Read idoma ĀCƐ Ɛ́FĒSƆSI 5 Bible Online

ĀCƐ Ɛ́FĒSƆSI 5 - idoma bible

ĀCƐ Ɛ́FĒSƆSI 5

¹Aá gbla ucē kú Ɔwɔicō yá abɔ̄ aá wɛ ayípɛ̄ ɔlɛ́ unū ā.

²Ɔdā dúú nɛ̄ aá gē yá ā géē le kpaakpa ɔ́dāŋ ka gē yíhɔtū ta iyī aá, ɛ́gɛ́nɛ̄ Ohɔ́nyɛtá yíhɔtū tá alɔ lɛ ā, anɔ́ɔ ó cɛ̄ lɛ uwá lɛ ɔ́ ŋmó. Ɔwɛ ɛ́gɛ́nyā oyēeyī kú nū wɛ ɛhi okpóocu mɛ́mla ɛya nēé gwó lɛ Ɔwɔicō kwɛyí alɔ nōo he Ɔwɔicō ɔtū.

³Amáŋ abɔ̄ aá le pīya ācɔ̄lóhɔ́nyɛtá ā, ó lɔhi kú ɔ̄cɛ dúúmā kóō le okónu kwu aá iyē kú ucē bɛ̄ɛka ikpɔ́nyā ō ce, unwū ɔnyā ó yá bɛ̄ɛka opī ā, ámāŋ ka o gbɛlá olɔhi kú iyī ɔ̄cɛ ofūnū ā. Ɔ̄cɛ dúúmā í cíkā ō má ɔdā ō labɔ̄ bá ɔ̄ kɛlā kú ucē ɛ́gɛ́nyā lɛyíkwu aá fúlufúlu ŋ́, abɔ̄ aá le pīya ayí ɔlɛ́ Ɔwɔicō ā.

⁴Aá híīī kɛlā nōo gē tūwēyī, ɛlā obɔ̄bí, amáŋ ɛla icííci ŋ́. Ikɔkɔ ɔ́ɔmā aá tū Ɔwɔicō ahínyá kú ɔdā nōó yá lɛ aá ā.

⁵Aá lɛ abɔ̄ bī ɛ̄nyā, ka ɔ̄cɛ dúú nōo gē cikpɔ́nyā, ɔ̄cɛ o yá unwū ɔnyā bɛ̄ɛka opī ā, ɔ̄co o yá ɔdīcííci, amáŋ ɔ̄cɛ nōo gē yúnwū ɔdā nɛ̄hi (Ācɛ nēe gē yúnwū ɔdā, kwú ɔdā ɔ́ɔmā ú pīya ɔwɔ kú uwā ɛɛ́) í gáā lɛ ɛgá dúúmā ipú ajɔ̄ɔ̄cɛ́ ɛga nɛ̄ Ɔwɔicō mɛ́mla Ohɔ́nyɛtá géē gbō ācɛ ā ŋ́.

⁶Aá cɛ̄ lɛ ɔ̄cɛ dúúmā bī ɛlā icííci lɛ plla aá ŋ́. Ó wɛ ohígbū ikpɔ́nyā ōce, unwū ɔnyā ō yá bɛ̄ɛka opī mɛ́mla únwū ɔdā nō yá nɛ̄hi ā nɛ̄ Ɔwɔicō géē bī le cɔ̄nū tū ācɛ nēé lɛyítáajɛ le ɔ́ ŋ́ mā á.

⁷Ohígbū ɛ́gɔ́ɔmā aá híīī túbla ācɛ ɛ́gɔ́ɔmā fúlufúlu ŋ́.

⁸Aá abɔ̄yī aá, aá tɛtɛ yɔ̄ ipú ajodobū, amáŋ abālɔbányā nɛ̄ aá le pīya ācɛ ɔlɛ́ Óndú ɛ́ɛ́ mā, aá le pīya ācɛ kú ɔlá ofíyajɛ ɛɛ́. Ohígbū ɔ́ɔmā aá géē yɔ̄ bɛ̄ɛka ācɛ nēe wɛ ákú ɔlá ofíyajɛ ā piíí.

