Read idoma UJÓSSUWA 23 Bible Online

UJÓSSUWA 23 - idoma bible

UJÓSSUWA 23

¹Igbīhāajɛ ā, Óndú ā lɛ ācɛ kú Ísrɛ̄lu gbō ŋmá ɛgiyí aólɛlā kú uwá. Eko ɔ́ɔmā, Ujóssuwa le hīla nɛ̄hi ɛɛ́.

²Anɔ́ɔ ó lɛ odúúdú ācɛ kú Ísrɛ̄lu ā kpó hīgwú. Kwu anyākwɔ́cɛ, aótrɛ̄yí, aɔ́cɛ́ ohɛ́pɔ̄, mɛ́mla aígabɔ̄ kú ācɛ ā, anɔ́ɔ ó da uwá ka anúɔ le hīla nɛ́hi ɛɛ́.

³Ó keé kē má odúúdú ɔdā nɛ̄ Óndú, Ɔwɔicō kú uwá yá aéwo ɔhá iyɔ̄bū uwā ā. Ó ka Óndú, Ɔwɔicō kú uwā ɔ́ɔ húmáyī nuunu lɛ uwá á.

⁴Ó ka anúɔ le ajɛ nōo gbɔɔ́ ŋmá ísu kú Ujɔ́dan ɛnɔ̄ɔ̄cī gaá kwu ísu kú Umeditarénīya ɛnɔ̄ɔ̄nɛ̄ nɛ̄ aá mīya ŋmá abɔ̄ aólɛlā ā mɛ́mla ajɛ kú aéwo nɛ̄ aá kōō mīyɛ ɛ́ɛ́ ŋ́ mā ā, kpó kɔ̄ lɛ uwá kóō wɛ ɔdā úgwū kú uwá ɛɛ́

⁵Ó ka Óndú, Ɔwɔicō kú uwā géē yá kú aólɛlā kú uwā kéē kwinya ŋmá iyɔ̄bū aá. Ó gē nū uwā nyɔ̄ abɔ̄ nēé géē bá ī wā ā. Kéē géē mīyɛ ajɛ kú uwā ɛ́gɛ́nɛ̄ Óndú, Ɔwɔicō kú uwā cokónu lɛ uwá ā.

⁶Ó da uwá kéē lɛlá kwu ɔ́ kéē lɛyítáajɛ lɛ odúúdú ɔdā nēé tá ɔkpá kú íne kú Umósīsi ā, kéē lɛ ɛjɛ̄ɛ̄jī nū yá jīla. Ó klla da uwá ka é híī je mlanyī āyā dúúmā kú íne ā ŋ́.

⁷Ó klla da uwá kéē híī pīyatɔ̄há mla ācɛ kú ajɛ ā nēe hile ipú aá ā ŋ́. Ɛ́ɛ́ nēé kōō ī hī iyē kú ɔwɔ kú uwá ŋ́, ɛɛ́ nēé gē gbā ɔwɔ kú uwā ɛ̄gbā ŋ́, ɛɛ́ nēé gē bī iyē kú ɔwɔ kú uwá i gbɛka ŋ́.

⁸Ó kéē lɛyítáajɛ lɛ Óndú ā ɛ́gɛ́nɛ̄ é bá ī lɛyítáajɛ lɛ ɔ́ jāā kwiícɛ ā.

⁹Ó klla da uwá ka aéwo nɛ̄ nwuné klla lɔfú nɛ̄hi ā, Óndú ā lɛ uwá kpó nū bɛ̄cɛ ŋmá iyɔ̄bū uwā ɛɛ́. Ka odúúmā kú uwā í lɔfú háyi iyɔ̄bū uwā glá ŋ́.

¹⁰Ó ka ɔ̄cɛ éyi kú uwā géē yá ācɛ úlā ɛpa ce ofigwó kú uwā kéē kwinya ŋmá ɛgiyí uwā. Ohígbū ka Óndú, Ɔwɔicō kú uwā yɔ̄ í nuunu lɛ uwá ɛ́gɛ́nɛ̄ ó cokónu lɛ uwá lɛ ā.

¹¹Ujóssuwa kéē lɛ ɛlá kwu ɔ́, kéē yíihɔtū tá Óndú, Ɔwɔicō kú uwā.

¹²Ó da uwá ka ɔ́dāŋ kéē lɛyítáajɛ lɛ Óndú ŋ́, nēé gbɔɔ́ ō lɛ ayí uwā ɔnyā,

¹³ó kéē gēe jé ka, Óndú ā í gáā nū aéwo nēe lɛ ajɛ ā bɛ̄cɛ ŋmá iyɔ̄bū uwā ɛ́ɛ́ gɛ ŋ́. Ó kéē géē lɛbɛ̄ɛka ukpa, ámāŋ ɔ̄gɔ̄ ámāŋ itali ámāŋ ujē ā lɛ uwá, nōo géē pla uwá ɔkɔ klla í cí uwā eyī. Ó ka ɔdā nɛ̄ anúɔ ka ā géē yá uwā jāā gbéeko nɛ̄ odúúmā kú uwā í hile ipú ajɛ olɔhi ā ɛɛ́ gɛ ŋ́.

¹⁴Ó klla da uwá ka eko nɛ̄ anúɔ í kwú ā gā ɛɛ́. Ó da uwá ka ɔ̄cɛ dóódu kú uwá kóō jé ipú ɔtū kú nū ka, Óndú, Ɔwɔicō kú uwā le ɔdā olɔhi dóódu nōó cokónu nū lɛ uwá ā kpó yá lɛ uwá ɛɛ́. Okónu dóódu nōó ce a, ó lɛ ɔ́ tū. Ó koó je odúúmā táajɛ ŋmá anú nōó yá ɔ̄ ŋ́ nɛɛ ŋ́.

¹⁵Ó ka ɛ́gɛ́nɛ̄ ó lɛ odúúdú okónu nɛ̄ ó ce lɛ uwá ā tū ā, ɛ́gɔ́ɔmā nōó géē yá uwā italā dóódu lɛ á, ɔ́dāŋ keé lɛyítáajɛ ŋ́.

¹⁶Ó ka ɔdāŋ́ keé lɛyí táajɛ lɛ íne kú Óndú ā ŋ́, nēé gbɔɔ́ ō gbā aɔ́wɔ ɔhá ɛ̄gbā. Ipú ɔnū nōó í cɛ̄ ā, ɔ́ɔ géē yá uwā italā, nɛ̄ eko kpiií, nɛ̄ ɔ̄cɛ dúúmā kú uwā í gáā hile ipú ajɛ olɔhi nɛ̄ Óndú ā je lɛ uwá ā gɛ ŋ́.