Read idoma UJÓSSUWA 6 Bible Online

UJÓSSUWA 6 - idoma bible

UJÓSSUWA 6

¹É lɛ ɔwɛ kú Ujérīko gwū, klla bá gē gbō ɔ̄, nɛ̄ ɔ̄cɛ dúúmā í wā ipú nū ā glá ɛ́ɛ́ nɛ̄ ɔ̄cɛ dúúmā gē ga ɛcɛ ŋmá igelī nɛ̄hi ā glá ŋ́.

²Anɔ́ɔ Óndú ā da Ujóssuwa kahíníi, “N géē je Ujérīko mɛ́mla odúúdú aɔ́cɛ́ kú nū, mɛ́mla odúúdú ācɛ olɔtū kú aícɔ́ɔja kú uwā tá ipú abɔ̄ kú uwɔ.

³Awɔ mɛ́mla aícɔ́ɔja kú uwɔ ā géē yɛ jíla igelī nɛ̄hi ā tá dúúdú igbo éyi ɛ̄cī, ipú ɛ̄cī ɛhīlī.

⁴Ācogwɛ́ɛya ahāapa, ɔnyɔɔnyɛ kú uwā géē bī opo, é géē gbɔbū kú ikpati kú okónu ōce ā. Ɛ̄cī ɔ́mahāapa ā, awɔ mɛ́mla aícɔ́ɔja ā géē yɛ igelī nɛ̄hi ā jīla tá igba ahāapa, ācogwɛ́ɛya kē í bá yɔ̄ ī tá opo ā.

⁵É géē tá opo éyi táalúúúu. ɔkwɔɔkwu nɛ̄ aá lɛ opo ɔ́ɔmā pó ā, odúúdú ācɛ ā géē dɛ̄gba nɛ̄hi, ɔdɔ kú igelī nɛ̄hi kú Ujérīko ā géē je wúla wā ajɛ. Cɛ́ɛ́ odúúdú aícɔ́ɔja ā géē bēé ga ipú ɔlɛ́ ā bōōbū.

⁶Ujóssuwa lɛ ācogwɛ́ɛya ā kpó hīgwú anɔ́ɔ ó da uwá kahíníī, “Ācɛ ōhī kú aá kéē kwú ikpati kú okónu ōce kú Óndú ā ú, cɛ́ɛ́ ācɛ ahāapa ká ācogwɛ́ɛya ahāapa ɔhá ā kéē bī opo kú ajī ɛbɛ́, iyɔ̄bū kú ikpati kú okónu ōce kú Óndú ā.

⁷Anɔ́ɔ ó da ācɛ ā kahíníī, “Aá nyɔ̄ gɔbū, ká aá yɛ jīla igelī nɛ̄hi ā tá, aícɔ́ɔja kéē gbɔbū lɛ ācogwɛ́ɛya ahāapa nēe bī opo iyɔ̄bū kú ikpati kú okónu ōce kú Óndú ā.”

⁸Ɛ́gɛ́nɛ̄ Ujóssuwa da ācɛ ā, ācogwɛ́ɛya ahāapa nēe bī opo kú ajī ɛbɛ́ ā má gbɔbū yɔ̄ í tá opo. Ikpati kú okónu ōce kú Óndú ā kē yɛce uwá.

⁹Aícɔ́ɔja ā kē gbɔbū lɛ ācogwɛ́ɛya nēe bá ī tá opo ā, ācɛ o hile ā kē bá igbīhi kú ikpati kú okónu ōce ā. Ācogwɛ́ɛya ā kē bá yɔ̄ ī tá opo ā eko dóódu.

¹⁰Amáŋ Ujóssuwa le da ācɛ ā kéē híī dɛ̄gba ɛɛ́ nɛ̄ ɛlā dúúmā ɔ́ɔ gē bɛ̄cɛ ŋmá okónu kú uwā ŋ́, jāā gbéeko nɛ̄ anúɔ le ɔdā nēé géē yá ā da uwá.

