Read idoma UJÓSSUWA 3 Bible Online

UJÓSSUWA 3 - idoma bible

UJÓSSUWA 3

¹Ɔ̄cɔ̄ɔcī oŋmɔ́cī nū ā, Ujóssuwa mɛ́mla odúúdú ācɛ ā cāŋjɛ ŋmá Usítim le pɛ́ wā okónu ísu kú Ujɔ́dan yɔ̄ í gbēyī kéē bēé nū.

²É bá abɔ́ɔ ɛ̄cī ɛtá. Oŋmɛ́yí kú ɛ̄cī ɔ́mɛtá ā, aótrɛ̄yí kú ācɛ ā bá í yɛ ipú ɔlɛ́ ā bilíbilí

³yɔ̄ ī da ācɛ ā kahíníí, “Eko dúú nɛ̄ aá má ayí kú Ulífāyi ācogwɛ́ɛya ā nēe bī ikpati kú okónu ōce kú Óndú, Ɔwɔicō kú aá ā, kwū ɔ̄ ú ŋmá ajɛ, aá le bɛ̄cɛ ŋmá ɔlɛ́ aá, cɛ́ɛ́ kú aá yɛ cɛ ɔ́.

⁴Cɛ́ɛ́ kú aá géē jé ɔwɛ nɛ̄ aá géē yɛ ā, ohígbū ka, aá yɛ ɔwɛ amānyā jéjée ɛ́ɛ́ ŋ́. Amáŋ, aá híī túblá ikpati kú okónu ōce ā ajaajɛ ŋ́. Aá lɛ hɛ́gigbīhi ligbó hɛ̄ ɔ̄ tá bɛ̄ɛka āyá kú umáyilu ā.

⁵Ujóssuwa klla da ācɛ ā kahíníī, “Aá lɛ íyí aá iyē gwu, ohígbū ka óócí, Óndú ā géē yá ɔdā ōhídáagó ipéyī aá”.

⁶Anɔ́ɔ ó da ācogwɛ́ɛya ā kéē kwū ikpati kú okónu ōce ā ú, cɛ́ɛ́ kéē bī ɔ̄ iyɔ̄bū ācɛ ā. É le yá ɛ́gɛ́nɛ̄ ó da uwá ā.

⁷Anɔ́ɔ Óndú ā da Ujóssuwa kahíníí, “Ícɛ nyā, n géē gbɔɔ́ ō je uwɔ gicō ipéyī kú odúúdú Ísrɛ̄lu, cɛ́ɛ́ kéē jé ka, ɛ́gɛ́nɛ̄ n yɔ̄ mla Umósīsi ā, ɛ́gɔ́ɔmā nɛ̄ n yɔ̄ mla awɔ á.

⁸Le da ācogwɛ́ɛya nēe bī ikpati kú okónu ōce ā ka, eko nēé gā okónu ísu ā, é géē māháyi cíí okónu ísu ā”.

⁹Anɔ́ɔ Ujóssuwa da ācɛ ā kahíníī, “Aá wā gaá pó ɛlā nɛ̄ Óndú, Ɔwɔicō kú aá lɛ nɛ̄ ó gáā ka lɛ aá ā.

¹⁰Ɛ̄nyā nɛ̄ aá géē jé ka, Ɔwɔicō nōo yēeyī ā yɔ̄ mla aá á. Abɔ̄ aá yɔ̄ í wā ā, ó géē nū ācɛ Ukénan, ācɛ Uhɛ́ti, ācɛ Uhám, Upɛ́rísi, Ugígāsi, Ámɔn, mɛ́mla ācɛ Ujébūsi bɛ̄cɛ hīla aá piíí,

¹¹eko nɛ̄ ikpati kú okónu ōce kú Óndú kú odúúdú ɛcɛ ā, le bēhé ísu kú Ujɔ́dan gbɔbū lɛ aá.

¹²Aá lɛ ācɛ igwɛ́ɛpa fu ŋmá ipɔ́ɔma éyééye kú Ísrɛ̄lu.

¹³Eko nɛ̄ ācogwɛ́ɛya nēe bī kpati kú okónu ōce ā kwū ikpó kú uwá ú wu ipú éŋkpɔ̄ ā, ísu ā í gáā pɛ́ gɛ ŋ́, cɛ́ɛ́ éŋkpɔ̄ nōo yɔ̄ ī pɛ̄ ŋmá ɛháajɛ ā géē je pɛ̄ tū ɛgéégée”

¹⁴Eko nɛ̄ ācɛ le bɛ̄cɛ ŋmá ipú áklɔ̄kpɛ kú uwā kéē gbɔɔ́ ō bēé ga Ujɔ́dan ā. Ācogwɛ́ɛya nēe bī ikpati kú okónu ōce ā bá iyɔ̄bū uwā.

¹⁵Eko nɛ̄ ācɛ nɛ̄ ē bī ikpati kú okónu ōce ā, ga okónu ísu kú Ujɔ́dan ā, nɛ̄ ikpó kú ācogwɛ́ɛya nēe bī ikpati kú okónu ōce ā, má wu éŋkpɔ̄ ā. (eko kú ɔdɛ̄hɔ̄ ōce ɔ́ɔmā, Ujɔ́dan gē cēenyi nɛ̄hi)

¹⁶Éŋkpɔ̄ nōo yɔ̄ í pɛ̄ ŋmá ɛhícō wā ā, kwú tīkwū gicō bá ɛga ékpónú jāā ga ɛga oligbó kwu ɛga nēé hī ka Ádām, igelī nɛ̄hi nōo kwu Usáretan ā. Enyi ɛ̄nɛ̄ o gē yɔ̄ í pɛ́ ga ɛháajɛ gā ísu ɔmā ā kwú hɛ́ dúúdú. Anɔ́ɔ ó le tɔ́ɔtɛ́ lɛ ācɛ ā kéē le bēhé ga ɛga nēe kwu Ujérīko ajaajɛ ā.

¹⁷Eko nɛ̄ ācɛ ā bá ī bēhé ā, ācogwɛ́ɛya ā, háyi ɛyí ajɛ oōŋmó ɔtahɛ́ kú ísu a jāā gbéeko nɛ̄ ācɛ a le pɛ́ bēhé ísu ā.