Read idoma UJÓSSUWA 12 Bible Online

UJÓSSUWA 12 - idoma bible

UJÓSSUWA 12

¹Gbɔbū kú Umósīsi kóō kwú ā, anú mɛ́mla ācɛ Ísrɛ̄lu le aɔ́cɛ́ ɛpa kú ɛnɔ̄ɔ̄cī kú ísu kú Ujɔ́dan kpó yálé. Aɔ́cɛ́ nēe bá ā gbō ācɛ kú ajɛ nēe ŋmá ɔpɛ́ kú Aránɔn nōo yɔ̄ ɛháajɛ ā ga ɛfu kú Uhɛ́mɔn mɛ́mla odúúdú Arába ɛnɔ̄ɔ̄cī ā.

²Ɔcɛ́ éyi kú aɔ́cɛ́ ā wɛ Usíhɔn, ɔcɛ́ kú ācɛ kú Ámɔn nōo lā Uhɛ́sibɔn ā. Ajɛ nɛ̄ ó gē leyīkwu ɔ́ ā wɛ, āyā kú ajɛ kú Ugílɛ̄di, nōo ŋmá Árōwɛ, nōo yɔ̄ okónōgwu kú ɔpɛ́ kú Aránɔn mɛ́mla igelī nɛ̄hi nōo yɔ̄ ɔtāhɛ̄ kú ɔpɛ́ ā. Ó klla yɛ jāā ga ísu kú Ujábɔ̄ku, nōo wɛ ɛjī kú Ámɔn ā.

³É mīyɛ Arába ga ísu kú cínɛ̄rɔtu lɛyíkwu ɛnɔ̄ɔ̄cī kú ísu kú ɔmā ā. Ó klla yɛ lɛyíkwu ɛháajɛ ga ɔkwu kú ɛfu kú Upísiga.

⁴É klla le Ógu, ɔcɛ́ kú Ubássan, éyi kú aóhile kú aágwu nēé hī ka Uréfēyím nōo lā Ásitārɔtu mɛ́mla Ɛ́dirēyi yálé.

⁵Ó gē gbāajɛ ŋmá ɛfu kú Uhɛ́mɔn mɛ́mla Uséleka, mɛ́mla odúúdú Ubássan nōo tū ɛjī kwu ācɛ Ugɛ́ssɔ mɛ́mla ācɛ Umaáka mɛ́mla ohɛ́pa kú Ugílɛ̄di gaá kwu ɛjī kú Usíhɔn ɔcɛ́ kú Uhɛ́sibɔn.

⁶Umósīsi, ɔ̄cocɛ̄hɔ̄ kú Óndú ā mɛ́mla ācɛ kú Ísrɛ̄lu ā le uwá yálé, klla kwú ajɛ kú uwá ú lɛ ayí kú Urúbɛ̄n, mɛ́mla Ugádi mɛ́mla éyi kú āyā kú ipɔ́ɔma kú Umanásɛ kóō wɛ ɔdā úgwū kú uwā.

⁷Ujóssuwa mɛ́mla ācɛ kú Ísrɛ̄lu lɛ odúúdú aɔ́cɛ́ kú ajɛ nēe bá ɛnɔ̄ɔ̄nɛ̄ kú Ujɔ́dan ā kpó yálé. O gbɔɔ́ ŋmá Ubááligadi ɔpɛ́ kú Ulɛ́bānɔn ga ɛfu kú Uhaláki ɛháajɛ kú Ɛ́dɔm. Ujóssuwa le ajɛ nyā kɔ̄ lɛ aípɔ́ɔma kú Ísrɛ̄lu ā kóō wɛ ɔdā úgwū kú uwā.

⁸Ajɛ nyā gbɔɔ́ ŋmá ajɛ ɛyí ɛfu, ga ikpó kú ɛnɔ̄ɔ̄nɛ̄ kú ɛfu ā. Ɔpɛ́ kú Ujɔ́dan jāā ga ikpó ɛfu ā. Mɛ́mla owúlatū ga ɛnɔ̄ɔ̄cī kú nū, mɛ́mla o yɛ ga ígbíli kú ɛháajɛ ā. Ajɛ nyā kē tɛtɛ wɛ ipɔ́lɛ́ kú ācɛ Uhɛ́ti, Ámɔn, Ukénan, Upɛ́risi, ācɛ Uhám, mɛ́mla ācɛ Ujébūsi.

⁹Ācɛ kú Ísrɛ̄lu lɛ aɔ́cɛ́ kú aígelī nɛ̄hi nēe bá nyā kpó yálé. Ujérīko, Ái nōo kwu Ubɛ́tɛlu ajaajɛ ā,

¹⁰Ujerúsālɛm, Uhɛ́brɔn,

¹¹Ujamútu, Ulákisi

¹²Égilɔn, Ugésa,

¹³Udébiri, Ugɛ́da,

¹⁴Uhɔ́ma, Árādi,

¹⁵Ilíbna, Adulám,

¹⁶Umakéda, Ubɛ́tɛlu,

¹⁷Utápūwa, Uhɛ́fa,

¹⁸Áfēki, Ulásárɔn

¹⁹Umádɔn, Uhásɔ,

²⁰Ussímrɔn-mérɔn, Ákisāfu

²¹Utáánāki, Umegído,

²²Ukɛ́dɛssi, Ujokinéyām, ipú Ukármelu,

²³Udɔ́ okónu ɔkpá, Ugóyim ipú Ugálili mɛ́mla

²⁴Utísa. Odúúdú aɔ́cɛ́ ā wɛ ofu cigwóléyi.