Read idoma UJÓSSUWA 24 Bible Online

UJÓSSUWA 24 - idoma bible

UJÓSSUWA 24

¹Ujóssuwa lɛ odúúdú aípɔ́ɔma kú Ísrɛ̄lu ā kpó hīgwú tɔ̄há ajɛ kú Ussɛ́kɛm. Anyākwɔ́cɛ, aótrɛ̄yí, aɔ́cɛ́ ohɛ́pɔ̄, mɛ́mla aígabɔ̄ ā. Anɔ́ɔ odúúdú uwá ga iyɔ̄bū Óndú ā á.

²Anɔ́ɔ Ujóssuwa da odúúdú ācɛ ā, kahíníī, “Ɔdā nɛ̄ Óndú ā, Ɔwɔicō kú Ísrɛ̄lu ā ka íkée á, ‘ó ka aádáádā aá lā ogbeé ɔhá kú ísu kú Uyúfarētīisi, gē gbō aɔ́wɔ ɔhá ɛ̄gbā. Éyi kú aádáádā aá ɔ́ɔmā wɛ Utéra, ádā kú Ébrahām mɛ́mla Unáhɔ.’

³Ó ka eko éyi Óndú ā, kwú Ébrahām aádáádā alɔ ú ŋmá ajɛ kú Uyúfarētīisi, bī ɔ̄ bū odúúdú ajɛ kú Ukénan. Ó ka anúɔ kpó ayááyí alɛwa lɛ ɔ́. Ó ka anúɔ kōō je Áyísīki lɛ ɔ́ dúú

⁴Óndú ā kē kpó Ujékɔ̄pu mɛ́mla Ísɔ lɛ Áyísīki á. Anú klla je igelī nɛ̄hi kú ɛyí ɛfu kú Ɛ́dɔm ā lɛ ísɔ á, amáŋ ádā uwā, Ujékɔ̄pu mɛ́mla ayí nū lɛ pɛ́ ga Íjīpiti

⁵Igbīhāajɛ ā, Óndú ā le Umósīsi mɛ́mla Árɔ̄ni tɛ̄hɔ̄ gā Íjīpiti mla unwalu nɛ̄hi nōó bī í klá ācɛ Íjīpiti. Amáŋ ó le uwá kpó wɛ̄ɛcɛ

⁶Eko nɛ̄ Óndú ā kpó aádáádā alɔ bɛ̄cɛ ŋmá Íjīpiti ā, ācɛ kú Íjīpiti bī úgbɔ́ɔnyā o kpɛ́fú mɛ́mla ɔnya ɛfú le nū uwā inyā. Amáŋ eko nɛ̄ aádáádā alɔ gā okónu ísu igwɛ̄bɛ́ ā,

⁷é jikwū kú otábɔ̄, anɔ́ɔ Óndú ā kwú ajɛ odobū í tá ɔtāhɛ̄ uwā mɛ́mla ācɛ kú Íjīpiti. Óndú ā cɛ̄ lɛ ísu ā le kɔ́ ɛpa, anɔ́ɔ é le bū ɔ̄ ɛyí ajɛ oŋmókókó. Amáŋ ó le yá kú ísu ā kóō kwú okónu ú klá tū ācɛ kú Íjīpiti eko nēé nū aádáádā alɔ ga ipú ísu ā. Aá kē jé ɔdā nōó yá ācɛ kú Íjīpiti ā.” Ó keé kē lā ipú ígbíli iháyí alɛwa.

⁸Anɔ́ɔ Óndú le uwá kpó wā ajɛ kú ācɛ Ámɔn, nēe lā ɛnɔ̄ɔ̄cī kú Ísu kú Ujɔ́dan ā. Ācɛ ā kpɛ́fú tá uwā, amáŋ é le ācɛ ā yálé, klla mīyɛ ajɛ kú uwā. Óndú ā klla le uwá kpó yíífi ŋmá iyɔ̄bū uwā.

⁹Ɔcɛ́ kú Umówābu, Ubálāki, ɔyí kú Usípɔ kpɛ́fú tá uwā. Ɔcɛ́ ā le ɛhɔ̄ tū fu Ubálam, ɔyí kú Ubéyɔ kóō lɛ okónu tá lɛ alɔ.

¹⁰Amáŋ Óndú ā í jāhɔ̄ lɛ Ubálam ŋ́, anɔ́ɔ ó cɛ̄ lɛ Ubálam le ɔhá hɛ́ ce uwá. Ɔwɛ ɔ́ɔmā nōó bī le nya uwá tá ŋmá abɔ̄ kú Ubálāki á.

