Read idoma ĀCƐ UGALÉSĪYA 4 Bible Online

ĀCƐ UGALÉSĪYA 4 - idoma bible

ĀCƐ UGALÉSĪYA 4

¹N tíne ō ka kpɔ́ ka-é je ɔyí nōo í lúgwū agbénú kú ádā nū ā bɛ̄ɛka ɔfiyɛ eko nɛ̄ ó wɛ ɔyí obene kpɔ́ ā, nááná nɛ̄ anú kōō wɛ óndú kú ɛjɛ̄ɛ̄jī agbénú ā a.

²Eko nɛ̄ ó wɛ ɔyípɛ́ obene ā, ó lɛ ācɛ nēe bá ī leyīkwu ɔ́ klla bá ī leyīkwu agbénú ā jāā gbéeko nɛ̄ Ɔwɔicō tū nɛ̄ ó í lúgwū agbénú kú nū ā.

³Ɔwɛ ɛ́gɔ́ɔmā nɛ̄ ó lɛ lɛ alɔ dúú á. Eko nɛ̄ alɔ í jɛ́yí ɔdā dúú lɔhi ɛ́ɛ́ ŋ́ mā aálelékwū nēe gē gbō ɛcɛ nyā ā lɛ alɔ yá ɔfiyɛ kú uwā.

⁴Amáŋ eko nɛ̄ eko nɛ̄ Ɔwɔicō miya táajɛ ā le yá ā, Ɔwɔicō lɛ Ɔyínɔ̄nyīlɔ kú nū tɛ̄hɔ̄ wā ipú ɛcɛ nyā. Ɔ̄cɛnyā ma ɔ́ á, ó lɛyítáajɛ lɛ íne kú ācɛ Ujíyu.

⁵Ó wā kóō lɛ ācɛ nēe bá nɛ̄ íne ā ī gbō ā nyatá, cɛ́ɛ́ ká ālɔ̄ le pīya ayí kú Ɔwɔicō.

⁶O yá kóō mafú ka aá wɛ ayí nū ā, Ɔwɔicō lɛ Alelékwū kú Ɔyínɔ̄nyīlɔ kú nū tɛ̄hɔ̄ wā ipɔ́tū kú alɔ, alelékwū, nōo yɔ̄ ī yá kú ālɔ̄ dɛ̄gba kahíníī, “Ádā, Ádā um.”

⁷Ohígbū ɔ́ɔmā aá wɛ ɔfiyɛ ɔhá gɛ ŋ́. Amáŋ aá wɛ ayínɔ̄nyīlɔ mɛ́mla ayínɔ̄nyā kú Ɔwɔicō. Abɔ̄ nɛ̄ aá kē wɛ ayí kú nū ā, ɔ́ɔmā lé ka Ɔwɔicō géē kpó odúúdú úgwū kú nū lɛ aá.

⁸Otɛtɛ, nɛ̄ aá jé Ɔwɔicō lɔɔlɔhi ɛ́ɛ́ ŋ́ mā ā, aá wɛ ɔfiyɛ kú aálelékwū nēé wɛ Ɔwɔicō ɔkwɛ̄yi ŋ́ mā ā.

⁹Abālɔbányā nɛ̄ aá lɛ Ɔwɔicō jé abɔ̄yī aá ɛ́ɛ́ mā ā, kɛ̄ɛ kā n̄ ka, abālɔbányā nɛ̄ Ɔwɔicō lɛ aá jé ɛɛ́ mā a, ɛ́gɛ́nyá nɛ̄ aá klla tíne ō kwúcē ga ɛgiyí aálelékwū nēé ī gbō ɛcɛ nyā āā, nēé lɔfú ŋ́ í klla tīile ŋ́, kú aá kwú pīya aɔ́fiyɛ kú uwā igbɔhá āa?

¹⁰Aá yɔ̄ ī cēyītīkwū kú aá téeyī olɔhi kú Ɔwɔicō oŋmá o lɛ ɔtū tá ɛ̄cī mla ɔyā mla eko mla iháyí gē je uwá keé cɛgbá!

¹¹Ɔtū kú um plicō ohígbū nɛ̄ odúúdú ɔdā nɛ̄ n yá kú um tá aá abɔ̄ ā kóō le pīya áncā ŋ́.

¹²Ayínɛ́, n lɛ abɔ̄ tɛ́yīpɛ̄ lɛ aá kú aá yá ucē bɛ̄ɛka ami ā, ohígbū ka ami abɔ̄yī um le pīya bɛ̄ɛka aá ɛ́gɛ́nɛ̄ íne ā í labɔ̄ lɛ aá ŋ́ mā. Aá yá um ɔdōbɔ̄bi dúúmā eko nōo yɛ ā ŋ́, amáŋ abālɔbányā aá ī yá um ɔdōbɔ̄bí.

¹³Aá jé ka eko nɛ̄ n wā í tɔ́ɔna kú ɔkōōlɔhi ā lɛ aá aflɛ́yí ā,

¹⁴abɔ̄ ōcē kú um junwalu lɛ aá nááná ā, aá leyī gwū um tónū ŋ́, ɛ́ɛ́ nɛ̄ aá kōō tū um ŋ́. Amáŋ aá kē mīyɛ um ɛ́gɛ́nɛ̄ aá í lɔfú mīyɛ alelékwū-ōtɛ̄hɔ̄ kú Ɔwɔicō nōo ŋmá ɔkpáncō ā, aá klla mīyɛ um ɛ́gɛ́nɛ̄ aá í mīyɛ Ohɔ́nyɛtá Ujísɔ̄si ā.

