Read idoma ĀCƐ Ɛ́FĒSƆSI 3 Bible Online

ĀCƐ Ɛ́FĒSƆSI 3 - idoma bible

ĀCƐ Ɛ́FĒSƆSI 3

¹Ohígbū ɔdā nɛ̄ Ɔwɔicō yá nyā, ami, Upɔ́lu wɛ olagbá ohígbū ka n cɛ̄ Ohɔ́nyɛtá ɛhɔ̄, yɔ̄ gē tɔ́ɔna kú ɔ̄kōolɔhi lɛ aá nēe wɛ aílɔ́wá ā.

²Ó lɛ áafú ŋ́ aá pó lɔɔlɔhi ɛ́gɛ́nɛ̄ Ɔwɔicō je ɛhi kú úklɔ́ kú nū nyā gā um kú n̄ yá cɛ́ɛ́ kóō le lɔhi lɛ aá ā.

³Ɔwɔicō lɛ ɔdā nōó miya tayínū ā mafú gā um ɛ́gɛ́nɛ̄ n tá ɔ̄ tū ɔkpá lígíí ā.

⁴Ɔ́dāŋ ka aá lɛ ɔdā nɛ̄ n tá ā jé, aá géē jé ɛ́gɛ́nɛ̄ n jɛ́ɛyí ɔdā nɛ̄ Ɔwɔicō bī ɔtū lɛyíkwu Ohɔ́nyɛtá ɛ́ɛ́ nōó bī ɔ̄ wɛ̄ɛcɛ ā.

⁵Alɛɛcɛ í jé ɔdā nɛ̄ Ɔwɔicō i tayínū ā gbɔbū lɛ eko nyā ŋ́, amáŋ Alelékwū Ihɔ kú nū lɛ ɔ́ mafú lɛ ācotɛ̄hɔ̄ mɛ́mla ācomɛ́ɛbɛ nōó fu ɛyɛ́ɛ́yí kéē cɛ̄ ɔ̄ ɛhɔ̄ ā.

⁶Ɔdā nɛ̄ ācɛ í jé ɛ́ɛ́ ŋ́ mā wɛ ka, ɔ̄kōolɔhi ā lɛ ɔ́ yá kóō le tɔ́ɔtɛ́ lɛ aílɔ́wá mɛ́mla ācɛ Ujíyu kéē mīyɛ ɔhā ŋmá abɔ̄ Ɔwɔicō. É kwú pīya ɔ́wá kú ɛdɔ ɔkpíyē ékpó, ɛ́gɛ́nɛ̄ ɔ̄cɛ ī kɛlā ā, anɔ́ɔ é mīyɛ ɔdā nɛ̄ Ɔwɔicō cokónu ō je lɛ uwá bū ɛgiyí Ohɔ́nyɛtá Ujísɔ̄si ā á.

⁷Ɔwɔicō lɛ um yá ɔ̄cotɛ̄hɔ̄ kú ɔ̄kōolɔhi ā anɔ́ɔ ó lɛ ɔfú kú nū jē ga um bū ipú ɛhi ɛyɛ́ɛyɛ́yí nōó je ga um ā.

⁸Ami nyɛ́ fíyɛ́ dúú kú ipú ācɔ̄lóhɔ́nyɛtá á, nááná Ɔwɔicō kwú ɛdɔ kú úklɔ́ nyā ú gā um kú um tɔ́ɔna kú ɔ̄kōolɔhi ā lɛ aílɔ́wá lɛ́yíkwu ɔdā olɔhi nɛ̄ alɔ lɛ ohígbū Ohɔ́nyɛtá nɛ̄ alɔ jé ā.

⁹Ɛdɔ kú úklɔ́ kú um nyā wɛ kú um yá kú ācɛ kéē má ɔwɛ nɛ̄ Ɔwɔicō géē yá ɔdā nōó miya tayínū ā. Ɔwɔicō nōo yá ɔdā dóódu ā, í cɛ̄ lɛ ɔ̄cɛ dúú jé ɔdā nōó le tayínū ŋmá īkííkée nōo yɛ ā ŋ́.

