Read idoma UJÓSSUWA 11 Bible Online

UJÓSSUWA 11 - idoma bible

UJÓSSUWA 11

¹Eko nɛ̄ ɔ̄kā kú ācɛ nɛ̄ Ujóssuwa yálé le tá ahɔ̄ kú Ujábin, ɔcɛ́ kú Uhásɔ ā. Anɔ́ɔ ó lɛ ɛhɔ̄ tū fu Ujóbābu, ɔcɛ́ kú Umádɔn, mɛ́mla ɔcɛ́ kú Ussímrɔn, mɛ́mla ɔ̄cɛ kú Ákissāfu.

²Ó klla le ɛhɔ̄ tū fu aɔ́cɛ́ kú ipú ɔlɛ́ kú ɛyí ɛfu kú ɛhícō ā, mɛ́mla ákú aɔ́pɛ́ kú Ujɔ́dan ɛháajɛ kú isú kú Ugalíli ā. Ó klla le ɛhɔ̄ tū fu aɔ́cɛ kú okónu ísu, nēe yɔ̄ kwu Udɔ ajaajɛ ā.

³Ó klla lɛ ɛhɔ̄ tū fu ācɛ kú ɛnɔ̄ɔ̄cī mɛ́mla ácɛ kú ɛnɔ̄ɔ̄nɛ̄ kú Ukénan, mɛ́mla ācɛ Ámɔn, ācɛ Uhɛ́ti, ācɛ Upɛ́risi, mɛ́mla ācɛ Ujébūsi nēe lā ɛyí ɛfu ā. Ó le ɛhɔ̄ tū fu ācɛ Uhám ɛháajɛ kú Uhɛ́mɔn ipú ajɛ kú Umíspa.

⁴Anɔ́ɔ odúúdú uwá le pɛ́ wɛ̄ɛcɛ mla aícɔ́ɔja kú uwá, ɛwa kú uwā wɛ ɛnɛ̄nɛ̄ɛ̄hi bɛ̄ɛka ɔjɛ kú ipú ísu ā. É klla bī ɔnya o kpɛ́fú mɛ́mla aúgbɔ́ɔnya o kpɛ́fú wā dúú.

⁵Anɔ́ɔ odúúdú aɔ́cɛ́ nēe bá nyā lɛ aícɔ́ɔja kú uwā pīya tɔhá lɛ aáklɔ̄kpe kú ɛfú kwu okónu éŋkpɔ̄ kú Umérɔm kéē kpɛ́fú tá ācɛ Ísrɛ̄lu.

⁶Anɔ́ɔ Óndú ā da Ujóssuwa kóō híī yúufi uwā ŋ́, ka eko nyā kú o ŋmɔ́ɔcī nū ā, anúɔ géē lɛ odúúdú ācɛ ā kpó ŋmó kwɛyí lɛ ācɛ Ísrɛ̄lu ɛɛ́. Ó ka ɔ́ɔ kē í je ɔnya kú uwā ikpó kpó cē klla í je úgbɔ́ɔnya kú uwá kpó tɔ̄lá.”

⁷Anɔ́ɔ Ujóssuwa mɛ́mla ācɛ ɔlɛ́ nú nyɔ̄ í le ɛfú kpó tá uwá acígilí okónu éŋkpɔ̄ kú Umérɔma.

⁸Óndú ā cɛ̄ lɛ ācɛ kú Ísrɛ̄lu le uwá kpó yálé. É ŋmó uwā klla nū uwā jāā ga Usídɔn nɛ̄hi ā, mɛ́mla Umisrefotámeyim, jāā ga ɛnɔ̄ɔ̄cī ga ɔpɛ́ kú Umíspa. É ŋmó uwá jāā gbéeko nɛ̄ ɔ̄cɛ dúúmā kú aólɛlā ā í hile gɛ ŋ́.

⁹Ɛ́gɛ́nɛ̄ Óndú ā da Ujóssuwa lɛ ā nɛ̄ ó yá kpɛ́mm. Ó lɛ aɔ́nya kú uwá ikpó kpó cē, klla lɛ úgbɔ́ɔnya kú uwá kpó tɔ̄lá.

¹⁰Anɔ́ɔ Ujóssuwa kwúcē igbīhi wā Uhásɔ, klla mīyɛ ɔlɛ́ ɔ́ɔmā tābɔ̄ klla bī ɔkpacaŋgelī le ɔcɛ́ kú ɔlɛ́ ā ŋmó. Ohígbū ka anú ā wɛ otrɛ̄yí klla wɛ olɔfú kú ajɛ ɔ́ɔmā á.

¹¹É lɛ odúúdú ācɛ abɔ̄ kpó ŋmó. Ɔ̄cɛ dúúmā kú uwā í hile ŋ́. É klla lɛ ɔlɛ́ ā tɔ̄lá.

