Read idoma ĀCƐ Ɛ́FĒSƆSI 2 Bible Online

ĀCƐ Ɛ́FĒSƆSI 2 - idoma bible

ĀCƐ Ɛ́FĒSƆSI 2

¹Otɛtɛ, aá lɛbɛ̄ɛka okwū ā ɛgiyí ɔdā dóódu lɛyíkwu alelékwū kú Ɔwɔicō ohígbū īkpɛ̄yí olɔfú nɛ̄ ā yá tá ɔ̄ mɛ́mla íne kú nū nɛ̄ aá bīya ā.

²Eko ɔ́ɔmā ā gē yɛ ɔwɛ kú ɔbíipú ɛ́gɛ́nɛ̄ ācɛ kú ɛcɛ nyā gē yɛ ɔwɛ kú ɔbíipú ā. Aá gē lɛyítáajɛ lɛ alelékwū nōo gē gbō aálelékwū nōo gē gbō ācɛ nēe tá ō jāhɔ̄ lɛ Ɔwɔicō ā.

³Ɔkwɔ̄ɔ̄kwɛ̄yi ā odúúdú alɔ yá ucē ɛdɔ ékpó bɛ̄ɛka uwá ā, ālɔ̄ bá gē yá aɔ́dā dúú nēe kwu alɔ ɔtū o yá ā, alɔ gē yá ɔdā dúú nɛ̄ ɔkpíyē ámāŋ ka aɔ́dā nɛ̄ ɔtū kú alɔ gbɛlá ā. Abɔ̄ alɔ wɛ ɔ̄cɛ ɔlamu bɛ̄ɛka ɛjɛ̄ɛ̄jī ācɛ ohile ā, ó wɛ ɔdā nōo gē ci ŋ́ Ɔwɔicō í yá alɔ italā ohígbū koó le cɔ̄nū mla alɔ ohígbū íne kú nū nɛ̄ alɔ bīya ā.

⁴Amáŋ abɔ̄ Ɔwɔicō ī ményinyi nɛ̄hi ā, nɛ̄ alɔ klla le he ɔ́ ɔtū nɛ̄hi ā, nááná nɛ̄ ālɔ̄ lɛbɛ̄ɛka okwū ā ɛgiyí ɔdā dóódu lɛyíkwu alelékwū kú Ɔwɔicō ohígbū ikpɛ̄yí olɔfú nɛ̄ alɔ yá tá ɔ̄ ā, ó kwú alɔ ú héyī ŋmá ɔlékwū mla Ohɔ́nyɛtá.

⁵Abɔ̄ Ɔwɔicō ī ményinyi nɛ̄hi ā nōó nya aá tá á.

⁶Ohígbū ka alɔ wɛ ákú Ohɔ́nyɛtá ā, ó kwú alɔ ú héyī ŋmá ikwū kú alelékwū cɛ́ɛ́ kú ālɔ̄ géē gbāājɛ mla anú ɔkpáncō.

⁷Ó yá ɛnyā kóō lɛ ɛhi kú eyīnyinyi kú nū nōo nwuné nɛ̄ɛ̄nɛ̄hi nɛ̄ ɔ̄cɛ dúúmā í cābɔ̄ nū glá ŋ́ mā mafú lɛ odúúdú ācɛ oŋmá eko nyā tá eko ɔhá ɛ̄cɔ̄bū, o ŋmá lɛ ɔwɛ nōó yíihɔtū tá alɔ ohígbū Ujísɔ̄si ā.

⁸Ohígbū ka ɛhi kú eyīnyinyi kú Ɔwɔicō ā ó lɛ aá nyatá, o ŋmá le ɔtū nɛ̄ aá le ce ɔ́ ā.

⁹Ó wɛ ohígbū úklɔ́ nɛ̄ aá yá nōó nyā aá tá ā ŋ́, ɛ́ɛ́ nɛ̄ ɔ̄cɛ dúú í bī ɔ́ɔmā le gwō ŋ́.

¹⁰Alɔ wɛ ɔdā nɛ̄ alɔ wɛ abālɔbányā ohígbū ka Ɔwɔicō kwú alɔ í bɔ́há mla Ohɔ́nyɛtá Ujísɔ̄si ɛ́ɛ́, cɛ́ɛ́ ká ālɔ̄ yá ɔdā olɔhi lɛ ācɛ ɛjɛ̄ɛ̄jī oyēeyī kú alɔ dóódu. Ɛ̄nyā wɛ ɔdā nɛ̄ Ɔwɔicō tútū lɛ alɔ ká ālɔ̄ yá á.

¹¹É ma aá ācɛ Ujíyu ŋ́. Ācɛ nēe wɛ ācɛ Ujíyu ā gē hī aá ka “ācɛ nēé hɛ́ api ŋ́” ohígbū ka uwá ā lɛ apī hɛ́. Ɔ́ɔmā kē wɛ ɔdā nɛ̄ abɔ̄ kú ɔ̄cɛ ɔlamu yá ɔkpíyē ɔlamu.

