Read idoma 1 ĀCƐ UTESALONÍKA 2 Bible Online

1 ĀCƐ UTESALONÍKA 2 - idoma bible

1 ĀCƐ UTESALONÍKA 2

¹Aá Abɔ̄yī aá jé, ayínɛ́ alɔ, ka aha nɛ̄ alɔ tá wā ɛgiyí aá ā í wɛ icííci ŋ́.

²Aá jé ɛ́gɛ́nɛ̄ é yá kú alɔ móōwē lɛ, ɛ́gɛ́nɛ̄ é cá alɔ ɛcá ipú igelī kú Ufílipāyi gbɔbū kú alɔ wā ɛgiyí aá, Utesaloníka ā. Nááná nɛ̄ ācɛ alɛwa kōō cēyītīkwū kéē bɛ̄yíkwu alɔ ā, Ɔwɔicō lɛ ɔtū tū alɔ ɔtū cɛ̄ lɛ alɔ lɛ ɔna kú ɔ̄kōolɔhi ā nōo ŋmá ɛgiyí nū ā tá lɛ aá kpɔ́

³Eko nɛ̄ alɔ yɔ̄ í yá kú aá cɛ̄ ɔ̄kōolɔhi ā, alɔ í kɛ̄kɛ̄mgbɛ̄ lɛ aá ŋ́, alɔ í yɔ̄ gē gbɛlá ka ālɔ̄ lɛ aá plla ŋ́, ɔtū kú alɔ le yēŋēē.

⁴Ikɔkɔ ɔ́ɔmā, alɔ gē ka ɔdā nɛ̄ Ɔwɔicō tíne ká alɔ ka ā, ohígbū ka ó cɛ̄ ka anúɔ lɔtūce alɔ glá, ɔ́ɔmā yá ɛ́ɛ́ nōó je úklɔ́ kú ɔna ō tá kú ɔ̄kōolɔhi ā lɛ alɔ á. Alɔ í yɔ̄ gē yá ɔdā nɛ̄ ācɛ tíne ká alɔ yá ā icííci ŋ́, amáŋ alɔ gē yá ɔdā nɛ̄ Ɔwɔicō, nōo jé ipú ɔtū kú alɔ ā, tíne ká alɔ yá ā.

⁵Aá jé lɔɔlɔhi ka alɔ í wā ɛgiyí aá wā í kɛlā ō yá ɔ̄cɛ ɛbɛ́ lɛ aá ŋ́, ɛ́ɛ́ nɛ̄ alɔ kōō bī unwū ɔdā ɔtū eko nɛ̄ alɔ tɔ́ɔna kú ɔ̄kōolɔhi ā lɛ aá ā ŋ́. Ɔwɔicō jé ipú ɔtū kú alɔ.

⁶Alɔ í yɔ̄ gē yá ɔdā dúú nōo géē cɛ̄ lɛ ɔ̄cɛ dúúmā cɛ̄tra alɔ ŋ́, ɛ́ɛ́ nɛ̄ alɔ kōō ī tíne kú aá ámāŋ ka ɔ̄cɛ ɔhá dúú kéē cɛ̄tra alɔ ŋ́.

⁷Amáŋ abɔ̄ alɔ wɛ ācotɛ̄hɔ̄ kú Ohɔ́nyɛtá ā, ó géē yɛ í le kpaakpa lɛ alɔ kú ālɔ̄ dɔɔ̄kā odée ŋmá ɛgiyí aá. Amáŋ alɔ gbonɛnɛ lɛ aá, alɔ klla ī yíhɔtū tá aá ɛ́gɛ́nɛ̄ ɛ́nɛ́ o je amɛ̄ le ɔyí nū gē leyīkwu ayí nū ā.

⁸Abɔ̄ aá le he alɔ ɔtū nɛ̄ɛ̄nɛ̄hi ā, alɔ le tútū ká ālɔ̄ cɛ̄ lɛ aá jé odée lɛyíkwu ɔ̄kōolɔhi nōo ŋmá ɛgiyí Ɔwɔicō ā. Ó wɛ ɔ́ɔmā ōfūnū ŋ́, amáŋ alɔ le tútū ō kwú lɛ aá dúú. Aá he alɔ ɔtū nɛ̄ɛ̄nɛ̄hi.

⁹Aá blakwu ɔ́ gɛ ŋ́ nɛɛ, ayínɛ́ um, ɛ́gɛ́nɛ̄ alɔ yúklɔ́ lɔfú lɔfú lɛ ā! Alɔ yúklɔ́ ɔlɛ́ɛnɔ mɛ́mla otú cɛ́ɛ́ ka abɔ̄ alɔ bá mla aá gē tɔ́ɔna kú ɔ̄kōolɔhi nōo ŋmá ɛgiyí Ɔwɔicō lɛ aá ā, kóō híīī wɛ unwalu kú ije ō ŋmó lɛ aá ŋ́.