¹²Ujóssuwa mīyɛ odúúdú aígelī nɛ̄hi nēe bá abɔ́ɔ ā tābɔ̄. Ó le ācɛ mɛ́mla aɔ́cɛ́ kú uwā kpó ŋmó ɛ́gɛ́nɛ̄ Umósīsi, ɔ̄cocɛ̄hɔ̄ kú Ɔwɔicō da ɔ́ lɛ ā.

¹³Amáŋ, é je igelī nɛ̄hi dóódu nēe gwó kwu Umɔ́du ā yɔlá tāajɛ ŋ́, ayíka Uhásɔ nɛ̄ Ujóssuwa je tɔ̄lá ā.

¹⁴Ācɛ kú Ísrɛ̄lu lɛ odúúdú iyó mɛ́mla aɛ́bɛ́ kú ācɛ kú ipú aígelī nɛ̄hi ā kpó lɛ īyī uwā. Amáŋ é lɛ ācɛ ā kpó ŋmó dúúdú, ɔ̄cɛ dúúmā í hile ŋ́.

¹⁵Óndú ā tɛtɛ le da Umósīsi lɛyíkwu ɔdā ā. Umósīsi kē klla le da Ujóssuwa, anɔ́ɔ Ujóssuwa kē le abɔ́ fúlá tū ɛlā nēé da ɔ́ ā. Anɔ́ɔ ó kē le ɔdā dóódu nɛ̄ Óndú ā da Umósīsi ā yá jīla á.

¹⁶Ujóssuwa mīyɛ odúúdú ajɛ kú ɛyí ɛfu kú Unɛ́gɛ̄bu, mɛ́mla odúúdú ajɛ kú Ugóssɛn, mɛ́mla ɔpɛ́ kú Arába, mɛ́mla ɛfu kú Ísrɛ̄lu, mɛ́mla ɔpɛ́ kú nū ā tābɔ̄.

¹⁷Ó klla mīyɛ ajɛ nōo gbɔɔ́ ŋmá ɛfu kú Uhálaki, ga Uséyɛ ā, jāā ga Ubááligadi, ɔpɛ́ kú Ulɛ́bānɔn, ɛháajɛ kú ɛfu kú Uhɛ́ɛmɔn ā.

¹⁸Ɛfú nɛ̄ Ujóssuwa kpó tú aɔ́cɛ́ ā ligbó ajɛ nɛ̄hi. Amáŋ ó le uwá kpó kwú klla le uwá kpó ŋmó.

¹⁹Igelī nɛ̄hi dúúmā í yɔ̄ nɛ̄ ó yá ɛbɔ́ mla ācɛ kú Ísrɛ̄lu ŋ́ nɛ̄ɛ, ayíka ācɛ Uhám nēe lā Ugíbeyɔn ā. Ó le ācɛ o hile ā kpó yálé kpɛ́mm ɔgbɛ́fú nɛ̄ ó kpó ā.

²⁰Ɔwɔicō le yá kú ācɛ ā kéē lɛ abɔ̄ gbɔtū ka aá ī kpɛ́fú tū ācɛ Ísrɛ̄lu, o yá ɛ́ɛ́ kéē híī méyīnyinyi uwā ŋ́, cɛ́ɛ́ kéē lɛ uwá kpó yíífi dúúdú ŋmá ajɛ ɛ́gɛ́nɛ̄ nɛ̄ Umósīsi tū uwā ukɔ́ lɛ ā.

²¹Ujóssuwa le bɛ̄cɛ eko ɔ́ɔmā gaá le aágwu nēé hī ka Ánākim ā kpó yálé ŋmá ɛyí ɛfu, ŋmá Uhɛ́brɔn, Udɛ́biri, Ánābu mɛ́mla oŋmɛ́yí kú ɛfu kú Ujúda mla Ísrɛ̄lu ā. Ujóssuwa le uwá mɛ́mla ɔlɛ́ uwā kpó yíífi.

²²Agwu kú Ánākim dúúmā í hile ipú ajɛ kú Ísrɛ̄lu gɛ ŋ́. Nááná ā, aóhī hile Ugása, Ugáti mɛ́mla Ássidɔ̄du.

²³Anɔ́ɔ Ujóssuwa mīyɛ odúúdú ajɛ ā, ɛ́gɛ́nɛ̄ Óndú ā da Umósīsi lɛ ā. Anɔ́ɔ Ujóssuwa kwú ajɛ ā ú lɛ ācɛ kú Ísrɛ̄lu kóō wɛ ɔdā kú úgwū kú uwā. Ó le ɔ́ kɔ̄ lɛ uwá ɛ́gɛ́nɛ̄ aípɔ́ɔma kú uwā lɛ ā. Anɔ́ɔ ācɛ ā má mlɛ́nyɔ́ ŋmá ɛfú ō kpó á.