⁹Ohígbū ka ɔlá ofíyajɛ nyā yá ɛ́ɛ́ nɛ̄ ācɛ gē yá ɛjɛ̄ɛ̄jī aɔ́dā nōo lɔhi, aɔ́dā nēe le kpaakpa mɛ́mla aɔ́dā nēe wɛ ɔkwɛ̄yi á.

¹⁰Aá kllɔcɛ́ kú aá jé ɔdā nōo he Óndú ā ɔtū.

¹¹Aá híīī lɛ abɔ̄ mla aɔ́dā nōó tīile ŋ́ nɛ ācɛ gē yá ā ŋ́, é wɛ aɔ́dā kú ajodobū nɛ̄ n. Ikɔkɔ ɔ́ɔmā aá yá ɔ́ tɛ́ɛcɛ péee kú ācɛ kéē má ɔ̄.

¹²Ó kōō ī tūwēyī nɛ̄hi kú ɔ̄cɛ kóō kɛlā lɛyíkwu ɔdā nēé gē yá tayínū ā.

¹³Amáŋ ɔ́dāŋ ka ɔlá le fíyajɛ klá ɔdā dóódu, ɛdɔ kú ɔdā ɔ́ɔmā í yɔ̄ ajodobū gɛ ŋ́, ó má tɛ́ɛcɛ péee ɛɛ́.

¹⁴Ohígbū ka ɔdā dúúmā nēé le mafú péee ɛ́ɛ í yɔ̄ ajodobū gɛ ŋ́. Ó má tɛ́ɛcɛ gēdēē ɛɛ́. Ɔ́ɔmā yá ɛ́ɛ́ nɛ̄ ɔ̄cɛ éyi ka, “Ogbɔlā, le héyī, ká ā le héyī ŋmá ɔlékwū. Cɛ́ɛ́ kú Ohɔ́nyɛtá kóō yá kú ɔlá kóō fíyajɛ klá uwɔ.”

¹⁵Ohígbū ɛ́gɔ́ɔmā aá leyī kwɛcɛ kú ɛ́gɛ́nɛ̄ a gé lā oyēeyī lɛ ā, aá híīī yɔ̄ bɛ̄ɛka aógwuda ā ŋ́, amáŋ aá yɔ bɛ̄ɛka ācɛ nēe jééyī ā.

¹⁶Aá bī ɛga nɛ̄ aá lɛ ā le yúklɔ́ olɔhi, ohígbū ka eko obɔ̄bí yɔ̄ á.

¹⁷Aá híīī líla ŋ́, amáŋ dɔɔ̄kā ɔdā nɛ̄ Óndú ā tíne ká ā yá ā.

¹⁸Aá cɛ̄ kú ejé kóō kwú aá ŋ́ ohígbū koó géē lɔfú lɛ aá pīya ācɛ ɔdāhá glá ā. Ikɔkɔ ɔ́ɔmā je ɛga lɛ Alelékwū kú Ɔwɔicō kóō bī aá yúklɔ́.

¹⁹Aá bī ɛlā kú ipú Aíjē olɔhi, ijē kú ocɛ̄tra mɛ́mla ijē kú ācɛ o yɛce Ohɔ́nyɛtá yɔ̄ gē le kɛlā lɛ iyī aá, aá gwíijē ocɛ̄tra mɛ́mla ijē owóófu iyē kú Óndú ā ipú ɔtū kú aá.

²⁰Aá tá Ɔwɔicō nōo wɛ Ádā alɔ ā ahínyá eko dóódu ohígbū ɔdā dóódu, ohígbū Óndú alɔ Ujísɔ̄si Ohɔ́nyɛtá.

²¹Aá cɛ̄ kú aá tɛ́yí wāajɛ lɛ iyī aá o yá ɛ́ɛ́ kú Ohɔ́nyɛtá kóō lɛ ojīlīmā.

²²Anyā, aá tɛyí wāajɛ lɛ ɔbá aá, ɛ́gɛ́nɛ̄ aá i tɛ́yí wāajɛ lɛ Óndú ā.