¹¹Anɔ́ɔ ó le da ācɛ ɔlɛ́ nū kéē lɛ ikpati kú okónu ōce kú Óndú ā bī í yɛ igelī nɛ̄hi ā jīla tá igbo éyi. É le yá lɛ ā, anɔ́ɔ é gaá mlɛ́nyɔ́ ipú áklɔ̄kpɛ kú uwā ɛ̄cī ɔ́ɔmā á.

¹²Ujóssuwa cāŋjɛ ɔ̄cɔ̄ɔ̄cī kú ɛ̄cī ɔ́mpa ā, anɔ́ɔ ācogwɛ́ɛya kwú ikpati kú okónu ōce kú Óndú ā ú.

¹³Igbɔ ɔ́mpa, ācogwɛ́ɛya, mɛ́mla aícɔ́ɔja ā le yɛ igelī nɛ̄hi ā jīla tá, ɛ́gɛ́nɛ̄ é tɛ́tɛ́ hɔ́ɔgba yɛ lɛ, ɛ̄cī aflɛ́yí ā. Ígwu éyi kú aícɔ́ɔja gbɔbū, ācogwɛ́ɛya ahāapa nɛ̄ ē bī opo ā gboce uwá bá í tá opo ā, ācogwɛ́ɛya nēe bī ikpati kú okónu ōce kú Óndú ā kē tū ɔ́mɛtá. Aícɔ́ɔja o hile ā kē bá igbīhi uwā. Eko nyā kpɛ́mm ā, opo yɔ̄ í kɛlā.

¹⁴Ɛ̄cī ɔ́mpa nyā, é le yɛ igelī nɛ̄hi ā jīla tá kpɔ̄, anɔ́ɔ é píyɛyí wā í mlɛ́nyɔ́ ipú áklɔ̄kpɛ kú uwā á. É kē yá ɛ̄nyā lɛ ā ɛ̄cī ɛhīlī.

¹⁵Ɛ̄cī ɔ́mahāapa ā, é cāŋjɛ ɔ̄cɔ̄ɔ̄cī le igelī nɛ̄hi ā yɛ jīla tá igba ahāapa ɔwɛ nēé tɛtɛ yɛ ɔ́ jīla tá ā. Ɛ̄cī ɔ́ɔmā ōfōōfūnū nēé yɛ igeli ā jīla tá igbo ahāapa á.

¹⁶Igbo ɔ́mahāapa ā, eko nɛ̄ ācogwɛ́ɛya ā le tútū ō tá opo ā, Ujóssuwa da ācɛ ā kahíníī, “Aá dɛ̄gba, ohígbū ka Óndú ā kwu igelī nɛ̄hi ā ú lɛ aá ɛɛ́.

¹⁷Igelī ā mɛ́mla ɔdā dóódu nēe bá ipú nū ā, aá géē kpó uwá yíífi lɛ Óndú ā. Urēhábu akwuna ā, mɛ́mla odúúdú ācɛ nōo bá ipú inu ɔlɛ́ nū mla anú ā nɛ̄ aá géē hɛ́tá á. Ohígbū ɔdā nɛ̄ ó yá lɛ ācɛ nɛ̄ alɔ tɛ̄hɔ̄ nyɔ̄ í jīla ajɛ ā.

¹⁸Amáŋ ɔdā dóódu nōo wɛ ɔdā o je kpó yíífi lɛ Óndú ā, aá híī lɛ abɔ̄ kwu ɔ́ ŋ́. Ɔ́dāŋ́ ka, aá kwú ɔdā ífi dúúmā ú wā ɔlɛ́ aá, aá géē bī unwulu mɛ́mla ífi gé lɛ Ísrɛ̄lu.

