Read idoma UJÓSSUWA 10 Bible Online

UJÓSSUWA 10 - idoma bible

UJÓSSUWA 10

¹Adonisédēki, ɔcɛ́ kú Ujerúsālɛm le pó ka Ujóssuwa ɔ́ɔ le Ái yíífi dúúdú klla lɛ ɔcɛ́ kú nū ŋmó ɛ́gɛ́nɛ̄ ó yá ɔcɛ́ kú Ujérīko ā. Ó klla pó ka, ācɛ kú Ugíbeyɔn ɔ́ɔ le ɛbɔ́ yá mla ācɛ kú Ísrɛ̄lu nēe lā ɔtāhɛ̄ uwā ā.

²Ɛ̄nyā je unwalu lɛ ācɛ kú Ujɛrúsālɛm nɛ̄hi, ohígbū ka, ācɛ kú Ugíbeyɔn lɛwa nɛ̄hi, bɛ̄ɛka igelī nɛ̄hi dóódu nōo lɛ ɔcɛ́ ā. Ɔlɛ́ ā kē nwuné fíyɛ́ Ái á. Ācɛ kú igelī nɛ̄hi ā kē jé ō kpɛ́fú nɛ̄hi.

³Anɔ́ɔ, Adonisédēki lɛ ɛhɔ̄ tū fu Uhɔ̄ham, ɔcɛ́ kú Uhɛ́brɔn, Upíram, ɔcɛ́ kú Ujamútu, Ujáfiya, ɔcɛ́ kú Ulákisi mɛ́mla Udébiri, ɔcɛ́ kú Églɔn, kéē

⁴wā í tá anúɔ abɔ̄, cɛ́ɛ́ kú anúɔ kpɛ́fú tá Ugíbeyɔn, ohígbū ka, ācɛ abɔ́ɔ ɔ́ɔ le ɛbɔ́ yá mla Ujóssuwa mɛ́mla ācɛ Ísrɛ̄lu ɛɛ́.

⁵Anɔ́ɔ aɔ́cɛ́ ɛhɔ̄ kú Ámɔn nyā, aɔ́cɛ́ kú Ujɛrúsālɛm, Uhɛ́brɔn, Ujamútu, Ulákisi mɛ́mla Églɔn, le aícɔ́ɔja kú uwā pīya tɔ̄há le ɔlɛ́ kú ācɛ Ugíbeyɔn yɛ jīla tá, cɛ́ɛ́ kéē kpɛ́fú tá uwā.

⁶Anɔ́ɔ ācɛ kú Ugíbeyɔn lɛ ɛhɔ̄ tū fu Ujóssuwa Ugígal kóō je mlanyī á ŋ́ ɔkpani, ka ɔ́ɔ wā bōōbū gaá tá aá abɔ̄, cɛ́ɛ́ kóō lɛ aá nyatá. É ka odúúdú aɔ́cɛ́ kú Ámɔn nēe bá ɛyí ɛfu ā, ɛ́ɛ le pīya tɔ̄há gáā kpɛ́fú tá aá ɛɛ́.

⁷Anɔ́ɔ Ujóssuwa mɛ́mla odúúdú aícɔ́ɔja kú nū néē lɔfú fíyɛ́ dúú ā, gbɔɔ́ ŋmá Ugígal á.

⁸Óndú ā le ɔfú tū Ujóssuwa iyē ka ɔ́ɔ yúufi uwā ŋ́, ka anúɔ tɛtɛ cɛ̄ lɛ ɔ́ lɛ uwā yálé ɛɛ́. Ó ka ɔ̄cɛ dúúmā kú uwā ɔ́ gáā háyi iyɔ̄bū Ujóssuwa glá ŋ́.

⁹Ujóssuwa mɛ́mla aícɔ́ɔja kú nū yɛ otú gbɔ́ ɔ̄ci ŋmá Ugígal kéē nyɔ̄ Ugíbeyɔn, kéē gáā nuunu tá ācɛ kú Ámɔn acígilí.

¹⁰Óndú ā le yá kú ɔtū kú ācɛ kú Ámɔn ā kóō le wuklíicō abɔ̄ nɛ̄ aícɔ́ɔja kú ācɛ bá ī wā a. Ācɛ kú Ísrɛ̄lu gbɔɔ́ ō ŋmó uwā nɛ̄hi ajɛ kú Ugíbeyɔn, klla nū uwā jāā ga ɛyí ɛfu, gaá bū Ubɛti Uhórɔn, klla nuunu tá uwá jāā ga ɛháajɛ kú Asɛ́ka mɛ́mla Umakéda ā.

