēe kɛ̄mgbɛ̄ ka aá wɛ ācɛ o cɛ̄ɛ̄lā Ɔwɔicō bɛ̄ɛka alɔ nááná nēé kē wɛ ŋ́ mā ā, le plla tá ipú ígwu kú alɔ wɛɛlɛ kéē wā ī bɔkwu ɛ́gɛ́nɛ̄ alɔ ī nyíliyētá ipú opīyatɔ̄há kú alɔ mla Ohɔ́nyɛtá Ujísɔ̄si ā, cɛ́ɛ́ kéē lɛ alɔ pīya ɔfiyɛ cɛ́ɛ́ kú alɔ yá ɔdā nɛ̄ íne kú ācɛ Ujíyu ka ā.

⁵Alɔ í cɔ̄nyā lɛ uwá jéjéē ɛ́ɛ́ ŋ́, cɛ́ɛ́ ká alɔ lɛ ɛlā ɔkwɛ̄yi kú ɔkōōlɔhi ā tū lɔhi gbēyī aá.

⁶Amáŋ ācɛ nēé je bɛ̄ɛka otrɛyí kú icɔ́ɔci nēe bá abɔ́ɔ ā í lɛ ɔdā dúú nēé ī ka tū ipú ɔ̄kōōlɔhi nɛ̄ n yɔ̄ ī tɔ́ɔna nū ā ŋ́. N ka ɛ̄nyā ohígbū ka ɔdā nēé wɛ í lɛ ɔdā dúúmā ō yá mla um ŋ́; Ɔwɔicō í gē má ɛ́gɛ́nɛ̄ ɔ̄cɛ wɛ ā ɛ́ɛ́ kóō hɛ́pɔ̄ ŋ́.

⁷Amáŋ ikɔkɔ ɔ́ɔmāā é ma ka Ɔwɔicō kwú úklɔ́ kú ō tɔ́ɔna kú ɔ̄kōōlɔhi lɛ aílɔ́wá ā ú tū um abɔ̄ lɛ ācɛ nēé hɛ́ apī ŋ́ mā a, ɛ́gɛ́nɛ̄ é je úklɔ́ kú ɔna ō tá kú ɔkōōlɔhi lɛ ācɛ Ujíyu tū Upíta abɔ̄ āa.

⁸Ohígbū ka Ɔwɔicō ékpó nōo le um yá ɔ̄cocɛ̄hɔ̄ kú nū ga ɛgiyí aílɔ́wá ā, je Upíta pīya ɔ̄cotɛhɔ̄ kú nū ga ɛgiyí ācɛ Ujíyu dúú á.

⁹Ujémīsi mla Ukífasi mla Ujɔ́ni, ācɛ nēé je bɛ̄ɛka ákanaba ā le jé ka Ɔwɔicō ɔ́ɔ je úklɔ́ kú ɔna kú ɔkōōlɔhi nyā gā um á, anɔ́ɔ ohígbū ɛ̄nyā ā é le abɔ̄ je lɛ ami mɛ́mla Ubánābasi kéē mafú keé cɛ̄ tɔ̄há mla alɔ. Alɔ cɛ̄ tɔ̄há ka ami mɛ́mla Ubánābasi ká ālɔ̄ ga ɛgiyí aílɔ́wá, ká uwá ā kéē kē ga ɛgiyí ācɛ Ujíyu ā.

¹⁰Ɔdā nēé dɔɔ̄kā ŋmá ɛgiyí alɔ ā wɛ ka alɔ leyīkwu ācɛ ogbɛhá, ɔdā nyā piíí ā kē wɛ ɔdā ō ce um ɛgbá nɛ̄ɛ̄nɛ̄hi nɛ̄ n húmáyī yá gbɔbū á.

¹¹Amáŋ eko nɛ̄ Ukífasi táaha wā Ántiyɔ̄ku ā, n ka ífulá tū ɔ̄ lɔfú lɔfú ipú eyī odúúdú ācɔ̄lóhɔ́nyɛtá lɛyí kwu ɔdā nɛ̄ ó yá ā, ohígbū koó yá ɛlā obɔ̄bí nɛ̄ɛ̄nɛ̄hi.

¹²Eko nɛ̄ Upíta wā aflɛ́yí ā, ó húmáyī lé ɔdōlé mla ācɔ̄lóhɔ́nyɛtá nēe wɛ aílɔ́wá, nēé gē lɛlá wu apī ō hɛ́ ŋ́ mā a. Amáŋ igbīhi nɛ̄ ācɛ ŋmá ɛgiyí Ujémīsi gā ā, Upíta tá ka anúɔ í lé mla aílɔ́wá ā gɛ ŋ́ ohígbū koó gē yúufi ācɛ nēe gē ka kéē lɛ aílɔ́wá ā apī hɛ́ piíí ā a.

