Read idoma ĀCƐ UKÓLŌSI 1 Bible Online

ĀCƐ UKÓLŌSI 1 - idoma bible

ĀCƐ UKÓLŌSI 1

¹Ami Upɔ́lu, ɔ̄cotɛ̄hɔ̄ kú Ohɔ́nyɛtá Ujísɔ̄si ŋmá lɛ ɛ́gɛ́nɛ̄ Ɔwɔicō cɛ̄ lɛ ā, mɛ́mla Utímōti, ɔyínɛ́ aá ipú Ohɔ́nyɛtá ā gē tɔ́kpá nyā á.

²Alɔ tɔ́kpá nyā fu ācɛ ɔlɛ́ Ɔwɔicō mla ayínɛ́ alɔ, ācɔ̄lóhɔ́nyɛtá nēe háyi kpaakpa, nēe bá Ukólōsi ā. Ɔwɔicō Ádā alɔ kóō ményinyi aá, kú aá bá ɛbɔ́.

³Alɔ gē tá Ɔwɔicō, Ádā kú Óndú alɔ Ujísɔ̄si Ohɔ́nyɛtá, ahínyá eko dóódu nɛ̄ alɔ gē gbɔ̄ɔkɔ ohígbū aá.

⁴Ohígbū ka alɔ le ɛ́gɛ́nɛ̄ aá cɛ̄ɛ̄lā Ohɔ́nyɛtá Ujísɔ̄si lɛ ā mɛ́mla ɛ́gɛ́nɛ̄ odúúdú ācɔ̄lóhɔ́nyɛtá he aá ɔtū lɛ ā pó.

⁵Ɔtū nɛ̄ aá kpóce ā mla ihɔtū kú aá nyā ŋmá ɔdā nɛ̄ aá leyīce, nēé kē le tū céé ajɔ̄ɔ̄cɛ́ lɛ aá ā. Eko nēé bī ɔ̄kōolɔhi ā gé lɛ aá aflɛ́yí ā, nɛ̄ aá pó lɛyíkwu ɔdā olɔhi nɛ̄ aá kpéyīce yɔ̄ ī gbēyī nū nyā á.

⁶Ɔ̄kōōlɔhi ā yɔ̄ gē yá kéē hɔ́hā ce ācɛ, é kē yɔ̄ ī ka ɔ́ tɛ́ɛcɛ lɛ ācɛ ɛga dóódu kú ɛcɛ, ɛ́gɛ́nɛ̄ ó yá ipú aá eko nɛ̄ aá pó ɔ̄kā kú ɛhi kú eyīnyinyi kú Ɔwɔicō lɛyíkwu ācɛ ā aflɛ́yí ā, nɛ̄ aá klla lɛ ɔ́ jé ɛ́gɛ́nɛ̄ ó lɛ kpɔ́cíí ā.

⁷Aá pó ɔ̄kā kú ɛ́gɛ́nɛ̄ Ɔwɔicō ī ményinyi ācɛ lɛ ā ŋmá ɛgiyí Épafrāsi, ocɛ̄hɔ̄ ɔ́mpā alɔ, nōo wɛ ɔ̄coyúklɔ́ kú ɔtōōkpóce Ohɔ́nyɛtá kwɛyí alɔ ā.

⁸Ó le da alɔ ɛ́gɛ́nɛ̄ Alelékwū Ihɔ ā yá kú aá yíhɔtū tá alɔ lɛ ā.

⁹Ohígbū ɛ́gɔ́ɔmā, ŋmá ɛ̄cī nɛ̄ alɔ pó ā, alɔ í mlɛ́nyɔ́ ō gbɔ̄ɔkɔ ohígbū aá jéjéē ɛ́ɛ́ ŋ́. Alɔ gē ba Ɔwɔicō kóō le yá kú aá lɛ ɔdā nōó dɔɔ̄kā ā jé lɔɔlɔhi, kú aá jéeyī klla jɛ́ɛyí odée ɛ́gɛ́nɛ̄ Alelékwū kú nū ī je lɛ ɔ̄cɛ ā.

