Read idoma UJÓSSUWA 4 Bible Online

UJÓSSUWA 4 - idoma bible

UJÓSSUWA 4

¹Eko nɛ̄ odúúdú éwo kú Ísrɛ̄lu ā, le bēhé Ujɔ́dan ā, Óndú ā da Ujóssuwa kahíníī,

²“Le ācɛ igwɛ́ɛpa fu. Ɔ̄cɛ éyi kóō ŋmá ipɔ́ɔma kú Ísrɛ̄lu éyééye ā.

³Cɛ́ɛ́ kú ā da uwá kéē lɛ ɛcɔ̄ igwɛ́ɛpa kpó ŋmá ɔtāhɛ̄ éŋkpɔ̄ kú Ujɔ́dan ā. É géē kpó ɛcɔ̄ ā ŋmá ɛga nɛ̄ ācogwɛ́ɛya ā háyi piíí ā. É géē bī ɛcɔ̄ nyā mla iyī uwā jāā ga ɛga nɛ̄ aá gaá ce áklɔ̄kpɛ otú mā ā.

⁴Anɔ́ɔ Ujóssuwa lɛ ācɛ igwɛ́ɛpa nɛ̄ ó fu ā kpó hīgwú tɔ̄há.

⁵Anɔ́ɔ ó da uwá ka, á gbɔbū lɛ ikpati kú okónu ōce kú, Óndú, Ɔwɔicō kú aá ga ɔtāhɛ̄ kú ísu kú Ujɔ́dan ā, cɛ́ɛ́ éyééye kú aá kóō kwú ɛcɔ̄ éyi ú ce ɔkɔ, ɛ́gɛ́nɛ̄ ipɔ́ɔma kú nū lɛ ā.

⁶Aɛ́cɔ̄ nyā kē í blatū ācɛ, ɔdā nɛ̄ Óndú ā yá ā. Ekɔ̄bū nɛ̄ ayí aá lɛ ɔ̄kā da aá ɔdā nōo wɛ ɛyí kú ɛcɔ̄ nyā.

⁷Cɛ́ɛ́ aá géē da uwá ka, ísu kú Ujɔ́dan kwú hɛ́ hɔ́hā tá, eko nēé bī ikpati kú okónu ōce kú Óndú ā gaá bū ɔ̄ ā. Ɛcɔ̄ ā kē í yɔ̄ ī blatū ācɛ kú Ísrɛ̄lu eko dóódu, ɔdā nōo yá ā.”

⁸Ācɛ kú Ísrɛ̄lu ā le yá ɛ́gɛ́nɛ̄ Ujóssuwa jē ɔ́da lɛ uwá lɛ a. É le ɛcɔ̄ igwɛ́ɛpa kpó ŋmá ɔtāhɛ̄ kú Ujɔ́dan ā, ɛ́gɛ́nɛ̄ ipɔ́ɔma kú uwá lɛ ā, anɔ́ɔ é le ɔ̄ kpó nyɔ̄ ɛga nēé gbo ɔtú ɔ́ɔmā ā.

⁹Anɔ́ɔ Ujóssuwa lɛ ɛcɔ̄ igwɛ́ɛpa kpó kwu ajɛ ɛga nɛ̄ ācogwɛ́ɛya le ikpó bá ajɛ ɔtāhɛ̄ kú Ujɔ́dan ā, ɛcɔ̄ ā kē bá abɔ́ɔ jāā kwu eko nēé tɔ́kpá nyā ā.

¹⁰Ācogwɛ́ɛya ā háyi ɔtāhɛ̄ ísu kú Ujɔ́dan abɔ́ɔ jāā gbéeko nɛ̄ ɔdā dóódu nɛ̄ Óndú ā da Ujóssuwa le yá kwɛyí. Ɛ̄nyā wɛ ɔdā nɛ̄ Umósīsi je ɔ́da lɛ Ujóssuwa lɛyíkwu á. Anɔ́ɔ ācɛ ā páápá le bēhé ísu kú Ujɔ́dan á.

¹¹Eko, nɛ̄ odúúdú uwá kwú bēhé ga ogbeé ɔhá ā, ikpati kú okónu ōce kú Óndú ā mɛ́mla ācogwɛ́ɛya ā gaá gbɔbū lɛ uwá.

