Read idoma UJÓSSUWA 18 Bible Online

UJÓSSUWA 18 - idoma bible

UJÓSSUWA 18

¹Igbīhi nēé mīyɛ odúúdú ajɛ ā, odúúdú ācɛ kú Ísrɛ̄lu le jīla Ussílo, le Áklɔ̄kpīihɔ pi kwaajɛ lɛ Óndú ā.

²Aípɔ́ɔma kú Ísrɛ̄lu ahāapa hile nēé lɛ ukpɛ̄ kú ajɛ kú ajɛ kú uwā ɛ́ɛ́ ŋ́ má.

³Anɔ́ɔ Ujóssuwa da ācɛ ā ka eko nyá nɛ́ɛ géē gbēyī gaá kwu ɛ́ɛ́ kéē bēhé gaá mīyɛ ajɛ nɛ̄ Óndú ā, Ɔwɔicō kú aádáádā uwā je lɛ uwá ā?

⁴Ó kéē lɛ ācɛ ɛtɛ́ɛ́tá fu lɛ anúɔ ŋmá ipɔ́ɔma dóódu, ká anúɔ lɛ uwá tū nyɔ̄ í lɛ āyā kú ajɛ nēé tíne ō lɛ ā má, cɛ́ɛ́ kéē lɛ ohi kpó gé lɛ anúɔ.

⁵Ó kéē géē kɔ̄ ajɛ ā miya uwá ɛga ahāapa. Ó ka Ujúda lā ajɛ kú nū o yɛ ga ɛháajɛ ā, Ujósɛ̄fu géē lā ajɛ kú nū o yɛ ga ɛhícō ā.

⁶Ó kéē lɛ ocābɔ̄ kú ɛ́gɛ́nɛ̄ é géē kɔ̄ ajɛ ā ɛga ahāapa lɛ ā tá tāajɛ, cɛ́ɛ́ kɛ́ɛ lɛ ɔ́ bī gé lɛ anúɔ. Cɛ́ɛ́ ká anúɔ lɛ ūlī tá ká anúɔ má ɔtū kú Óndú, Ɔwɔicō kú uwā lɛyíkwu ɔ́.

⁷Amáŋ ó ka ācɛ kú ipɔ́ɔma kú Ulífāyi ɔ́ɔ́ gáā lɛ ukpɛ̄ kú ajɛ ā dúúmā mla ācɛ ā ŋ́. Ka ukpɛ̄ kú uwā ɔ́ɔ wɛ o yúklɔ́ kú ɛya ō gwó lɛ Óndú ā. Aipɔ́ɔma kú Urúbɛ̄n, Ugádi mɛ́mla āyā kú ipɔ́ɔma kú Umanásɛ kē lɛ ajɛ kú uwā lɛ ɛnɔ̄ɔ̄cī kú Ujɔ́dan ɛga nɛ̄ Umósīsi, ɔ̄cocɛ̄hɔ̄ kú Óndú ā je lɛ uwá ā.

⁸Anɔ́ɔ ācɛ ā gbɔɔ́ ō nyɔ̄ í jīla ajɛ ā eko nɛ̄ Ujóssuwa le ukɔ́ tū uwā kwɛyí, kéē ga ipú odúúdú ajɛ ā kéē lɛ ɔ́ má, cɛ́ɛ́ kéē le pīyɛyí wā ɛgiyí anúɔ ā. Anɔ́ɔ Ujósuwa kahíníī, “Cɛ́ɛ́ Ussílo amānyā ā, n lɛ ūlī tá ká n̄ má ɔdā nɛ̄ Óndú, Ɔwɔicō kú aá bī ɔtū lɛyíkwu ɔ́ ā.”

⁹Anɔ́ɔ ācɛ le tá ipú odúúdu ajɛ ā lɛ ɔ́ jīla, le ɔ́ tá tāajɛ ɛ́gɛ́nɛ̄ ē kɔ̄ ɔ̄ ɛga ahāapa lɛ̄ ā. É klla le iyē kú igelī nɛ̄hi kú uwā kpó tá. Anɔ́ɔ ē pīyɛyí wā ɛgiyí Ujóssuwa Ussílo á.

¹⁰Anɔ́ɔ Ujóssuwa lɛ ūlī tá kóō jé ɔdā nɛ̄ Óndú ā bī lɛyíkwu uwá ā. Anɔ́ɔ ó lɛ ajɛ o hile ā kpó kɔ̄ lɛ ipɔ́ɔma o hile dóódu kú Ísrɛ̄lu ā.

¹¹Ipɔ́ɔma kú Ubɛ́njamīn wɛ ipɔ́ɔma aflɛ́yí nēé je ajɛ lɛ uwá eko nɛ̄ Ujóssuwa le ūlī tá āá. Ajɛ kú ācɛ Ubɛ́njamīn ā yɔ̄ ɔtāhɛ̄ ɛjī kú ajɛ kú ipɔ́ɔma kú Ujúda ɛháajɛ mɛ́mla ɛjī kú ajɛ kú ipɔ́ɔma kú Ujósɛ̄fu ɛhícō.

