Read idoma ĀCƐ UFÍLIPĀYI 2 Bible Online

ĀCƐ UFÍLIPĀYI 2 - idoma bible

ĀCƐ UFÍLIPĀYI 2

¹Ohɔ́nyɛtá gē lɔfú tū aá iyē, ihɔtū nōo le lɛ aá gē tú aá ɔtūlé. Alelékwū kú Ohɔ́nyɛtá cɛ̄ lɛ aá ī létɔ̄há. Aá kē gbonɛnɛ lɛ iyī aá, klla gē ményinyi iyī aá.

²N gē gbɔ̄ɔkɔ lɛ aá kú aá yá kú ɔtū kóō le he um nɛ̄ɛ̄nɛ̄hi abɔ̄ aá gē gbɛlá ɛdɔ ékpó ā, nɛ̄ aá gē yíhɔtū tá iyī aá ɔwɛ ékpó mɛ́mla aá bī ɔtū ékpó mɛ́mla ɛdɔ kú ocɛ̄ tɔ̄há ékpó ā.

³Aá híīī yá ɔdā dúúmā nōo géē mafú ka aá gē dɔɔ̄kā odée lɛ iyi aá ofunu ŋ́ ámāŋ ka ohígbū ka aá géē bī iyī aá gwō nɛ̄ɛ̄nɛ̄hi ŋ́. Aá tá iyī aá wāajɛ ipú ɔdā dúú nɛ̄ aá gē yá lɛyíkwu ɔ́mpa aá ā, aá gbɛlá ojigógó ka ācɛ ɔhá ɔɔ́ yá ɔdā olɔhi fíyɛ́ aá á.

⁴Aá híīī gbɛlá kwu aɔ́dā kú aá ōfūnū ŋ́, amáŋ aá gbɛlá kwu ákú ācɛ ɔhá dúú.

⁵Aá cēyītīkwū ojigógó kú aá lɛ ɛdɔ odo nyā lɛyíkwu iyī aá ɛ́gɛ́nɛ̄ nɛ̄ Ohɔ́nyɛtá lɛ ā.

⁶Ó húmáyī lɛbɛ̄ɛka Ɔwɔicō ā, amáŋ ó gbɛlá ka anúɔ le jōnjīlɛ̄ abɔ̄fú mla Ɔwɔicō ŋ́.

⁷Amáŋ ikɔkɔ nōó í yá lɛ ā, ó cɛ̄ ŋmá ɔtū ékpó kú nū kóō mabɔ̄ āhɔ̄ nɛ̄hi nōó yɔ̄ gbɔbū ā tá. Anɔ́ɔ ó kwú iyī nū ú yá bɛ̄ɛka ɔ̄cocɛ̄hɔ̄ ā. Ó kōō le pīya ɔlɛɛcɛ, anɔ́ɔ ācɛ kē má ɔ̄ bɛ̄ɛka ɔlɛɛcɛ á.

⁸Ó lɛ ojīlīmā kú nū tū wāajɛ, anɔ́ɔ ó tɛ́yí wāajɛ lɛ Ɔwɔicō jāā gɛjī nōó gekwú á. Ikwū ūwēyī nōó kōō kwú ɔcóōnyɔ́kpá á.

⁹Ohígbū ɔdā nōó yá nyā, Ɔwɔicō kwú ɔ̄ ú gicō ga ɛga ojīlīmā nōo fíyɛ́ dúú ipú ɔkpáncō ā Anɔ́ɔ ó kwú iyē nōo fíyɛ́ iyē ɔhá dóódu ú lɛ ɔ́ á.

¹⁰Ohígbū ɔ́ɔmā, ipú ojīlīmā ō ce iyē nɛ̄ Ujísɔ̄si lé ā, odúúdú ācɛ nēe yɔ̄ ɔkpáncō mɛ́mla aɛ́nɛ́ o bá ipú ɛcɛ mɛ́mla aɛ́nɛ́ e bá ɛga nōo yɔ̄ ɛháajɛ kú ɛcɛ ā, géē lɛ okwúukwu kwajɛ, eko nēé le iyē ɔ́ɔmā hī.

