Read idoma UJÓSSUWA 13 Bible Online

UJÓSSUWA 13 - idoma bible

UJÓSSUWA 13

¹Eko nyā Ujóssuwa kwú hīlokplícī ɛɛ́. Óndú ā kē da ɔ́ kahíníī, “A le hīla, klla kwú gbo ókplícī ɛɛ́, amáŋ ajɛ hile nɛ̄hi nɛ̄ á mīyɛ ɛ́ɛ́ ŋ́ kpɔ́.

²Aɛ́nyā wɛ ajɛ nēe hile nɛ̄ á mīyɛ ɛ́ɛ́ ŋ́ má: odúúdú ajɛ kú ācɛ Ufilístiya mɛ́mla ajɛ kú Ugɛ́ssɔn.

³Ajɛ kú Áfim nōo yɔ̄ ɛháajɛ ā, (ajɛ nōo gbɔɔ́ ŋmá ɔkpá kú Ussíhɔ nōo kwu ɛjī kú Íjīpiti ā, jāā ga ɛhícō, ga ɛjī kú Ékrɔn, nōo wɛ ajɛ kú Ukénan. Aɔ́cɛ́ ɛhɔ̄ kú ācɛ Ufilístiya kē lā, Ugása, Ássīdɔ̄du, Ásikɛ̄lɔn, Ugáti mɛ́mla Ɛ́krɔn kpɔ́ ɛ́ɛ́),

⁴Odúúdú ajɛ kú ācɛ Ukɛ́nan mɛ́mla ācɛ Umeyára ɛ̄nɛ̄ wɛ ákú ācɛ Usídɔn ā jāā ga Áféki nōo kwu ɛjī kú ācɛ Ámɔ̄n ā.

⁵Ajɛ kú ācɛ Ugɛ́bālu. Odúúdú ajɛ kú Ulɛ́bānɔn ga ɛnɔ̄ɔ̄cī, mɛ́mla ajɛ nōo ŋmá Ubaalgádi, nōo yɔ̄ ɛháajɛ kú Uhɛ́mɔn ga Uhámati ā.

⁶Ajɛ ā yɛ kwu ajɛ kú odúúdú ācɛ Usídɔn ɛ̄nɛ̄ o lā ɔtāhɛ̄ kú ɛfu kú Ulɛ́bānɔn mɛ́mla Umísrēfotameyim ā. N géē nū odúúdú ācɛ ā ŋmá ajɛ ā, abɔ̄ ācɛ Ísrɛ̄lu yɔ̄ gē wā ā.” Ó da Ujósuwā kóō lɛ ajɛ kpó kɔ̄ lɛ aípɔ́ɔma kú Ísrɛ̄lu ɛ́gɛ́nɛ̄ anúɔ tū ɔ̄ ukɔ́ lɛ ā.

⁷Ó klla da ɔ́ ka ɔ́ɔ̄ lɛ ajɛ ā kɔ̄ lɛ aípɔ́ɔma ahāanɛ o hile kú Ísrɛ̄lu ā, mɛ́mla āyā éyi kú ipɔ́ɔma kú Umanásɛ, cɛ́ɛ́ kóō kwú pīya ɔdā úgwū kú uwá.

⁸Aipɔ́ɔma kú Urúbɛ̄n mɛ́mla Ugádi mɛ́mla āyā éyi kú ipɔ́ɔma kú Umanásɛ ā tɛtɛ mīyɛ ajɛ nɛ̄ Umósīsi, ɔ̄cocɛ̄hɔ̄ kú Óndú ā je lɛ uwá ā. Ajɛ kú uwā ā yɔ̄ ɛnɔ̄ɔ̄cī, ogbeé kú ísu kú Ujɔ́dan

⁹Ajɛ kú uwā yɛ jāā ga Árōwɛ (ɛ̄nɛ̄ o yɔ̄ ogwu kú ɔpɛ́ kú Árɔ̄ni ā) mɛ́mla aígelī nɛ̄hi nōo yɔ̄ ɔtāhɛ̄ kú ɔpɛ́ ɔ́ɔmā ā, mɛ́mla odúúdú ɛfu nēe ŋmá Umédēba ga Udíbɔn ā.