¹⁰Cɛ́ɛ́ ɛpléeko nyā icɔ́ɔci lɔfú yá kú aálelékwū-ōtɛ̄hɔ̄ nēe gē gbāājɛ nēe lɔfú ipú ojuja ā kéē nwū ɛ́gɛ́nɛ̄ Ɔwɔicō jéeyī ipú ɛjɛ̄ɛ̄jī ɔdā dóódu ā.

¹¹Ɔwɔicō yá ɛ̄nyā oŋmá lɛ ɔwɛ nōó tɛtɛ miya ɔ́ táajɛ ogbɔɔ́ ŋmá ohútu ā. Óndú alɔ Ujísɔ̄si Ohɔ́nyɛtá nōó bī le yá ɛ̄nyā tɔ́ɔtɛ́ á.

¹²Ipú opīyatɔ̄há mla Ohɔ́nyɛtá mɛ́mla oŋmá lɛ ɔtū nɛ̄ alɔ le ce ɔ́ ā, alɔ í gē kpéko bónū kú ālɔ̄ ga ɛgiyí Ɔwɔicō gɛ ŋ́ ohígbū ka alɔ lɔtū yéékpó koó géē mīyɛ alɔ.

¹³Ohígbū ɛ́gɔ́ɔmā n gē gbɔ̄ɔkɔ lɛ aá kú aá híīī gbagbafú ohígbū ōwē nɛ̄ n yɔ̄ gē má ohígbū aá ā ŋ́. Odúúdú nū wɛ ohígbū olɔhi kú aá nɛ̄ n.

¹⁴Ohígbū ɛ̄nyā n lɛ okwúukwu kú um kwajɛ lɛ Ádā alɔ nōo yɔ̄ ɔkpáncō ā.

¹⁵Oŋmá ɛgiyí nū ā nɛ̄ ɛjɛ̄ɛ̄jī ipɔ́ɔmā kú ipú ɔkpáncō mɛ́mla ipú ɛcɛ nyā lɛ oyēeyī á.

¹⁶N gbɔ̄ɔkɔ lɛ Ɔwɔicō ka oŋmá ɔhā nɛ̄hi nōó lɛ ɔkpáncō ā kóō cɛ̄ le Alelékwū kú nū kóō lɛ ɔfú je lɛ aá, cɛ́ɛ́ kú ɔtū kú aá kóō le lɔfú.

¹⁷N klla gē gbɔ̄ɔkɔ cɛ́ɛ́ kú Ohɔ́nyɛtá kóō wā í lā ipú odo kú aá eko dóódu oŋmá lɛ ɔtū nɛ̄ aá géē le ce ɔ́ ā. N gē gbɔ̄ɔkɔ ká Ɔwɔicō kóō he aá ɔtū nɛ̄hi, nɛ̄ aá í gáā mɔ̄ɔ̄tá ipú ɔdā dúú nɛ̄ aá géē yá ā glá ŋ́.

¹⁸Cɛ́ɛ́ aá mɛ́mla odúúdú ācɛ ɔlɛ́ Ɔwɔicō ohile ā géē lɔfú jɛ́ɛyí kú ɛ́gɛ́nɛ̄ ihɔtū nɛ̄ɛ̄nɛ̄hi nɛ̄ Ohɔ́nyɛtá yá tū aá ā lɔwá, līkpō, licō klla lipú nwuné lɛ ā.

¹⁹N gē gbɔ̄ɔkɔ kú aá géē wā ī lɛ ɛ́gɛ́nɛ̄ Ohɔ́nyɛtá yíhɔtū tá aá lɛ ā jé, nááná nɛ̄ aá gáā jé ɔ̄ dúúdú glá ŋ́ mā. Ɔ́ɔmā ā géē cɛ̄ lɛ aá je gbla Ɔwɔicō ɔwɛ dóódu.

²⁰Alɔ cɛ̄tra Ɔwɔicō nɛ̄ ɔfú kú nū nōo yɔ̄ ī yúklɔ́ ipú alɔ ā lɛ ɔdā nɛ̄hi yá lɛ alɔ fíyɛ́ ɛ́gɛ́nɛ̄ alɔ kōō gbɛlá nū ā.

²¹Alɔ nēe bá ipú icɔ́ɔci mɛ́mla alɔ nēe pīyatɔ̄há mla Ohɔ́nyɛtá ā cíkā ō cɛ̄tra Ɔwɔicō eko dóóu piyóó.