Read idoma ĀCƐ Ɛ́FĒSƆSI 6 Bible Online

ĀCƐ Ɛ́FĒSƆSI 6 - idoma bible

ĀCƐ Ɛ́FĒSƆSI 6

¹Ayípɛ̄, abɔ̄ aá le pīya ācɔ̄lóhɔ́nyɛtá ā, aá tɛ́yí wāajɛ lɛ ádā aá mɛ́mla ɛ́nɛ́ aá, ohígbū ka ɛ̄nyā wɛ ɔdā nɛ̄ aá cíkā ō yá á.

²“Aá lɛ ojīlīmā ce ádā aá mɛ́mla ɛ́nɛ́ aá” (ɛ̄nyā wɛ íne aflɛ́yí nēe cokónu o yá ɔdā olɔhi lɛ ɔ̄cɛ nōo í lɛyítáaj lɛ ɔ́ á.)

³“Cɛ́ɛ́ aá géē jɛ̄ gɔbū ipú ɔdā dóódu nɛ̄ a lɛ abɔ̄ ka aá kwu ɔ́ gē yá, aá klla kē í yēeyī gbojī ipú ɛcɛ nyā ā.”

⁴Ācɛ o ma ayí, aá híīī ka ɔdōōbɔ̄bí le ayípɛ̄ ɔlɛ aá ŋ́, aá kē yá uwā ɔdā dúúmā nōo géē yá kéē cɔ̄nū mla aá ŋ́ ikɔkɔ ɔ́ɔmā, aá bī uwā jɛ̄ kú aá nwū uwā ɔdā nēé cíkā ō yá piíí ā abɔ̄ aá wɛ ācɔ̄lóhɔ́nyɛtá ā.

⁵Aá nēe wɛ ɔfiyɛ ā, aá tɛ́yí wāajɛ lɛ aɔ́kpani aá kú ipú ɛcɛ nyā, kú aá lɛ ojīlīmā ce uwá dúúdú ŋmá ɔtū ékpónú. Aá géē yá ɔdā nēé da aá ɛ́gɛ́nɛ̄ aá géē yá ɔdā nɛ̄ Ohɔ́nyɛtá da aá.

⁶Aá híīī lɛ ojīlīmā ce aɔ́kpani aá eko nēé lɛ eyī kwajɛ ōfūnū ŋ́ ohígbū koó géē lɛbɛ̄ɛka aá gē dɔɔ̄kā kéē ka ka aá gē yá ɔdā olɔhi íbí, amáŋ aá bī ɛjɛ̄ɛ̄jī ɔfú kú aá le yá ɔdā nɛ̄ Ɔwɔicō tíne ā bɛ̄ɛka ācocɛhɔ̄ kú Ohɔ́nyɛtá ā.

⁷Aá nēe wɛ ɔfiyɛ ā, aá yúklɔ́ kú aá mla ɔtū nɛ̄hɛ́ bɛ̄ɛka úklɔ́ nɛ̄ aá gē yá lɛ Ɔwɔicō ā, nōó wɛ o yá lɛ ɔ̄cɛ ɔlamu icííci ŋ́ mā.

⁸Aá le jé ka ɔ́dāŋ nɛ̄ ɔ̄cɛ kōō wɛ ɔfiyɛ o, ó kōō wɛ ɔfiyɛ nóo, Ɔwɔicō gē gbā ulé kú úklɔ́ olɔhi nɛ̄ ɔ̄cɛ yá ā lɛ ɔ́.

⁹Aá nēe wɛ aóndú kú ɔfiyɛ ā, aá yá ucē nōó cíkā ā lɛ ācocɛ̄hɔ̄ kú aá, aá híīī yɔ̄ gē tū uwā ufi ŋ́, aá bla ka aá mɛ́mla ācocɛ̄hɔ̄ kú aá lɛ ɛdɔ ɔ̄cɛ ékpó ɔkpáncō nōo wɛ ɔkpani kú aá ɛplɛ́ɛpa, nōó gē méyīgoo kú ɔ̄cɛ eko nōó ī kɛpɔ̄ tū ɛjɛ̄ɛ̄jī ācɛ ŋ́.

¹⁰Ámōōmɛ ɛlā nyā wɛ, opīyatɔ̄há kú aá mla Óndú ā kóō lɔfú tū aá iyē ŋmá ipú ɔfú nɛ̄hi kú nū.

¹¹Aá lɛ odúúdú ɔkplɛ́fú nɛ̄ Ɔwɔicō kpó lɛ aá ā kpó tū iyē cɛ́ɛ́ kú aá géē lɔfú nunu tá ebilíi mla ula kú nū ā.

¹²Ohígbū ka alɔ í yɔ̄ ī kpɛ́fú tá alɛɛcɛ ɔhá ŋ́, amáŋ alɔ gē kpɛ́fú tá aálelékwū obɔ̄bíipú nēe bá ipú ojuja, nēe gē gbāājɛ ā. É lɛ íkwu mɛ́mla ɔfú kú alelékwū obɔ̄bí nēé gē pā eko kú ajodobū nɛ̄ alɔ bá anú nyā ā.