¹²Ɛjī ajɛ kú uwā ɛhícō ā gbɔɔ́ ŋmá Ujɔ́dan gaá bū ɔpɛ́ kú ɛhícō kú Ujérīko, mɛ́mla ɛnɔ̄ɔ̄nɛ̄ gaá bū ipɔ́lɛ́ kú ɛyí ɛfu jāā ga ipú ígbíli nōo kwu igbíli kú Ubɛtáfén ajaajɛ ā.

¹³Ɛjī ā klla yɛ ga ɔpɛ́ kú ɛháajɛ kú Ubɛ́tɛlu ga Atárɔ̄tu-áda, gaá bū ɛyí ɛfu kú ɛháajɛ kú Ubɛ́ti Uhórɔn.

¹⁴Ɛjī ā klla le pīya ga ɛháajɛ ŋmá ɛnɔ̄ɔ̄nɛ̄ kú ɛfu nyā, anɔ́ɔ ó yɛ lɛyíkwu igelī nɛ̄hi kú Ukiriyati Ubáalu (ámāŋ ka Ukɛriyati Ujēyarím), nōo wɛ ákú ipɔ́ɔma kú Ujúda a. Ɛ̄nyā wɛ ɛjī kú nū kú ābɔ̄ ɛnɔ̄ɔ̄nɛ̄ á.

¹⁵Ɛjī kú nū ɛháajɛ ā gbɔɔ́ ŋmá okónōgwu kú Ukɛriyat Ujēyarím gaá [2] ga ɔkpá kú Unéfitówa.

¹⁶Ɛji ā yɛ gaajɛ ga ɛháajɛ ɛfu nōo yɔ̄ ɛhícō kú ɔpɛ́ kú Urefém, ɛga nɛ̄ ɔpɛ́ kú Uhínɔm gbɔɔ́ ŋmá ā. Oŋmá abɔ́ɔ ā, ó yɛ ga ɛháajɛ bū ɔpɛ́ kú Uhínɔm ga aɛ́fu o kwɔhá, nēe ga ɛháajɛ kú Ujerúsālɛm ā. Anɔ́ɔ ó klla yɛ ga njɔlɔ kú Ɛnrójɛ́lu á.

¹⁷Ó kwu pīya bū ɛhícō gaá bū Ɛnssemɛssi ga Ugɛlílōtu nōo pīyeyī kwu Adumím ā. Ɛjī ā gaá bū ɛcɔ̄ kú Ubóhan, (Ubóhan wɛ ɔyí kú Urúbɛ̄n.)

¹⁸Ɛjī ā klla gaá bū ɛhícō lɛyíkwu ɛjī kú ɔpɛ́ kú Ujɔ́dan ā, klla yɛ ga ɔpɛ́,

¹⁹bū Ubɛti Uhɔ́gla. Ɛjī kú ɛháajɛ ā gaá ŋmɛ́yí ɛga nɛ̄ ísu kú Ujɔ́dan gaá pɛ́ tū ipú ísu Ɔmā ā.

²⁰Ujɔ́dan wɛ ɛjī kú nú ɛnɔ̄ɔ̄cī á. Aɛ́nyā wɛ ɛjī kú ajɛ nɛ̄ aípɔ́ɔma kú Ubɛ́njamīn mīyɛ kóō wɛ ukpɛ kú ajɛ kú úgwū kú uwā ā.

²¹Aígelī nɛ̄hi kú aípɔ́ɔma kú Ubɛ́njamīn ā bá yɔ̄ á, Ujérīko, Ubɛti Uhɔ́gla, Ɛmɛ́ki kɛ̄sisi,

²²Ubɛti Árāba, Usɛmárem, Ubɛ́tɛlu,

²³Áfim, Upára, Ófra,

²⁴Ucɛ̄faramóni, Ófini, mɛ́mla Ugéba. Aígelī nɛ̄hi ā wɛ igwɛ́ɛpa mɛ́mla aígelī nɛ̄ŋcɛ́ nēe yɛ uwá jīla tá ā.

²⁵É klla lɛ Ugíbēyɔn, Uráma, Ubérɔtu,

²⁶Umísifa, Ucefíra, Umósa,

²⁷Urékɛm, Íripīli, Utárāla,

²⁸Uséla Ukíriyati, Ujerúsālɛm, Ugíbeya, mɛ́mla Ukɛriyat Ujēyarím. É wɛ aígelī nɛ̄hi igwɛ́ɛnɛ, mɛ́mla aígelī nɛ̄ŋcɛ́ nēe yɛ uwá jīla tá ā. Aɛ́nyā wɛ ajɛ nɛ̄ aípɔ́ɔma kú Ubɛ́njamīn mīyɛ ukpɛ̄ kú úgwū kú uwā á.