¹¹É le bēhé Ujɔ́dan ga Ujérīko. Ācɛ kú Ujérīko nuunu tá uwā ɛ́gɛ́nɛ̄ ācɛ kú Ámɔn, Upɛ́risi, Ukɛ́nan, ācɛ Uhɛ́ti, Ugerísayi, ācɛ Uhám, mɛ́mla Ujɛ́busi kpɛ́fú tá uwā ā. Amáŋ Óndú ā cɛ̄ lɛ uwá le odúúdú ācɛ ā kpó yálé

¹²Abɔ̄ é bá í wā a, Óndú cɛ̄ le ɔtū kú uwā kwú wuklíicō, o yá ɛ́ɛ́ kóō lɛ aɔ́cɛ́ kú Ámɔn ɛpa ā nū bɛ̄cɛ hīla uwá. Anɔ́ɔ aádáádā alɔ í kē bī ɔkpacaŋ́gelī mɛ́mla ɔtā mla ɔyī kú uwā yúklɔ́ gɛ ŋ́.

¹³Ó kwú ajɛ nēé hɛ́hɔ̄ anú jéjée ɛ́ɛ́ ŋ́, mɛ́mla ajɛ nɛ̄ ó wɛ uwá gwó aígelī nɛ̄hi kú nū ā ŋ́ mā ú lɛ uwá. É kē lā anú abālɔbányā, bá ī lé īkpō kú ɔcí Ufáyin nɛ̄ ó wɛ uwá tū ŋ́ mā. É klla bá ī lɛ anɔ̄ kú ɔcí nēé hī ka ólīfu nɛ̄ ó wɛ uwá tū ā ŋ́.”

¹⁴Anɔ́ɔ Ujóssuwa da uwa keé lɛ ojīlīma ce Óndú ā, kéē gbā ɔ̄ ɛ̄gbā kpaakpa ŋmá ipú ɔtū kú uwā. Ó klla da uwá kéē lɛ aɔ́wɔ nɛ̄ aádáádā uwā gē gbā Umɛsopotámīya mɛ́mla ajɛ Íjīpiti ā kpó bónū, cɛ́ɛ́ kéē gbā Óndú ā ōfōōfūnū ɛ̄gbā.

¹⁵Ó klla da uwá kpó kahíníī, “Ɔ́dāŋ ka aá tíne ō gbā Óndú ā ɛ̄gbā gɛ ŋ́ nɛɛ, aá keé le ɔtū kú aá yéékpónú, cɛ́ɛ́ ká aá lɛ ɔ̄cɛ nɛ̄ aá géē gbā ɔ̄ ɛ̄gbā ā fu ícíícɛ nyā. Ka aɔ́wɔ nɛ̄ aádáádā alɔ gbā ɔ̄ ɛ̄gbā Umesopotámīya ā kɛ̄ɛ̄ ka aɔ́wɔ kú ācɛ Ámɔn nēe lā ipú ajɛ kú uwā eko ɔ́ɔmā a. Ákú ami mɛ́mla ipɔ́ɔnū kú ɔlɛ́ um ā, alɔ géē gbā Óndú ā ɛ̄gbā í cɛ̄ ɔ̄ ɛhɔ̄.”

¹⁶Anɔ́ɔ ācɛ ā tá ɔ̄ ohi ka aá í gáā mā Óndú ā tá nyɔ̄ í gbā aɔ́wɔ ɔhá ɛ̄gbā gbóógbóō ŋ́.

¹⁷É ka Óndú, Ɔwɔicō kú aá, kpó aádáádā aá bɛ̄cɛ ŋmá ipú ɔfiyɛ ajɛ Íjīpiti á. É ka aá má aɔ́dā idáagó nōó yá ā. É klla ka ó le aá gbō ɛbɔ́ ŋmá abɔ̄ kú ācɛ dóódu nɛ̄ aá bū ipú uwā ā.

¹⁸É ka abɔ̄ aá bá ī nyɔ̄ ipú ajɛ née bá ā, Óndú ā ɔ́ɔ le odúúdú ācɛ Ámɔn nōo lā anú ā kpó nū bɛ̄cɛ. Ohígbū ɔ́ɔmā ā, aá géē gbā Óndú ā ɛ̄gbā dúú. Ka anú wɛ Ɔwɔicō kú aá á.

¹⁹Anɔ́ɔ Ujóssuwa da ācɛ a ka amáŋ é gáā gbā Óndú ɛ̄gbā glá ŋ́. Ohígbū ka ó tīihɔ, ó gáā je ínoōbīya yá uwā ɛhi áncā ŋ́. Ó gáā cɛ̄ lɛ ɔwɔ ɔhá búla anú ŋ́.

