Read idoma ĀCƐ UKÓLŌSI 3 Bible Online

ĀCƐ UKÓLŌSI 3 - idoma bible

ĀCƐ UKÓLŌSI 3

¹Abɔ̄ é kwú aá ú héyī ŋmá ɔlékwū mla Ohɔ́nyɛtá ɛ́ɛ́ mā, aá lɛ ɔtū kú aá tū aɔ́dā nēe bá ajɔ̄ɔ̄cɛ́, ɛga nɛ̄ Ohɔ́nyɛtá yājɛ abɔ̄lɔ́ná kú Ɔwɔicō ā.

²Aá lɛ ɔtū kú aá tú kwu aɔ́dā nēe bá ajɔ̄ɔ̄cɛ́, amáŋ ó híīī wɛ aɔ́dā nēe bá ipú ɛcɛ amānyā ā gɛ ŋ́.

³Ohígbū koó lɛbɛ̄ɛka aá gekwú mla Ohɔ́nyɛtá ɛɛ́ mā, anɔ́ɔ é kē kwú oyēeyī kú aá ú tayínū mla Ohɔ́nyɛtá ipú Ɔwɔicō.

⁴Ohɔ́nyɛtá ā bī oyēeyī abɔ̄yīnū kú alɔ á, eko nōó í wɛ̄ɛcɛ igbɔhá ā, aá abɔ̄ aá géē yɔ̄ abɔ́ɔ mla anú í báana ɛgahi nɛ̄hi kú nū ā mla anú.

⁵Ohígbū ɛ́gɔ́ɔmā aá lɛ ɛgbá kú aɔ́dā kú ɛcɛ nēe bá ī yúklɔ́ ipú ɔtū kú áa ā kpó bónū. Aɔ́dā o lɛbɛ̄ɛka ɛdɔ kú ajā ōgbo ɛyɛ́ɛyɛ́yí, unwū kú ɔdōōbɔ̄bí ō yá, mɛ́mla unwū ɔdā nɛ̄hi o yá (unwū ɔdā nɛ̄hi o yá wɛ ɛcí ō pā ā).

⁶Ohígbū aɔ́dōōbɔ̄bí mbá ā Ɔwɔicō géē cɔ̄nū tū ācɛ nēé lɛyítáajɛ lɛ ɔ́ ŋ́ mā.

⁷Otɛtɛ ā unwū kú odōōbɔ̄bí ɛ́gɔ́ɔmā gē yá kú aá lā ɛdɔ oyēeyī ɛ́gɔ́ɔmā.

⁸Amáŋ abālɔbányā, aá híīī cɔ̄nū gɛ ŋ́, ámāŋ yá unwū ɔdā ámáŋ wɔ́tū ācɛ gɛ ŋ́. Aá lɛ ɛlā obɔ̄bí ō ka mla ɛlā ɔdāhā ō ka kpó bónū ŋmá okónu kú aá.

⁹Aá híīī kɛ̄mgbɛ̄ lɛ iyī aá ŋ́, ohígbū ka aá lɛ oyēeyī nɛ̄ncɛ̄ ā mla úklɔ́ kú nū kpó bónū bɛ̄ɛka ɛ́gɛ́nɛ̄ ɔ̄cɛ gē plla īlī bónū ā ɛɛ́

¹⁰Aá kē kwú pīya ɔ̄cɛ ɛ̄yīpɛ̄ ɛɛ́. Ɔwɔicō kē yɔ̄ ī yá ā ɛ̄yīpɛ̄ eko dóódu, o yá ɛ́ɛ́ ká aá lɛbɛ̄ɛka anú ā fíyɛ́, ká aá kē lɛ ɛdɔ kú ɔ̄cɛ nōó wɛ ā jé lɔɔlɔhi.

¹¹Ipú ācɛ ɛ̄yīpɛ̄ nyā ā, ācɛ Ujíyu ámāŋ ka ācɛ nēé wɛ ācɛ Ujíyu ŋ́, aílɔ́wá ámāŋ ka ācɛ o ka ucē ɔhá, ɔfiyɛ, ɔyí ajɛ, í gáā yɔ̄ ŋ́. Amáŋ Ohɔ́nyɛtá wɛ ɔdā dóódu nōo cɛgbá á, ó kē yɔ̄ ipú odúúdú aá.

¹²Ɔwɔicō lɛ aá fu kú aá kwú pīya ákú nū, cɛ́ɛ́ kú aá tīihɔ, ká aá klla he ɔ́ ɔtū. Ohígbū ɛ́gɔ́ɔmā, aá ményinyi ācɛ, aá gbonɛnɛ, aá tú ɛyí wājɛ, aá bɔ́ ipɔ́tū kú aá, aá kē gbeyīcíí.

