Read idoma UJÓSSUWA 17 Bible Online

UJÓSSUWA 17 - idoma bible

UJÓSSUWA 17

¹É kwú āyā kú ajɛ kú ɛnɔ̄ɔ̄nɛ̄ kú Ujɔ́dan ā ú lɛ aípɔ́nū nēe ŋmá ipɔ́ɔma kú Umanásɛ nōo wɛ ɔyí ɔnyākwɔ́cɛ kú Ujófɛ̄fu ā. Umákiri nōo wɛ ádā kú Ugílɛ̄di ā wɛ ɔ́kplá kú Umanásɛ á. Abɔ̄ nɛ̄ ó klla wɛ ogbēnjūwā mɛ́ɛ̄ ā. Anɔ́ɔ ē kwú Ubássan ɛnɔ̄ɔ̄cī kú Ujɔ́dan í lɛ ɔ̄.

²É kwú ajɛ ohile kú ɛnɔ̄ɔ̄cī kú Ujɔ́dan ā ú kɔ̄ lɛ aípɔ́ɔma kú Umanásɛ nēe hile ā. É wɛ, Abíyɛ̄sa, Uhɛ́lɛ̄ki, Ásrīyɛlu, Usɛ́kɛm, Uhɛ́fa, mɛ́mla Usémīda. Aɛ́nyā wɛ ayínɔ̄nyílɔ kú Umanásɛ, ɔyí kú Ujósɛ̄fu á. É wɛ otrɛ̄yí kú aípɔ́ɔnū kú ɔlɛ́ uwā.

³Usɛliféhādi, ɔyí kú Uhɛ́fa, ɔyí kú Ugílɛ̄di, ɔyí kú Umákɛ, ɔyí kú Umanásɛ, í ma ɔyínɔ̄nyīlɔ dúúmā ŋ́, ayíka ayínɔ̄nyā ōfōōfūnū. Iyē kú uwa kē le ka, Umála, Unówa, Uhógla, Umilíca, mɛ́mla Utirísa

⁴É le tá ɛgiyí ɔ̄cogwɛ́ɛya Ɛlísa mɛ́mla Ujóssuwa, ɔyí kú Unɔ́n mɛ́mla anyākwɔ́cɛ kú Ísrɛ̄lu, gaá ka ka Óndú ā ɔ́ɔ da Umósīsi kóō lɛ ajɛ je lɛ aá ipú aɔ́máapú ádā uwā, cɛ́ɛ́ kóō wɛ úgwū kú uwā ɛ́gɛ́nɛ̄ é je lɛ aɔ́máapú uwā nɔ̄nyīlɔ ā. Anɔ́ɔ é le ajɛ je lɛ uwá ɛ́gɛ́nɛ̄ é je lɛ aɔ́máapú uwā nɔ̄nyīlɔ lɛ ā, ɛ́gɛ́nɛ̄ Óndú ā tɛtɛ tū Umósīsi ukɔ́ lɛ ā.

⁵Ɔdā nōo yá ɛ́ɛ́ nɛ̄ Umanásɛ lɛ ukpɛ̄ kú ajɛ igwó mla Ugílɛ̄di mɛ́mla Ubássan ɛnɔ̄ɔ̄cī kú isú kú Ujɔ́dan ā yɔ̄ á.

⁶Ohígbū ka é le ajɛ je lɛ ācɛnyīlɔ mɛ́mla ācɛnyā kú uwā a. É kwú ajɛ kú Ugílɛdi ú lɛ ācɛ o hile kú ācɛ kú ipɔ́ɔma kú Umanásɛ.

⁷Ajɛ kú Umanásɛ gbɔɔ́ ŋmá Ássa ga Umícimēta, ɛnɔ̄ɔ̄cī kú Usɛ́kɛm. Ɛjī kú nū yɛ ɛháajɛ gā ipú ācɛ kú Ɛntápūwa.

⁸Ajɛ nōo yɛ jīla Utápūwa tá ā wɛ ákú Umanásɛ, amáŋ ɔlɛ́ kú Utápūwa nōo yɔ̄ ɛjī ā wɛ ákú ipɔ́ɔma kú Ɛ́frem.

⁹Ɛjī kú nū yɛ ga ɔkpá kú Ukána. Aígelī nɛ̄hi kú ɛháajɛ kú ɔkpá ā wɛ ákú Ɛ́frem, náana nēé kōō bá ajɛ kú Umanásɛ ā. Ɛjī kú Umanásɛ gaá yɛ bū ɛhícō kú ɔkpá ā gaá ŋmɛ́yí ísu kú Umeditarénīya.