²⁰Ɔ́dāŋ́ keé nyɛ̄ɛ̄ hɛ ɔ̄ tá gaá gbɔɔ́ ō gbā ɔwɔ kú aéwo ɔhá ɛ̄gbā, ó géē pīyeyī kwu uwá klla í yá uwā italā. Ó ka ɔ́ɔ géē kpó uwā yíífi, ɔ́dāŋ ka ó kōō tɛtɛ lɔhi lɛ uwá nááná.

²¹Ācɛ ā da Ujóssuwa ka ehée, aá géē gbā Óndú ā ɛ̄gbā.

²²Anɔ́ɔ Ujóssuwa da uwá keé wɛ Ijáalí kú iyī uwā á. Koó wɛ ɔkwɛ̄yi ka uwá ɔ́ɔ cɛ̄ ka Óndú nɛ̄ aá je kú aá gbā ɔ̄ ɛ̄gbā á. Anɔ́ɔ é cɛ̄ ka aá wɛ ijáalí kú iyī aá á.

²³Anɔ́ɔ Ujóssuwa da uwá kóō lɛ ā, é lɛ aɔ́wɔ kú aéwo ɔhá nēé lɛ ā kpó bónū, cɛ́ɛ́ kéē lɛ okónu ce lɛ Óndú ā, Ɔwɔicō kú Ísrɛ̄lu.

²⁴Anɔ́ɔ ē da Ujóssuwa ka aá géē gbā Óndú, Ɔwɔicō kú aá ɛ̄gbā. Ka aá kē í lɛyítáajɛ lɛ íne kú nū.

²⁵Anɔ́ɔ Ujóssuwa lɛ okónu ce mla ācɛ ā ɛ̄cī ɔ́ɔmā Ussɛ́kɛm á. Ó lɛ íne mɛ́mla ɔwɛ nēé géē yɛce ā kpó lɛ uwá.

²⁶Ujóssuwa le íne ā tá tū ɔkpá kú íne kú Ɔwɔicō. Anɔ́ɔ ó cɛ̄ lɛ uwá kwú ɛcɔ̄ nɛ̄hi éyi í kwu ajɛ, ɔkwu ɔcī kú Óoku nōo kwu pī Áklɔ̄kpīihɔ kú Óndú ā.

²⁷Anɔ́ɔ ó da odúúdú ācɛ ā ka ɛcɔ̄ ā géē wɛ ijáalí kú aá á. Ó ka ɛcɔ̄ ā kē lɛ odúúdú ɛlā nɛ̄ Óndú ā ka lɛ uwá ā pó ɛɛ́. Ó géē wɛ ijáalí ce uwá ɛyí, cɛ́ɛ́ kóō lɛ uwá tū ŋmá o yíīkpɛ̄yí olɔfú tá Óndú ā.

²⁸Anɔ́ɔ Ujóssuwa le ācɛ ā yáwa á. Anɔ́ɔ é le kabɔ̄ ga ipú ajɛ kú uwā á.

²⁹Igbīhi ɛ̄nyā, Ujóssuwa, ɔyí kú Unɔ́n gekwú eko nōo wɛ iháyí ofɛhɔ̄ cigwó ā.

³⁰É lɛ ɔ̄ nyi ipú ajɛ kú nū Utimínāti Uséra, nōo yɔ̄ ipú ɔlɛ́ kú ɛyí ɛfu kú Ɛ́frem, ɛhícō kú ɛfu kú Ugáássi

³¹Eko nɛ̄ Ujóssuwa yēeyī gaá kwu ā, ācɛ kú Ísrɛ̄lu, gbā Óndú ā ɛ̄gbā lɔɔlɔhi. Igbīhi nōó gekwú ā, é gbā Óndú ā ɛ̄gbā jāā gaá kwu eko nɛ̄ ɔnyākwɔ̄cɛ nēe má aɔ́dā dóódu nɛ̄ Óndú ā yá eyī ā le pɛ́ gekwú.

³²É le okwū kú Ujósɛ̄fu nēé bī ŋmá Íjīpiti ā nyi Ussɛ́kɛm ipú ajɛ nɛ̄ Ujékɔ̄pu lá ŋmá ɛga ayí kú Uhámɔ, ádā kú Ussɛ́kɛm, ije nɛ̄hɛ́ ofɛhɔ̄ ā. Ajɛ nyā nɛ̄ aípɔ́ɔma kú Ujósɛfu lé úgwū nū á.

³³Ɛlísa, ɔyí kú Árɔ̄ni gekwú. É lɛ ɔ́ nyi Ugíbɛ̄ya, ɔlɛ́ kú igelī nɛ̄hi kú ɛyí ɛfu kú Ɛ́frem, nēé je lɛ ɔyí nū Ufínēhasi ā.