¹¹Anɔ́ɔ odúúdú ācɛ kē í lɛ okónu cɛ̄ ɔ́ tɛ́ɛcɛ ka Ujísɔ̄si Ohɔ́nyɛtá ā wɛ Óndú á, ɛ̄nyā géē yá kú ācɛ kéē wóófu Ɔwɔicō Ádā ā.

¹²Ohígbū ɔ́ɔmā, ācohumɔtū, eko nɛ̄ n yɔ̄ mla aá ā, aá mīyɛ ɛlā nɛ̄ n yɔ̄ gē nwū ā. Ó kōō cɛgbá fíyɛ́ kú aá lɛyítáajɛ gā um abālɔbányā nɛ̄ ń yɔ̄ mla aá gɛ ŋ́ mā ā. Aá bī ɛjɛ̄ɛ̄jī ɔfú nɛ̄ aá lɛ ā yɔ̄ ī yúklɔ́, cɛ́ɛ́ kú ɔdā dúúmā kóō hile ŋmá ɔdā olɔhi nɛ̄ aá yɔ̄ gē yá ā ŋ́, aá lɛ ojīlīmā ce Ɔwɔicō dúúdú abɔ̄ aá gē yá ɛ̄nyā ā.

¹³Ohígbū ka Ɔwɔicō yɔ̄ ipú aá eko dóódu yɔ̄ gē yá ká ɔtū kóō he aá, cɛ́ɛ́ kú aá yá ɔdā nōó dɔɔ̄kā kú aá yá ā.

¹⁴Eko dúúmā nɛ̄ ā ī yá ɔdā dúúmā, aá híīī kiŋini ŋ́ ámāŋ ka o yɔ̄ gē táafu mla iyī aá ŋ́.

¹⁵Cɛ́ɛ́ kú aá lɛ ɛnyá dúú ŋ́, ká ɔ̄cɛ dúú kóō má ɛpɔ̄bí kú aá ŋ́, ɛ́gɛ́nɛ̄ aá wɛ ayípɛ̄ ɔlɛ́ Ɔwɔicō nɛ̄ ɔdōōbɔbí dúú í kwu aá iyē ŋ́ mā. Abɔ̄ aá lā ipú ɛcɛ nɛ̄ ācɛ nēe ī yá uce obɔ̄bí mɛ́mla ācobīyíne bá ā. Aá í fíyajɛ ɔtāhɛ̄ uwā bɛ̄ɛka inyílɔ́wɔ ipú ɛcɛ odobū ā.

¹⁶Abɔ̄ aá gē bī olɛhɔ̄ nōo gē mafú lɛ ācɛ ɔwɛ nēé lɔfú lā oyēeyī ɔkwɔ̄ɔ̄kwɛ̄yi glá ā. Ɔ́dāŋ nɛ̄ aá le yá lɛ ā, n géē lɛ ɔdā ō labɔ̄ bá ɔ̄ ká n̄ bī aá gwō ɛ̄cī nɛ̄ Ohɔ́nyɛtá géē wā ā. Ohígbū ka ɛdɔ ɔ̄cɛ nɛ̄ aá gbla ā géē mafú ká ɔfú nɛ̄ n le tīiyē mɛ́mla úklɔ́ nɛ̄ n yá ā í bónū gɛ ŋ́.

¹⁷Ɔ̄cɛ í jé ŋ, é lɔfú ŋmó um, cɛ́ɛ́ ɔwɛ ɛ́gɛ́nyā n géē lɛbɛ̄ɛka ɛhi kú oyī nēé cē bá ɛyí ede kú ɛya nɛ̄ aá gwó lɛ Ɔwɔicō ohígbū ka aá lɔtūce ɔ́. Ɔ́dāŋ ka n gekwú, ɔtū he um cɛ́ɛ́ ká n̄ gwéeyē mla odúúdú aá.

¹⁸Ɔwɛ ékpó ɔ́ɔmā, aá í gwéeyē piíí dúú cɛ́ɛ́ kú aá yá ká um gwéeyē mla aá dúú.

¹⁹Ɔ́dāŋ nɛ̄ Óndú ā cɛ̄, n lɔtūce ka n géē tū Utímōti ɛhɔ̄ fu aá eko kpiíí, cɛ́ɛ́ ká ɔ̄kā kú ɛ́gɛ́nɛ̄ aá bá lɛ nōó géē kā um ā í yá kú ɔtū kú um kóō gāājɛ.