¹⁰Ajɛ kú Ɛ́frem yɛ ga ɛháajɛ. Ákú Umanásɛ kē yɛ ga ɛhícō. Ísu kú Umeditarénīya kē wɛ ɛjī kú nū ɛnɔ̄ɔ̄nɛ̄ á. Ajɛ kú ācɛ Ássa yɛ ga ɛhícō kú ɛnɔ̄ɔ̄nɛ̄, anɔ́ɔ Ísáka lā ga ɛhícō kú ɛnɔ̄ɔ̄cī.

¹¹Ɔtāhɛ̄ kú ajɛ kú Ássa mɛ́mla Ísáka ā, Umanásɛ kē lɛ Ubɛt Ussán mɛ́mla Úbilim mɛ́mla aígelī nɛ̄ŋ́cɛ́ nēe yɛ jīla uwá tá ā, mɛ́mla Udɔ́ɔ (ɛ̄nɛ̄ o yɔ̄ okónu ísu ā), mɛ́mla aípɔ́lɛ́ nɛ̄ŋcɛ́ kú uwā. É klla lɛ Ɛ́ndɔ, Utáánāki, Umegído mɛ́mla aígelī nɛ̄ŋcɛ́ nēe yɛ ɔ́ jīla tá ā.

¹²Amáŋ, ācɛ kú Umanásɛ í lɔfú nū ācɛ nēe lā aígelī nɛ̄hi nēe bá nyā bɛ̄cɛ glá ŋ́. Ācɛ Ukénan lā abɔ́ɔ mla uwá jāā kwu eko nēé tɔ́kpá nyā ā.

¹³Ó kōō wɛ eko nɛ̄ Ísrɛ̄lu le lɔfú nɛ̄hi tōōtɔ̄ɔ̄ ā, é nū odúúdú ācɛ Ukénan ā bɛ̄cɛ ŋmá ajɛ ā glá ŋ́. Amáŋ ē kwú uwá ú pīya ɔfiyɛ kú uwá kéē yúklɔ́ lɛ uwá abɔ̄fú.

¹⁴Aipɔ́ɔma kú Ujósɛ̄fu da Ujóssuwa ka ɔdíyá nɔ́ɔ kwú āyā kú ajɛ ékpónú ú lɛ aá kóō wɛ ɔdā úgwū kú aá ā? Ka aá ɔ́ɔ kē lɛwa nɛ̄hi, ohígbū ka Óndú ā ɔ́ɔ le ɔhā hɛ́ ce aá.

¹⁵Anɔ́ɔ Ujóssuwa da uwá ka ɔ́dāŋ ka é lɛ ɛwa nɛ̄hi, nɛ̄ ɔlɛ́ kú ɛfu kú Ɛ́frem a í jē uwā ŋ́ nɛɛ, kéē nyɔ̄ ga ipú ūpū cɛ́ɛ́ kéē lɛ ajɛ kla lɛ iyī uwā ipú ajɛ kú ācɛ Upɛrísi mɛ́mla ācɛ kú Uréfem.

¹⁶Anɔ́ɔ ē tá ɔ̄ ohi ka ɔlɛ́ kú ɛyí ɛfu ā í jɛ̄ aá ŋ́, amáŋ ācɛ kú Ukénan nēe lā ajɛ ɔlamu ā, lɛ aúgbɔ́ɔnya ōkpɛ́fú kú oje, kwu aɛ́nɛ̄ e lā Ubɛti Ussán mɛ́mla aígelī nɛ̄ŋcɛ́ nēe yɛ jīla anú tá ā, mɛ́mla ācɛ nēe la ɔpɛ́ kú Ujesiríli ā.

¹⁷Anɔ́ɔ Ujóssuwa da aípɔ́ɔma kú Ɛ́frem mɛ́mla Umanásɛ kú ɛnɔ̄ɔ̄nɛ̄ ā kéē lɛwa ɔkwɛ̄yi, é kē lɔfú nɛ̄hi. Kéē géē lɛ ajɛ fíyɛ́ ɛga éyi.

¹⁸Ó ka ɔlɛ́ kú ɛgiyí ɛfu ā ɔ́ɔ wɛ ákú uwā, nááná nɛ̄ ɔ́ɔ wɛ ipú ūpū. Ó klla da uwá kéē nyɔ̄ í lɛ ɔ́ yá péee, cɛ́ɛ́ kéē nyɔ̄ í lā anú, o ŋmá ɛyí éyi ga ɛyí ɔhá. Ó klla da uwá kéē lɛ ācɛ Ukénan ā nū bɛ̄cɛ ŋmá ajɛ ā, nááná néē kōō lɛ aúgbɔ́ɔnya ōkpɛ́fú kú oje klla lɔfú nɛ̄hi ā.