Read idoma UJÓSSUWA 22 Bible Online

UJÓSSUWA 22 - idoma bible

UJÓSSUWA 22

¹Anɔ́ɔ Ujóssuwa lɛ ācɛ kú ipɔ́ɔma kú Urúbɛ̄n, mɛ́mla Ugádi mɛ́mla ɛnɔ̄ɔ̄cī kú Umanásɛ ā hīgwú tɔ̄há.

²Anɔ́ɔ ó da uwá ka ɔdā dóódu nɛ̄ Umósīsi ɔ̄cocɛ̄hɔ̄ kú Óndú ā da uwá kéē yá ā, ka é le ɔ́ yá ɛɛ́. Ó ka ɛ́ɛ lɛyítáajɛ lɛ odúúdú íne kú nū.

³Jāā kwu abālɔbányā, é cīgbīhi kwu ācɛ kú Ísrɛ̄lu ɔ́mpa uwā ŋ́. Ó keé húmáyī ī lɛyítáajɛ lɛ íne kú Óndú ā, Ɔwɔicō kú uwā.

⁴Ɛ́gɛ́nɛ̄ ó cokónu lɛ uwá lɛ ā, Óndú, Ɔwɔicō kú uwā ɔ́ɔ le ɛbɔ́ je lɛ ācɛ kú Ísrɛ̄lu ɔ́mpa uwā ɛɛ́. Ó kéē le cīgbīhi ga ɔlɛ́ ipú ajɛ nōo wɛ ákú uwā nōo yɔ̄ ɛnɔ̄ɔ̄cī kú Ujɔ́dan, nɛ̄ Umósīsi ɔ̄cocɛ̄hɔ̄ kú Óndú ā je lɛ uwá ā.

⁵Ó kéē má kéē lɛyítáajɛ lɛ íne nɛ̄ Umósīsi je lɛ uwá ā. Kéē yíihɔtū tá Óndú, Ɔwɔicō kú uwā. Ó ka é yá ɔdā nōo he ɔ́ ɔtū ā, kéē lɛyí táajɛ lɛ aíne kú nū, kéē yɛ ɔwɛ kú nū kpaakpa, kéē klla gbā ɔ̄ ɛ̄gbā mla odúúdú odo mla ɔtū kú uwā.

⁶Ujóssuwa le ɔhā hɛ́ ce uwá, anɔ́ɔ ó le uwá nū ga ɔlɛ́, yɔ̄ ī da uwá kéē ga ɔlɛ́ le gbo agbénú nɛ̄hi. Agbénú kú aɔ́dāajɛ, oje nɛ̄hɛ́, ugóolu (oje ɔdɔ), oje udɔ, oje ɔlamu mɛ́mla aódōwiyē alɛwa. Ó da uwá kéē lɛ aɔ́dā nēé mīyɛ ŋmá abɔ̄ kú aólɛlā ā kɔ̄ mla ācɛ ipɔ́ɔma kú uwā. Anɔ́ɔ é le pɛ́ tá ɔlɛ́ uwā á. Umósīsi tɛtɛ kwú ajɛ nōo yɔ̄ ɛnɔ̄ɔ̄cī kú Ujɔ́dan ā ú lɛ āyā éyi kú ipɔ́ɔma kú Umanásɛ ɛɛ́. Amáŋ Ujóssuwa klla kē tɛtɛ kwú ajɛ nōo yɔ̄ ɛnɔ̄ɔ̄nɛ̄ kú Ujɔ́dan ā ú lɛ āyā ɔhá kú ipɔ́ɔma kú Umanásɛ ā, tɔ̄há mla aípɔ́ɔma ɔhá ā.

⁷

⁸

⁹Anɔ́ɔ ācɛ kú aípɔ́ɔma kú Urúbɛn, Ugádi, mɛ́mla āyā kú Umanásɛ ā, kwúcē ga ɔlɛ́ uwā á. É mā ācɛ o hile tá Ussílo ipú ajɛ kú Ukénan. Anɔ́ɔ ē gbɔɔ́ ō ga ipú ajɛ kú uwā nōo yɔ̄ Ugílɛ̄di, nēé je lɛ uwá ɛ́gɛ́nɛ̄ Óndú ā tū Umósīsi ukɔ́ lɛ ā.