¹³Aá híīī gwū ɔ́mpa aá ɔcí ŋ́, ɔ́dāŋ ka ɔ̄cɛ dúúmā kē lɛ ɛlā lɛ mla ɔ́mpa nū kóō kwú yá ɔ̄ ɛhi. Ɛ́gɛ́nɛ̄ Óndú ā je yá aá ɛhi ā, aá je yá ɔ́mpa aá ɛhi ɛ́gɔ́ɔmā dúú.

¹⁴Ɛ̄nɛ̄ o fíyɛ́ aɛ́nɛ̄ e bá ā dúú ā wɛ ka aá lɛ ihɔtū, nōo gē gbō ɔdā dóódu tɔ̄há lɔfúlɔfú ā, lɛ lɛ iyī aá.

¹⁵Ɛbɔ́ nɛ̄ Ohɔ́nyɛtá bī wā ā kóō gbō ɔtū kú aá, ohígbū ɛ̄nyā nēé hī aá igwú tɔ̄há ipú iyē ékpó á. Aá kē yɔ̄ ī tá ahínyá eko dóódu.

¹⁶Ɛlā kú Ohɔ́nyɛtá nōo tīile nɛ̄hi ā kóō lā dúúdú ipú aá, kóō yá kú aá le gbagbénú ipú íjééyī dóódu. Aá nwū iyī aá ɛlā kú aá kē tū iyī aá ukɔ́ mla odúúdú íjéeyī. Aá gwííjē ɛ̄gbā, aá gwííjē ocɛ̄tra, mla ijē kú ācɛ ɔlɛ́ Ɔwɔicō. Aá gwííjē lɛ Ɔwɔicō kú aá tá ɔ́ ahínyá ipɔ́tū kú aá.

¹⁷Ɔdā dóódu nɛ̄ aá kē í ka ámāŋ ka úklɔ́ nɛ̄ aá í yá, aá yá ɛjɛ̄ɛ̄jī nū ŋmá lɛ iyē kú Ujísɔ̄si, Óndú ā, abɔ̄ aá gē bá ī tá Ɔwɔicō, Ádā alɔ ahínyá ŋmá lɛ iyē kú nū ā.

¹⁸Anyā, aá tɛ́ɛyí wāajɛ lɛ aɔ́bá aá, ohígbū ka ɛ̄nyā nɛ̄ aá cíkā ō yá á, abɔ̄ aá le pīya ācɔ̄lóhɔ́nyɛtá ā.

¹⁹Aɔ́bá, aá yíhɔtū tū anyā aá. Aá híīī lɔnɔɔtū lɛ uwá ŋ́.

²⁰Ayípɛ̄, aá lɛ ojīlīmā ce aádā aá mɛ́mla aɛ́nɛ́ aá ipú ɔdā dóódu, ohígbū ka ɛ̄nyā wɛ úklɔ́ kú aá abɔ̄ aá wɛ ācɔ̄lóhɔ́nyɛtá ā.

²¹Aádā mɛ́mla aɛ́nɛ́, aá híīī yá ayí aá cɔ̄nū ŋ́. Aá le yá lɛ ā, ɔtū kú uwā géē je gbenyi, nēé gaá lɛ ɔtū yá ɔdā nēé cíkā ō yá ā gɛ ŋ́.

²²Aɔ́fiyɛ, aá lɛ ojīlīmā ce ācɛ nēe wɛ óndú aá kú ɛcɛ ā ipú ɔdā dóódu. Ó wɛ ojīlīmā kú eyīgoo bɛ̄ɛka ācɛ olɛ ojīlīmā cē ācɛ ipú eyī uwā ā ŋ́. Amáŋ aá lɛ ojīlīmā ce uwá ŋmá ipɔ́tū kú aá ohígbū ka aá gē yúúfi Óndú ā.

²³Ɔdā dóódu nɛ̄ aá géē yá, aá yá ɔ̄ ŋmá ipɔ́tū kú aá bɛ̄ɛka ɔdā nɛ̄ aá gē yá ɔ̄ lɛ Óndú āa, nōó wɛ o yá lɛ ācɛ ŋ́ mā.

²⁴Aá le jé ka Ɔwɔicō géē gbā ulé nōó le tū gbēyī ācɛ ɔlɛ́ nū ā lɛ aá, ohígbū ka Ohɔ́nyɛtá wɛ Óndú aá nɛ̄ aá gē yúklɔ́ lɛ ɔ́ á.

²⁵Ohígbū ka ɔ̄cɛ nōo ī yá ɔdōōbɔ̄bí géē mīyɛ ulé kú odōōbɔ̄bí nōó yá ā. Ɔwɔicō í kē ī má eyīgoo kú ɔ̄cɛ ŋ́.