Read idoma ĀCƐ UFÍLIPĀYI 3 Bible Online

ĀCƐ UFÍLIPĀYI 3 - idoma bible

ĀCƐ UFÍLIPĀYI 3

¹Ayínɛ́ um, ācɔ̄lóhɔ́nyɛtá, ɛ̄nyā wɛ ɛlā nɛ̄ n bī le ŋmó ɔkpá kú um ɛyí á. Aá gwéeyē ohígbū ka aá le pīyatɔ̄há mla Óndú ā. Ó je unwalu gā um ŋ́ ɔ́dāŋ nɛ̄ n lɛ ɔdā nɛ̄ n tɛtɛ ka gbɔbū ā ka kpɔ́. Ó géē tá aá ikpó kwajɛ.

²Aá leyīkwɛcɛ ohígbū ācɛ nēe gē yá ɔdōōbɔ̄bí ā, aéwo ɔdāhá, ācɛ nēe bá abɔ́ɔ ā wɛ ācɛ nēe ī pi ācɛ kéē lɛ apī hɛ́ piíí ā.

³Alɔ ā wɛ ācɛ nēe háápī ɔwɛ ɔkwɛ̄yi á, ó wɛ uwá ŋ́, ohígbū ka alɔ ī gbā Ɔwɔicō ɛ̄gbā ohígbū ka alelékwū kú nū gē tá alɔ abɔ̄, alɔ kē gē gwéeyē ohígbū oyēeyī kú alɔ nōo le pīyatɔ̄há mla Ohɔ́nyɛtá Ujísɔ̄si ā, alɔ í kē kpɔ́tūce uculo kú ɛ́nɛ́bɛ́ ɔkpíyē ŋ́.

⁴Ami ā náana ā, lɔfú kpɔ́tū kú um ce ɛdɔ aɔ́dā ɛ́gɔ́ɔmā dúú. Ɔ́dāŋ nɛ̄ ɔ̄cɛ dúúmā gbɛlá ka anúɔ lɔfú kpɔ́tūce uculo kú ɛ́nɛ́bɛ́ ɔkpíyé nɛɛ. Ami ā lɛ ɔdā nōo yá nɛ̄ n cíkā ō yá lɛ ā fíyɛ́.

⁵É hɛ́ um apī ɛ̄cī ɔ́maahāapa, ɛ́nɛ́ um mɛ́mla ádā um wɛ ācɛ Ísrɛ̄lu, ɛ́nɛ́ um mɛ́mla ádā um ŋmá ipɔ́ɔma kú Ubénjamin, ádáádā um húmáyī wɛ ācɛ Uhíbru, n yá ɛjɛ̄ɛ̄jī ɔdā dúúmā nɛ̄ íne kú ācɛ Ujíyu ka ka n̄ yá ā abɔ̄ n wɛ ɔwá kú Ufarisīi ā.

⁶N yá ɔtūcaca ká n̄ cɛ̄ Ɔwɔicō ɛhɔ̄ nɛ̄ɛ̄nɛ̄hi jāā gbéeko nɛ̄ n yá ācɛ icɔ́ɔci ā ōwē nɛ̄ɛ̄nɛ̄hi. Ɔ́dāŋ ka a yɔ̄ gē gbɛlá kwu ɛ́gɛ́nɛ̄ ɔ̄cɛ lɔfú le kpaakpa oŋmá lɛ o yá ɔdā nēé je ɔ́da ipú íne kú ɔ̄cɛ kóō yá ā nɛɛ, ɔ̄cɛ dúú í gáā má ɛpɔ̄bí kú um āyā ɔ́ɔmā ŋ́.

⁷Amáŋ odúúdú aɔ́dā nɛ̄ n tɛtɛ gē yá nɛ̄ n lɔfú ka keé wɛ itene kú um ā, abālɔbányā n le má keé lɛ itene dúúmā ŋ́, ohígbū ɔdā nɛ̄ Ohɔ́nyɛtá yá ga um ā.

⁸Ó wɛ aɔ́dā nēe bá abɔ́ɔ ā ōfōōfū uwā nɛ̄ n ka keé tīile gā um gɛ ŋ́ mā ŋ́, amáŋ n je odúúdú aɔ́dā nɛ̄ n tɛtɛ yá ā bɛ̄ɛka ífi ā dúúdú ohígbū Óndú Ohɔ́nyɛtá Ujísɔ̄si nɛ̄ n jé ā. Ɔ́ɔmā tīile ga um fíyɛ́ á. Ohígbū nū ā n lɛ ɛjɛ̄ɛ̄jī ɔdā nɛ̄ n yɔ̄ gē yá gbɔbū ā kpó bónū, n je uwá bɛ̄ɛka īmū icííci ā, o yá ɛ́ɛ́ ká n̄ lɛ ile ka n wɛ ákú Ohɔ́nyɛtá ā lɛ.

⁹Cɛ́ɛ́ ká n̄ le pīya ékpó mla anú dúúdú. Ń wɛ ɔ̄cɛ okpaakpa eyī Ɔwɔicō ohígbū ka n yá ɔdā nɛ̄ íne kú Umósīsi ka kā n̄ yá ā gɛ ŋ́. N le kpaakpa iyɔ̄bū Ɔwɔicō abālɔbányā ohígbū ɔtū nɛ̄ n kpóce Ohɔ́nyɛtá ā. Ɔwɔicō yá ɛ́ɛ́ n le kpaakpa iyɔbū nū á, ohígbū ka n kpɔ́tū ce Ohɔ́nyɛtá.

