Read idoma ĀCƐ Ɛ́FĒSƆSI 4 Bible Online

ĀCƐ Ɛ́FĒSƆSI 4 - idoma bible

ĀCƐ Ɛ́FĒSƆSI 4

¹Ami ā, nōo wɛ alagbá abālɔbányā ohígbū ka n cɛ̄ Óndú ā ɛhɔ̄ ā gē gbɔ̄ɔkɔ lɛ aá, ká aá lā ɔwɛ nōo cíkā lɛ ɔwɛ nɛ̄ Ɔwɔicō miya lɛ aá ká aá lā eko nōó hī aá igwú ka aá kwú pīya éyi kú ācɛ ɔlɛ́ nū ā.

²Aá tū iyī aá wāajɛ eko dóódu, aá gbonɛnɛ lɛ ācɛ, aá lɔtūlé. Aá ma ihɔtū kú áa fú o ŋmá lɛ ībū kú ɔ́mpa aá nɛ̄ aá gē cɛ̄ ā.

³Aá nya cɛ́ɛ́ kú aá yɔ̄ gē pīyatɔ̄há mla iyī aá kpɔ́ ɛ́gɛ́nɛ̄ alelékwū kú Ɔwɔicō yá ɔ̄ tɔ́ɔtɛ lɛ aá oŋmá lɛ ɛbɔ́ nōó je lɛ aá ā.

⁴Alɔ wɛ ɔkpíye ékpó, alɔ klla kē lɛ ɛdɔ Alelékwū ékpó, ɛ́gɛ́nɛ̄ alɔ leyīce odée nɛ̄ Ɔwɔicō hī alɔ igwú kú nū ā.

⁵Óndú ékpó yɔ̄ á, alɔ kē lɛ ɔwɛ ékpó nɛ̄ alɔ lɔtūce Ɔwɔicō, ɛdɔ ɛka kú Ɔwɔicō ékpó nēe kpó tū alɔ ɛyí á,

⁶Ɔwɔicō ékpónú yɔ̄ á, anú ā kē wɛ Ádā kú odúúdú ācɛ ā. Ó klla wɛ Óndú nōo yɔ̄ ī gbō odúúdú ācɛ, ó gē bī odúúdú ācɛ le yúklɔ́, ó kē lā ipú ódúúdú ācɛ.

⁷Amáŋ éyééye kú alɔ mīyɛ ɛhi ɛyɛ́ɛ́yí nōo mafu ɛ́gɛ́nɛ̄ Ohɔ́nyɛtá jɛ́ɛla nwuné lɛ ā.

⁸Ɛ́gɛ́nɛ̄ Ɔkpíihɔ ka ā, “Eko nōó gicō ɛga olicō fíyɛ́ dúú ā, ó lɛ ācɛ nēé kwú ā kpó nyɔ̄ mla iyī nū, ó kē kpó ɛhi lɛ ācɛ”.

⁹Ɔdí wɛ ɛyí kú ɛlā nēé ka kahíníī, “Ó gicō ā?” Ɛyí ɛlā nyā lé ka gbɔbū ɛ́ɛ́ kóō gicō ā, ó gajɛ le tá ɛhɛ́ɛ́háájɛ ɛga olipú fíyɛ́ dúú ā.

¹⁰Ɔ̄cɛ ékpó nōo wā ajɛ ā, anú piíí ga icīīcō le gla ojuja, o yá ɛ́ɛ́ kóō yɔ̄ ɛ́gɛ́ a dóódu kú ipú ɛcɛ ā.

¹¹Anú ā wɛ ɔ̄cɛ nōo kpó ɛhi lɛ ācɛ á. Ó fu ācɛ ōhī kéē wɛ ācotɛ̄hɔ̄, ó kē fu ācɛ ɔhá kéē wɛ ācomɛ́ɛbɛ, ó fu ācɛ ɔhá kéē wɛ ācotɔ́ɔna kú ɔ̄kōolɔhi bɔ́lɔ́ɔ́lɛ́, ó kē fu ācɛ ɔhá kéē wɛ ācɛ nōo ī gbācɛ bɛ̄ɛka álá ā, mɛ́mla aítíca nōo ī nwū ācɛ ɛlɔ̄ɔwɔicō.

¹²Ó yá ɛ̄nyā o yá ɛ́ɛ́ kéē lɛ odúúdú ācɔ̄lóhɔ́nyɛtá tútū kéē yúklɔ́ nɛ̄ ācɔ̄lóhɔ́nyɛtá ā cíkā ō yá ā, cɛ́ɛ́ kéē yá ká ācɛ icɔ́ɔci nēe wɛ ɔkpíyē kú Ohɔ́nyɛtá ā kéē jɛ̄ ipú ɛlā Ɔwɔicō.

