Read idoma ĀCƐ UKÓLŌSI 4 Bible Online

ĀCƐ UKÓLŌSI 4 - idoma bible

ĀCƐ UKÓLŌSI 4

¹Aɔ́kpani, aá yá ɔdā nōo le kpaakpa mɛ́mla aɔ́dā nōo cíkā lɛ aɔ́fiyɛ kú aá. Aá bla ka aá abɔ̄ aá kē lɛ ɔ̄cɛ nōo wɛ Ɔkpani kú aá nōo yɔ̄ ɔkpáncō.

²Aá híīī mā ɔkɔ o yɔ̄ ī gbā tá ŋ́, aá kē lɛ ɛlá kwu ɔdā nɛ̄ aá ī ka lɛ Ɔwɔicō ā, aá kē tá ɔ̄ ahínyá.

³Eko dúú nɛ̄ aá ī gbɔ̄ɔkɔ, aá gbɔ̄ɔkɔ ohígbū alɔ dúú, cɛ́ɛ́ ká Ɔwɔicō kóō lɛ ɛga olɔhi je lɛ alɔ ká ālɔ̄ tɔ́ɔna kú ɔ̄kōolɔhi kú nū lɛyíkwu Ohɔ́nyɛtá ā. Ohígbū ɔna kú ɔ̄kōolɔhi ā yá nɛ̄ n yɔ̄ agbá abālɔbányā á.

⁴Aá gbɔ̄ɔkɔ ká n̄ kɛlā ɛ́gɛ́nɛ̄ o cíkā ō ka lɛ ā, ɔwɛ nōó géē cē uwā ahɔ̄ gēdēē.

⁵Aá bī íjééyī lɛ yá ɔdā dóódu ipú ācɛ nēé wɛ ācɔ̄lóhɔ́nyɛtá ŋ́ mā ā, ká aá bī ɛga dúú nɛ̄ aá lɛ ā le yúlɔ́ lɔɔlɔhi.

⁶Ɛlā nɛ̄ aá í ka lɛ ācɛ ā kóō lɔhi ō pó ahɔ̄. Aá cíkā ō jé ɛ́gɛ́nɛ̄ aá géē tá ācɛ dóódu ohi ɔwɛ okpaakpa ā.

⁷ Utáyícíkɔ̄si, ɔyínɛ́ alɔ ohumɔtū, nōo bī ɔtū ékpó le yúklɔ́, klla ī cɛ̄ Óndú ā ɛhɔ̄ mla alɔ ā, géē da aá ɔdā dóódu nōo yá um ā.

⁸N géē tū ɔ̄ ɛhɔ̄ gé lɛ aá ohígbū ɔdā nyā, kóō da aá ɛlā kú āhɔ̄ kú alɔ kóō kē tū aá ɔtūlé.

⁹N géē tū Onesímɔ̄si, ɔyínɛ́ nōo he um ɔtū nōo ī yúklɔ́ ŋmá ɔtū ékpó ā ɛhɔ̄ mla anú. Ó wɛ éyi kú ígwu kú aá. Uwá géē da aá ɔdā dóódu nōo yɔ̄ ī yá amānyā ā.

¹⁰Arístākɔsi, olagbá ɔ́mpa um hokónu tū aá. Umáki nōo wɛ ɔyínɛ́ ɛpa kú Ubánābasii ā hokónu tū aá dúú. É lɛ ukɔ́ tū aá ɛɛ́, ka eko nɛ̄ Umaki gā, aá mīyɛ anú.

¹¹Ujósuwa, nēé kē hī ka Ujɔ́stɔ̄si ā, hokónu tū aá. Ācɛ ɛtá nēe bá ā wɛ ācɛ Ujíyu ōfōōfūwā nēe cɛ̄ɛ̄lā Ɔwɔicō nēe bá ī yúklɔ́ mla um ohígbū ajɔ̄ɔ̄cɛ́ kú Ɔwɔicō á. É tū um abɔ̄ nɛ̄hi.

¹²Épafrāsi, nōo wɛ éyi kú ipú ígwu kú aá, nōo klla wɛ ɔ̄cocɛ̄hɔ̄ kú Ohɔ́nyɛtá Ujísɔ̄si ā, hokónu tū aá. Ó gē gbɔ̄ɔkɔ lɔfúlɔfú ohígbū aá ojigógó, ī ba Ɔwɔicō kóō lɛ ɔ́ yá tɔ́ɔtɛ́ lɛ aá ká aá háyi kpaakpa lɔfú bɛ̄ɛka ācɛ nēe wɛ ijímkpa ipú ɛlā Ɔwɔicō ā ŋmá ɔtū ékpó, klla le tútū ō lɛyítáajɛ lɛ ɔdā nō he Ɔwɔicō ɔtū ā.

¹³N cɛ̄ ɔ̄ ijáalí koó yúklɔ́ lɔfú kóō tá aá mla ācɛ nēe bá Ulayodísīya mɛ́mla Uhiyerapólīsi ā abɔ̄.

¹⁴Ulúkú, obócí nōo he alɔ ɔtū ā, hokónu tū aá, mɛ́mla Udɛ́masi dúú.

¹⁵Aá hokónu tū ayínɛ́ nēe bá Ulayodísīya, mɛ́mla Unímfa mɛ́mla ācɛ icɔ́ɔci nēe bá inu ɔlɛ́ nū ā.

¹⁶Eko nɛ̄ aá lɛ ɔkpá nyā jé ɔtāhɛ̄ kú aá, aá yá kéē lɛ ɔ́ jé ipú icɔ́ɔci kú Ulayodísīya dúú. Aá klla yá kú aá lɛ ɔkpá nōo ŋmá Ulayodísīya ā jé dúú.

¹⁷Aá da Akípɔ̄si kahíníī, “Lɛ ɔtū kwu úklɔ́ nɛ̄ a mīyɛ ŋmá ɛgiyí Óndú ā, cɛ́ɛ́ ká ā lɛ ɔ́ yá dúúdú.”

¹⁸Ami, Upɔ́lu, tá okónu oōhɛ́ tū aá nyā mla abɔ̄ kú um á. Aá blakwu agbá nɛ̄ n yɔ̄ ā. N gbɔ̄ɔkɔ kú Ɔwɔicō kóō ményinyi aá.