Read idoma UJÓSSUWA 15 Bible Online

UJÓSSUWA 15 - idoma bible

UJÓSSUWA 15

¹Ɛ̄nyā wɛ Ukpɛ̄ kú ajɛ kú ācɛ kú ípɔ́ɔma kú Ujúda, Ɛ́gɛ́nɛ̄ ipɔ́ɔnū kú ipɔ́ɔma ɔ́ɔmā lɛ ā. Ajɛ ā yɛ ga ɛháajɛ jāā ga okónu ígbíli kú Usín, nōo wɛ ɛjī kú Ɛ́dɔm ā.

²Ɛháajɛ kú ajɛ ā, gbɔɔ́ ŋmá oŋmɛ́yí kú ísu ɔmā ā.

³Ajɛ ā yɛ ɛháajɛ ŋmá Akrabím gaá bū Usín. Ó gaá bū ɛháajɛ kú Ukádɛssi Ubanéya ga Uhɛ́sīrɔn gaá yɛ ga Ádda, ɛga nōó pīya ga Ukáka.

⁴Ó klla yɛ ga Ásimɔ̄n, yɛ bá ɔkpá nōo yɔ̄ ɛjī kú ísu kú Umeditarénīya ā iyē, gaá kwu ɛjī abɔ́ɔ. Abɔ́ɔ ā wɛ ɛjī kú ɛháajɛ kú ajɛ kú Ujúda á.

⁵Ɛjī kú ɛnɔ̄ɔ̄cī kú nū wɛ ísu Ɔmā ā, ó yɛ jāā ga ɛhícō ɛga nɛ̄ ísu kú Ujɔ́dan pɛ̄ tū ɔ̄ ā.

⁶Ó yɛ ga ɛhícō ga Ubɛti Uhɔ́gla, gaá bū óci nōo lɛ eyī pīya kwu ɔpɛ́ kú Ujɔ́dan ā. Ó yɛ gaá bū ɛgiyí ɛcɔ̄ kú Ubóhan, (Ubóhan wɛ ɔyí kú Urúbɛ̄n)

⁷Ajɛ ā yɛ ŋmá ɔpɛ́ kú Unwalu ā gicō ga Udébiri, klla le pīya bū ɛhícō, lɛyíkwu Ugígalu, nōó pīyeyī kwu Adumím, gaá bū ɛháajɛ kú ɔpɛ́ ā. Ó klla gaá bū ɔkpá kú Ɛnssímɛ́ssi bɛ̄cɛ Ɛnrōgɛ́lu,

⁸anɔ́ɔ ɛjī gaá bū icō ga ɔpɛ́ kú Uhínnɔm ābɔ̄ ɛháajɛ kú ɛfu nɛ̄ŋcɛ́ kú igelī nɛ̄hi kú ācɛ Ujébūsi, nēé hī ka Ujerúsālɛm ā, anɔ́ɔ ɛjī ā klla yɛ gicō ɛyí ɛfu nōo yɔ̄ bayi ɔpɛ́ kú Urefém.

⁹Anɔ́ɔ ɛjī ā klla yɛ ŋmá ɛyí ɛfu abɔ́ɔ gaá bū njɔlɔ kú Unéfutɔ̄wa, ó ŋmá abɔ́ɔ gaá bɛ̄cɛ aígelī nɛ̄hi nēe kwu ɛfu kú Ɛ́frɔn ajaajɛ ā. Ɛjī ā klla leyī pīya biílí ŋmá abɔ́ɔ ga Ubáala ámāŋ kú Ukíriyati Ujeyarim.

¹⁰Ɛjī klla le pīya biílí ɛga nōo yɔ̄ ɛnɔ̄ɔ̄nɛ̄ kú Ubáala ā lɛyíkwu ɛfu kú Ɛ́dɔm. Ó yɛ gaá bū ɛhícō kú ɛfu kú Ucésālɔn ga Ubɛti Ussímɛ̄ssi gaá le gla Utímina.

¹¹Ɛjī ā klla yɛ bɛ̄cɛ gɔbū ga ɛyí ɛfu kú ɛhícō kú Ɛ́krɔn. Ó klla leyī pīya ga Usíkɛ̄rɔn, le yɛ gla ɛfu kú Ubáala. Ó le yɛ bɛ̄cɛ ga Ujaminíya, anɔ́ɔ ó gaá ŋmɛ́yí ísu kú Umeditarénīya á.

¹²Ɛga ɛ̄nyā wɛ ɛjī kú nū, ɛnɔ̄ɔ̄nɛ̄ á. Ipú ajɛ ɛ̄nyā nɛ̄ ayí kú ipɔ́ɔma kú Ujúda lā á.