¹³Ohígbū ɔ́ɔmā aá lɛ ɔkplɛ́fú nɛ̄ Ɔwɔicō kpó lɛ aá a kpó tū iyē abālɔbányā! Cɛ́ɛ́ eko nɛ̄ ɛ̄cī obɔ̄bī ā gā, aá gáā kwu ŋmá ɛgiyí ɔlɛlā nōo kpɔ́fú kwu aá ā ŋ́. Cɛ́ɛ́ eko nɛ̄ aá lɛ unu nu kwɛyí nɛ̄ aá géē háyi glá kpɔ́.

¹⁴Ohígbū ɔ́ɔmā aá háyi le tútū mla ɛlā ɔkwɛ̄yi lɛyíkwu Ɔwɔicō ā kwú ɛ́nyɔ́ bɛ̄ɛka ɔkpá okwɛ́nyɔ̄ ā, o yɔ̄ gē yá ɔdā okpaakpa ojigógó ā kóō lɛbɛ̄ɛka ɔkplɛ́fú o klá ɔtū kú aá ā.

¹⁵O tútū kú aá gaá tɔ́ɔna kú ɔ̄kōolɔhi kú ɛbɔ́ ā tɛ́ɛcɛ géē lɛbɛ̄ɛka áblákpá o wikpó kú aá.

¹⁶Aá bī ɔtōōkpóce Ɔwɔicō bɛ̄ɛka ɔkplɛ́fú ā. Aá géē bī ɔkplɛ́fú nyā le nyí ɔlá kú ɔyí ō cɔ̄lá nɛ̄ ebilíi ī tá lɛ aá ā.

¹⁷Ká Ɔwɔicō kóō nyā aá tá bɛ̄ɛka ɔkpú ō kwɛyí ā. Aá mīyɛ ɛlā kú Ɔwɔicō nōo lɛbɛ̄ɛka ɔkpacaŋ́gelī ā ŋmá abɔ̄ Alelékwū Ihɔ.

¹⁸Aá gbɔ̄ɔkɔ abɔ̄ aá gē yá odúúdú aɔ́dā nēe bá nyá ā, kú aá yɔ̄ ī ba Ɔwɔicō kóō tá aá abɔ̄. Ipú ɔdā dúú nɛ̄ aá bī abɔ̄ gē yá ā, aá gbɔ̄ɔkɔ, ɛ́gɛ́nɛ̄ Alelékwū kú Ɔwɔicō lɛ ɔfú tū aá iyē lɛ ā. Ohígbū ɛ̄nyā, aá cīgbīhi ŋmá ɔkɔ nɛ̄ aá gē gbā ā ŋ́. Eko dúú nɛ̄ aá gē gbɔ̄ɔkɔ, aá bēē gbɔ̄ɔkɔ ohígbū odúúdú ācɔ̄lóhɔ́nyɛtá.

¹⁹Aá gbɔ̄ɔkɔ lɛ Ɔwɔicō ohígbū um dúú, cɛ́ɛ́ kú Ɔwɔicō kóō lɛ ɛlā nɛ̄ n cíkā ō ka ā da um eko dúúmā nɛ̄ n gbɔɔ́ ō kɛlā, cɛ́ɛ́ ká n̄ géē lɔtū kɛlā péee abɔ̄ n yɔ̄ ī yá kú ācɛ kéē lɛ ɔdā nēé tɛtɛ jé lɛyíkwu ɔ̄kōolɔhi ā gbɔbū ŋ́ mā jé ā.

²⁰Ó yá ɛ́ɛ́ kú ācɛ alɛwa kéē lɛ odée jé ohígbū ɔ̄kōolɔhi ā nɛ̄ n wɛ ɔ̄cɛ okwɛyí Ohɔ́nyɛtá á, nááná nɛ̄ n yɔ̄ agbá abālɔbányā ā, aá gbɔ̄ɔkɔ lɛ Ɔwɔicō ɛ́gɛ́nɛ̄ ó cíkā ā.

²¹ Utayicíkɔ̄si, ɔ̄cɔlóhɔ́nyɛtá ɔ́mpa alɔ nōo he alɔ ɔtū, nōo cɛ̄ Óndú ɛhɔ̄ ŋmá ɔtú ékpónú ipú úklɔ́ nōo yá lɛ ɔ́ ā, ó géē da aá ɛjɛ̄ɛ̄jī ɔdā nōo húmáyī yá um ā, cɛ́ɛ́ aá lɔfú jé ɛ́gɛ́nɛ̄ āhɔ̄ kú um lɛ aá.

²²Ɔ́ɔmā yá ɛ́ɛ́ nɛ̄ n yɔ̄ gē ka lɛ ɔ́ kóō wā í lɛ aá má kóō ka lɛ aá ɛ́gɛ́nɛ̄ alɔ bá lɛ ā, kóō kē lɔfú tū aá iyē.

²³Ɔwɔicō Ádā alɔ mɛ́mla Óndú Ujísɔ̄si Ohɔ́nyɛtá kóō yá kú odúúdú ayínɛ́ nēe wɛ ācɔ̄lóhɔ́nyɛtá ā kéē lā tɔ̄há mla ɔtūnɛ̄hɛ́, kéē yíhɔtū tá iyī uwā. Ɔwɔicō mɛ́mla Ohɔ́nyɛtá kéē yá kú aá lɔtūce uwá.

²⁴N gē gbɔ̄ɔkɔ kú Ɔwɔicō kóō je ɛhi kú eyīnyinyi lɛ odúúdú aá nēe yíhɔtū tá Óndú alɔ Ujísɔ̄si Ohɔ́nyɛtá ā oŋmá eko tá eko ā.