¹⁰Eko nɛ̄ aípɔ́ɔma kú Urúbɛ̄n, Ugádi mɛ́mla ipɔ́ɔma kú ɛnɔ̄ɔ̄cī kú Umanásɛ ga Ugílīlɔtu nōo kwu ɛnɔ̄ɔ̄nɛ̄ ísu kú Ujɔ́dan ajaajɛ ā, é le ede ɛnɛ̄hi nōo klla lɔhi nɛ̄hi éyi gwó abɔ́ɔ gbɔbū ɛ́ɛ́ kéē bēhé ísu ā.

¹¹Eko nēé le ka lɛ ācɛ kú Ísrɛ̄lu o hile ā ka, ācɛ kú aípɔ́ɔma kú Urúbɛ̄n, Ugádi, mɛ́mla āyā éyi kú Umanásɛ ā le ede gwó kwu Ugílīlɔtu, ābɔ̄ kú āyā kú Ujɔ́dan nōo wɛ ákú ācɛ kú Ísrɛ̄lu ā.

¹²Odúúdú uwá le pīya tɔ̄há wā Ussílo kéē gáā kpɛ́fú tá aípɔ́ɔma kú ɛnɔ̄ɔ̄cī ā.

¹³Anɔ́ɔ ācɛ kú Ísrɛ̄lu lɛ Ufínēhasi, ɔyí kú Ɛlísa, ɔ̄cogwɛ́ɛya ā tɛ̄hɔ̄ fu aípɔ́ɔma kú Urúbɛn, Ugádi mɛ́mla ipɔ́ɔma kú ɛnɔ̄ɔ̄cī kú Umanásɛ ipú ajɛ kú Ugílɛ̄di.

¹⁴Aótrɛ̄yí kú aípɔ́ɔma igwó o hile ā kē nyɔ̄ mla Ufínēhasi dúú.

¹⁵É le táajɛ kú Ugílɛ̄di, ɛgiyí ācɛ kú Urúbɛ̄n, Ugádi mɛ́mla ācɛ ɛnɔ̄ɔ̄cī kú Umanásɛ.

¹⁶É kɛlā kwɛyí odúúdú ācɛ kú Óndú ā ka ɔdíyá nēé yá Ɔwɔicō kú Ísrɛ̄lu ɔdōbɔ̄bí ɔ́ɔmā ā? É klla da uwá keé le íne kú Óndú ā bīya, klla le īkpɛ̄yí olɔfú yá tá Óndú ā dúú, o ŋmá lɛ ede nēé gwó abɔ̄yī uwā ā. É keé klla yɛ ce Óndú ā ɛ́ɛ́ gɛ ŋ́.

¹⁷É da uwá ɔ̄kā ka ɔ́dāŋ nēé blakwu íne nɛ̄ aá ɔ́ɔ bīya eko nɛ̄ aá bá Upéyɔ, nɛ̄ Óndú ā ɔ́ɔ yá aá italā bū ipú ōcē nɛ̄ ɔ́ tū klá aá āā. É kée kōō gwu aá iyē ŋmá anú dúúdú ɛ́ɛ́ ŋ́.

¹⁸É ka ɛ́ɛ tá kéē yɛce Óndú ā mɛ́nɛɛ? Ɔ́dāŋ́ ka, ɛ́ɛ tá kóō yɛ ce Óndú ā ícɛ, ɔ́ɔ géē cɔ̄nū mla odúúdú ācɛ Chile kú Ísrɛ̄lu ócí.

¹⁹É ka ɔ́dāŋ́ ka ajɛ kú uwā ɔ́ɔ lɔhi nēé gē gbā Óndú ā ɛ̄gbā anú ŋ́ nɛɛ, ɛ́ɛ̄ wā ipú ajɛ kú Óndú ā ɛga nɛ̄ Áklɔ̄kpīihɔ kú nū kwu ā. É ke í je ajɛ lɛ uwá abɔ́ɔ ipú aá. Amáŋ kéē híī yá īkpɛ̄yí olɔfú tá Óndú ā ŋ́. Ámāŋ o lɛ alɔ yá bɛ̄ɛka ācɛ ō yá ikpɛ̄yí olɔfú tá Óndú ā, ohígbū ede nɛ̄ aá nyɔ̄ í gwó kóō búla ákú Óndú, Ɔwɔicō kú aá iyē ā.