¹³Ɛ́gɛ́nɛ̄ Óndú ā da Ujóssuwa lɛ ā é kwú āyā ká ajɛ kú Ujúda ú lɛ Ukálɛ̄bu, ɔyí kú Ujefúne nōo ŋmá ipɔ́ɔma kú Ujúda ā. Ó mīyɛ Uhɛ́brɔn, igelī nɛ̄hi kú Aába ádā kú Ánāki, agwu ā.

¹⁴Ukálɛ̄bu lɛ ayí kú ipɔ́ɔma kú Ánāki agwu ā nū bɛ̄cɛ ŋmá igelī nɛ̄hi ā. Ó klla le ipɔ́ɔma kú Usséssāyi, Ahíman, mɛ́mla Utalimáyi nū ŋmá ajɛ ā dúú.

¹⁵Ó ŋmá abɔ́ɔ gaá le ɛfú kpó tá ācɛ nēe lā Udébiri ā. (ē tɛtɛ hī igelī nɛ̄hi nyā ka, Ukɛriyati Uséfa.)

¹⁶Anɔ́ɔ Ukálɛ̄bu ka ɔ̄cɛ dúúmā nɛ̄ ó lɛ ācɛ Ukɛriyati Uséfa yálé, anúɔ géē je Ákisāfu, ɔyí anúɔ nɔ̄nyā lɛ ɔ́ kóō wɛ ɔnyā nū.

¹⁷Ótīnīyɛlu, ɔyí kú Ukénāsi, ɔyínɛ́ kú Ukálɛ̄bu le igelī nɛ̄hi ā yálé klla mīyɛ ɔ́ tābɔ̄. Anɔ́ɔ Ukálɛ̄bu kwú ɔyí nū Ákisāfu ú lɛ ɔ́ kóō wɛ ɔnyā nū á.

¹⁸Ɛ̄cī nēé lɛ ɔnyā ā, Ótīnīyɛlu da Ákisāfu ká ɔ̄ da ádā nū ɔ̄kā kóō lɛ ajɛ je lɛ ɔ́. Anɔ́ɔ, ɔnyā má kwu ajɛ ŋmá ɛyí ijakī, anɔ́ɔ Ukálɛ̄bu da ɔ́ ɔ̄kā ka ɔdí nɔ́ɔ gē dɔɔ̄kā ā?

¹⁹Anɔ́ɔ ó tá ohi ka anúɔ gē dɔɔ̄kā njɔlɔ kú éŋkpɔ̄, ohígbū ka ajɛ nɔ́ɔ je lɛ anúɔ ā wɛ ajɛ íkpákplā. Anɔ́ɔ Ukálɛ̄bu kwú ajɛ ɛhícō mɛ́mla ɛháajɛ nɛ̄ njɔlɔ bá anú ā ú lɛ ɔ́ á.

²⁰Ɛ̄nyā wɛ ajɛ nɛ̄ ipɔ́ɔnū kú ipɔ́ɔma kú Ujúda mīyɛ kóō wɛ ajɛ kú úgwū kú uwā á.

²¹Aígelī nɛ̄hi nēe bá ɛháajɛ ɛga oligbó ā wɛ ákú uwā. Aá ɛ̄nɛ̄ o kwu ɛjī kú Ɛ́dɔm ā wɛ, Ukabusíli, Ɛ́da mɛ́mla Ujágu.

²²Ukína, Udimɔ́na, Adádā,

²³Ukɛ́dɛssi, Uhásɔ, Utánan,

²⁴Usífu, Utélem, Ubeyálɔtu,

²⁵Uhásɔ, Uhádāta, Ukeríyɔ̄tu, Uhɛ́surɔn

²⁶Ámam, Séma, Umólāda,

²⁷Uhása Ugáada, Uhɛ́simɔn, Ubɛ́tipéleti,

²⁸Uhasasúwalu, Ubiyɛssɛ́ba, Ubisiyotíya,

²⁹Ubáala Íim, Ɛ́sɛm,

³⁰Ɛlitólādi, Ucésilu, Uhɔ́ma,

³¹Usíkilāgi Umadimána, Usansána,

³²Ulébayɔ̄tu, Ussíhim, Áyin, mɛ́mla Urímɔn. Aígelī nɛ̄hi ā wɛ ofu caahāanɛ mɛ́mla aígelī nɛŋ́cɛ́ nēe bá kwu ɔ́ ā.

³³Aígelī nēe bá ikpó ɛfu ā wɛ, Ɛssitáyɔlu, Usóra, Ássīna,

³⁴Usánōwa, Ɛngánim, Utápūwa, Ɛ́nam

³⁵Ujámutu, Adulám, Usóko, Asɛ́ka,

³⁶Ussaróyim, Aditéyim, Ugɛdɛ́ra, mɛ́mla Ugɛdɛ́rōtēm. Aígelī nɛ̄hi ā wɛ igwɛ́ɛnɛ mɛ́mla aígelī nɛ̄ŋcɛ́ nēe yɛ jīla uwá tá ā.

