Read idoma ĀCƐ UFÍLIPĀYI 4 Bible Online

ĀCƐ UFÍLIPĀYI 4 - idoma bible

ĀCƐ UFÍLIPĀYI 4

¹Abɔ̄ ó le lɛ ā, ayínɛ́ ohumɔtū, aá he um ɔtū nɛ̄ɛ̄nɛ̄hi, abɔ̄ aá kwú um nɛ̄ɛ̄nɛ̄hi. Aá yá ká n̄ gwéeyē nɛ̄ɛ̄nɛ̄hi, n kē ī bī aá gwō nɛ̄ɛ̄nɛ̄hi! Oŋmá odúúdú ɛlā nɛ̄ n ka, ayínɛ́ ohumɔtū, aá cɛ̄ lɛ agbafú gbo aá ŋ́, aá háyi kpaakpa lɛ Óndú ā.

²N gē gbɔ̄ɔkɔ lɛ ācɛnyā ɛpa nēe bá nyā, Uyodíya mɛ́mla Usíntīki. Kóocōō aá lɛ iyī aá kagwó abɔ̄ aá wɛ ācɔ̄lóhɔ́nyɛtá ékpó ipú Óndú ā.

³Awɔ ā dúú, ɔ̄cɛ nōo yúklɔ́ mla um lɔɔlɔhi ā. N dɔɔ̄kā kú ā lɛ ācɛnyā ɛpa nēe bá nyā kagwó. Ohígbū ka ami mɛ́mla uwá gē yúklɔ́ nɛ̄ɛ̄nɛ̄hi tɔ̄há yɔ̄ ī tɔ́ɔna kú ɔ̄kōolɔhi ā lɛ ācɛ alɛwa. Alɔ mɛ́mla Uklɛ́mɛ̄nti mɛ́mla ācoyúklɔ́ lɛ Óndú ā ɔ́mpā um, nɛ̄ iyē kú uwā yɔ̄ ipú ɔkpá kú ācɛ nēe yēeyī ā.

⁴Ɔtū kú aá kóō wɛ ɛnɛ̄hɛ́ ojigógó abɔ̄ aá pīyatɔ̄há mla Óndú ā.

⁵Aá kóō yɔ̄ gē pi ojigógó ká ákú aá le kpaakpa piíí ā ŋ́. Óndú ā í wā ānāānā ā.

⁶Ɛlā ɔdā dúú kóō kwú aá ɔtū ŋ́. Eko dúú nɛ̄ aá ī gbɔ̄ɔkɔ lɛ Ɔwɔicō nɛɛ, aá ba Ɔwɔicō ɛ̄ba kú ɔdā nōo ce aá ɛgbá, amáŋ ɛ̄nɛ̄ aá kē lɛ ɛ́ɛ́ ŋ́ mā ā. Aá yɔ̄ gē tá ɔ̄ ahínyá eko dúú nɛ̄ aá yɔ̄ gē ba ɔdā dúú ŋmá ɛgiyí nū.

⁷Cɛ́ɛ́ Ɔwɔicō lɛ ɛbɔ́ kú nū nōó tōō jɛ́ɛyí nū ŋ́ mā je lɛ aá, nɛ̄ ɔdā dúú ī gáā lɛ abɔ̄ kwu ɔtū mɛ́mla odo kú aá glá ŋ́. Ɛ̄nyā lɛ ā ohígbū ka aá le pīyatɔ̄há mla Ohɔ́nyɛtá.

⁸Ɛlā ámōōmɛ, kú um ā bá yɔ̄ á, ayínɛ́ um, aá gbɛlá kwu aɔ́dā nēe yɔ̄ gē yá nēe lɔhi ofūnū, nɛ̄ ācɛ ɔhá cíkā ō cɛ̄tra uwá, aɔ́dā nɛ̄ ɛ̄kɛ̄mgbɛ̄ dúú í lɛ iyē kwu ɔ́ ŋ́, aɔ́dā nēe géē yá kú eyī kú ācɛ kóō hɔ́ɔkɔ nū, aɔ́dā o le kpaakpa eyī Ɔwɔicō, aɔ́dā nōó lɛ ɛnyá dúú ŋ́, aɔ́dā nēe he ācɛ ɔtū, mɛ́mla aɔ́dā nɛ̄ ācɛ gē gbɛlá olɔhi lɛyíkwu uwá.

⁹Aá géē yɔ̄ ī bī ɔdā nɛ̄ n nwū mɛ́mla ɛ̄nɛ̄ aá mīyɛ ŋmá ɛgiyí um ā, ɔdā nɛ̄ aá pó ŋmá okónu kú um mɛ́mla ɛ̄nɛ̄ aá má um yá abɔ̄yī um ā le yúklɔ́. Cɛ́ɛ́ Ɔwɔicō nōo gē je ɛbɔ́ lɛ ācɛ ā géē yɔ̄ mla aá.

¹⁰Ɔtū kú um wɛ ɛnɛ̄hɛ́, n kē cɛ̄tra Óndú ā nɛ̄ɛ̄nɛ̄hi, ohígbū ka abɔ̄ aá gbēyī ā, igbīhāajɛ, ó klla le tɔ́ɔtɛ lɛ aá kpɔ́ ɛ́ɛ́ kú aá lɛ ɛga má kú aá mafú ɛ́gɛ́nɛ̄ aá dɔɔ̄kā ō tá um abɔ̄ lɛ ā. Ń yɔ̄ gē ka ka aá dɔɔ̄kā ō tá um abɔ̄ gɛ ŋ́ nɛɛ ŋ́. Ó lé ka aá má ɛga mafú gā um ka aá dɔɔ̄kā ō tá um abɔ̄ ŋ́.