¹⁰Ó klla yɛ jāā ga ɛjī kú Ámɔn mɛ́mla odúúdú aígelī nɛ̄hi nɛ̄ ɔcɛ́ kú Ámɔn, Usíhɔn, gē gbō ŋmá Uhɛ́sibɔn ā.

¹¹Ajɛ ā klla yɛ ga Ugílɛ̄di, mɛ́mla ɛyí ajɛ kú Ugɛ́ssɔ mɛ́mla Umáaka, mɛ́mla odúúdú ɛfu kú Uhámɔn, mɛ́mla odúúdú Ubássan jāā ga Usélika.

¹²Ó klla yɛ ga odúúdú ajɛ ɔcɛ́ kú Ógu, nōo wɛ ámōōmɛ kú ewo kú ācɛ Urɛ̄fém, nɛ̄ ó gē gbō Ássitárɔ̄tu mɛ́mla Ɛ́dreyi. Umósīsi tɛtɛ lɛ ācɛ nēe bá nyā yálé, le uwá nū bɛ̄cɛ ŋmá ipú ajɛ ā.

¹³Amáŋ, ācɛ kú Ísrɛ̄lu í nū ācɛ kú Ugɛ́ssɔn mɛ́mla Umáaka bɛ̄cɛ ŋ́. É lā ipú ācɛ Ísrɛ̄lu kpɔ́ jāā kwu eko nēé tɔ́kpá nyā.

¹⁴Umósīsi í je ajɛ dúúmā lɛ ipɔ́ɔma kú Ulífāyi ŋ́. Ɛ́gɛ́nɛ̄ Óndú ā da Umósīsi ā, é géē mīyɛ ukpɛ̄ kú uwá ŋmá ipú aɔ́dā kú ɛ̄gbā nēé gē bī wā í lɛ gwɛ́ɛya ɛyí ede kú Óndú ā, Ɔwɔicō kú Ísrɛ̄lu ā.

¹⁵Umósīsi kē kwú āyā kú ajɛ ā ú lɛ ipɔ́ɔma kú Urúbɛ̄n kóō wɛ ukpɛ̄ kú úgwū kú uwā.

¹⁶Ajɛ kú uwā yɛ ga Árōwɛ ɛ̄nɛ̄ o yɔ̄ okónogwu kú ɔpɛ́ kú Ánɔn ā mɛ́mla igelī nɛ̄hi nōo yɔ̄ ɔtāhɛ̄ kú ɔpɛ́ ā, mɛ́mla odúúdú ajɛ o plákátá kú ɛyí ɛfu kú Umedéba.

¹⁷Ó yɛ ga Uhɛ́sibɔn mɛ́mla odúúdú aígelī nɛ̄hi nēe bá ɛyí ajɛ oplákátá kú ɛyí ɛfu ā. É wɛ Udíbɔn, Ubámɔ̄tu, Ubáal, Ubɛ́tbáalmɛn,

¹⁸Ujáhāsi, Ukedemɔ́ti, Umɛ́fāati.

¹⁹Ukírīyatém, Usibíma, Userɛt-ussáha, nōo ce ɛyí ɛfu kú ɔpɛ́ ā.

²⁰Ubɛtipéyɔ mɛ́mla ɔpɛ́ kú ɛfu kú Upísga mɛ́mla Ubɛt-jéssīmɔtu.

²¹Mɛ́mla aígelī nɛ̄hi kú ajɛ oplákátá kú ɛyí ɛfu kú odúúdú ajɛ kú Uhéssibɔn. Ɔcɛ́ kú Ámɔn gē gbō ɔ̄ ŋmá Uhɛ́ssibɔn ā. Umósīsi le ɔcɛ́ ā mɛ́mla odúúdú aɔ́cɛ́ kú Umídiyarā kpó yálé. Ajɛ ā wɛ Ɛ́fi, Urɛ́kɛm, Usɔ́ɔ, Uhɔ́ɔ, mɛ́mla Uréba, odúúdú uwā kē tɛtɛ gbāajɛ ā lɛ ɔcɛ́ nōo yɔ̄ Uhéssibɔn ā.

