Read idoma UJÓSSUWA 5 Bible Online

UJÓSSUWA 5 - idoma bible

UJÓSSUWA 5

¹Eko nɛ̄, odúúdú aɔ́cɛ́ kú Ámɔn, nēe bá ogbeé kú Ujɔ́dan ɛnɔ̄ɔ̄nɛ̄ ā, mɛ́mla odúúdú aɔ́cɛ́ kú Ukénan nēe lā pīya ísu ā, le pó ka, Óndú ā le éŋkpɔ̄ kú Ujɔ́dan ŋmó ŋmá ajɛ hīla ayí kú Ísrɛ̄lu kéē bēé á, ɔtū kú uwā kwú kpó gbenyi, ipú le gbogodo lɛ uwá. Ɔ̄cɛ dúúmā kú uwá í klla lɛ ɔtū gɛ ŋ́, ohígbū ufi kú ācɛ kú Ísrɛ̄lu nēé bá ī yá ā.

²Anɔ́ɔ Óndú ā da Ujóssuwa kahíníi, “Lɛ aɛ́wā gbā ŋmá ɛcɔ̄ kú uflínti, cɛ́ɛ́ a lɛ ācɛ kú Ísrɛ̄lu nēé hɛ́ apī ɛ́ɛ́ ŋ́ mā, apī kpó hɛ́.”

³Ujóssuwa le yá ɛ́gɛ́nɛ̄ Óndú ā da ɔ̄ lɛ ā, anɔ́ɔ ó lɛ ācɛ kú Ísrɛ̄lu nēé hɛ́ apī ɛ́ɛ́ ŋ́ mā, apī kpó hɛ́ ɛga nēé hī ka, Ugibīti hāārálōtu, nɛ̄ ɛyí nū lé ka ɛfu kú apī ō hɛ́ ā.

⁴Ɔdā nōo yá ɛɛ́ nɛ̄ Ujóssuwa hɛ́ uwā apī ā yɔ̄ á. Odúúdú ācɛnyīlɔ kú uwā nēe bɛ̄cɛ ŋmá Íjīpiti ā, nēe kpɛ́fú ipú uwā glá ā le pɛ́ gekwú ipú ígbíli, igbīhi nēé bɛ̄cɛ ŋmá Íjīpiti ā.

⁵Odúúdú ācɛnyīlɔ kú uwā nēe bɛ̄cɛ ŋmá Íjīpiti eko ɔ́ɔmā ā, le apī kpó hɛ́, amáŋ ācɛnyīlɔ nēé ma eko kú iyāwu kú ígbíli kú uwā ā, é hɛ́ uwā apī ŋ́.

⁶Ohígbū ka, ayí kú Ísrɛ̄lu yɛ ipú ígbíli iháyí ofɛpa, jāā gbéeko nɛ̄ ācɛ nōo gē kpɛ́fú glá ipú uwā nēe bɛ̄cɛ ŋmá Íjīpiti ā, lɛ pɛ́ gekwú. Ohígbū ka é lɛyítáajɛ lɛ ɔkɔ kú Óndú ŋ́. Ɛ̄nyā yá ɛ́ɛ́ nɛ̄ Óndú ā tókónu lɛ uwā ka, odúúmā kú uwā ɔ́ɔ gáā ga ipú ajɛ nōó cokónu lɛ uwá ā ŋ́. Ajɛ nɛ̄ ɔdōlé yɔ̄ anú nɛ̄ɛ̄nɛ̄hi ā.

⁷Ayí uwā nɛ̄ Óndú ā bī jɛ̄ kwɛyí uwá ā, nɛ̄ Ujóssuwa hɛ́ uwā apī á, ohígbū ka é hɛ́ uwā apī jéjéē ɛɛ́ ŋ́.

⁸Eko nēé lɛ uwá apī hɛ́ kwɛyí ā, odúúdú éwo kú Ísrɛ̄lu klá ipú áklɔ̄kpɛ kú uwá cíí, jāā gbéeko nɛ̄ apī kú uwā le kpó jé.

⁹Anɔ́ɔ, Óndú ā da Ujóssuwa kahíníi, “Ícɛ nyā, n kwú uwēyī ō ka ka aá wɛ aɔ́fiyɛ ajɛ kú Íjīpiti ā ú ŋmá aá ɛyí ɛɛ́.” Ohígbū ɛ̄nyā, é kwú iyē ú ce abɔ́ɔ ka Ugígalu jāā kwu ícɛ nyā.

¹⁰Eko nɛ̄ ācɛ kú Ísrɛ̄lu ce áklɔ̄kpɛ Ugígalu, ɔpɛ́ nōo kwu Ujérīko ajaajɛ ā, é lɛ ucɛ kú onyatá ā lé ɔ̄nɔɔ̄nɛ̄ kú ɛ̄cī igwɛ́ɛnɛ kú ɔyā ā.

¹¹Ɔŋmɔ́ɔ̄cī nū wɛ ɛ̄cī aflɛ́yí nēé lé ɔdōlé nōo jɛ̄ ajɛ kú Ukénan á. Īkpɔ̄da ōŋmɔ́lá mɛ́mla igbō nēé lɛ ɔdōnīgbo tū ɔ̄ ŋ́ mā.

¹²Umaná í wā ajɛ lɛ uwá kéē lé ɛɛ́ gɛ ŋ́. O ŋmá eko ɔ́ɔmā gɔbū ā, é gbɔɔ́ ō lē ɔdōlɛ́ nōo jɛ̄ ajɛ kú Ukénan ā.

¹³Eko nɛ̄ Ujóssuwa le bá lɛ Ujérīko ajaajɛ ā, ó je eyī gicō, anɔ́ɔ ó má ɔ̄cɛ éyi háyi iyɔ̄bū nū, lɛ ɔkpacaŋ́gelī pi bī abɔ̄. Ujóssuwa le tá ɛgiyí nū, anɔ́ɔ ó da ɔ́ ɔ̄kā kahíníī, “A wɛ éyi kú aícɔ́ɔja kú alɔ kɛ̄ɛ, ka a wɛ olɛlā kú alɔ?”

¹⁴Anɔ́ɔ ɔ̄cɛ ā tóohi kahíníī, “Ehéee, amáŋ ami wɛ otrɛ̄yí kú aícɔ́ɔja kú Óndú ā, n kē gā amanyā ɛɛ́” Anɔ́ɔ Ujóssuwa lɛ eyī pīya klla ajɛ iyɔ̄bū nū lɛ ɛ̄gbā gbō ɔ̄ á. Anɔ́ɔ ó da ɔ́ kahíníī, “N wɛ ɔ̄cocɛ̄hɔ̄ kú uwɔ nɛ̄. Ɔdī nɛ̄ Óndú um tíne ká n̄ yá ā?”

¹⁵Anɔ́ɔ otrɛ̄yí kú aícɔ́ɔja kú Óndú ā da ɔ́ kahíníī, “Lɛ áblákpá kú uwɔ plla, ohígbū ka a háyi ɛga o tīihɔ.” Anɔ́ɔ Ujóssuwa le yá ɛ́gɛ́nɛ̄ ó da ɔ̄ ā.