¹³Ohígbū ɔ́ɔmā odúúdú alɔ géē cɛ̄ tɔ̄há ga ɛga nɛ̄ alɔ géē lɔfú le pīya ācɛ ékpó, ɔwɛ nɛ̄ alɔ gē lɔtūce Ɔwɔicō mɛ́mla ɔwɛ nɛ̄ alɔ jé ɔyínɔ̄nyīlɔ kú nū lɛ ā. Alɔ géē je jɛ̄ ŋmɛ́yí ɔwɛ nɛ̄ alɔ lɔtūce Ɔwɔicō ā, alɔ klla í je pīya ijímkpa ɔwɛ dóódu bɛ̄ɛka Ohɔ́nyɛtá ā.

¹⁴Cɛ́ɛ́ alɔ híīī wɛ ayípɛ̄ nēe lɛbɛ̄ɛka ɔ́kɔ nɛ̄ owu kú éŋkpɔ̄ nōo gē pīyabɔ̄ piyóó ā ge tá úgbagwú ga amu ga anú ā ŋ́. Ɛ́gɔ́ɔmā gē yá eko nɛ̄ ācɛ nēe gē plla ācɛ ka aá gē nwū ācɛ ɛlā á, ācɛ nēe gē yá kú ācɛ kéē cɛ̄ɛ̄lā nōó wɛ ɔkwɛ̄yi ŋ́ mā.

¹⁵Ikɔkɔ ɔ́ɔmā alɔ cíkā ō kɛlā ɔkwɛ̄yi nōo yɔ̄ ipú ɔ̄kōolɔhi ā tɛ́ɛcɛ abɔ̄ alɔ gē yíhɔtū tá ɔ́mpa alɔ ā. Alɔ géē jɛ̄ ɔwɛ dóódu bɛ̄ɛka Ohɔ́nyɛtá nōo wɛ Otrɛ̄yí kú icɔ́ɔci ā.

¹⁶Anú ā gē leyīkwu ɛjɛ̄ɛ̄jī āyā kú ɔkpíyē ā, cɛ́ɛ́ kéē kwɔhá lɔɔlɔhi ŋmá opīyatɔ̄há kú āyā kú ɔkpíyē ɛyɛ́ɛyɛ́yí. Ó klla gē tábɔ̄ kú āyā kú ɔkpíyē dóódu kéē yúklɔ́ ɛ́gɛ́nɛ̄ ó cíkā ō yá ā. Odúúdú iyē ā géē jɛ̄ klla í ma iyī nū gicō bɛ̄ɛka inu ā oŋmá lɛ ihɔtū.

¹⁷Oŋmá lɛ íkwu kú Óndú ā, n gē pi aá ahɔ̄ kú aá híīī lā bɛ̄ɛka ācɛ nēé lɔtūce Ɔwɔicō ŋ́ ma ŋ́. Ɔdā nēé gē gbɛlá nū ā í wɛ ɔdā o tīile ŋ́.

¹⁸É gē jɛ́ɛyí kú ɔdā dúúmā ŋ́, é lɛ abɔ̄ mla oyēeyī ɛ̄yīpɛ̄ nɛ̄ Ɔwɔicō gē je lɛ ācɛ ā ŋ́. É jé ɔdā dúúmā ŋ́, é lɛ ɔtū olɔfú.

¹⁹Ɔdōōbɔ̄bī dúúmā nēé gē yá ā í gē tū uwā uwēyī gɛ ŋ́. É ce iyī uwā bī ŋmá ínoōbīya nōo gē lɛ ɔ̄cɛ blínyī ā glá ŋ́.

²⁰Aá jé ka ɛdɔ kú oyēeyī ɛ́gɔ́ɔmā ī cɛ̄ tɔ̄há mla ɔdā nɛ̄ aá jé lɛyíkwu Ohɔ́nyɛtá ā ŋ́. Anú kē wɛ ɔkwɛ̄yi ā á.

²¹N jé péee keé lɛ ɛlā ka lɛ aá lɛyíkwu ɔ́ dúú ɛɛ́, anɔ́ɔ, abɔ̄ aá le pīya ācɛ o cɛ̄ɛ̄lā nū ā, é lɛ ɛlā ɔkwɛ̄yi kú ɔ̄kōolɔhi lɛyíkwu Ohɔ́nyɛtá ā nwū aá dúú ɛɛ́.

