Read idoma UJÓSSUWA 19 Bible Online

UJÓSSUWA 19 - idoma bible

UJÓSSUWA 19

¹Ūlī ɔ́mpa nēé tá ā le ipɔ́ɔma kú Usímīyɔ̄n kwú. Ajɛ nēé je lɛ uwá ā yɛ gaá kwu ɛjī ajɛ kú ipɔ́ɔma kú Ujúda ajaajɛ.

²Ajɛ kú uwá ā wɛ, Ubiyɛssɛ́ba, Ussɛ́ba, Umoláda,

⁵Usíkilāgi, Ubɛti Umaracábɔtu, Uhása, Usúsa,

⁶Ubɛti Ulēbáyōtu mɛ́mla Ussarúhɛn. Aígelī nɛ̄hi ā wɛ igwɛ́ɛtá mɛ́mla aígelī nɛ̄ŋcɛ́ nēe yɛ uwá jīla tá ā.

⁷Ipɔ́ɔma kú Usímīyɔ̄n klla mīyɛ aígelī nɛ̄hi ɔhá kpɔ́ mɛ́mla aígelī nɛ̄ŋcɛ́ nēe yɛ jīla uwá tá ā. Aígelī nɛ̄hi ā wɛ, Áyin, Urímɔn, Ɛ́ta, mɛ́mla Ássan.

⁸Aígelī nɛ̄hi mɛ́mla aígelī nɛ̄ŋcɛ́ nēe yɛ jāā ɛháajɛ kú ɔlɛ́ Ubalātibéya nēé gē hī ka Uráma ā, wɛ ipú ajɛ kú uwā dúú.

⁹Ajɛ nɛ̄ Ujóssuwa je lɛ ipɔ́ɔma kú Ujúda ā le ce uwá bá, anɔ́ɔ ohígbū ɔ́ɔmā ó kwú ɛga ōhī kú ajɛ ā ú lɛ ipɔ́ɔma kú Usímīyɔ̄n.

¹⁰Ipɔ́ɔma kú Usébulɔn wɛ ipɔ́ɔma ɔ́mɛɛtá nɛ̄ ūlī kwú kéē je ajɛ lɛ uwá á. Ajɛ nɛ̄ Ujóssuwa je lɛ uwá ā yɛ jāā ga ɛháajɛ kú ɛnɔ̄ɔ̄cī jāā ga igelī nɛ̄hi kú Usárīdi.

¹¹Abɔ́ɔ nɛ̄ ɛjī kú ajɛ ā gbɔɔ́ ŋmá lɛyíkwu ɛnɔ̄ɔ̄nɛ̄ ga Umáreya, gaá kwu Udabēssɛ́ti mɛ́mla ɔkpá nōo yɔ̄ ɛnɔ̄ɔ̄cī kú Ujókinéyam ā.

¹²Ajɛ ā yɛ ŋmá āyā ɔhá kú Usáridi ā, yɛ lɛyíkwu ɛnɔ̄ɔ̄cī ga ɛjī kú Ucísilɔtábɔ. Anɔ́ɔ ó ga Udabérati klla yɛ gicō ga Ujáfīya.

¹³Ajɛ ā yɛ kpɔ́ ga ɛnɔ̄ɔ̄cī ŋmá abɔ́ɔ ga Ugati Uhéfa mɛ́mla Etukasín. Ó kwu nyā ga ābɔ̄ kú Unéya ɔwɛ nōo yɛ ga Urímɔn ā.

¹⁴O yɛ ga ɛhícō ā, ajɛ ā kwú nyā lɛyíkwu Uhánātɔn. Anɔ́ɔ ó nyɔ̄ í le ŋmɛ́yí ɔpɛ́ kú Ufitáhɛlu ā.

¹⁵Aígelī nɛ̄hi igwɛ́ɛpa mɛ́mla aígelī nɛ̄ŋcɛ́ nɛ̄ yɛ jīla uwá tá ā yɔ̄ ipú ajɛ ā dúú. Aōhī kú aígelī nɛ̄hi igwɛ́ɛpa ā bá yɔ̄ á, Ukáta, Unáhalu, Ussímīrɔn, Udála mɛ́mla Ubɛ́tilɛhɛ̄m.

¹⁶Aígelī nɛ̄hi mɛ́mla aípɔ́lɛ nēe bá ā wɛ úgwū kú ajɛ nɛ̄ Ujóssuwa je lɛ ípɔ́ɔma kú Usébūlɔn á.

