Read idoma ĀCƐ UKÓLŌSI 2 Bible Online

ĀCƐ UKÓLŌSI 2 - idoma bible

ĀCƐ UKÓLŌSI 2

¹N tíne kú aá le jé ɛ́gɛ́nɛ̄ n gē yúklɔ́ lɔfú nɛ̄hi ohígbū aá mla ohígbū ācɔ̄lóhɔ́nyɛtá nēe bá Ulayodísīya, mla ācɛ dóódu nēé jé um eyī jééjé ɛ́ɛ́ ŋ́ mā ā.

²N yá ɛjɛ̄ɛ̄jī ɛ̄nyā o yá kú aá mla uwá kú aá lɔtū lɛ nɛ̄ɛ̄nɛ̄hi cɛ́ɛ́ kú aá gbɔɔ́ ō wā í yíhɔtū tá iyī aá tōōtɔ̄ɔ̄, cɛ́ɛ́ kéē lɛ ɛyí kú ɔdā nɛ̄ Ɔwɔicō miya tayínū jé kpócíí, nōo wɛ o lɛ Ohɔ́nyɛtá abɔ̄yī nū ā jé.

³Anú ā wɛ ɔ̄cɛ nōo gē yá ká ɔ̄cɛ kóō jé íjéeyī mɛ́mla ɔdōōjé kú Ɔwɔicō nōo lɛbɛ̄ɛka agbénú nēé le tayínū tɛtɛ ā á.

⁴N ka ɛ̄nyā cɛ́ɛ́ kú aá cɛ̄ lɛ ɔ̄cɛ dúú bī áafú olɔnyɛ kú nū lɛ plla aá ŋ́.

⁵Ohígbū ka ami abɔ̄yī um í yɔ̄ mla ŋ́ nááná ā, alelékwū kú um yɔ̄ mla aá yɔ̄ gē gwéeyē klla yɔ̄ gē má abɔ̄ aá le flá tɔ̄há ká nɛ̄ ɔ̄cɛ dúú í fō aá ŋmá ɔhá glá ŋ́ ipú ɔtū nɛ̄ aá kpóce Ohɔ́nyɛtá ā.

⁶Ohígbū ɛ́gɔ́ɔmā ɛ́gɛ́nɛ̄ aá le jé ka Ohɔ́nyɛtá Ujísɔ̄si wɛ Óndú ā, aá yá ucē bɛ̄ɛka ācɛ nēe le pīyatɔ̄há mla anú ā.

⁷Aá lɛ ɛgba kú aá tá lipú ga ipú Ohɔ́nyɛtá, ɛ́gɛ́nɛ̄ ɔ̄cí gē yá ā, abɔ̄ aá yɔ̄ ī jɛ̄ gɔbū ā, aá gboló ce ɔ́ fíyɛ́, kú ɔtū nɛ̄ aá kpóce Ohɔ́nyɛtá ā kóō jíliye ŋ́, ɛ́gɛ́nɛ̄ é nwū aá lɛ ā. Aá kóō bá ī tá Ɔwɔicō ahínyá nɛ̄ɛ̄nɛ̄hi eko dóódu.

⁸Aá lɛ eyī kwɛcɛ, cɛ́ɛ́ ká ɔ̄cɛ dúú kóō bī ɛlā icííci kú íjéeyī kú ɔlɛɛcɛ lɛ aá pīya ɔfiyɛ kú nū ŋ́. É bī ɔdōnwū kú ɔlɛɛcɛ nōo ŋmá ɛgiyí aálelékwū nēe yɔ̄ ī gbō ɛcɛ ā, ɔdōnwū ā í ŋmá ɛgiyí Ohɔ́nyɛtá ŋ́.

⁹Ohígbū kú Ohɔ́nyɛtá wɛ odúúdú ɔ̄cɛ nɛ̄ Ɔwɔicō wɛ ā eko nōó yɛ ipú ɛcɛ bɛ̄ɛka ɔ̄cɛ ā.

¹⁰É kwú oyēeyī ɔkwɔ̄ɔ̄kwɛ̄yi ú lɛ aá, eko nɛ̄ aá lɛ pīyatɔhā lɔɔlɔhi mla anú. Anú ā cɛgbá fíyɛ́ aálelékwū nēe gē gbāājɛ nēe lɛ íkwu ā á.

¹¹Abɔ̄ aá lɛ pīyatɔ̄há mla Ohɔ́nyɛtá, nēé kē le ɔdā nōo lɛbɛ̄ɛka apī ohɛ́ ā yá aá ā. Ó wɛ apī ohɛ́ ɔlamu nɛ̄ ācɛ Ujíyu í yá ā ŋ́. Amáŋ ɛ̄nɛ̄ ɛyí nū wɛ ka Ohɔ́nyɛtá lɛ aá hɛ́tá ŋmá ɔdā nōo yɔ̄ ipú ɔ̄cɛ gē cɛ̄ lɛ ɔ́ bīyíne ā.

¹²Ohígbū ka eko nēé yá aá ubatísim ā, ó lɛbɛ̄ɛka é lɛ aá nyi mla Ohɔ́nyɛtá ā. É kē le aá héyī ŋmá ɔlékwū mla Ohɔ́nyɛtá ipú ubatísim oŋmá ɔfú kú ɔtū nɛ̄ aá kpóce Ɔwɔicō nōo je Ohɔ́nyɛtá héyī ŋmá ɔlékwū ā.