²³Ohígbū ka ɔbá lɛ íkwu ō da ɔnya kóō yá ɔda dúú glá ɛ́gɛ́nɛ̄ Ohɔ́nyɛtá lɛ íkwu ō da icɔ́ɔci kóō yá ɔdā dúú glá ā. Ohɔ́nyɛtá ā wɛ ɔ̄cɛ nōo nya ācɛ icɔ́ɔci kú nū tá á, icɔ́ɔci ā kē lɛbɛ̄ɛka ɔkpíyē kú nū ā.

²⁴Ohígbū ɔ́ɔmā, ɔnyā géē lɛyítáajɛ lɛ ɔbá nū dúúdú ɛ́gɛ́nɛ̄ ācɛ icɔ́ɔci géē lɛyítáajɛ lɛ Ohɔ́nyɛtá ā.

²⁵Ɔbá dóódu cíkā ō yíhɔtū tá ɔnyā nū ɛ́gɛ́nɛ̄ Ohɔ́nyɛtá yíhɔtū tá ācɛ icɔ́ɔci anɔ́ɔ o kwú oyēeyī kú nū tónu ohígbū nū ā.

²⁶Ohɔ́nyɛtá kwú oyēeyī kú nū ú tónū o yá ɛ́ɛ́ kóō kwú ɔ̄ ú lɛ Ɔwɔicō bɛ̄ɛka ɛhi ɛyɛ́ɛ́yí ā, ó yá ɛ̄nyā ŋmá lɛ ɔna kú ɔ̄kōolɔhi nōó tá ā, igbīhi nōó bī éŋkpɔ̄ lɛ ɔ́ yá yēŋēē ā,

²⁷o yá ɛ́ɛ́ kóō lɛ icɔ́ɔci ā pīya ákú iyī nū ā, icɔ́ɔci olɔhi nɛ̄hi, ó le yēŋēē, ó lɛ ɛnyá ɛga dóódu ŋ́, ó lɛ ɛ́kpā ŋ́ ámāŋ ka iyē o kwányíhí dúúmā ŋ́.

²⁸Ɔ̄cɛnyīlɔ cíkā ō yíhɔtū tá ɔnyā nū ɛ́gɛ́nɛ̄ ɔkpíyē kú nū he ɔ́ ɔtū lɛ ā. Ɔ̄cɛnyīlɔ nōo yíhɔtū tá ɔnyā nū kē he iyī nū ɔtū.

²⁹Ɔ̄cɛ dúúmā í gē wɔ́tū ɔkpíyē kú nū ŋ́, ikɔkɔ ɔ́ɔmā ó gē bī iyē kú nū lɔɔ́lɔhi klla gē leyīkwu ɔ́ lɔɔlɔhi ɛ́gɛ́nɛ̄ Ohɔ́nyɛtá gē yá mla icɔ́ɔci yíílí á,

³⁰Ohígbū ka alɔ ā wɛ ɔ́wá kú ɔkpíyē kú nū nɛ̄.

³¹“Ɛ́gɛ́nɛ̄ é tá ɔ̄ ipú ɔkpá kú Ɔkpíihɔ ā, ohígbū ɔ́ɔmā ɔ̄cɛnyīlɔ géē nyɛ̄ɛ̄ ŋmá ɔlɛ́ ádā nū mɛ́mla ɛ́nɛ́ nū cɛ́ɛ́ ó gáā bɔ́há mla ɔnyā nū, anɔ́ɔ uwá ɛplɛ́ɛpa le pīya ɔkpíyē ékpónú.”

³²Ipú ɔkpá kú ɛlā Ɔwɔicō nyā, ó lɛ ɛlā ɔ̄kwɛ̄yi nōo cɛgbá nɛ̄hi nēé mafú lɛ ɔ̄cɛ dúú ɛ́ɛ́ ŋ́. N jé ka ɛla nēe bá nyā yɔ̄ ī kɛlā lɛyíkwu Ohɔ́nyɛtá mɛ́mla ācɛ icɔ́ɔci ā.

³³Amáŋ ɛlā nēe bá nyā gē kɛlā lɛyíkwu aá. Ɔbá éyééye í yíhɔtū tá ɔnyā nū bɛ̄ɛka iyī nū ā piíí, ɛjɛ̄ɛ̄jī ɔnyā í lɛ ojīlīmā ce ɔbá nū piíí.