Read idoma UJÓSSUWA 21 Bible Online

UJÓSSUWA 21 - idoma bible

UJÓSSUWA 21

¹Ācɛ kú Ísrɛ̄lu bá kwu igelī nɛ̄hi kú Ussílo ipú ajɛ kú ācɛ Ukénan ajaajɛ ā. Anɔ́ɔ abɔ̄ bá abɔ́ɔ ā, aótrɛ̄yí kú ipɔ́ɔma kú Ulífāyi ā le pɛ́ ga ɛgiyí Elísa, ɔ̄cogwɛ́ɛya ā, mɛ́mla Ujóssuwa, ɔyí kú Unɔ́n, mɛ́mla aótrɛ̄yí kú aípɔ́ɔma o hile kú Ísrɛ̄lu ā.

²Anɔ́ɔ é da uwá ka Óndú ā ɔ́ɔ da Umósīsi kóō lɛ aígelī nɛ̄hi kpó lɛ aípɔ́ɔma kú Ulífāyi kéē lā anú. Kóō klla kwú ajɛ ɛga nɛ̄ aɔ́dāajɛ kú aá ɔ́ɔ géē lúlé ipú nū glá ā ú lɛ aá yɛ jīla aígelī nɛ̄hi ā tá.

³Anɔ́ɔ ācɛ kú Ísrɛ̄lu le ukɔ́ nɛ̄ Óndú ā tū ā pó, anɔ́ɔ é kwú aígelī nɛ̄hi mɛ́mla ajɛ ɛga o lúlé kú aɔ́dāajɛ kú uwā í bá ɔ̄ lɛ uwá ŋmá ipú ajɛ kú abɔ̄yī uwā.

⁴Ipɔ́ɔ́nū kú Ukóhāti wɛ ipɔ́ɔma aflɛ́yí kú Ulífāyi nēé je aípɔ́lɛ́ lɛ uwá á. Ācɛ nēe ŋmá ipɔ́ɔma kú Árɔ̄ni ā, é kpó aígelī nɛ̄hi igwɛ́ɛtá lɛ uwá ŋmá ipú ajɛ kú aípɔ́ɔma kú Ujúda, Usímīyɔn mɛ́mla Ubɛ́njamīn.

⁵É kpó aígelī nɛ̄hi igwó lɛ ipɔ́ɔma ohile kú Ukóhāti ŋmá ipú ajɛ kú aípɔ́ɔma kú Ɛ́frem, Udán, mɛ́mla ɛnɔ̄ɔ̄nɛ̄ kú ajɛ kú Umanásɛ.

⁶É kpó aígelī nɛ̄hi igwɛ́ɛtá lɛ ipɔ́ɔma kú Ugɛ́ssɔn ŋmá ipú ajɛ kú aípɔ́ɔma kú Ísāka, Unáfutāli, Ássa mɛ́mla ɛnɔ̄ɔ̄cī kú ajɛ kú Umanásɛ.

⁷É kpó aígelī nɛ̄hi igwɛ́ɛpa lɛ ipɔ́ɔma kú Umérāri ŋmá ipú ajɛ kú aípɔ́ɔma kú Urúbɛ̄n, Ugádi, mɛ́mla Usébūlɔn.

⁸Oŋmá lɛ ūlī ō tá [3] ā, ācɛ kú Ísrɛ̄lu, le aígelī nɛ̄hi nēe bá ā kpó lɛ ācɛ kú Ulífāyi ŋmá ipú ajɛ kú aípɔ́ɔma kú Ísrɛ̄lu ɛ́gɛ́nɛ̄ Óndú ā da Umósīsi lɛ ā.

⁹Aɛ́nyā wɛ iyē kú aígelī nɛ̄hi nēé je ŋmá ajɛ kú aípɔ́ɔma kú Ujúda mɛ́mla Usímīyɔ̄n, nēé je

¹⁰lɛ ayí kú Árɔ̄ni nēe wɛ ipɔ́ɔma kú Ukóhāti nōo ŋmá Ulífāyi ā. Uwá nēé je ajɛ lɛ uwá aflɛ́yí á.

¹¹É je igelī nɛ̄hi kú Aába (ɛ̄nɛ̄ o wɛ ayí kú agwu nēé hī ka Ánāki ā) nēé gē hī ka Uhéburɔn, nōo yɔ̄ ɔlɛ́ ɛfu kú Ujúda ā, mɛ́mla ipácí ɛga o lúlé kú aɔ́dāajɛ nēe yɛ jīla uwá tá ā.