¹³Ɛjī kwɛjī lɛ Ɔwɔicō nɛɛ aá gekwú ɛ́ɛ́ ohígbū íne nɛ̄ aá bīya ā mɛ́mla ohígbū ka aá wɛ aílɔ́wá nēé lɛ íne kú Ɔwɔicō ā ŋ́. Amáŋ Ɔwɔicō le yá kú aá yēeyī mla Ohɔ́nyɛtá. Ó kwú odúúdú íne nɛ̄ aá bīya ā í yá aá ɛhi

¹⁴Ó lɛ ɔdōōbɔ̄bí nēé tá tāajɛ lɛyíkwu alɔ ā ŋmónyí mla íne nōo kwú alɔ ā. Ó lɛ íne a pīya áncā abɔ̄ ó lɛ ɔ́ hɛ́ tū ɔcóōnyɔ́kpá kú Ohɔ́nyɛtá ā.

¹⁵Ujísɔ̄si le aálelékwū nēe ī gbāājɛ, klla lɛ ɔfú ā yá lé ɛyí ɔcóōnyɔ́kpá ā, mīyɛ uwá ɔfú, anɔ́ɔ ó lɛ uwēyī kpó tū uwā ɛyí ipéyī ójīla, abɔ̄ ó lɛ agbá kwu uwá abɔ̄ yɔ̄ ī pi uwá tá iyī nū ɔkwu yɔ̄ ī gbogwú ā.

¹⁶Ohígbū ɔ́ɔmā ɔ̄cɛ dúúmā kóō híīī tū íne lɛ aá ohígbū ɔdōlé ámāŋ ɔdā nɛ̄ aá í gwá ámāŋ ohígbū ɛ̄cī ō tīihɔ ámāŋ ka ucɛ kú ɔyā ɛ̄yīpɛ̄ ámāŋ Usábāti ŋ́.

¹⁷Aɔ́dā ɛ́gɔ́ɔmā wɛ ofu kú aɔ́dā nēe géē wā ā, amáŋ ɔdā nōo wɛ ɔkwɛ̄yi ā wɛ Ohɔ́nyɛtá.

¹⁸Aá híīī cɛ̄ ká ɔ̄cɛ dúúmā kóō ŋmó aá ɛpɔ̄bí ŋmá lɛ o ka aá géē tū iyī aá wāajɛ píīī, klla gē gbā aálelékwū-ōtɛ̄hɔ̄ ɛ̄gbā. Ɔ̄cɛ ɛ́gɔ́ɔmā ī lɛ abɔ̄ bá ɛbɛ nōó má, nōo yá kú odo kú ɔ̄cɛ ɔlamu cɛ̄ lɛ ɔ́ le nū pītīī mla ɔbɔ́ɔ̄cɛ nááná nōó ī ka ka anúɔ tú ɛyí wāajɛ ā.

¹⁹Ó kē lɛyítáajɛ lɛ Ohɔ́nyɛtá, nōo kē wɛ otrɛ̄yí kú icɔ́ɔci ā, nōo lɛbɛ̄ɛka iyē kú nū ā ŋ́. Ohɔ́nyɛtá gē gbō ɛjɛ̄ɛ̄jī iyē ā, ī je ɔdōlé lɛ ɔ́, klla ī bī iyē ā bɔ́há mla aéko kú iyē mɛ́mla aíli kú iyē kē jɛ̄ ɛ́gɛ́nɛ̄ Ɔwɔicō tíne ā á.

²⁰Aá gekwú mla Ohɔ́nyɛtá é kē lɛ aá hɛ́tá ŋmá ɛgiyí aálelékwū nēe ī gbō ɛcɛ nyā ā, ɔdíyá nɛ̄ aá gē yēeyī bɛ̄ɛka ɔdā nɛ̄ aá wɛ ákú ɛcɛ nyā kpɔ́ ɛ́ɛ́ mā? Ɔdíyá nɛ̄ aá ī lɛyítáajɛ lɛ íne nēé ka

²¹“Áá híīī lɛ abɔ̄ kwu ɛnyá ŋ”, “Aá híīī lɛ ígblɛ́nyī tū ɔ́ɔmā ā ŋ́”, “Aá híīī lɛ abɔ̄ bī ɔ́ɔmā ŋ́” mā ā?

²²Ɔdā nēe bá nyā lɛyíkwu aɔ́dā nēe gē yíífi eko nēé lɛ uwá bī yúklɔ́ kwɛyí. É wɛ aíne nɛ̄ ɔlɛɛcɛ tū mla ɔdōnwū kú ācɛ.

²³Ɛdɔ kú aíne lɛyíkwu ɔdā nɛ̄ ɔ̄cɛ í lé mɛ́mla ɛ̄nɛ̄ ɔ̄cɛ í lé ŋ́ nēe bá ā, ŋmá íjééyī kú ɛ̄gbā abɔ̄fú nēé gē gbā aálelékwū-ōtɛ̄hɔ̄ ā mɛ́mla otú iyī uwā wāajɛ ɛ̄kɛ̄mgbɛ̄ kú uwā mla o yá ɔkpíyē kú uwā ōwē nɛ̄hi. Amáŋ é tīile dúúmā ō cē unwū kú ɔkpíyē kú uwā bī ŋ́.