²²Ubáalam ɔyí kú Ubéyɔ, ɔ̄cogwɛ́bā ā wɛ ɔ̄cɛ éyi ŋmá ipú ācɛ nɛ̄ ācɛ kú Ísrɛ̄lu ŋmó ā.

²³Ísu kú Ujɔ́dan ā wɛ ɛjī kú ɛnɔ̄ɔ̄nɛ̄ kú ajɛ kú ipɔ́ɔma kú Urúbɛ̄n á. Aɛ́nyā wɛ, aígelī nɛ̄hi nēé je lɛ ācɛ kú ipɔ́ɔma kú Urúbɛn kéē wɛ ɔdā úgwū kú uwā á.

²⁴Umósīsi lɛ ukpɛ̄ kú ajɛ kú ipɔ́ɔma kú Ugádi je lɛ uwá dúú.

²⁵Ajɛ kú uwā gbɔɔ́ ŋmá Ujása mɛ́mla odúúdú aígelī nɛ̄hi kú ācɛ Ugílɛ̄di, āyā kú ajɛ kú ācɛ Ámɔn ā, jāā ga Árōwɛ nōo yɔ̄ ɛnɔ̄ɔ̄cī kú Urába ā.

²⁶Ajɛ kú uwā klla yɛ ŋmá Uhɛ́ssibɔn, ga Urámati Umísipɛ, mɛ́mla Ubɛ́tōnim. Ó klla ŋmá Umáhánem ga ɛjī kú Ulódēba.

²⁷Ugádi klla lɛ ɔpɛ́ kú Ujɔ́dan nōo kē yɛ ga Ubɛtháram, Ubɛtinímra, Usúkōtu mɛ́mla Usáfɔn, mɛ́mla o hile kú ajɛ kú ɔcɛ́ Uhíhon kú Uhɛ́ssibɔn ā. Ɛjī kú ajɛ kú uwā lɛyíkwu ɛnɔ̄ɔ̄nɛ̄ kú ísu kú Ujɔ́dan jāā gaá kwu ɛhícō kú ókpoó kú Ugálīli.

²⁸Aɛ́nyā nēe bá ā wɛ ajɛ nēé je lɛ ācɛ kú ipɔ́ɔma kú Ugádi kóō wɛ ukpɛ̄ kú ɔdā úgwū kú uwā á.

²⁹Umósīsi kē lɛ āyā kú ajɛ ā je lɛ āyā kú ipɔ́ɔma kú Umanásɛ ɛnɔ̄ɔ̄cī, cɛ́ɛ́ ká ɔ̄ wɛ ukpɛ̄ kú ɔdā úgwū kú uwā.

³⁰Ajɛ kú uwā ā yɛ ga, Umahánim, mɛ́mla odúúdú Ubássan, mɛ́mla odúúdú aígelī nɛ̄hi ofu ɛtɛ́ kú Ujɛ́ɛ, ipú ajɛ kú Ubássan ā.

³¹Āyā éyi kú Ugílɛ̄di wɛ ipú ajɛ kú uwā, mɛ́mla Ássitārɔtu mɛ́mla Ɛ́drēyi, ɔlɛ́ kú ɔtāhɛ̄ kú ajɛ ɔcɛ́ kú Ógu, ɔcɛ́ kú Ubássan ā. É kwú odúúdú ajɛ nyā ú lɛ āyā kú ipɔ́ɔma kú Umanásɛ nōo wɛ ákú ɔyí kú Umákɛ ā.

³²Ɛ́gɛ́nyā nɛ̄ Umósīsi kɔ̄ ajɛ kú ɛnɔ̄ɔ̄cī kú Ujérīko mɛ́mla Ujɔ́dan eko nɛ̄ó yɔ̄ ɔpɛ́ kú Umówābu ā á.

³³Amáŋ, Umósīsi í je ajɛ dúúmā lɛ ipɔ́ɔma kú Ulífāyi ŋ́. Ó da uwá ka, ukpɛ̄ kú uwá ɔ́ɔ gē ŋmá ipú ɛya nēé ī gwó lɛ Óndú, Ɔwɔicō kú Ísrɛ̄lu.