¹³Ācōlóhɔ́nyɛta ɔha kú ācɛ Ujíyu le pīya tɔhá mla ucē kú ɔ̄cɛ o leyīɛpa nɛ̄ Upíta yá ā, Ubánābasi kōō le pīya tɔ̄há mla uwá ipú ucē obɔ̄bí nyā dúú.

¹⁴Amáŋ eko nɛ̄ n le má ka uwá í yɔ̄ ī yá ɔdā okpaakpa ɛ́gɛ́nɛ̄ ɛlā ɔkwɛ̄yi kú ɔ̄kōōlɔhi ā lɛ ā ŋ́ mā ā, n da Ukífasi ipéēyī odúúdú ācɛ o hile kahíníī, “ Awɔ nēé ma ɔ̄cɛ ujíyu ā habɔ̄ íne kú ācɛ Ujíyu tá húmáyī lā bɛ̄ɛka aílɔ́wá ā, á yá ucē bɛ̄ɛka Ɔ̄cɛ újíyu ŋ́. Ɛ́gɛ́nyā nāa í pi aílɔ́wá ā abɔ̄fú kéē yá ucē bɛ̄ɛka ācɛ Ujíyu glá ā?”

¹⁵Alɔ nɛ̄ ɛ̄nɛ̄ mla Ádā alɔ wɛ ācɛ Ujíyu ā, nɛ̄ alɔ í kē wɛ aílɔ́wá nɛ̄ ācɛ Ujíyu hī ācobīyíne ā ŋ́ mā,

¹⁶nááná jé ka Ɔwɔicō gē hɛ́pɔ̄hi lɛ ācɛ ŋmá lɛ ɔtōkpóce Ujísɔ̄si Ohɔ́nyɛtá, ó wɛ o ŋmá lɛ o yá ɔdā nēé tá ipú íne ka ɔ̄cɛ kóō yá ā ŋ́. Alɔ abɔ̄ alɔ cɛ̄ɛ̄lā kú Ujísɔ̄si Ohɔ́nyɛtá o yá ɛ́ɛ́ kéē lɛ alɔ kagwó mla Ɔwɔicō bū ipú ɔtōkpóce Ohɔ́nyɛtá, ó wɛ o ŋmá lɛ o yá ɔdā nēé tá ipú íne ka alɔ yá ā ŋ́ má. Ohígbū keé gáā hɛ́pɔ̄hi lɛ ɔ̄cɛ dúúmā o ŋmá lɛ o yá ɔdā nēé tá ipú íne ā ŋ́.

¹⁷Alɔ cēyītīkwū nɛ̄hi kú alɔ lɛ ɛma okpaakpa lɛ mla Ɔwɔicō ohígbū opīyatɔ̄há kú alɔ mla Ohɔ́nyɛtá. Amáŋ ɔ́dāŋ ka abɔ̄ nɛ̄ alɔ ī yá ɛ̄nyā ā anɔ́ɔ é le má ka alɔ wɛ ācobīyíne ɛ́gɛ́nɛ̄ aílɔ́wá ā wɛ ā, ɔ́mā lé ka Ohɔ́nyɛtá ī cɛ̄lā kú íne ō bīya kɛ̄ɛ? Ó lɛ ā gbóógbóō ŋ́.

¹⁸Ɔ́dāŋ ka n lɛ ɔwɛ kú íne nɛ̄ n ca tāajɛ ā gwó gicō kpɔ́, ayíka n yɔ̄ ī yá ɔdā nōo bɔ̄bí nɛ̄hi ɔkwɔ̄ɔ̄kwɛ̄yi.

¹⁹Ohígbū ka ami ā, ɛ́gɛ́nɛ̄ ɔ̄cɛ ī kɛlā ā gekwú, íne ā í nā um tɔ́ɔwɛ glá gɛ ŋ́, íne ā yá um lɛ ā á, cɛ́ɛ́ ká n̄ yēeyī ká n̄ yúklɔ́ lɛ Ɔwɔicō. Ó lɛbɛ̄ɛka n gekwú mla Ohɔ́nyɛtá ɛyí ɔcóōnyɔ́kpá ā.

²⁰Cɛ́ɛ́ kóō wɛ ami yɔ̄ ī yēeyī kpɔ́ ā gɛ ŋ́, amáŋ Ohɔ́nyɛtá wɛ ɔ̄cɛ nōo lā ipú um mɛ́ɛ́ á. Ɔwɛ nɛ̄ n kē yēeyī abālɔbányā ā, n lā ŋmá ɔtōkpóce Ɔyí Ɔwɔicō nōo yíihɔtū tá um klla cɛ̄ gekwú o yá ɛ́ɛ́ kóō lɛ um nyatá a.

²¹Ń tá ihɔtū ogbonɛnɛ kú Ɔwɔicō ā ŋ́. Ɔ́dāŋ ka é gē hɛ́pɔ̄hi lɛ ɔ̄cɛ o ŋmá lɛ o lɛ íne tū nɛɛ, ó lɛ ā ayíka Ohɔ́nyɛtá gekwú tónū icííci.