¹²Ukálɛ̄bu ɔyí kú Ujɛ́fūnɛ tɛtɛ lɛ igelī nɛ̄hi nyā, mɛ́mla obugā mla aígelī nɛ̄ŋcɛ́ kú uwā á.

¹³É kwú aígelī nɛ̄hi nēe bá nyā ú kpó kwu ɔ́ lɛ ayí kú ipɔ́ɔma kú Árɔ̄ni, ɔ̄cogwɛ́ɛya mɛ́mla Uhɛ́burɔn nēé tɛtɛ je lɛ uwá ā. Aígelī nɛ̄hi ā bá yɔ̄ á,

¹⁴Ujatiyɛ, Ɛ́ssitemōwa,

¹⁵Uhólɔn, Udébiyɛ,

¹⁶Áyin, Ujúta, mɛ́mla Ubɛti Ussímɛ̄ssi, mɛ́mla ajɛ ácí kú uwā. Aígelī nɛ̄hi ā wɛ ahāanɛ nēé kpó ŋmá ipɔ́ɔma kú Ujúda mɛ́mla Usímiyɔ̄n á.

¹⁷É kpó aígelī nɛ̄hi ɛnɛ nēe bá ā, ŋmá ipú ajɛ kú Ubɛ́njamīn ā lɛ uwá. É wɛ Ugíbiyɔn, Ugɛ́ba,

¹⁸Ánātɔ̄tu, mɛ́mla Álimɔn, mɛ́mla ajɛ ácí kú uwā.

¹⁹Odúúdú aígelī nɛ̄hi mɛ́mla ipú ácí ɛga o lúlé kú aɛ́bɛ́ nēé kpó lɛ aípɔ́ɔma kú Árɔ̄ni, ācogwɛ́ɛya ā, wɛ igwɛ́ɛtá.

²⁰É kpó aígelī nɛ̄hi ŋmá ipú ajɛ kú ipɔ́ɔma kú Ɛ́frem lɛ aípɔ́ɔnū ɔhá kú Ulífāyi nēe ŋmá ipɔ́ɔma kú Ukóhāti ā.

²¹Aígelī nɛ̄hi ɛnɛ nēe bá nyā nēé kpó lɛ uwá á, Ussɛ́kɛm, mɛ́mla ajɛ kú ācɛ ɔlɛ́ nū. Ó kē wɛ éyi kú igelī nɛ̄hi ō kwinya ɔ́ci nyɔ̄ ā. Aɔ́há wɛ, Ugɛ́sa,

²²Ukíbīsem mɛ́mla Ubɛti Uhórɔn mɛ́mla ajɛ ácí ɛga o lúlé kú aɔ́dāajɛ kú uwá.

²³É kpó igelī nɛ̄hi ɛnɛ lɛ uwá ŋmá ajɛ kú ipɔ́ɔma kú Udán, Ɛlítēke, Ugibɛ́tɔn,

²⁴Áyíjālɔn, mɛ́mla Ugatrímɔn mɛ́mla ajɛ ácí ɛga o lúlé kú aɔ́dāajɛ kú uwā.

²⁵Oŋmá ɛnɔ̄ɔ̄nɛ̄ kú ipɔ́ɔma kú Umanásɛ ā. É kpó aígelī ɛpa lɛ uwá ŋmá ɛnɔ̄ɔ̄cī kú ajɛ kú ipɔ́ɔma kú Umanásɛ. Aígelī nɛ̄hi ā bá yɔ̄ á, Utáánāki mɛ́mla Ugátrīmɔn mɛ́mla ajɛ ácí ɛga o lúlé kú aɔ́daajɛ kú uwā.

²⁶É kpó aígelī nɛ̄hi igwó mɛ́mla ajɛ ácí ɛga o lúlé kú aɔ́daajɛ kú uwá, lɛ ipɔ́ɔma kú Ukóhati ā.

²⁷Aípɔ́ɔma kú Ugɛ́ssɔn, nēe wɛ igwú ɔhá kú ipɔ́ɔma kú Ulífāyi ā, mīyɛ aígelī nɛ̄hi ɛpa mɛ́mla ajɛ ácí ɛga o lúlé kú aɔ́daajɛ ŋmá ɛnɔ̄ɔ̄cī kú ajɛ kú Umanásɛ. Igelī nɛ̄hi kú Ugólan (éyí kú aígelī nɛ̄hi ō kwinya ɔ́ci nyɔ̄ ā) mɛ́mla Ubéesitɛ́ra mɛ́mla ajɛ ácí ɛga o lúlé kú aɔ́daajɛ.