¹⁷Ipɔ́ɔma kú Ísāka wɛ ipɔ́ɔma ɔ́mɛɛnɛ nɛ̄ Ujóssuwa tá ūlī kwú nɛ̄ ó je ajɛ lɛ uwá á.

¹⁸Ɛga nēé je lɛ uwá ā bá yɔ̄ á, Ujesiríli, Ucésulɔtu, Ussúnɛm,

¹⁹Uhafarém, Usíyɔn, Anahárāti,

²⁰Urábīti, Ukísiyɔn, Ébɛsi,

²¹Urémɛ̄ti, Ɛnganim, Ɛnháda mɛ́mla Ubɛtipássɛ̄si.

²²Aígelī nɛ̄hi igwɛ́ɛhīlī mɛ́mla aígelī nɛ̄ŋcɛ́ nēe yɛ jīla uwá tá ā wɛ ipú ajɛ kú uwā dúú. Aígelī nɛ̄hi ā bá yɔ̄ á, Ussahasúma mɛ́mla Ubɛti Ussémessi. Ɛjī kú uwā kú ɛhícō ā yɛ ŋmá ɛnɔ̄ɔ̄cī, o gbɔɔ́ ŋmá ɛfu kú Utábɔ yɛ ga ísu kú Ujɔ́dan.

²³Ujóssuwa le odúúdú ajɛ nyā mɛ́mla aígelī nɛ̄hi mɛ́mla aígelī nɛ̄ŋcɛ́ kpó lɛ ipɔ́ɔma kú Ísāka.

²⁴Ācɛ ɔ́mɛhɔ̄ nɛ̄ ūlī kú Ujóssuwa kwú nēé je ajɛ lɛ uwá ā, wɛ ipɔ́ɔma kú Ássa.

²⁵Ajɛ kú uwā ā wɛ, Uhelíkāti, Uháli, Ubɛ́tɛn, Ácisāfu

²⁶Alam Umɛ́lɛ̄ki, Ámādi, mɛ́mla Umíssalu. Ajɛ kú uwā kú ɛnɔ̄ɔ̄nɛ̄ ā, gaá kwu Ukámɛ̄lu mɛ́mla Ussíhɔ-Ulíbínāti.

²⁷Ajɛ ā klla le pīya ga ɛnɔ̄ɔ̄nɛ̄. Ɛjī kú nū gaá kwu Ubɛtidágɔn, gaá kwu Usébūlɔn mɛ́mla ɔpɛ́ kú Ifutáhɛlu ɔwɛ ɛhícō nōo yɛ ga Ubɛ́tēmɛki mɛ́mla Unéyíyɛlu. Ó klla yɛ ga ɛhícō ga Ukábulu.

²⁸Éburɔn, Uréhobu, Uhámɔn mɛ́mla Ukóna jāā ga Usídɔn.

²⁹Ɛjī ā kwú pīya ga Uráma gaá kwu igelī nɛ̄hi kú Utáya nēé lɛ igá hɛ tū ɔ̄ ā. Ó le pīya ga Uhósa gāá ŋmɛ́yí ísu kú Umeditarénīya. Ó yɛ ga Umáhāla, Ákisību,

³⁰Úma, Áfēki, mɛ́mla Uréhobu. Odúúdú aígelī nɛ̄hi mɛ́mla aígelī nɛ̄ŋcɛ́ nēe yɛ uwá jīla tá ā wɛ ofu cɛpa.

³¹Ajɛ nɛ̄ Ujóssuwa je lɛ ipɔ́ɔma kú Ássa kóō wɛ ɔdā úgwū kú uwá ā bá abɔ́ɔ á.

³²Ācɛ ɔ́mɛhīlī nɛ̄ ūlī kú Ujóssuwa kwú nēé je ajɛ lɛ uwá ā wɛ ipɔ́ɔma kú Unáfutāli.

³³Ɛjī kú ajɛ kú uwā gbɔɔ́ ŋmá Uhélefu gaá kwu ɔcí kú Óku ipú ajɛ kú Usaananím, ga Adaminákēbu, ga Ujɔ́mīna jāā ga Ulákúm gaá ŋmɛ́yí Ujɔ́dan.