¹¹Abɔ̄ ācɛ kú Ámɔn bá ī kwinya ŋmá ɛgiyí aícɔ́ɔja kú Ísrɛ̄lu bū ɛpá éyi ā, Óndú ā le yá kú ɛcɔ̄ kú ɔwɔ o wɛ́ɛcɔ̄ kóō yā klá uwá abɔ̄ é yɔ̄ ī ga Asɛ́ka ā. Ɛwa kú uwá nɛ̄ ɛcɔ̄ɔwɔ ŋmó ā klla fíyɛ́ ɛ̄nɛ̄ aícɔ́ɔja kú Ísrɛ̄lu ŋmó ā á.

¹²Ɛ̄cī ɔ́ɔmā, Óndú ā cɛ̄ lɛ ācɛ kú Ísrɛ̄lu lɛ ācɛ Ámɔn kpó yálé. Ujóssuwa le ɛlā ka lɛ Óndú ā ipéēyī kú ācɛ kú Ísrɛ̄lu kahíníī, “Ɛnɔ, háyi cíí icō Ugíbeyɔn. Ɔyā háyi cíí ɔpɛ́ kú Áíjālɔn”

¹³Anɔ́ɔ ɛnɔ ā má háyi cíí á. Ɔyā í kē ŋmá ɛga nɛ̄ ó yɔ̄ ā ŋ́ jāā gbéeko nɛ̄ éwo kú Ísrɛ̄lu lɛ aólɛlā kú uwā kpó yálé. É le ɔdā nōo yá nyá tá tū ipú ɔkpá kú Ujássa ka ɛnɔ māháyi cíí ɔkpáncō. Ó kē ga ajɛ ŋ́ ɛ̄cī odumkulu.

¹⁴Ɛ̄cī ɛ́gɛ́nyā í tɛtɛ yɔ̄ jéjéē ɛɛ́ ŋ́, ɛɛ́ nɛ̄ ó klla gáā yɔ̄ ɛ́ɛ́ gɛ ŋ́, ɛ̄cī nɛ̄ Óndú ā lɛyí táajɛ lɛ ɛlā kú ɔlɛɛcɛ ā nɛ̄ ó cɛ̄ɛ̄pɔ̄ ācɛ kú Ísrɛ̄lu nuunu lɛ uwá.

¹⁵Igbīhi ɛ̄nyā ā, Ujóssuwa mla aícɔ́ɔja kú nū kwúcē wā Ugígalu.

¹⁶Aɔ́cɛ́ ɛhɔ̄ kú Ámɔn ā le pɛ́ kwu gaá tayínū ipú ɔgɔ kú Umakéda.

¹⁷Anɔ́ɔ ɔ̄cɛ éyi lɛ uwá má, anɔ́ɔ é le ɛga néē bá ā ka lɛ Ujóssuwa á.

¹⁸Anɔ́ɔ Ujóssuwa da uwá kéē lɛ ápátɛ́cɔ̄ nɛ̄hi míya gwū okónu ɔ̄gɔ̄ ā, cɛ́ɛ́ kéē lɛ ācɛ fu kéē gbō abɔ́ɔ.

¹⁹Amáŋ ó da ācɛ ohile ā kéē híī bá abɔ́ɔ abɔ̄yī uwā ŋ́. Kéē nū aólɛlā kú uwā, cɛ́ɛ́ kéē kpɛ́fú tá uwā ŋmá igbīhi. Kéē híī cɛ̄ lɛ uwá cīgbīhi wā ɔlɛ́ uwá ŋ́. Ka Óndú ā, Ɔwɔicō kú uwā ɔ́ɔ cɛ̄ lɛ uwá lɛ uwá yálé ɛɛ́.

²⁰Ujóssuwa mɛ́mla ācɛ kú Ísrɛ̄lu lɛ uwá kpó ŋmó, amáŋ, ācɛ ōhī kú uwā lɛ ɛga má le kwu gaá tayínū ipú ɔ́gba kú igelī nɛ̄hi ā, nēé kē ŋmó uwá ŋ́.