²⁸É kpó aígelī nɛ̄hi ɛnɛ lɛ uwá ŋmá ipú ajɛ kú ipɔ́ɔma kú Ísāka. Aígelī nɛ̄hi ā wɛ, Ukíssīyɔn, Udábērati,

²⁹Ujámuti, mɛ́mla Enigánim, mɛ́mla ajɛ ácí ɛga o lúlé kú uwā.

³⁰É kpó aígelī nɛ̄hi ɛnɛ lɛ uwá ŋmá ajɛ kú ipɔ́ɔma kú Ássa. Aígelī nɛ̄hi ā wɛ, Umíssalu, Ábudɔn,

³¹Uhɛ́kāti, mɛ́mla Uréhōbu, mɛ́mla ajɛ ácí ɛga o lúlé kú aɔ́daajɛ kú uwā.

³²É kpó aígelī nɛ̄hi ɛtá lɛ uwá ŋmá ipú ajɛ kú ipɔ́ɔma kú Unáfutāli. Ukédisi nōo yɔ̄ Ugálíli ā, mɛ́mla ajɛ ácí ɛga o lúlé kú nū, (ó wɛ éyi kú aígelī nɛ̄hi ō kwinya ɔ́ci nyɔ̄), Uhámɔti Udɔ, mɛ́mla Ukátan, mɛ́mla ajɛ ácí ɛga o lúlé kú aɔ́daajɛ kú uwā.

³³Ipɔ́ɔ́nū ɛyɛ́ɛyɛ́yí kú ipɔ́ɔma kú Ugɛ́ssɔn mīyɛ aígelī nɛ̄hi igwɛ́ɛtá mɛ́mla ajɛ ácí ɛga o lúlé kú aɔ́daajɛ kú uwā.

³⁴Ācɛ ohile kú ācɛ Ulífāyi nēe ŋmá ipɔ́ɔma kú Umérāri ā, mīyɛ aígelī nɛ̄hi ɛnɛ ŋmá ipɔ́ɔma kú Usébulɔn. Ujókníim, Ukárati,

³⁵Udímina, mɛ́mla Unahála, mla ajɛ ácí ɛga o lúlé kú aɔ́daajɛ kú uwá.

³⁶É kpó aígelī nɛ̄hi ɛnɛ lɛ uwá dúú ŋmá ipú ajɛ kú ipɔ́ɔma kú Urúbɛ̄n. Aígelī nɛ̄hi ā wɛ, Ubɛ́sa, Ujáhāsi.

³⁷Ukɛ́dɛ̄mɔtu, mɛ́mla Umefaati mɛ́mla ajɛ ácí ɛga o lúlé kú aɔ́daajɛ kú uwá.

³⁸É kpó aígelī nɛ̄hi ɛnɛ lɛ uwá ŋmá ipú ajɛ kú ipɔ́ɔma kú Ugádi Urámɔ̄tu nōo yɔ̄ Ugílɛ̄di nōo klla wɛ (éyi kú igelī nɛ̄hi ō kwinya ɔ́ci nyɔ̄ a), Umáhanēm,

³⁹Uhɛ́ssibɔn, mɛ́mla Ujása mɛ́mla ajɛ ácí ɛga o lúlé kú aɔ́daajɛ kú uwā.

⁴⁰É kpó aígelī nɛ̄hi igwɛ́ɛpa lɛ ipɔ́ɔma kú Umɛ́rāri.

⁴¹É kpó aígelī ofɛpa cahātá ā kpó lɛ ipɔ́ɔma kú Ulífāyi.

⁴²Aígelī lɛ ajɛ ácí ɛga o lúlé kú aɔ́daajɛ kú uwā nōo yɛ uwá jīla tá ā.

⁴³Óndú ā lɛ odúúdú ajɛ nōó cokónu nū lɛ aádáádā kú Ísrɛ̄lu ā kpó lɛ ācɛ kú Ísrɛ̄lu. É má lā ajɛ eko nēé mīyɛ ɔ́ ā.

⁴⁴Óndú ā le yá kéē bá ɛbɔ́ ipú odúúdú ajɛ ā, ɛ́gɛ́nɛ̄ ó cokónu lɛ aádáádā uwá lɛ ā. Aólɛlā kú uwá ékpónú í lɔfú háyi iyɔ̄bū uwā glá ŋ́, ohígbū ka Óndú ā cɛ̄ lɛ ācɛ kú Ísrɛ̄lu lɛ aólɛlā kú uwā kpó yálé.

⁴⁵Óndú ā lɛ odúúdú okónu nɛ̄ ó ce lɛ ācɛ kú Ísrɛ̄lu ā tū kpɛ́mm.