²²Ohígbū ɛ́gɔ́ɔmā, aá híīī lā ɛdɔ oyēeyī nɛ̄ncɛ̄ nɛ̄ aá tɛtɛ lā nōo cɛ̄ lɛ aá yá ɛdɔ ɔdā nɛ̄ aá yá ā gɛ ŋ́. Ɔwɛ nɛ̄ncɛ̄ nɛ̄ aá lā ā yɔ̄ ī kpó aá yíífi, ohígbū koó gé cɛ̄ lɛ aá yúnwū kú ɔdā nōo gē kpó aá yíífi.

²³Ikɔkɔ ɛ̄nyā, é lɛ ɔtū mɛ́mla odo kú aá yá ɛ̄yīpɛ̄.

²⁴Aá géē je pīya ɔ̄cɛ ɛ̄yīpɛ̄ ā piíí, nɛ̄ Ɔwɔicō yá kéē lɛbɛ̄ɛka anú abɔ̄yīnū ā, kú aá lā ɔwɛ nɛ̄ ɛjɛ̄ɛ̄jī ācɛ géē má oyēeyī okpaakpa nōo géē yá kú ɔtū kóō he Ɔwɔicō ɛ́gɛ́nɛ̄ ɛlā ɔkwɛ̄yi nōo ŋmá ɛgiyí nū lɛ ā.

²⁵Ohígbū ɔ́ɔmā aá híīī kɛ̄mgbɛ̄ lɛ iyī aá gɛ ŋ́, amáŋ ɔnyɔɔnyɛ kóō kɛlā ɔ̄kwɛ̄yi lɛ ɔ́mpā nū ohígbū ka odúúdú alɔ wɛ āyā kú ɔkpíyē kú Ohɔ́nyɛtá.

²⁶Ɔ́dāŋ ka a le cɔ̄nū mla ɔ̄cɛ dúúmā, ā cɛ̄ lɛ ícɔ̄nū kú uwɔ bī iyī uwɔ̄ nyɔ̄ ī bīyíne kú Ɔwɔicō ŋ́. Ā í mabɔ̄ ɔnū nɛ̄ a cɛ̄ ā tá gbɔbū lɛ ɛnɔ o gaajɛ

²⁷Aá kē híīī je ɛga dúúmā lɛ ebilíi ā ŋ́.

²⁸Ɔcɛ nōo ge wūwī kóō mabɔ̄ uwī ō wī tá, cɛ́ɛ́ kóō gbo úklɔ́ nōó géē yɔ̄ gē yá, o yá ɛ́ɛ́ kóō géē lɔfú tá ācogbɛhá ā abɔ̄ glá.

²⁹Aá híīī kɛlā obɔ̄bí dúúmā ŋ́, amáŋ aá kɛlā olɔhi nōo géē tīile lɛ ācɛ, ɛlā nōō géē tá uwā abɔ̄ kéē jɛ̄ ɛ́gɛ́nɛ̄ ɛgbá kú uwā lɛ āa cɛ́ɛ́ kú ɛlā nɛ̄ aá géē ka āa kóō le pīya ɔhā lɛ ācɛ nēe í pó ā.

³⁰Aá híīī yá Alelékwū Ihɔ kú Ɔwɔicō ɔtūnōbí ŋ́, ohígbū ká ɔdāŋ ka aá lɛ Alelékwū kú Ɔwɔicō lɛ ɛɛ́ ɔ́ɔmā cābɔ̄ ka aá wɛ ákú nū, nōo géē gbo aá cɛ́ɛ́ ká ɔdā dúú kóō yá aá ŋ́ jāā gbó ɛ̄cī nōó géē nya aá tá.

³¹Aá mabɔ̄ ɔnɔɔtū, ɔtūkpoókpoó, mɛ́mla ícɔ̄nū tá. Aá kē mabɔ̄ ɛgba ō dɛ̄ tū ācɛ mɛ́mla ɛcá ō cá uwā, mɛ́mla obɔ̄bí kú ɔ̄cɛ ō ka tá.

³²Ikɔkɔ ɔ́ɔmā aá gbonɛnɛ kú aá klla ményinyi iyī aá. Aá je obɔ̄bí yá iyī aá ɛhi ɛ́gɛ́nɛ̄ Ɔwɔicō je obɔ̄bí kú aá yá aá ɛhi ipú opīyatɔha kú aá mla Ohɔ́nyɛtá ā.