²⁰É da uwá kéē blakwu ɛ́gɛ́nɛ̄ Ákan, ɔyí kú Uséra tá kóō lɛyítáajɛ lɛ íne kú Óndú ā ohígbū ɔdēelihɔ kú ífi ā. Óndú ā le odúúdú ācɛ kú Ísrɛ̄lu yá italā ohígbū nū. Ó wɛ Ákan ofōōfūnū kwú ohígbū íne nɛ̄ ó bīya ā ŋ́.

²¹Anɔ́ɔ ācɛ kú aípɔ́ɔma kú Urúbɛn, Ugádi mɛ́mla ipɔ́ɔma ɛnɔ̄ɔ̄cī kú Umanásɛ ā, tá aótrɛ̄yí kú aípɔ́ɔma kú ɛnɔ̄ɔ̄nɛ̄ ā ohi lɛ ā á

²²É ka aá le abɔ̄ tɛ́yɛ̄yīpɛ̄ ī gbɔ̄ɔkɔ lɛ Óndú, Ɔwɔicɔ̄ nōo lɔfú fíyɛ́ dúú ā. É ka ɔ́ɔ jé ɔdā nōo yá, ɛ́ɛ́ nɛ̄ aá gwó ede ā. É ka aá tíne kú odúúdú ācɛ Ísrɛ̄lu kéē lɛ ɔ́ jé lɛ ā dúú.

²³É klla ka ka ɔ́dāŋ nɛ̄ aá gwó ede ā, o yá ɛ́ɛ́ kú aá bɛ́yíkwu Óndú ā nɛɛ, ámāŋ ka o lɛ ɛka kú aá mla anú bīya nɛɛ, ó lɛ ā, Ɔwɔicō abɔ̄yī nū kóō lɛ aá kpó kwú gé lɛ uwá, cɛ́ɛ́ kéē lɛ aá kpó ŋmó abɔ̄yī uwā ícíícɛ ɔ́ɔmā. É ka aá ɔ́ bī ɔ̄ ɔtū ka aá gáā gwɛ́ɛya ɛyí ede ā, gbɔbū ɛ́ɛ́ nɛ̄ aá gwó ɔ̄ɔ ā ŋ́.

²⁴É ka aá yá ɔdā nɛ̄ aá yá ā ohígbū ka aá gē yúufi ekɔ̄bū nɛ̄ ayááyí aá géē da ayááyí aá ɔ̄ká ka, ɔ̄dí ɔ́ gbo ákú uwā mla Óndú, Ɔwɔicō kú Ísrɛ̄lu ā?

²⁵É klla géē ka ka Óndú ā ɔ́ le ísu kú Ujɔ́dan tū ɛjī lɛ aá mla uwá. É lɔfú ka ka aá nēe wɛ ācɛ kú Urúbɛ̄n mɛ́mla Ugádi ā, í lɛ ɔdā dúúmā ō yá mla Óndú ā ŋ́. Eko ɔ́ɔmā, ayááyí uwā í gáā cɛ̄ lɛ ayááyí aá gbā Óndú ā ɛ̄gbā gɛ ŋ́.

²⁶É ka aá gwó ede ā ɔkwɛ̄yi, amáŋ aá gwó ɔ̄ kú aá bī ɔ̄ lɛ gwɛ́ɛya o yɔlá dúúdú ámāŋ ka o bī ɔ̄ je ɔdā ɛ̄gbā lɛ Óndú ā ɛyí nū ŋ́.

²⁷É ka amáŋ ede nɛ̄ aá gwó ā wɛ ɔdā ocābɔ̄ lɛ ācɛ ɔlɛ́ aá mɛ́mla ācɛ ɔlɛ́ uwā, mɛ́mla aɛ́gɔ́ kú ācɛ nēe í wā igbīhi aá, ka, aá gbā Óndú ā ɛ̄gbā ɔkwɛ̄yi ipéyī nū. Aá bī ɔdā ɛ̄gbā o yɔlá dúúdú mɛ́mla ɔdā ɛ̄gbā kú ɛya kú ɛbɔ́ lɛ ɔ́. Ɛ̄nyā í klla gáā cɛ̄ lɛ ayááyí uwā kéē dá ayááyí aá ka ɔdā dúú ɔ́ gbo ákú aá mla Óndú ā ō gbɛ̄ɛ̄gbā ŋ́.

