Read idoma UJÓSSUWA 14 Bible Online

UJÓSSUWA 14 - idoma bible

UJÓSSUWA 14

¹Ɛ̄nyā wɛ ɛ́gɛ́nɛ̄ Ɛlísa ɔ̄cogwɛ́ɛya, mɛ́mla Ujóssuwa, ɔyí kú Unɔ́n, mɛ́mla anyākwɔ́cɛ kú Ísrɛ̄lu, kɔ̄ ajɛ kú Ukénan nōo yɔ̄ ɛnɔ̄ɔ̄nɛ̄ kú Ujɔ́dan ā lɛ aípɔ́ɔma kú Ísrɛ̄lu nōo hile ā.

²Ɛ́gɛ́nɛ̄ Óndú ā da Umósīsi lɛ ā, ūlī nēé gáā tá ɛ́ɛ́ kéē kɔ̄ ajɛ lɛ ipɔ́ɔma ahāanɛ ce āyā kú Ísrɛ̄lu nōo hile ā á.

³Umósīsi kē tɛtɛ lɛ ajɛ kú ɛnɔ̄ɔ̄cī kú Ujɔ́dan ā kɔ̄ lɛ ipɔ́ɔma ɛpa ce āyā ɔhá ā ɛɛ́. Amáŋ ācɛ kú ipɔ́ɔma kú Ulífāyi í lɛ ukpɛ̄ kú ajɛ dúúmā ŋ́. Ukpɛ̄ kú uwā yɔ̄ ipú ɛya kú Óndú ā.

⁴É le ipɔ́ɔma kú Ujósɛ̄fu kɔ̄ ɛga ɛpa. Umanásɛ mɛ́mla Ɛ́frem. Amáŋ Umósīsi í je ajɛ lɛ ipɔ́ɔma kú Ulífāyi ŋ́. Ayíka ɔlɛ́ nēé gē lá anú ōfōōfūnū ā mɛ́mla ajɛ ɛga nɛ̄ aálá mɛ́mla aɛ́na kú uwā gē lé ácí ā.

⁵Ācɛ kú Ísrɛ̄lu lɛ ajɛ ā kɔ̄ ɛ́gɛ́nɛ̄ Óndú tū Umósīsi ukɔ́ lɛ ā.

⁶Ɛ̄cī éyi, Ukálɛ̄bu ɔyí kú Ujɛ́fūnɛ, nōo ŋmá ipɔ́ɔma kú Ukénisi ā, mɛ́mla ācɛ ipɔ́ɔma kú Ujúda gā ɛgiyí Ujóssuwa Ugígalu gaá da ɔ́ ɔ̄kā ka ɔ́dāŋ ka ɔ́ɔ jé ɔdā nɛ̄ Óndú ā ɔ́ɔ ka Ukadessi Ubánēya ohígbū anúɔ mɛ́mla anú lɛ Umósīsi, ɔ̄cɛ kú Ɔwɔicō ā.

⁷Ó da Ujósuwa kahíníī, “N wɛ iháyí ofɛpa ɛ́ɛ́ nɛ̄ ɔ̄cocɛ̄hɔ̄ kú Óndú ā, Umósīsi, tū um ɛhɔ̄ ŋmá Ukadɛ̄ssi Ubanéya gaá jila ajɛ nyā wɛɛlɛ á. N kē le ohi okpaakpa bī wā gé lɛ ɔ́.

⁸Amáŋ, ācɛ nēe nyɔ̄ mla um ā, yá kú ācɛ ɔlɛ́ alɔ kéē yúufi. Amáŋ n lɛyítáajɛ lɛ Óndú um Ɔwɔicō kú um kpaakpa.

⁹Ohígbū ɔdā nɛ̄ n yá ā, Umósīsi le okónu ce gā um ka ajɛ dúú nɛ̄ n lɛ ikpó da ɔ́ ā, ó géē wɛ ákú um mɛ́mla ayí um, cɛ́ɛ́ kóō lɛ pīya úgwū kú alɔ.

¹⁰Abālɔbányā, má ɔ̄, iháyí ɔ́mofɛpa cɛ̄hɔ̄ nɛ̄ Óndú ā da Umósīsi ɛlā ā yɔ̄ mɛ́ɛ̄ á. Ɔdā nyā kē yá eko nɛ̄ ācɛ Ísrɛ̄lu yɔ̄ í bū ipú ígbíli ā, Óndú ā, ɛ́gɛ́nɛ̄ ó cokónu lɛ ā, ó kē le oyēeyī kú um tū jāā kwu eko nyā. Má ɔ̄ n kwú pīya iháyí ofɛnɛ cɛ̄hɔ̄ ɛɛ́.

¹¹Amáŋ n kē lɔfú ícɛ nyā bɛ̄ɛka ɛ́gɛ́nɛ̄ n tɛtɛ lɛ eko nɛ̄ Umósīsi tū um ɛhɔ̄ ga ɛcɛ ā. N kē lɔfú kpɛ́fú ámāŋ ka o yá ɛdɔ ɔdā ɔhá glá ɛɛ́.

¹²Ohígbū ɔ́ɔmā, kwú ajɛ kú ɛyí ɛfu nyā nɛ̄ Óndú ā cokónu ō je gā um ɛ̄cī nɛ̄ ami mɛ́mla ācɛ ɔ́mpa um wā í kpó ohi lɛ ɔ́ ā ú gā um abālɔbányā. Alɔ wā í da aá ka, ayí kú aɔ́báagwu nēé hī ka Ánākin ā bá abɔ́ɔ. Kéē lɛwa klla lā ipú aígelī nɛ̄hi nēé le igá kú ɔdɔ o lɔfú hɛ́ tū uwā. Eko ōhī, Óndú ā kē yɔ̄ mla um nɛ̄ n í nū uwā bɛ̄cɛ ɛ́gɛ́nɛ̄ Óndú ka lɛ ā.”

¹³Anɔ́ɔ Ujóssuwa lɛ ɔhā hɛ́ ce Ukálɛ̄bu, ɔyí kú Ujɛ́fūnɛ klla kwú igelī nɛ̄hi kú Uhɛ́burɔn ú lɛ ɔ́ kóō wɛ ɔdā úgwū kú nū.

¹⁴Uhɛ́burɔn kē wɛ ákú ipɔ́ɔma kú Ukálɛ̄bu, ɔyí kú Ujɛ́fūnɛ kú Ukenīsi jāā kwu ícɛ nyā. Ohígbū ka ó lɛyītáajɛ lɛ Óndú, Ɔwɔicō kú Ísrɛ̄lu jāā kwu ícɛ.

¹⁵Gbɔbū lɛ eko nyā ā, ē gē hī Uhɛ́burɔn ka, igelī nɛ̄hi kú Aába. (Aába wɛ agwu nɛ̄hi fíyɛ́ dúú kpɛ́mm á) Anɔ́ɔ ɛbɔ́ kē gā ipú ajɛ ā á.