Read idoma UJÓSSUWA 2 Bible Online

UJÓSSUWA 2 - idoma bible

UJÓSSUWA 2

¹Anɔ́ɔ, Ujóssuwa, ɔyí kú Unɔ́n, lɛ ācɛ ɛpa tɛ̄hɔ̄ wɛɛlɛ ŋmá Ussítim. Ó da uwá kahíníī, “Aá nyɔ̄, kú aá lɛ ajɛ ā jila lɔɔlɔhi, ofíyɛ́ dúú ā, igelī nɛ̄hi kú Ujérīko. Eko nēé gā igelī nɛ̄hi kú Ujérīko, é gaá le gbɔga ɔlɛ́ akwuna éyi nēé hī ka Uréhābu

²Ɔcɛ́ kú Ujérīko le pó ka ācɛ ɛpa kú Ísrɛ̄lu ɔ́ɔ gā ipú igelī nɛ̄hi ā otú ɔ́ɔmā gáā jila ajɛ ā wɛɛlɛ ɛɛ́.

³Anɔ́ɔ ɔcɛ́ kú Ujérīko ā le ɛhɔ̄ tū fu Uréhābu kahíníí, “Ācɛ ɛpa nēe wā ɔlɛ́ uwɔ ā, lɛ uwá kpó wɛ̄ɛcɛ, ohígbū kēé wā gáā jila ajɛ kú alɔ wɛɛlɛ nɛ.”

⁴Amáŋ, Uréhābu lɛ ācɛ ɛpa ā kpó tayínū, anɔ́ɔ ó kahíníí, “Ɔ̄kwɛ̄yi, ācɛ ɛpa wā ɛgiyí um, amáŋ, ń jé ɛga nēé ŋmá ā ŋ́.

⁵Abɔ̄ ajɛ gbɔɔ́ ō dobū ā, gbɔbū ɛ́ɛ́ kéē gwū ɔwɛ kú igá kú ipú igelī nɛ̄hi ā, ń jé ɛga nēé nyɔ̄ ā gɛ ŋ́. Amáŋ ɔ́dāŋ nɛ̄ aá nyɔ̄ fíya, aá lɔfú kwú uwā ɔwɛ.”

⁶Amáŋ gbɔbū kú olɛhɔ̄ kóō ŋmá ɛgiyí ɔcɛ́ wā ā, Uréhābu le ācɛ ɛpa ā kpó tayínū icō kú ɛyí inu ɔlɛ́ nū, ɛháajɛ ɛga nɛ̄ ó kpó ɔdɛ̄hɔ̄ bá ā.

⁷Ācɛ ɔlɛ́ ɔcɛ́ ā, le pɛ́ bɛ̄cɛ ŋmá ipú igelī nɛ̄hi ā, kéē nyɔ̄ í dɔɔ̄kā uwā gbɔbū kéē gwū odūngwɔ̄wɛ kú igá kú igelī nɛ̄hi ā. É tíne uwā jāā ga ɛga nɛ̄ ɔwɛ bēhé Ujɔ́dan ā.

⁸Gbɔbū ká ācɛ kéē gbɔlā ā, Uréhābu le tá icō ɛgiyí uwā.

⁹Anɔ́ɔ ó da uwá kahíníī, “N jé ka Óndú ā kwú ajɛ ā í lɛ aá ɛɛ́. Ufi kú aá gē yá odúúdú alɔ. Ɔtū kú odúúdú alɔ kwú gbenyi ohígbū aá ɛ́ɛ́.

¹⁰Ohígbū ka alɔ pó ɛ́gɛ́nɛ̄ Óndú ā je ísu igwɛ̄bɛ́ ā ŋmó ŋmá ajɛ iyɔ̄bu aá eko nɛ̄ aá bɛ̄cɛ ŋmá Íjīpiti ā. Mɛ́mla ɔdā nɛ̄ aá yá aɔ́cɛ́ kú ācɛ Ámɔn ɛpa nēe bá ɛnɔ̄ɔ̄cī kú Ujɔ́dan ā. Ussíhɔn mɛ́mla Ógu nɛ̄ aá je kpó ŋmó dúúdú ā.

¹¹Ikpííkpó nɛ̄ alɔ le pó ā, ɔtū kú alɔ kwu gbenyi, ɔ̄cɛ dúúmā kú alɔ í klla lɛ ɔtū ɛ́ɛ́ gɛ ŋ́. Ohígbū ka, Óndú, Ɔwɔicō kú aá wɛ Óndú kú ɔkpáncō mɛ́mla ɛcɛ á.