²⁸É ka aá gbɛlá ka, ɔ́dāŋ ka ɔdā nɛ̄ aá yúufi nū ā le yá ɔkwɛ̄yi, ayááyí aá lɔfú da ayááyí uwā glá ka, éē má ɔ̄ wɛ́ɛ́, ka aádáádā aá gwó ede nōo wɛ ɛ́gblá kú ákú Óndú ā ka ɔ́ɔ wɛ ákú ō gwɛ́ɛya o yɔlá dúúdú ámāŋ ka ogwɛ́ɛya kú ɔdā ɛ̄gbā anú ŋ́. Amáŋ ó wɛ ɔdā ō blakwu ɔdā nōo yá lɛ ācɛ ɔlɛ́ aá mɛ́mla ācɛ ɔlɛ́ uwā.

²⁹É ka aá í gáā yíīkpɛ̄yí olɔfú tá Óndú ā ŋ́, ɛɛ́ nɛ̄ aá gē kwúcē igbīhi ŋmá ō yɛce ɔ́ ŋ́. É ka aá gáā gwó ede ɔhá gwō ede kú Óndú, Ɔwɔicō kú aá nōo kwu iyɔ̄bū Áklɔ̄kpīihɔ ā ŋ́.

³⁰Eko nɛ̄ Ufínēhasi, ɔ̄cogwɛ́ɛya ā, mɛ́mla aótrɛ̄yí igwó nēe ŋmá odúúdu aípɔ́ɔma kú Ísrɛ̄lu ā le ɛlā nɛ̄ aípɔ́ɔma kú Urúbɛn, Ugádi mɛ́mla āyā kú ɛnɔ̄ɔ̄cī kú Umanásɛ ā ka lɛ uwá ā pó ā, ɛlā ā le nū uwā ipú.

³¹Anɔ́ɔ Ufínēhasi, ɔ̄cogwɛ́ɛya ā da uwá kahíníī, “Abālɔbányā aá jé ka Óndú ā yɔ̄ mla aá. A híī yíikpɛ̄yí olɔfú tá Óndú ā ŋ́. Aá kē lɛ ācɛ kú Ísrɛ̄lu nyatá ŋmá italā kú Óndú ā ɛɛ́.”

³²Anɔ́ɔ Ufínēhasi mɛ́mla anyākwɔ́cɛ ā nyɛ̄ɛ̄ hɛ ācɛ kú Urúbɛn, mɛ́mla Ugádi, mɛ́mla ācɛ kú Umanásɛ nēe bá ɛnɔ̄ɔ̄cī ā tá ipú ajɛ kú Ugílɛ̄di, anɔ́ɔ é le cīgbīhi ga Ukɛ́nan gaá lɛ ohi kú iyāwu kú uwā kpó lɛ ācɛ ɔlɛ́ uwā.

³³Eko nɛ̄ ācɛ kú Ísrɛ̄lu lɛ ohi kú iyāwu kú uwá pó ā, ipú kú uwā le nū, anɔ́ɔ é le cɛ̄tra Ɔwɔicō á. É klla gbɛlá ō nyɔ̄ í kpɛ́fú tá ācɛ kú Urúbɛ̄n, Ugádi mɛ́mla ācɛ Umanásɛ nēe bá ɛnɔ̄ɔ̄cī ā kéē je ajɛ kú uwá yíífi ɛɛ́ gɛ ŋ́.

³⁴Ācɛ kú Urúbɛn, Ugádi mɛ́mla ācɛ kú Umanásɛ nēe bá ɛnɔ̄ɔ̄cī ā ka ede ā wɛ ijáalí lɛ aá mɛ́mla uwá ka, Óndú ā wɛ Ɔwɔicō. Ohígbū ɔ́ɔmā, é hī iyē kú abɔ́ɔ ka Ijáalí.