¹⁰Aá abɔ̄yī aá jé ɔdā nɛ̄ alɔ yá ā, Ɔwɔicō abɔ̄yī nū kē jé ɔdā nɛ̄ alɔ yá ā, ka ucē kú alɔ lɛyíkwu aá nēe wɛ ācɔ̄lóhɔ́nyɛtá ā le yēŋēē, le kpaakpa, í klla lɛ ɔdā dúú nɛ̄ ācɛ dúú í bī le ŋmó alɔ ɛpɔ̄bí ŋ́.

¹¹Aá jé ka alɔ tá ɔnyɔɔnyɛ kú aá abɔ̄ ɛ́gɛ́nɛ̄ ádā gē tá ayí abɔ̄yī nū abɔ̄ ā.

¹²Alɔ gē tá aá ɔtū kwu ɔtū, alɔ kē ka lɛ aá lɔfúlɔfú kú aá lā oyēeyī kú aá ɔwɛ nɛ̄ ɔtū géē he Ɔwɔicō nōo hī aá igwú kú aá lɛ ukpɛ̄ kú ajɔ̄ɔ̄cɛ́ mɛ́mla ɛgahi kú nū ā lɛ.

¹³Anɔ́ɔ ó lɛ ɔdā ɔhá nōo yá ɛ́ɛ́ nɛ̄ alɔ cíkā ō tá Ɔwɔicō ahínyá. Eko nɛ̄ alɔ wā í da aá ɔdā nɛ̄ Ɔwɔicō ka lɛ alɔ ka ālɔ̄ ka lɛ aá ā, aá lɛ ɔdā nɛ̄ alɔ da aá ā pó, anɔ́ɔ aá ke cɛ̄ɛla ā bɛ̄ɛka olɛhɔ̄ kú Ɔwɔicō ā, ɛlā kú Ɔwɔicō nōo kē wɛ ɔkwɔ̄ɔ̄kwɛ̄yi ā. Ɔwɔicō kē bī ɛlā ā yɔ̄ gē yúklɔ́ ipú aá nēe cɛ̄ ā.

¹⁴Ayínɛ́ alɔ, ɔwɛ ékpó nɛ̄ aá móōwē ā nɛ̄ ācɛ icɔ́ɔci kú Ohɔ́nyɛtá nēe wɛ ákú Ɔwɔicō nēe bá Ujudíya ā móōwē lɛ dúú ā. Ācɛ ɔlɛ́ aá cɛ̄ lɛ aá móōwē ɔwɛ ékpó nɛ̄ ācɛ Ujudíya cɛ̄ lɛ aá móōwē ā.

¹⁵Ācɛ nēe ŋmó Óndú alɔ Ujísɔ̄si mɛ́mla ācomɛ́ɛbɛ ā, ācɛ ōhī kú uwā húmáyī yá alɔ ōwē. É lɛ Ɔwɔicō yá cɔ̄nū nɛ̄ɛ̄nɛ̄hi! Ɛlā ācɛ dúú í he uwá ɔtū ŋ́.

¹⁶É lɔfú tīiyē kéē cɛ̄ lɛ alɔ tɔ́ɔna kú ɔ̄kōolɔhi nōo géē cɛ̄ lɛ Ɔwɔicō nya aílɔ́wá tá ā lɛ uwá ŋ́. Ɛ̄nyā wɛ ámōōmɛ kú odúúdú íne kú Ɔwɔicō nēé ge bīya ojigógó á. Anɔ́ɔ abālɔbányā Ɔwɔicō géē kɛpɔ̄ olɔnɔ tū uwā mɛ́ɛ́nɛ.

¹⁷Ɛjīkwɛjī lɛ alɔ nɛɛ, ayínɛ́, eko nɛ̄ ācɛ ōhī hɛ́ alɔ abɔ̄fú gɛcɛ ŋmá ɛgiyí aá eko kpiíí ā, alɔ abɔ̄yī alɔ í yɔ̄ mla aá ŋ́. Amáŋ alɔ yɔ̄ ī gbɛlá kwu aá eko dóódu. Abɔ̄ aá kwú alɔ nɛ̄ɛ̄nɛ̄hi, alɔ lɔfú tīiyē kú alɔ lɛ aá má kpɔ́.

¹⁸Alɔ tíne kú alɔ kwúcē wā ɛgiyí aá. Ami abɔ̄yī um cēyītīkwū igbalɛwa ká n̄ kwúcē wā ɛgiyí aá, amáŋ ebilíi lɛ alɔ anú ci.

¹⁹Ó wɛ ɔkwɔ̄ɔ̄kwɛ̄yi ka aá nɛ̄ n, aá yá ɛ́ɛ́ nɛ̄ alɔ lɛ eyīyōce á, aá kē wɛ ācɛ nēe yá ɛ́ɛ́ nɛ̄ alɔ kē ī gwéeyē á, aá kē yá ɛ́ɛ́ nɛ̄ alɔ í gwó kú ɔdā nɛ̄ alɔ yá ā iyɔ̄bū Óndú alɔ Ujísɔ̄si Ohɔ́nyɛtá eko nōó í kwúcē wā á.

²⁰Ó lɛ ā ɔkwɛ̄yi nɛ̄, aá wɛ ācɛ nēe yá ɛ́ɛ́ nɛ̄ n gē gwó á, aá kē yá ɛ́ɛ́ nɛ̄ n gē gwéeyē á.