¹⁰Odúúdú ɔdā nɛ̄ n tíne ā wɛ ká n̄ le pīyatɔ̄há mla Ohɔ́nyɛtá, cɛ́ɛ́ ká n̄ lɛ ɛdɔ ɔfú nōo je Ohɔ́nyɛtá héyī ŋmá ɔlékwū ā lɛ, ká n̄ kē lɛ ɛdɔ ōwē nōó má ā má, ká n̄ kwú ɛdɔ ikwū nōó kwú ā.

¹¹Oŋmá ɔwɛ ɛ́gɛ́nyā n leyīce ka Ɔwɔicō abɔ̄yīnū géē je ami abɔ̄yī um héyī ŋmá ɔlékwū.

¹²Ń gbɛlá ka n lɛ ɔdā nɛ̄ n cíkā ō yá ā yá kwɛyí ɛ́ɛ́ ŋ́, ámāŋ ka n le pīya ɛdɔ ɔ̄cɛ nɛ̄ n cíkā o wɛ ā ɛ́ɛ́ ŋ́. Amáŋ n bī ɛjɛ̄ɛ̄jī ɔfú kú um yɔ̄ ī ceyītīkwū ká abɔ̄ kú um kóō lɛ ɔdā nōo yá ɛ́ɛ́ nɛ̄ Ohɔ́nyɛtá Ujísɔ̄si lɛ um pīya ákú nū ā kwú.

¹³Ācɔ̄lóhɔ́nyɛtá ɔ́mpā um, aá jé kpɔ́cií ka ń gbɛlá ɔkwɔ̄ɔ̄kwɛ̄yi ka abɔ̄ kú um lɛ ɔ́ kwú ɛ́ɛ́ nɛɛ ŋ́, amáŋ ɔdā ékpó nɛ̄ n gē yá nááná ā wɛ ka, ń lɛ ɛlá wu aɔ́dā nēe bá igbīhi ā gɛ ŋ́, cɛ́ɛ́ ká n̄ lɛ inya ā kwu gaajɛ ɔdā nōo yɔ̄ iyɔbū ā.

¹⁴Ohígbū ɔ́ɔmā, n bī ɛjɛ̄ɛ̄jī ɔfú kú um cēyītīkwū nɛ̄hi lɛ inya ā kwu gaajɛ, o yá ɛ́ɛ́ ká n̄ mīyɛ ɛhi nōo yɔ̄ ɔkpáncō nɛ̄ Ɔwɔicō hī um igwú nū ŋmá lɛ ɔdā nɛ̄ Ohɔ́nyɛtá Ujísɔ̄si yá ā.

¹⁵Odúúdú alɔ nēe le yɛ ligbó ipú ɛlɔ̄ɔwɔicō ā cíkā ō gbɛlá ɔwɛ ɛ́gɛ́nyā. Amáŋ ɔ́dāŋ ka ācɛ ōhī kú aá í gbɛlá ɔwɛ ɛyɛ́ɛ́yí ŋ́ nááná Ɔwɔicō géē yá kú ācɛ ɛ́gɔ́ɔmā kéē jɛ́ɛyí nū piíí.

¹⁶Ɛ̄nyā wɛ ɔdā nɛ̄ n ka á, alɔ yɛ gɔbū kú alɔ yɛce ɛdɔ kú íne ékpó nɛ̄ alɔ yɛce jāā kwu abālɔbányā ā.

¹⁷Ācɔ̄lóhɔ́nyɛtá ɔ́mpā um, aá yá ɔdā dúúmā nɛ̄ aá má um yɔ̄ gē yá ā. Aá leyī kwɛcɛ kú aá gbla ucē okpaakpa nɛ̄ alɔ mafú lɛ aá ka aá cíkā ō yá ā.

¹⁸Ɔdā nɛ̄ n gáā ka lɛ aá ā, n tɛtɛ lɛ ɔ́ ka lɛ aá igbalɛwa ɛɛ́, anɔ́ɔ abālɔbányā n gáā ka lɛ aá kpɔ́, yɔ̄ ī jikwū ohígbū ka ɛlā ā kwú um iyē nɛ̄hi. Ó lɛ ācɛ alɛwa kú aá nōo ŋmá lɛ ɛdɔ kú oyēeyī nēé lā ā, lɛ iyī uwā pīya aólɛlā kú ikwū kú Ohɔ́nyɛtá ɛyí ɔcóōnyɔ́kpá.

¹⁹É géē kpó uwā yíífi ipú ɔlikɔtɔ, ohígbū ka ɔdā nēé gē gbā ɔ̄ ɛ̄gbā ā wɛ ɔdā nɛ̄ uwá abɔ̄yī uwā dɔɔ̄kā lɛ ɔkpíyē kú uwā ā. É gē kɔbɔ́ɔ̄cɛ kú ɔdā ōhī nēé gē yá ā, nēe cíkā ō wɛ ɔdā ō tū uwā uwēyī. É yɔ̄ gē gbɛlá kwu o yɔ̄ í yá ɔdā nɛ̄ ācɛ kú ɛcɛ nyā gē yá ā.

²⁰Alɔ ā ɔkpáncō wɛ ɔlɛ́ abɔ̄yī alɔ á. Alɔ bī ɔtū nwula nwula gē gbēyī ohɔ́nyɛtá kú alɔ, Óndú Ujísɔ̄si Ohɔ́nyɛtá ā, kóō wā ŋmá ɔkpáncō.

²¹Ó géē bī ɔfú nōó í bī le yá kú ɔdā dóódu kéē bá ɛháajɛ nū ā, le ɔkpíyē kú alɔ nōo le gbɛnɛkɛɛ nōo klla ī kwú ā pīyabɔ̄ bɛ̄ɛka ákú nū, nōo tū ɛgahi nɛ̄ɛ̄nɛ̄hi ā.