¹²Abālɔbányā, aá bī iyē kú nū lɛ ɛka gbo gā um ka, ɛ́gɛ́nɛ̄ n gbonɛnɛ lɛ aá ā, aá géē gbonɛnɛ lɛ ā gā um mɛ́mla ācɛ ɔlɛ́ um. Cɛ́ɛ́ kú aá lɛ ɔdā ōcābɔ̄ kú nū je gā um ká n lɛ ɔtūce aá.

¹³Aá lɛ okónu ce gā um, ka aá í gáā ŋmó ami mɛ́mla ɛ́nɛ́ um, mɛ́mla ádā um, mɛ́mla ācocɛ̄hɔ̄ kú ɔlɛ́ uwá ŋ́.”

¹⁴Anɔ́ɔ, ācɛ a da ɔ́ kahíníī, “Ɔwɔicō kóō kwú oyēeyī kú alɔ ú, ɔ́dāŋ́ ka, alɔ í yá ɛ́gɛ́nɛ̄ alɔ ka ā ŋ́. Ɔ́dāŋ ka aá da ɔ̄cɛ dúúmā ɔdā nɛ̄ alɔ hímāyī yá ā ŋ́, eko nɛ̄ Óndú ā kwú ajɛ nyā ú lɛ alɔ, alɔ géē yá uwɔ lɔhi.”

¹⁵Uréhābu lā ɔlɛ́ nēé gwó kwu ɔdɔ kú igá kú igelī ā, anɔ́ɔ ó bī ɔ́ŋgbá kwú ācɛ ā ú kpó bū uwíndo ga ɛcɛ á.

¹⁶Anɔ́ɔ o da uwá kahíníī, “Aá kwū ga ɛyí ɛfu kú aá gáā tayínū abɔ́ɔ ɛ̄cī ɛtá ohígbū nɛ̄ ācɛ ɔlɛ́ ɔcɛ́ nēe bá gē tíne aá géē má aá. Eko nēé má aá gɛ ŋ́, nēé píyɛyí wā ɔlɛ́ ɛ́ɛ́, cɛ́ɛ́ kú aá géē bɛ̄cɛ kú aá nyɔ̄.

¹⁷Anɔ́ɔ, ācɛ ā da ɔ́ kahíníī, “Okónu nɛ̄ alɔ ce ā, alɔ géē yá ɔ̄.

¹⁸Ɛ̄cī nɛ̄ alɔ géē wā í mīyɛ ajɛ ā, lɛ īlī nɔ̄wá gbō playi uwíndo nāa jē alɔ bū ɔ̄ wɛ̄ɛcɛ ā, lɛ ádā uwɔ, ɛ́nɛ́ uwɔ, mɛ́mla ayínɛ́ uwɔ, mɛ́mla ācocɛ̄hɔ̄ kú uwā, kpó bá inu ɔlɛ́ uwɔ.

¹⁹Ɔ́dāŋ́ ka, ɔ̄cɛ dúúmā le bɛ̄cɛ ŋmá inu ɔlɛ́ uwɔ gā uláyi, oyī kú nū géē ce ɔ́ ɛyí, amáŋ, ɔ́dāŋ́ ka, abɔ̄ má kwu ɔ̄cɛ dúúmā nōo yɔ̄ inu mla awɔ nɛ̄ ó gekwú, oyī kú nū géē ce alɔ ɛyí.

²⁰Amáŋ, ɔ́dāŋ́ ka, a le da ɔ̄cɛ dúúmā ɔdā nɛ̄ alɔ wā í yá nyā, ɛka nāa cɛ̄ lɛ alɔ gbo nyā í gáā kwú alɔ gɛ ŋ́.

²¹Anɔ́ɔ Uréhābu ce ɛlā kú uwā, le uwá tá úŋmóō á. Eko nēé le yɛ ā, ó kwú īlī nɔ̄wá gbō playi uwíndo kú ɔlɛ́ nū.

²²Ācɛ ɛpa a le kwu gaá tayínū ɛyí ɛfu. Ācɛ ɔlɛ́ ɔcɛ́ ā tíne uwā ɛ̄cī ɛtá, ē má uwá ŋ́, anɔ́ɔ é kwúcē le tá ɔlɛ́ á.

²³Anɔ́ɔ ācɛ ɛpa ā gā ajɛ ŋmá ɛyí ɛfu ā, le bēhé ísu kú Ujɔ́dan, anɔ́ɔ é le tá ɛgiyí Ujóssuwa á. É le odúúdú ɔdā nōo yá uwā kpó ka lɛ ɔ́.

²⁴Anɔ́ɔ é da ɔ́ kahíníī, “Alɔ jé péee ka, Óndú ā kwú ajɛ a ú lɛ alɔ ɛ́ɛ́, ɔtū kú odúúdú ācɛ abɔ́ɔ ā le gbogodo mla ufi ohígbū alɔ.”