²¹Odúúdú aícɔ́ɔja kú Ujóssuwa píyɛyí wā ɛgiyí nū ɛbɔ́ ipú áklɔ̄kpɛ kú Umakéda. Ɔ̄cɛ dúúmā ipú ajɛ ā í lɔtú kɛlā lɛyíkwu ācɛ kú Ísrɛ̄lu glá gɛ ŋ́.

²²Anɔ́ɔ Ujóssuwa da uwá kéē lɛ ɔ̄gɔ̄ ā nwūla, cɛ́ɛ́ kéē lɛ aɔ́cɛ́ ɛhɔ̄ ā kpó wɛ̄ɛcɛ gē lɛ anúɔ.

²³Anɔ́ɔ ē lɛ ɔ̄gɔ̄ ā nwūla, le aɔ́cɛ́ kú Ujerúsālɛm, Uhɛ́brɔn, Ujámut, Ulákisi, mla Églɔn ā kpó wɛ̄ɛcɛ.

²⁴Anɔ́ɔ é lɛ uwá kpó gé lɛ Ujóssuwa á. Ó lɛ odúúdú ācɛ kú Ísrɛ̄lu mɛ́mla aótrɛ̄yí nēe ga ɔgbɛ́fú mla anú ā kpó hīgwú. Ó da uwá kéē lɛ ikpó da aɔ́cɛ́ ā ɔkɔ báajɛ. Anɔ́ɔ ē le yá lɛ ā á.

²⁵Ujóssuwa da ācɛ ā kéē híī yúufi ŋ́. Kéē lɛ ɔtū lɛ, ohígbū ka ɛ́gɔ́ɔmā nɛ̄ Óndú ā gáā yá odúúdú aólɛlā kú uwā á.

²⁶Anɔ́ɔ Ujóssuwa lɛ aɔ́cɛ́ ā kpó tū olī playi ɔcí ɛhɔ̄, ɛga nɛ̄ okwū kú uwá playi jāā gbō ɔ̄nɔ̄ɔ̄nɛ̄ ā.

²⁷Eko nɛ̄ ɛnɔ gbɔɔ́ ō gaajɛ ā, Ujóssuwa da uwá kéē lɛ okwū kú uwá kpó wāajɛ. Anɔ́ɔ ē lɛ okwū kú uwá kpó tá tū ɔ̄gɔ̄ néē tɛtɛ tayínū anú ā. Anɔ́ɔ é lɛ ɛcɔ̄ nɛ̄hi míya gwū okónu ɔ̄gɔ̄ ā. Ɛcɔ̄ ɔ́ɔmā gwū ɔ̄ jāā kwu ícɛ.

²⁸Ujóssuwa kpɛ́fú tá ācɛ kú Umakéda mɛ́mla ɔcɛ́ kú nū ɛ̄cī ɔ́ɔmā. Ó kē lɛ odúúdú ācɛ kú ipɔ́lɛ́ ɔ́ɔmā kpó ŋmó. Ɔ̄cɛ dúúmā kú uwá í hile ŋ́. Ɛdɔ ɔdā nɛ̄ ó yá ɔcɛ́ kú Ujérīko ā, nɛ̄ ó yá ɔcɛ́ kú Umakɛ́da dúú á.

²⁹Igbīhi ɛ̄nyā ā, Ujóssuwa mɛ́mla aícɔ́ɔja kú nū le pɛ́ nyɛ̄ɛ̄ ŋmá Umakéda gā Ulíbna gaá le ɛ́fú kpó tá ɔ̄.

³⁰Óndú ā klla cɛ̄ lɛ uwá lɛ ɔlɛ́ ɔ́ɔmā mɛ́mla ɔcɛ́ kú nū yálé. É mā ɔ̄cɛ dúúmā kú uwá tá ŋ́. É le uwá kpó ŋmó. Ɔdā néē yá ɔcɛ́ kú Ujérīko ā néē yá ɔcɛ́ kú abɔ́ɔ dúú á.

³¹Ujóssuwa mɛ́mla aícɔ́ɔja kú nū gbɔɔ́ ŋmá Ulíbna gā Ulákisi, le ɔ́ yɛ jīla tá, klla le ɛfú kpó tá ɔ̄.