¹¹Ń yɔ̄ gē ka ɛ̄nyā ohígbū ka n gbɛlá ka ācɛ í leyīkwu um ŋ́ nɛɛ ŋ́, ohígbū ka n le nwū jé ka, ɔdā dúú nɛ̄ n lɛ ā jɛ̄ um, ɛ́gɛ́ dúú nōó nyɛ́ lɛ.

¹²N lɛ ɔdā nōo wɛ ɛgbá nōo gē ce ɔ̄cɛ jé ɛɛ́, n lɛ ɔdā nɛ̄ ɔ̄cɛ gē lɛ fíyɛ́ ɛ̄nɛ̄ ó cɛgbá ā jé dúú ɛ́ɛ́. N le nwū le jé ka āhɔ̄ dúú nɛ̄ n yɔ̄ ā jɛ̄ um. Ɛga dúúmā nɛ̄ n má iyī um, ɛpléeko dúúmā, ɔdā nɛ̄ n lɛ ā jɛ̄ um. Ɔ́dāŋ ka n kōō má nwuné lé ōō ámāŋ ɔ́dāŋ ka ɛmiyɛ kōō ī ŋmó um, ń jé ɛyɛ́ɛyɛ́yí kú nū ŋ́. Ɔ́dāŋ ka n kōō lɛ aɔ́dā alɛwa ámāŋ ɔ́dāŋ ka ń kōō lɛ jɛ̄ ō bī le yá ɛgbá kú um ŋ́, ń jé ɛyɛ́ɛyɛ́yí kú nū ŋ́.

¹³N lɛ ɔfu ō le eyī méeyī mla āhɔ̄ dúúmā glá, ohígbū ka Ohɔ́nyɛtá lɛ ɔfú tū um iyē.

¹⁴Nááná ā, ɛ́gɛ́ dúúmā nōó wɛ, aá yá ɔdā olɔhi nɛ̄hi ohígbū ka aá tá um abɔ̄ eko nɛ̄ n yɔ̄ ipú nwalu ā.

¹⁵Aá, ācɛ Ufílipāyi abɔ̄yī aá, jé lɔɔlɔhi ka eko nɛ̄ n yɛ ŋmá Umasɛdónīya ā, aá ōfōōfū aá wɛ ígwu kú ācɔ̄lóhɔ́nyɛtá nēe tá um abɔ̄ á, ɛ̄nyā kē wɛ eko nɛ̄ n hútū ō tɔ́ɔna kú ɔ̄kōolɔhi abāābɔ̄ ipú éwo ɔ́ɔmā ā. Aá ōfōōfū aá wɛ ācɛ nēe bī ije le yá um ɛhi á.

¹⁶Ó kōō fíyɛ́ igbeékpónú eko nɛ̄ n cɛgbá kú ācɛ kéē bī ije wā í le tá um abɔ̄ ajɛ kú Utesalóníka ā, aá kwú ɔ̄ ú tɛ̄hɔ̄ fu um.

¹⁷Ó wɛ ka n gē tíne ō mīyɛ ɛhi icííci ŋ́. Ikɔkɔ ɔ́ɔmā n tíne kéē lɛ itene kú aɔ́dā olɔhi nɛ̄ aá yá ā ka tū ipú ɔdā nɛ̄ aá lɛ ā.

¹⁸Ɛ̄nyā wɛ ɛlā kú ahínyá kú um nɛ̄ n tá aá ohígbū ɛjɛ̄ɛ̄jī ɔdā dóódu nɛ̄ aá je ga um ā. Ɛhi ā kōō le nwuné fíyɛ́ ɛ̄nɛ̄ n cɛgbá ā! N lɛ odúúdú ɔdā nɛ̄ n tíne ā lɛ ɛɛ́, abālɔbányā nɛ̄ Epafrodítɔ̄si lɛ ɛjɛ̄ɛ̄jī ɔdā nɛ̄ aá le tū ɔ̄ ɛhɔ̄ fu um ā kpó gā um ā. Aɔ́dā ɛhi ā lɛbɛ̄ɛka ɛya kú ɔdā okpóocu nēé gwó lɛ Ɔwɔicō ā, nōó mīyɛ, nōo kē he ɔ́ ɔtū.

¹⁹Anɔ́ɔ Ɔwɔicō kú um, nōo lɛ agbénú nɛ̄ɛ̄nɛ̄hi ā géē yá odúúdú ɛgbá kú aá lɛ aá kwɛyí um ŋmá lɛ ɛ́gɛ́nɛ̄ agbénū kú nū nwunééné lɛ ā ohígbū Ujísɔ̄si Ohɔ́nyɛtá.

²⁰Alɔ cɛ̄tra Ɔwɔicō nōo wɛ Ádā alɔ oŋmá éko tééko piyóó. Aamí.

²¹N hokónu tū ɔnyɔɔnyɛ kú ācɔ̄lóhɔ́nyɛtá nēe pīyatɔ̄há mla Ohɔ́nyɛtá Ujísɔ̄si ā. Ācɔ̄lóhɔ́nyɛtá nēe bá amānyā mla um ā, hokónu tū aá.

²²Odúúdú ācɔ̄lóhɔ́nyɛtá nēe bá amānyā ā, ofíyɛ́ dúú aɛ́nɛ̄ e wɛ ipɔ́ɔ́nū kú ɔlɛ́ ɔcɛ́nɛ̄hi ā.

²³N gbɔ̄ɔkɔ ká Óndú Ujísɔ̄si Ohɔ́nyɛtá kóō yɔ̄ gē je ɛhi kú eyīnyinyi kú nū ā lɛ odúúdú aá.