¹²Ayí kú Urúbɛ̄n, ayí kú Ugádi, mɛ́mla āyā kú ayí kú Umanásɛ le bēhé mɛ́mla iyɔ́fú kú uwā mɛ́mla ācɛ o hile kú Ísrɛ̄lu, ɛ́gɛ́nɛ̄ Umósīsi ka lɛ ā.

¹³Ipéyī Ɔwɔicō ɛ̄cī ɔ́ɔmā, ācɛ lɛ bɛ̄ɛka, úlā ofɛ̄hɔ ā, le bēhé ísu kú Ujɔ́dan mɛ́mla iyɔ́fú kú uwā ga ɔpɛ́ kú Ujérīko.

¹⁴Ɔdā nɛ̄ Óndú ā yá ɛ̄cī ɔ́ɔmā, le Ujóssuwa je gicō nɛ̄hi ipéyī ācɛ Ísrɛ̄lu. Ó cɛ̄ le uwá lɛ ojílīma ce ɔ́ ipú oyēeyī kú nū dúúdú, ɛ́gɛ́nɛ̄ é lɛ ojīlīmā ce Umósīsi ā.

¹⁵Anɔ́ɔ Óndú ā da Ujóssuwa kahíníī,

¹⁶“Le ka lɛ ācogwɛ́ɛya, nēé gē bī ikpati kú okónu ōce ā, kéē le bɛ̄cɛ wɛ̄ɛcɛ ŋmá ipú ísu kú Ujɔ́dan.”

¹⁷Anɔ́ɔ, Ujóssuwa da ācogwɛ́ɛya ā kéē le bɛ̄cɛ ŋmá ipú ísu Ujɔ́dan.

¹⁸Eko nɛ̄ ācogwɛ́ɛya nēe gē bī ikpati kú okónu ōce kú Óndú ā le bɛ̄cɛ ŋmá ipú Ujɔ́dan, nēé kwú íkpó kú uwā bá ajɛ ōŋmó kú okónōgwu Ujɔ́dan ā, éŋkpɔ̄ kú Ujɔ́dan kwúcē wā ɛgiyí nū iyí nū, klla kwú cēenyi klá ɛga nōo tɛtɛ cēenyi klá ā.

¹⁹Ācɛ ā bēé ísu kú Ujɔ́dan, ɛ̄cī igwó kú ɔyā éyi. Anɔ́ɔ é gaá lā Ugígalu ɛnɔ̄ɔ̄cī kú Ujérīko.

²⁰Ujóssuwa kwú ɛcɔ̄ igwɛ́ɛpa nēé kpó ŋmá ɔtāhɛ̄ ísu kú Ujɔ́dan ā ú kpó kwaajɛ Ugígal.

²¹Anɔ́ɔ ó da ācɛ kú Ísrɛ̄lu kahíníī, “Eko nɛ̄ ayí aá lɛ ɔ̄kā da aá ɛ̄cɔ̄bū, ɔdā nōo wɛ ɛyí kú ɛcɔ̄ nyā a,

²²aá géē kɛlā lɛ uwá lɛyíkwu eko nɛ̄ ācɛ kú Ísrɛ̄lu bēé ísu ɛyí ajɛ oŋmíkpākpālā ā.

²³Ohígbū ka, Óndú, Ɔwɔicō kú aá kwú éŋkpɔ̄ ú ŋmó ŋmá ajɛ ɛga éyi kú Ujɔ́dan jāā gbéeko nɛ̄ aá le bēé ísu ā, ɛ́gɛ́nɛ̄ Óndú, Ɔwɔicō kú aá yá ísu igwɛ̄bɛ́ ā jāā gbéeko nɛ̄ alɔ bēé ā.

²⁴Cɛ́ɛ́ ka odúúdú ācɛ kú ɛcɛ kéē jé ka ɔfú kú Óndú ā nwuné, nɛ̄ aá géē lɛ ojīlīma ce anú nōo wɛ Ɔwɔicō kú aá ipú ɛcɛ nyā piyóó.”