³²Ɛ̄cī ɔ́mpa kú ɛfú ā, Óndú ā cɛ̄ lɛ uwá lɛ ācɛ Ulákisi yálé bɛ̄ɛka ɛ́gɛ́nɛ̄ o yá Ulíbna lé ā. É kē mā ɔ̄cɛ dúúmā kú uwā tá ŋ́ dúú. É le uwá kpó ŋmó dúúdú.

³³Uhɔ́ram, ɔcɛ́ kú Ugɛ́sa wā í ta Ulákisi abɔ̄, amáŋ Ujóssuwa le anú mɛ́mla aícɔ́ɔja kú nū kpó ŋmó, ɔ̄cɛ dúúmā í hile ipú uwá ŋ́.

³⁴Ujóssuwa mɛ́mla aícɔ́ɔja kú nū. Anɔ́ɔ ó gbɔɔ́ ŋmá Ulákisi gā Églɔn, le yɛ ɔ́ jīla tá klla gbɔɔ́ ō kpɛ́fú tá uwā.

³⁵É le uwá kpó yálé ícíícɛ ɔ́ɔmā klla lɛ ācɛ ɔlɛ́ uwá kpó ŋmó, ɛ́gɛ́nɛ̄ ē yá ācɛ Ulákisi ā.

³⁶Igbīhi ɛ̄nyā, Ujóssuwa mɛ́mla aícɔ́ɔja kú nū lɛ tá ɛfu kú Uhɛ́burɔn gaá kpɛ́fú tá uwā.

³⁷É mīyɛ Uhɛ́burɔn, lɛ ɔcɛ́ mɛ́mla ācɛ kú nū kpó ŋmó. É klla lɛ ācɛ kú aigelī nēe kwu ɔ́ ajaajɛ ā kpó ŋmó. Ujóssuwa ka kē lɛ aígelī nɛ̄ŋcɛ́ ā kpó yíífi dúúdú ɛ́gɛ́nɛ̄ é yá Églɔn ā. É mā ɔ̄cɛ dúúmā kú igelī nɛ̄hi ɔ́ɔmā tá yēeyī ŋ́.

³⁸Anɔ́ɔ Ujóssuwa mɛ́mla aícɔ́ɔja kú nū kwúcē igbīhi gā Udɛ́biri gaá le ɛfú kpó tá uwá.

³⁹Ó le igelī nɛ̄hi ā yálé klla mīyɛ ɔ́ tābɔ̄. Ó le ɔcɛ́ kú uwā kwú klla mīyɛ aígelī kú uwā nēe kwu uwá ajaajɛ ā. Ó le odúúdú ācɛ kú igelī nɛ̄hi ā kpó ŋmó. Ɔdā nɛ̄ ó yá aɔ́cɛ́ kú Uhɛ́brɔn mɛ́mla Ulíbina ā, nɛ̄ ó yá aɔ́cɛ́ kú Udɛ́biri mɛ́mla ācɛ ɔlɛ́ nū á.

⁴⁰Ujóssuwa mīyɛ odúúdú ajɛ ā. Ó lɛ aɔ́cɛ́ kú aígelī nɛ̄hi kú ɛyí ɛfu ā kpó yálé, kwu ákú ɔpɛ́ mɛ́mla ikpó ɛfú ā, jāā kwu ācɛ nōo bá ajɛ ɔlamu ɛháajɛ ā, kpó yálé kpɛ́mm. Ó habɔ̄ ɔ̄cɛ dúúmā tá ŋ́. Ó lɛ uwá kpó ŋmó dúúdú. Ohígbū ka, ɔ́ɔmā wɛ, ɔdā nɛ̄ Óndú, Ɔwɔicō kú Ísrɛ̄lu da ɔ́ á.

⁴¹Ujóssuwa yá ācɛ lé ŋmá Ukádɛssi Ubanéya ɛháajɛ, ga Ugása mɛ́mla odúúdú ajɛ kú Ugóssɛn jāā ga ɛhícō kú Ugíbeyɔn.

⁴²Ujóssuwa lɛ odúúdú ācɛ ā, mɛ́mla aɔ́cɛ́ kú uwā kpó yálé ɔgbɛ́fú, ohígbū ka Óndú, Ɔwɔicō yɔ̄ gē kpɛ́fú lɛ ācɛ Ísrɛ̄lu.

⁴³Igbīhi ɛ̄nyā ā, Ujóssuwa mɛ́mla aícɔ́ɔja kú nū kwúcē igbīhi gaá bá Ugígalu.