²⁰Ó wɛ ɔ̄cɛ nɛ̄ anú ōfōōfūnū nɛ̄ n lɛ nōo lɛ ɛlá wu olɔhi kú aá ɔkwɔ̄ɔ̄kwɛ̄yi á.

²¹Ɛjɛ̄ɛ̄jī ācɛ ohile yɔ̄ ī gbɛlá kwu ɔwɛ nēé í tá iyī uwā abɔ̄ ā ōfōōfūnū. É gbɛlá kwu ɔwɛ nēé géē yá ɔdā nōo kwu Ujísɔ̄si Ohɔ́nyɛtá ɔtū fúlufúlu ŋ́.

²²Aá abɔ̄yī aá tɛtɛ jé ɛ́gɛ́nɛ̄ ó mafú lɛ aá ka anúɔ wɛ ɔ̄cɛ ɔkwɛyi ā, mɛ́mla ɛ́gɛ́nɛ̄ Utímōti mɛ́mla ami lɛbɛ̄ɛka ɔyí mɛ́mla ádā nū ā, alɔ yúklɔ́ tɔ̄há o yá ɛ́ɛ́ kú ācɛ alɛɛlɛwa kéē lɛ ɔ̄kōolɔhi ā pó.

²³N lɔtūce ka n géē tū ɔ̄ ɛhɔ̄ fú aá ɔkwɔɔkwu nɛ̄ n le jé kpɔ́cíí kéē géē hɛ́ um tá ámāŋ ka n géē yɔ̄ agbá kpɔ́.

²⁴N lɔtūce Óndú ā ka ami abɔ̄yī um géē wā í má aá.

²⁵N gbɛlá koó cɛgbá ká n̄ lɛ Epafrodítɔ̄si, ɔyínɛ́ alɔ ɔ̄cɔlóhɔ́nyɛtá, ɔ́mpā alɔ tɛhɔ̄ fu aá. Ó wɛ ɔ̄cɛ nōo yúklɔ́ ohígbū ɔ̄kōolɔhi ā. Ami mɛ́mla anú yúklɔ́ tɔ̄há, o yá ɛ́ɛ́ kú ɔ̄kōolɔhi ā kóō mɛ ŋ́. Anú ā klla wɛ ɔ̄cotɛhɔ̄ kú aá nōo wā í tá um abɔ̄ á.

²⁶Ɔtū nwūla nwula yɔ̄ gē yá ɔ̄ nɛ̄ɛ̄nɛ̄hi kóō lɛ aá má. Ɔtū le bīya lɛ ɔ́ ohígbū ka aá le pó ka iyē í lɔfú lɛ ɔ́ ŋ́.

²⁷Ɔkwɔ̄ɔ̄kwɛ̄yi ó doōcē, ó hile lígíí kóō gekwú. Amáŋ Ɔwɔicō lɛ eyīnyinyi iyī nū má. Ó wɛ anú ōfōōfūnū ŋ́, amáŋ ó ményinyi um dúú, ó nya um tá ŋmá ɔtunōbí nɛ̄hi fíyɛ́ dúú.

²⁸Ami abɔ̄yī um gē yɔ́tū nwula nwula kú n̄ kwú ɔ̄ ú tɛhɔ̄ gé lɛ aá, cɛ́ɛ́ ká ɔtū kóō he aá eko nɛ̄ aá lɛ ɔ́ má kpɔ́, cɛ́ɛ́ ká ɔtūnōbí kú um kóō mɛ tāajɛ.

²⁹Aá mīyɛ ɔ́ eko ɔ́ɔmā bɛ̄ɛka ɔ̄cɔlóhɔ́nyɛtá ékpó mla aá ipú opīyatɔhá mla Óndú ā. Aá le ojīlīmā ce odúúdú ācɛ nēe yá ɛdɔ kú ɔdā nōó yá ā.

³⁰Ohígbū ka ó hile ligií kóō kwú oyēeyī kú nū í tónu ohígbū úklɔ́ nōó yɔ̄ ī yá lɛ Ohɔ́nyɛtá ā. Ó yá odúúdú ɛ̄nyā o yá ɛ́ɛ́ kóō tá um abɔ̄ ɔwɛ nɛ̄ aá abɔ̄yī aá í tá um abɔ̄ glá ŋ́ mā.