¹⁵Ɔtū he aá nɛ̄hi! Ɔdí yá mɛ́ɛ̄ āa? Ohígbū ka n cɛ̄ aá ijáalí ka, ɔ́dāŋ koó tɔ́ɔtɛ́ nɛɛ, aá géē yɛ í lɛ eyī kú aá ŋwúla cɛ́ɛ́ kú aá kwú kpó gā um.

¹⁶N le pīya olɛlā kú aá abālɔbányā ohígbū ɛlā ɔkwɛ̄yi nɛ̄ n ka lɛ aá ā nɛɛ?

¹⁷Ācɛ nēe bá ī tíne kéē pīya ɔ̄kōōlɔhi ā abɔ̄ ā bá ī cēyītīkwū nɛ̄hi kéē lɛ ɔtū kú aá pīya tá ɛgiyí uwā, amáŋ ɔdā nēé tíne ō yá ā í lɔhi lɛ aá ŋ́. Amáŋ ɔdā nēé tíne wɛ o lɛ yá cɛ́ɛ́ kú aá lɛyítáajɛ ga um gɛ ŋ́, cɛ́ɛ́ kú ɛlā kú uwā kóō kwú aá iyē ɛ́gɛ́nɛ̄ ákú um gē kwú aá iyē aā

¹⁸Ó lɔhi eko dóódu kú ɛlā ɔ̄cɛ kóō kwú ɔ̄cɛ ɔhá ɔtū ɔwɛ olɔhi, ó wɛ eko nɛ̄ n yɔ̄ mla aá ōfūnū ŋ́.

¹⁹Ācɛ o he um ɔtū, n lɛbɛ̄ɛka ɔnyā ō yɔ́ɔma gáā ma ɔyí ā, n gē jé ɛdɔ ɔnɔ ɛ́gɔ́ɔmā ohígbū aá jāā gbéeko nɛ̄ aá kwú pīya ācɛ o yɛce Ohɔ́nyɛtá ɔkwɔ̄ɔ̄kwɛ̄yi.

²⁰Ó he um ɔtū ká n̄ yɔ̄ mla aá abālɔbányā ká n̄ kē lɛ ɔkɔ kú um pīyabɔ̄, ohígbū ka ɛlā kú aá le kwú um ɔtū nɛ̄hi.

²¹Aá da um, ācɛ ōhī kú aá nēe tíne ka íne ā kóō yɔ̄ ī gbō uwā ā, aá pó ɔdā nɛ̄ íne ā ka ā ŋ́ nɛɛ?

²²Ohígbū keé lɛ ɔ́ tá ipú íne ā ka, Ébrahām lɛ ayínɔ̄nyīlɔ ɛpa. Éyi ŋmá ɛgiyí ɔfiyɛ nɔ̄nyā, ɔhá kē ŋmá ɛgiyí ɔ̄cɛnyā nōo lɛ iyī nū.

²³Amáŋ é ma ɔyínɔ̄nyīlɔ kú ɔfiyɛ nɔ̄nyā ā ɔwɛ ɔlamu é ma ɔyínɔ̄nyīlɔ kú ɔnyā nōo lɛ iyī nū ā ŋmá lɛ okónu nɛ̄ Ɔwɔicō ce ā.

²⁴Ɛ̄nyā wɛ ɔ̄kā nōo gē nwū odée. Ohígbū ka anyā nēe bá a kwɛyí ɛka ɛpa. Éyi ŋmá ɛfu kú Usayínāyi, [3] yɔ̄ gē ma ayí aɔ́fiyɛ. Iyē ɔnyā ā wɛ Uhágalu.

²⁵Uhágalu kwɛyí ɛfu kú Usayínāyi ajɛ kú Arébīya. Ó kwɛyí Ujerúsālɛm kú abālɔbányā, ohígbū ka anú mla ayí nū wɛ aɔ́fiyɛ.

²⁶Amáŋ ɔnyā nōo kwɛyí Ujerúsālɛm nōo yɔ̄ ɔkpáncō ā lɛ iyī nū á, anú wɛ ɛ́nɛ́ alɔ á.

²⁷Ohígbū keé lɛ ɔ́ tá ipú ɔkpíhɔ ka, “Gwéeyē ɔdɔma nɛ̄ ó ma ɔyí ŋ́. Le yíla bɛ̄cɛ ká ā dɛ̄gba, awɔ nɛ̄ ó móōwē kú ɔma ɔyí ŋ́ mā a. Ohígbū ka ayí kú ɔnyā nɛ̄ ɔbá tá ɔ̄ ā géē lɛwa fíyɛ́ ayí kú ɔnyā nōo lɛ ɔbá ā á.”

²⁸Abālɔbányā, ayínɛ́ um, aá wɛ ayí kú okónu nɛ̄ Ɔwɔicō ce bɛ̄ɛka Áyísīki ā.

²⁹Eko ɔ́ɔmā ɔyí nēé ma ɔwɛ ɔlamu ā, gē yá ɔyí nēé ma ŋmá lɔfú kú Alelékwū ā ŋmó, ɛ́gɔ́ɔmā nɛ̄ ó lɛ abālɔbányā dúú á.

³⁰Amáŋ ɔdí nēé tá ipú ɔkpíihɔ āa? Ó kahíníī, “Lɛ ɔfiyɛ nɔ̄nyā ā mla ɔyínɔ̄nyīlɔ kú nū nū tɛ́ɛcɛ, ohígbū ka ɔyínɔ̄nyīlɔ kú ɔfiyɛ nɔ̄nyā a í gáā lɛ āyā kú úgwū kú ádā uwā mla ɔyí kú ɔnyā nōo lɛ iyī nū ā glá ŋ́.”

³¹Ohígbū ɛ́gɔ́ɔmā, ayínɛ́ um, alɔ í wɛ ayí kú ɔfiyɛ nɔ̄nyā ŋ́, amáŋ ákú ɔnyā nōo lɛ iyī nū ā.