¹⁰Cɛ́ɛ́ aá géē lɔfú yɔ̄ ɛ́gɛ́nɛ̄ o he Óndú ā ɔtū ā, kú aá yá ɔdā nōo í yá kú ɔtū kóō he Óndú ā. Aá géē yá ɔdā olɔhi ɔwɛ ɛyɛ́ɛyɛ́yí, cɛ́ɛ́ aá géē jé Ɔwɔicō tōōtɔ̄ɔ̄.

¹¹Alɔ klla gē gbɔ̄ɔkɔ ká Ɔwɔicō kóō lɛ ɛdɔ ɔfú nɛ̄hi ō hídáagó kú nū tū aá iyē, cɛ́ɛ́ kú aá lɔfú gbeyīcíí, lɔtūlé klla ī gwéeyē.

¹²cɛ́ɛ́ aá bá ī tá Ádā ā ahínyá, nōo yá ká aá le cíkā ō lɛ ukpɛ̄ kú úgwū kú ācɛ ɔlɛ́ nū nēe lā ipú ajɔ̄ɔ̄cɛ́ kú ɔlá ofíyajɛ ā.

¹³Ó lɛ alɔ hɛ́tá ŋmá ɛgiyí ɔfú kú ajoodobū nēe ī gbō alɔ ā, klla kwú alɔ ú ɛbɔ́ ga ipú ācɛ nɛ̄ Ɔyínɔ̄nyīlɔ kú nū nōo he ɔ́ ɔtū ā yɔ̄ ī gbō ā.

¹⁴Ohígbū Ɔyínɔ̄nyīlɔ kú nū ā nēé flla alɔ á, ŋmá lɛ ō je íne nɛ̄ alɔ bīya ā yá alɔ ɛhi.

¹⁵Anú ā wɛ ɛ́gbla kú Ɔwɔicō nɛ̄ ɔ̄cɛ í gē má ŋ́ mā á, anú kē wɛ aflɛ́yí á nēe fíyɛ́ ɔdā dóódu nēé yá ā.

¹⁶Ohígbū ka Ɔwɔicō yá ɛjɛ̄ɛ̄jī aɔ́dā nēe bá ipú ɔkpáncō mla ɛcɛ ā bū ipú nū, ɔdā nɛ̄ eyī gē má mla ɛ̄nɛ̄ eyī í gē má ŋ́, kwu aɔ́cɛ́, ajɔ̄ɔ̄cɛ́, aɔ́cɛ́ ogbāajɛ, mɛ́mla ācɛ o lɛ íkwu nɛ̄hi ā. É yá ɛjɛ̄ɛ̄jī ɔdā dóódu bū iyē nū, é kē yá uwā lɛ ɔ́.

¹⁷Anú yɔ̄ gbɔbū lɛ ɔdā dóódu á, anú bī ɔdā dóódu bɔ́há á.

¹⁸Anú wɛ otrɛ̄yí kú icɔ́ɔci nōo wɛ okpíyē kú nū ā á, anú kē wɛ ohútu kú oyēeyī kú ɔkpíyē ā á. Anú wɛ Ɔyínɔ̄nyīlɔ kú aflɛ́yí nēé je héyī ŋmá ɔlékwū á, cɛ́ɛ́ kóō le fíyɛ́ dúú ipú ɔdā dóódu ā.

¹⁹Ohígbū ka Ɔwɔicō abɔ̄yīnū le miya ka Ɔyínɔ̄nyīlɔ ā kóō wɛ ɛ́gbla kú Ɔwɔicō abɔ̄ dóódu.

²⁰Oŋmá lɛ Ɔyínɔ̄nyīlɔ kú nū ā Ɔwɔicō dɔɔ̄kā kóō lɛ ɛjɛ̄ɛ̄jī aɔ́dā dóódu kagwó mla iyī nū. Ɔwɔicō yá ɛbɔ́ nyā ŋmá ikwū kú Ɔyínɔ̄nyīlɔ kú nū ɛyí ɔcóōnyɔ́kpá, anɔ́ɔ ó lɛ aɔ́dā nēe bá ɛcɛ ámāŋ ɔkpáncō ā kagwó mla iyīnū á.

²¹Ákú aá, ɛ́ɛ́ kú aá lɔtūce Ohɔ́nyɛtá ā, aá lɛ igbīhi cē kwu Ɔwɔicō, le pīya aólɛlā kú nū, yɔ̄ ī nuunu tū ɔ̄ bū ipú ɔdā nɛ̄ aá yá mla ɛ̄nɛ̄ aá bī ɔtū ā.