¹²Aá bla ka eko ɔ́ɔmā aá jé ɔ̄cɛ nɛ̄ Ohɔ́nyɛtá wɛ ā ɛ́ɛ́ ŋ́. Aá í wɛ ācɛ nɛ̄ Ɔwɔicō fu ā ŋ́, Ohígbū ɔ́ɔmā aá wɛ ācɛ éwɔhá nēé wɛ ɛka nɛ̄ Ɔwɔicō gbo lɛ ācɛ ɔlɛ́ nū nōo ŋmá okónu nōó ce mla uwá ā ŋ́. Aá leyīce ka ɔdā olɔ̄hi dúú ɔ́ɔ géē wā gē lɛ aá abɔ̄ aá lā ipú ɛcɛ nyā ŋ́. Aá kē jé Ɔwɔicō ŋ́.

¹³Aá nēe tɛtɛ lé ligbó ŋmá ɛgiyí Ɔwɔicō ā, amáŋ abālɔbányā, é lɛ aá bī wā kú aá bá tɔ̄há mla Ujísɔ̄si Ohɔ́nyɛtá piyóó. É le aá bī wā ajaajɛ ɛɛ́ ohígbū Ohɔ́nyɛtá nēé je nyɔ́kpá ɛyí ɔcóōnyɔ́kpá ā.

¹⁴Ohígbū ka Ohɔ́nyɛtá abɔ̄yīnū cɛ̄ lɛ alɔ lɛ ɛbɔ́ lɛ, ohígbū koó yá kú ācɛ Ujíyu mɛ́mla aéwɔhá kéē lā tɔ̄há bɛ̄ɛka ācɛ ipɔ́ɔ́nū ékpó ā. Ikwū kú nū ɛyí ɔcóōnyɔ́kpá ā lɛ ikpɛ́lā nōo kɔ̄ uwá hɛ̄ iyī uwā tá bɛ̄ɛka ɔdɔ ā catāajɛ.

¹⁵Ó lɛ odúúdú ɔwɛ ɛyɛ́ɛyɛ́yí kú íne kú ācɛ Ujíyu bī wā oŋmɛ́yí cɛ́ɛ́ kóō lɛ ācɛ éwo ɛyɛ́ɛyɛ́yí ɛpa pīyatɔ̄há mla Ohɔ́nyɛtá abɔ̄yīnū. Ɔwɛ ɛ́gɛ́nyā nōó yá kú ācɛ kéē bá ɛbɔ́ mla iyī uwā á.

¹⁶Ó ŋmá lɛ ikwū kú Ohɔ́nyɛtá ɛyí ɔcóōnyɔ́kpá ā, ó le yá kú ācɛ kéē wɛ olɛlā kú iyī uwā gɛ ŋ́. Oŋmá lɛ ikwū kú ɛyí ɔcóōnyɔ́kpá, ó lɛ aéwo ɛyɛ́ɛyɛ́yí ɛpa ā bī wā í le pīya ācɛ ékpónú, cɛ́ɛ́ kóō lɛ uwá kwúcē gé lɛ Ɔwɔicō.

¹⁷Ujísɔ̄si Ohɔ́nyɛtá wā í tɔ́ɔna kú ɔ̄kōolɔhi lɛyíkwu ɛbɔ́ lɛ ɛjɛ̄ɛ̄jī ācɛ. Ó tɔ́ɔna lɛ aá aílɔ́wá nēe ligbó lɛ Ɔwɔicō ā, anɔ́ɔ ó kē tɔ́ɔna lɛ ācɛ Ujíyu nēe kwu Ɔwɔicō ajaajɛ ā.

¹⁸Ohígbū ɔdā nɛ̄ Ohɔ́nyɛtá yá ā nɛ̄ odúúdú alɔ, ācɛ Ujíyu mɛ́mla aílɔ́wá ā lɔfú bī Alelékwū Ihɔ ékpó wā iyɔ̄bū Ádā alɔ nōo yɔ̄ ɔkpáncō ā á.

¹⁹Anɔ́ɔ ohígbū ɛ̄nyā, aá nēe wɛ aílɔ́wá ā í wɛ éwɔhá ámāŋ ka aúgbɔga kú ācɔ̄lóhɔ́nyɛtá gɛ ŋ́. Abālɔbányā aá le pīya ayí ajɛ ékpó mɛ́mla ācɛ éwo ékpónú mla ācɔ̄lóhɔ́nyɛtá mɛ́mla ācɛ kú ipɔ́ɔ́nū kú Ɔwɔicō.

²⁰Aá ā lɛbɛ̄ɛka inu nēé gwó cɛyí ikpíinu nɛ̄ ācotɛ̄hɔ̄ kú Ohɔ́nyɛtá mɛ́mla ācomɛ́ɛbɛ le táajɛ ā, nɛ̄ ɛcɔ̄ nōo cɛgbá fíyɛ́ dúú ā wɛ Ujíisɔ̄si Ohɔ́nyɛtá abɔ̄yīnū ā.

²¹Anú ā wɛ ɔ̄cɛ nōo yá ɛ́ɛ́ nɛ̄ inú ā dúúdú kwu iyī nū á, anɔ́ɔ ó klla lɛ ɔ́ yá kóō le nwuné nɛ̄ɛ̄nɛ̄hi jāā gbéeko nōó kwú pīya Agblīihɔ-nɛ̄hi nēé gē gbā Ɔwɔicō ɛ̄gbā ipú nū.

²²Ipú opīyatɔ̄há mla Ohɔ́nyɛtá ā, ó yɔ̄ gē kpó aá tɔ̄há mla ācɛ ɔhá ga ipú ɛga nɛ̄ Alelékwū kú Ɔwɔicō lā ā.