³⁷Aígelī ɔhá klla bá abɔ́ɔ, nēe lé ka, Uséna, Uhadássa, Umigidágadi,

³⁸Udílēyan, Umísīfa, Ujókitíli,

³⁹Ulákissi, Ubosíkāti, Ɛ́glɔn

⁴⁰Ukábɔn, Uláham, Ucítīlisi,

⁴¹Ugedɛ́rɔ̄tu, Ubɛtidágɔn, Unaáma, mɛ́mla Umakɛ́da. Aígelī ā wɛ igwɛ́ɛhīlī mɛ́mla aígelī nɛŋ́cɛ́ kú uwā.

⁴²Ulíbīna, Ɛ́ta, Ássan,

⁴³Ufúta, Ássīna, Unésību,

⁴⁴Ukelíya, Ákisību, mɛ́mla Umaréssa. É wɛ aígelī nɛ̄hi ahāanɛ mɛ́mla aígelī nɛ̄ŋ́cɛ́ kú uwā.

⁴⁵Ɛ́krɔn mɛ́mla aígelī nɛ̄hi kú nū nɛ̄ŋcɛ́ yɔ̄ anú dúú.

⁴⁶Odúúdú aígelī nɛ̄hi nēe kwu Ássīdɔ̄du ajaajɛ ŋmá Ɛ́krɔn ga ísu kú Umeditarénīya ā yɔ̄ anú dúú.

⁴⁷Ássīdɔ̄du mɛ́mla Ugása mɛ́mla aígelī nɛ̄hi kú uwā bá anú, jāā gaá kwu ɛjī kú Íjīpiti, okónu Ísu kú Umeditarénīya.

⁴⁸Aígelī nɛ̄hi kú ɛyí ɛfu nēe bā nyā wɛ anú, Ussámiyɛ Ujatɛ́ Usóko,

⁴⁹Udána, Ukīrīyati Udébiri,

⁵⁰Ánābu, Ɛssitémōwa, Ánim,

⁵¹Ugóssɛn, Uhólɔn, mɛ́mla Ugílo. É wɛ aígelī nɛ̄hi igwóléyi mɛ́mla aígelī nɛ̄ŋcɛ́ kú uwá nēe yɛ uwá jīla tá ā.

⁵²Árābu, Udúma, Ɛ́ssan,

⁵³Ujaním, Ubɛti Utápūwa, Áfēka,

⁵⁴Uhumáti, Uhɛ́brɔn, mɛ́mla Usíyɔ. É wɛ aígelī nɛ̄hi ahāanɛ mɛ́mla aígelī nɛ̄ŋcɛ́ kú uwá nēe yɛ uwá jīla tá ā.

⁵⁵Umáyɔn, Ukaamɛ́lu, Usífi, Ujúta,

⁵⁶Ujɛsirili, Ujókidéyam, Usanówa,

⁵⁷Ukéni, Ugíbēya, mɛ́mla Utímīna. É wɛ aígelī nɛ̄hi igwó mɛ́mla aígelī nɛ̄ŋcɛ́ nēe yɛ uwá jīla tá ā.

⁵⁸Aɔ́há ā wɛ, aígelī nɛ̄hi kú Uhalíhulu, Ubɛtísɔ, Ugédɔ,

⁵⁹Umaárāti, Ubɛt-Ánɔ́tu, mɛ́mla Ɛlitékɔn. É wɛ aígelī nɛ̄hi ɛhīlī mɛ́mla aígelī nɛ̄ŋcɛ́ nēe yɛ uwá jīla tá ā.

⁶⁰Aɔ́há ā wɛ Ukírīyati Ubáalu mɛ́mla Urába, aígelī nɛ̄hi ɛpa mɛ́mla aígelī nɛ̄ŋcɛ́ nēe yɛ jīla anú tá ā.

⁶¹Aígelī kú Árāba, Umídin, Usɛkáda, bá ipú ígbíli.

⁶²Unibɔ́han igelī nɛ̄hi kú Ɔmā ā mɛ́mla Ɛ́ngēdi bá ipú ígbíli dúú. Odúúdú wɛ aígelī nɛ̄hi ɛhīlī mɛ́mla aígelī nɛ̄ŋcɛ́ kú uwā nēe yɛ uwá jīla tá ā.

⁶³Amáŋ ācɛ kú Ujúda í lɔfú nū ācɛ kú Ujébūsi nēe lā Ujerúsālɛm ā bɛ̄cɛ glá ŋ́. Ācɛ kú Ujébūsi lā abɔ́ɔ mla ācɛ kú Ujúda jāā kwu ícɛ nyā ā.