¹⁹Ɔdā dóódu nēé bī ugóolu (oje ɔdɔ), udɔ, oje nɛ́hɛ̄ le yá uwā ā, wɛ aɔ́dā nēé kpó bá céé lɛ Óndú ā. É géē kpó uwā bá ipú ɛga o kpó agbénú kú Óndú tū ā.

²⁰Anɔ́ɔ ācogwɛ́ɛya ā lɛ opo tá, obōōbū nɛ̄ ācɛ ā lɛ opo ā pó ā, é le ɛgba dɛ̄ nɛ̄hi. Anɔ́ɔ ɔdɔ kú igelī nɛ̄hi kwú wúla wā ajɛ gidiimm. Anɔ́ɔ odúúdú aícɔ́ɔja ā le bēhé bōōbū ga ipú igelī nɛ̄hi ā, gaá mīyɛ igelī nɛ̄hi ā tābɔ̄ á.

²¹É bī ɔkpacaŋgelī kú uwá le odúúdú ācɛ nēe bá ipú ɔlɛ́ ā kpó ŋmó, kwu ācɛnyā mɛ́mla ācɛnyīlɔ, ayípɛ̄ mɛ́mla anyākwɔ́cɛ, é le aɛ́na mɛ́mla aálá mɛ́mla aíjakī kú uwā kpó ŋmó dúú.

²²Ujóssuwa da ācɛ ɛpa nēé tɛ́hɔ̄ nyɔ̄ í jila ajɛ ā kahíníī, “Aá ga ɔlɛ́ akwuna ā, cɛ́ɛ́ ká aá lɛ anú mɛ́mla ācɛ ɔlɛ́ nū kpó wɛ̄ɛcɛ ɛ́gɛ́nɛ̄ aá cokónu lɛ ɔ́ lɛ ā.”

²³Anɔ́ɔ é le yɛ, le Uréhābu bī wɛ̄ɛcɛ. Anú mɛ́mla ádā nū, ɛ́nɛ́ nū mɛ́mla ayínɛ́ nū mɛ́mla ācɛ o hile kú ɔlɛ́ nū. É lɛ odúúdú uwā kpó ga ipú áklɔ̄kpɛ kú Ísrɛ̄lu, cɛ́ɛ́ kú abɔ̄ kóō kwu uwá ŋ́.

²⁴Anɔ́ɔ é le igelī nɛ̄hi ā tɔ̄lá mɛ́mla ɔdā dóódu nēe bá ipú nū ā, ayíka ɔdā nēé bī oje udɔ, ugóolu (oje ɔdɔ), oje nɛ̄hɛ́ yá ā mɛ́mla oje ɔlamu. É le aɔ́dā e bá abɔ́ɔ ā kpó wā í kpó bá ipú inu, ɛga ō kpó ɔdā agbénú kú Óndú tū ā.

²⁵Amáŋ, Ujóssuwa lɛ Uréhābu akwuna ā, mɛ́mla ācɛ ɔlɛ́ nū hɛ́tá, ohígbū ka ó le ācobɔkwɛ̄lā tayínū nɛ̄ ó tɛ̄hɔ̄ ga Ujérīko ā kpó tayínū. Ipɔ́ɔma kú nū lā Ísrɛ̄lu jāā kwu ícɛ.

²⁶Eko ɔ́ɔmā ā, Ujóssuwa pi ācɛ ā ahɔ̄ nɛ̄hi kahíníī, “Ɔ̄cɛ dúúmā nōo yá kóō lɛ Ujérīko túgwó igbɔhá, Óndú ā í tókónu lɛ ɔ́ “Ɔ̄cɛ dúúmā nōo kwu ikpó inu kú Ujérīko ú táajɛ, ɔ́kplá kú nū géē kwú. Ɔ̄cɛ dúú nōo lɛ odūngwɔ̄wɛ kú igá kú nú túgwó, ɔyí ōhɔ́ma kú nū géē kwú.”

²⁷Óndú, yɔ̄ mla Ujóssuwa. Éwo dóódu pó ɔ̄kā kú Ujóssuwa.