Read idoma UJÓSSUWA 1 Bible Online

UJÓSSUWA 1 - idoma bible

UJÓSSUWA 1

¹Igbīhi ikwū kú Umósīsi, ɔ̄cocɛ̄hɔ̄ kú Ɔwɔicō ā, Óndú ā le ɛlā ka lɛ Ujóssuwa, ɔyí kú Unɔ́n nōo gē tá Umósīsi abɔ̄ ā kahíníī,

²“Umósīsi ɔ̄cocɛ̄hɔ̄ kú um gekwú ɛɛ́, cāŋjɛ abālɔbányā, ká awɔ mɛ́mla ācɛ kú Ísrɛ̄lu, ká aá lɛ bēhé ísu kú Ujɔ́dan ga ipú ajɛ, nɛ̄ n yɔ̄ gē je lɛ uwá ā.

³Ɛga dúúmā nɛ̄ ikpó kú uwɔ géē da ɔ́ ā, n géē je ɔ́ gā uwɔ, ɛ́gɛ́nɛ̄ n cokónu lɛ Umósīsi lɛ ā.

⁴Ajɛ ɛ̄nɛ̄ o gbɔɔ́ ŋmá ígbíli ɛháajɛ kú ɛfu kú Ulɛ́bānɔn jāā ga ísu nɛ̄hi, ísu kú Uyúfarétīisi ɛnɔ̄ɔ̄cī, gaá bū ajɛ kú ācɛ Uhɛ́ti ga ísu kú Umeditarénīya ɛnɔ̄ɔ̄nɛ̄ ā.

⁵Ɔ̄cɛ dóódu í gáā lɔfú yá uwɔ lé gbóógbō glá ŋ́ ipú oyēeyī kú uwɔ. Ɛ́gɛ́nɛ̄ n yɔ̄ mla Umósīsi ā, ɛ́gɔ́ɔmā nɛ̄ n géē yɔ̄ mla awɔ á. N gáā jé uwɔ kwɛjí ɔwɛ ɛ́ɛ́ nɛ̄ n gē je mlanyī uwɔ ŋ́.

⁶Lɛ ɔtū lé ká ā lɔfú tīyē, ohígbū ka awɔ gáā yá ɛ́ɛ́ nɛ̄ ācɛ ā géē lé úgwū kú ajɛ nɛ̄ n cokónu ūnū lɛ aádáádā uwā ā á.

⁷Lɛ ɔtū lɛ ōfōōfūnū, ká ā le lɔfú tīyē, cɛ́ɛ́ ká ā yá ɛ́gɛ́nɛ̄ īne nɛ̄ Umósīsi je gā uwɔ ā lɛ ā. Ā híī lɛ eyī gwū ɛga dúúmā kú íne ā bónū ŋ́, cɛ́ɛ́ a kē í yá lɔhi ɛga nāa gē nyɔ̄ ā.

⁸Le má ka a yɔ̄ gē ka íne nyā tɛ́ɛcɛ eko dóódu, a klla í yɔ̄ ī jé ɔ̄ tū ɔtū otú mɛ́mla ɔlɛ́ɛnɔ. Le má ka a í yá ɛjɛ̄ɛ̄jī ɔdā dóódu nēé tá ipú íne ā. Cɛ́ɛ́ a géē yá lɔhi klla í jɛ̄ gɔbū ipú ɔdā dóódu nāa í yá ā.

⁹N le da uwɔ ɛɛ́ ka, ā lɛ ɔtū lɛ, ká ā klla lɔfú tīyē. Ā híī yúufi, ɛ́ɛ́ nɛ̄ ɔtū kú uwɔ ge gbenyi ŋ́. Ohígbū ka, ami Óndú ā, Ɔwɔicō kú uwɔ ā yɔ̄ mla uwɔ ɛga dóódu nāa géē nyɔ̄ ā.”

¹⁰Anɔ́ɔ, Ujóssuwa le ɔ́da je lɛ aótrɛ̄yí kú ācɛ ā kahíníí,

¹¹“Aá ga ɔlɛ́ ā cɛ́ɛ́ ká aá da ācɛ ā kéē lɛ iyó kú uwā tútū, ohígbū ka, ipú ɛ̄cī ɛtá nyā, alɔ géē bēhé ísu kú Ujɔ́dan nyā gaá mīyɛ ajɛ nɛ̄ Óndú, Ɔwɔicō kú alɔ yɔ̄ ī je lɛ aá ā.”

¹²Ujóssuwa da aípɔ́ɔma kú Urúbɛ̄n, mɛ́mla Ugádi, mɛ́mla āyā kú ipɔ́ɔma kú Umanásɛ ā kahíníī,

¹³“Aá blakwu, ɛ́gɛ́nɛ̄ Umósīsi ɔ̄cocɛ̄hɔ̄ kú Óndú ā da aá ka, Óndú, Ɔwɔicō kú aá ɔ́ɔ géē je ajɛ kú ɛnɔ̄ɔ̄cī kú Ujɔ́dan ā lɛ aá kóō wɛ ɔlɛ́ aá ā.

¹⁴Anyā aá, ayí aá, mɛ́mla aɔ́dāajɛ kú aá géē bá amānyā, amáŋ, ācɛnyīlɔ kú aá nēe lɔfú kpɛ́fú glá ā géē kpó iyɔ́fú kú uwā tū iyē, cɛ́ɛ́ kéē bēhé Ujɔ́dan ā gaá tá ācɛ kú Ísrɛ̄lu o hile ā abɔ̄.

¹⁵Jāā gbéeko nēé mīyɛ ajɛ kú ɛnɔ̄ɔ̄nɛ̄ kú Ujɔ́dan nɛ̄ Óndú ā Ɔwɔicō kú aá je lɛ uwá ā. Eko, nēé mīyɛ ajɛ ā, anɔ́ɔ é kē má bá anú ɛbɔ́ ɛ́ɛ́, nɛ́ aá géē je cīgbīhi wā í lá ipú ajɛ kú aá ɛnɔ̄ɔ̄cī kú Ujɔ́dan, nɛ̄ Umósīsi ɔ̄cocɛ̄hɔ̄ kú Óndú ā je lɛ aá ā kllɔ́dɔ́ɔ́ á.”

¹⁶Anɔ́ɔ ācɛ ā tá Ujóssuwa ohi kahíníí, “Ɔdā dúúdú nɛ̄ a da alɔ ā, alɔ géē yá ɔ̄. Ɛga dúúmā nāa tū alɔ nyɔ̄, alɔ géē nyɔ̄.

¹⁷Alɔ géē lɛyítáajɛ gā uwɔ, ɛ́gɛ́nɛ̄ alɔ gē lɛyítáajɛ lɛ Umósīsi eko dóódu ā. Ká Óndú, Ɔwɔicō kú uwɔ kóō yɔ̄ mla awɔ ɛ́gɛ́nɛ̄ ó yɔ̄ mla Umósīsi ā.

¹⁸ɔ̄cɛ dúúmā nōo yá īkpɛ̄yí olɔfú tá ɔ́da kú uwɔ̄, ámāŋ, o tá kóō lɛyítáajɛ lɛ íne kú uwɔ, é géē ŋmó ɔ̄cɛ ɔ́ɔmā. Lɛ ɔtū lɛ ká ā lɔfú tīyē.