²²Amáŋ abālɔbányā, oŋmá lɛ ikwū ɔkpíyē kú Ɔyínɔ̄nyīlɔ kú nū ā, ó le aá pīya aóklóbīya nū, o yá ɛ́ɛ́ kóō lɛ aá bī wā ɛgiyí nū ācɛ nēe tīihɔ, í lɛ ɛnyá ŋ́, klla lɛ ɛpɔ̄bí dúúmā ŋ́.

²³Ɛ̄nyā wɛ ɔkwɛ̄yi ɔ́dāŋ ka aá yɔ̄ ī gɔbū, le butū ajɛ kli bɛ̄ɛka ákanaba ɔtāhɛ̄ inu ā, aá cɛ̄ lɛ ɔdā dúúmā jíla aá iyē ŋmá eyī nɛ̄ aá ce eko nɛ̄ aá pó ɔ̄kōolɔhi ā ŋ́, ɛ̄nɛ̄ é tɔ́ɔna kú nū lɛ éwo dóódu kú ipú ɛcɛ ā. Ɔ̄kōolɔhi ā nɛ̄ ami, Upɔ́lu je pīya ɔ̄cocɛ̄hɔ̄ nū yɔ̄ á.

²⁴Abālɔbányā, n gē gwéeyē ohígbū ōwē kú um ohígbū aá, anɔ́ɔ ipú ōwē kú ɔkpíyē kú um nyā n lɛ ōwē ohile kú Ohɔ́nyɛtá ohígbū ɔkpíyē kú nū, nōo wɛ icɔ́ɔci ā, má.

²⁵Ɔwɔicō lɛ um yá ɔ̄cɛ o tá icɔ́ɔci ā abɔ̄, ó lɛ um fu ká n̄ yúklɔ́ nyā, cɛ́ɛ́ ká n̄ tá aá abɔ̄ ká n̄ ka odúúdú ɛlā nōó ka ā tɛ́ɛcɛ.

²⁶Ɛ̄nɛ̄ ó ka tɛ́ɛcɛ lɛ ācɛ ŋ́ ŋmá eko nōo yɛ ā, ó lɛ ɔ́ ka abālɔbányā lɛ ācɛ ɔlɛ́ nū ɛɛ́.

²⁷Ó wɛ ɔtū kú Ɔwɔicō kóō le yá kú ācɛ ɔlɛ́ nū kéē lɛ ɔdā nōó tɛtɛ cɛ̄ lɛ uwá jé ŋ́ mā jé, ɛlā nōó le tū lɛ ucē dóódu, ɛlā kú oyéyījii ɔkwɛ̄yi nēé tɛtɛ jé ŋ́. Ɔdōtayínū ā wɛ ka Ohɔ́nyɛtá yɔ̄ ipú ɔtū kú aá, ɛ̄nyā kē í yá kú aá géē báana ɛgahi nɛ̄hi kú Ɔwɔicō mla anú.

²⁸Ohígbū ɛ́gɔ́ɔmā alɔ gē tɔ́ɔna lɛ ācɛ dóódu ohígbū Ohɔ́nyɛtá, gē bī ɛlā íjééyī dóódu nōo tɔ́ɔtɛ́ lɛ alɔ ā le pi uwá ahɔ̄ lɛyíkwu ɔdā nēé cíkā ō yá ŋ́, kla gē nwū uwā ɔdā nēé cíkā ō yá, o yá kéē wā í háyi iyɔ̄bū Ɔwɔicō glá, nɛ̄ íjéeyī dúúmā í gáā kpla uwá ɛhá ŋ́ bɛ̄ɛka ācɛ nēe le yá ijímkpa ipú opīyatɔ̄há mla Ohɔ́nyɛtá ā.

²⁹O yá ɛ́ɛ́ kú ɛjɛ̄ɛ̄jī aɔ́dā nēe bá nyā kéē lɛ tɔ́ɔtɛ́ ā, n bī ɔfú nɛ̄ Ohɔ́nyɛtá le tū um iyē ā yúklɔ́ lɔfu nɛ̄hi.