³⁴Abɔ́ɔ ā ɛjī ā le pīya lɛyíkwu ɛnɔ̄ɔ̄nɛ̄ ga Asínɔtu Utábɔ. Ó ŋmá abɔ́ɔ ga Uhúkɔku gaá lɛ iyē nya ɛháajɛ kú Usɛ́bulɔn, mla ɛnɔ̄ɔ̄nɛ̄ kú Ása, klla mɛ́mla ɛnɔ̄ɔ̄cī ɛgiyí Ujɔ́dan ā.

³⁵Aígelī nɛ̄hi nēé hí igá tú ā bá yɔ̄ á, Usidím, Usá, Uhámmāti, Urákāti, Ucínāreti,

³⁶Adáma, Uráma, Uhásɔ,

³⁷Ukɛdɛssi, Édrēyi, Enhásɔ,

³⁸Uyírɔn, Umígidālelu, Uhórɛm, Ubɛtánáti, Ubɛti Ussēmēssi mɛ́mla aígelī nɛ̄ŋcɛ́ kú uwā nēe yɛ uwá jīla tá ā. O pīya tɔ̄há kú odúúdú uwā wɛ aígelī nɛ̄hi igwáahāānɛ.

³⁹Aígelī nɛ̄hi nēe bá ā nɛ̄ Ujóssuwa kpó lɛ ipɔ́ɔma kú Unáfutāli kóō wɛ ɔdā úgwū kú uwā á.

⁴⁰Ipɔ́ɔma ɔ́mahāapa nɛ̄ Ujóssuwa tá ūlī je ajɛ lɛ uwá ā wɛ ipɔ́ɔma kú Udán.

⁴¹Ajɛ kú uwá kē wɛ, Usóra, Ɛssitáwolu, Irissémessi,

⁴²Ussáálubim, Áyijālɔn, Ítīla,

⁴³Ɛ́lɔ̄n, Utímina, Ɛ́krɔn,

⁴⁴Ɛlitéke, Ugibɛ́tɔn, Ubáalāti,

⁴⁵Ujéhūdi, Ubenebéraki, Ugáturīmɔni,

⁴⁶Umējákɔn mɛ́mla Urákɔn mɛ́mla ajɛ nōo yɛ Ujópa jīla tá ā.

⁴⁷O yɔ̄ yɛɛ ā, aólɛlā gaá mīyɛ aígelī nɛ̄hi kú ipɔ́ɔma kú Udán ŋmá abɔ̄ uwā. Anɔ́ɔ é le tá Uláyīssi gaá le ɛfú kpó tá uwā, le ācɛ nēe lā abɔ́ɔ ā kpó ŋmó. Anɔ́ɔ é mīyɛ ajɛ ā tɔ̄ɔ̄kwu á. É gaá lā abɔ́ɔ, anɔ́ɔ é le iyē kú igelī nɛ̄hi ā pīya abɔ̄ ŋmá Uláyīssi ga Udán á. Iyē kú aádáádā uwā Udán nēé je ce ɔ́ á.

⁴⁸Aígelī nɛ̄hi nēe bá ā yɔ̄ ipú ajɛ nɛ̄ ācɛ kú ipɔ́ɔma kú Udán mīyɛ ɔdā úgwū kú uwá ā.

⁴⁹Eko nɛ̄ Ujóssuwa le ajɛ ā kpó kɔ̄ lɛ uwá kwɛyí ā, é le ukpɛ̄ kú ajɛ kú Ujóssuwa, ɔyí kú Unɔ́n je lɛ ɔ́.

⁵⁰Ɛ́gɛ́nɛ̄ Óndú ā tū uwā ukɔ́ lɛ ā, aígelī nɛ̄hi nōó tíne ā nēé je lɛ ɔ́ á. É kē wɛ, Utimínāti, Uséra, ɛ̄nɛ̄ o yɔ̄ ɛfu kú Ɛ́frem ā. Ó le igelī nɛ̄hi ā túgwó, anɔ́ɔ ó má lā abɔ́ɔ á.

⁵¹Ɛlísa ɔ̄cogwɛ́ɛya ā, mɛ́mla Ujóssuwa, ɔyí kú Unɔ́n mɛ́mla anyākwɔ́cɛ kú aípɔ́ɔma kú Ísrɛ̄lu ā bī ūlī ō tá kéē jé ɔtū kú Óndú ā lɛyikwu ajɛ ō kɔ̄ ā. Anɔ́ɔ é bī ɔwɛ nyā le ajɛ kpó kɔ̄ lɛ ācɛ Ísrɛ̄lu Ussílo, okómpīinu kú Áklɔ̄kpīihɔ kú Óndú ā.