Read idoma 1 ĀCƐ UTESALONÍKA 1 Bible Online

1 ĀCƐ UTESALONÍKA 1 - idoma bible

1 ĀCƐ UTESALONÍKA 1

¹Ami, Upɔ́lu, mɛ́mla Usáyílāsi[1] mɛ́mla Utímōti tɔ́kpá nyā fu ācɔ̄lóhɔ́nyɛtá nēe bá ipú icɔ́ɔci kú Utesaloníka ā. Alɔ wɛ ákú Ɔwɔicō nōo wɛ Ádā ā mɛ́mla Óndú Ujísɔ̄si Ohɔ́nyɛtá. Ɔwɔicō kóō yá olɔhi lɛ aá, kóō klla yá kú aá lɛ ɛbɔ́.

²Alɔ yɔ̄ gē ka lɛ Ɔwɔicō ojígógó ɛ́gɛ́nɛ̄ ahínyá kú alɔ lɛ, ohígbū ka aá wɛ ācɔ̄lóhɔ́nyɛtá kpɔ́ ɛ́ɛ́. Eko dúúmā nɛ̄ alɔ gē gbɔ̄ɔkɔ lɛ Ɔwɔicō nɛɛ, alɔ gē gbɔ̄ɔkɔ lɛ ɔ́ ohígbū aá.

³Eko dúú nɛ̄ alɔ ī gbɔ̄ɔkɔ lɛ Ɔwɔicō mɛ́mla Ádā alɔ, alɔ gē bla klla gē ka lɛ ɔ́ ɛ́gɛ́nɛ̄ aá gē yúklɔ́ lɛ ohígbū ɔtū nɛ̄ aá le ce Ɔwɔicō ā, ɛ́gɛ́nɛ̄ aá cēyīkīkwū yúklɔ́ lɔfú lɛ ohígbū ka Ujísɔ̄si he aá ɔtū. Ɛ́gɛ́nɛ̄ aá leyīce yɔ̄ ī leyī táajɛ lɔfú lɔfú kú Ujísɔ̄si Ohɔ́nyɛtá kóō wā ā.

⁴Alɔ jé ka aá he Ɔwɔicō ɔtū nɛ̄hi ayínɛ́ alɔ, ɔ́ɔmā yá nōó lɛ aá fu klla lɛ aá fukɔ̄ lɛ iyī nū á.

⁵Ohígbū ka, eko nɛ̄ alɔ wā í ka ɔ̄kōolɔhi ā tɛ́ɛcɛ lɛ aá aflɛ́yí ā, alɔ í wā í kɛlā okónu ofūnū ŋ́, alɔ bī ɔfú kú Alelékwū Ihɔ le yúklɔ́ ō hídáagó alɛwa ɔtāhɛ̄ aá, alɔ kē mafú lɛ aá ɛ́gɛ́nɛ̄ alɔ abɔ̄yī alɔ cɛ̄ ɛlā ɔkwɛ̄yí kú ɔ̄kōolɔhi lɛ ā. Aá jé ɛ́gɛ́nɛ̄ alɔ lā lɛ eko nɛ̄ alɔ bá ipú ā. Alɔ yá ɔ́ɔmā kú olɔhi kú aá.

⁶Aá yá uce bɛ̄ɛka alɔ mɛ́mla Ohɔ́nyɛtá ā. Nááná nɛ̄ ācɛ yá aá ōwē nɛ̄ɛ̄nɛ̄hi igbalɛwa ā, aá mīyɛ olɛhɔ̄ ā mla éeyē nōo ŋmá ɛgiyí Alelékwū Ihɔ ā.

⁷Anɔ́ɔ aá le pīya ɛdɔ kú ācɛ nɛ̄ odúúdú ācɛ nēe kpɔ́tūce Óhɔ́nyɛtá nēe bá ipú Umasɛdónīya mɛ́mla Ugríisi cíkā ō má gbla á.

⁸Ācɛ alɛɛlɛwa nēé wɛ ācɛ Umasɛdónīya ámāŋ kú ācɛ Ugríisi ŋ́ ma, lɛ olɛhɔ̄ lɛyíkwu Ohɔ́nyɛtá ā pó ɛɛ́ ohígbū ɔdā nɛ̄ aá yɔ̄ ī yá ā. Ācɛ nēe bá ɛga dóódu ā yɔ̄ ī pó ɔ̄kā kú ɛ́gɛ́nɛ̄ aá lɔtūce Ɔwɔicō ā. Ó lɛ ā, alɔ í lɛ ɔdā dóódu ɔhá nɛ̄ alɔ ī ka gɛ ŋ́.

⁹Odúúdú ācɛ nēe bá ā kɛlā lɛyíkwu ɛ́gɛ́nɛ̄ aá gbonɛnɛ lɛ alɔ eko nɛ̄ alɔ táaha wā ɛgiyí aá ā, mɛ́mla ɛ́gɛ́nɛ̄ aá pīyabɔ̄ ŋmá ɛcí ō pā wā ɛgiyí Ɔwɔicō, ká aá gaá gbɔɔ́ ō cɛ̄ Ɔwɔicō ɔkwɛyí nōo yēeyī ā ɛhɔ̄ ā.

¹⁰Aá klla yá ɛ̄nyā kú aá gbēyī ɔyínɔ̄nyīlɔ kú nū kóō wā ŋmá ɛga nɛ̄ Ɔwɔicō yɔ̄ ā. Ɔyínɔ̄nyīlɔ kú nū nyā wɛ Ujísɔ̄si, nōó je héyī ŋmá ɔlékwū ā. Anú ā gē nyā alɔ tá eko nɛ̄ Ɔwɔicō gáā yá ācɛ italā, ohígbū koó le cɔ̄nū ohígbū íne nēé bīya ā.