Read idoma UJÓSSUWA 7 Bible Online

UJÓSSUWA 7 - idoma bible

UJÓSSUWA 7

¹Ācɛ kú Ísrɛ̄lu í lɛ íne nɛ̄ Óndú ā je lɛ uwá lɛyíkwu aɔ́dā ō kpó yíífi ā tū ŋ́. Ohígbū ka Ákan ɔyí kú ukámi, ɔyí kú Usábādi, ɔyí kú Uséra nōo ŋmá ipɔ́ɔma kú Ujúda ā, kwú ɔdēelihɔ ā ú kpó. Anɔ́ɔ Óndú ā kwú cɔ̄nū nɛ̄hi mla ācɛ kú Ísrɛ̄lu á.

²Ujóssuwa lɛ ācɛ tɛ̄hɔ̄ ŋmá Ujérīko ga Ái, nōo kwu Ubɛtáfɛ́n ɛnɔ̄ɔ̄cī kú Ubɛ́tɛlu ajaajɛ ā, kahíníi, “Aá nyɔ̄ kú aá lɛ ajɛ ā jila tayínū. Anɔ́ɔ ācɛ ā le yɛ gaá le ajɛ ā jila wɛɛlɛ.

³É pīyɛyí wā ɛgiyí Ujóssuwa, anɔ́ɔ é da ɔ́ kahíníī, “Odúúdú ācɛ í gáā nyɔ̄ ŋ́, amáŋ ācɛ bɛ̄ɛka úlā ɛhɔ̄ ámāŋ úlā ahāapa ce ofigwó kéē nyɔ̄ í kpɛ́fú tá ācɛ Ái. Ā cɛ̄ lɛ odúúdú ācɛ móōwē ga abɔ́ɔ ŋ́, ohígbū ka, ācɛ kú Ái ā í lɛ ɛwa ŋ́.”

⁴Ācɛ bɛ̄ɛka úlā ahāapa ce ofigwó ā le yɛ nyɔ̄ gaá kpɛ́fú tá Ái. Amáŋ ācɛ kú Ái le uwá kwu gbuulu, le uwá nū inya ŋmá ɔlɛ́ uwā.

⁵Ācɛ kú Ái ŋmó ācɛ ofu ce igwɛ́ɛhīlī kú uwá klla nū uwá inya ŋmá okónɔɔwe kú igá kú Ái jāā ga Ussɛbárim. É klla ŋmó uwá ɔpɛ́ kú ɛfu abɔ́ɔ. Anɔ́ɔ ufi cɛ̄ le ɔtū kú ācɛ kú Ísrɛ̄lu kwú kpó gbenyi bɛ̄ɛka éŋkpɔ̄ ā.

⁶Anɔ́ɔ Ujóssuwa lɛ īlī kú nū híla, má gbo klá ajɛ, kwú eyī í pīya klá ajɛ iyɔ̄bū ikpati kú okónu ōce kú Óndú ā, jāā gbó ɔ̄nɔ̄ɔnɛ̄. Anú mɛ́mla anyākwɔ́cɛ kú Ísrɛ̄lu ā, lɛ ewo wu klá ɛyí.

⁷Anɔ́ɔ Ujóssuwa kahíníí, “Woóó, eléélelé. Óndú, Ɔwɔicō kú um, ɔdíyá nāa kōō bī ācɛ ā bēhé Ujɔ́dan dɛ̄ɛ̄ ā? A bī alɔ wā ká ā kpó alɔ lɛ ācɛ kú Ámɔn kéē kpó alɔ yíífi nɛɛ? Ó lɛ ā, alɔ í kē yɛyí bá ogbeé kú Ujɔ́dan ā mɛ́ɛ̄.

⁸Óndú, ɔdí nɛ̄ n géē ka ā, eko nɛ̄ ācɛ kú Ísrɛ̄lu lɛ inya kwu ŋmá ɛgiyí olɛlā kú uwā ā?

⁹Ohígbū ka, odúúdú ācɛ kú Ukénan, mɛ́mla ācɛ kú ajɛ ā géē pó, é kē í cē íbɔm tū alɔ, klla í je alɔ kpó yíífi ŋmá ɛcɛ. É klla í je iyē kú alɔ hɛ́ ŋmá ɛcɛ. Olɔhi nyá nɛ̄ ɔ́ɔmā í yá lɛ iyē nɛ̄hi kú uwɔ ā?”

¹⁰Óndú ā da Ujóssuwa kahíníi “Cāŋjɛ, ɔdíyá nāa lɛ eyī pīya klá ajɛ ā?

¹¹Ísrɛ̄lu le íne kú um bīya. É lɛ okónu nɛ̄ n ce ā, mɛ́mla íne nɛ̄ n je lɛ uwá ā bīya. É le ɔdēelihɔ nēé cíkā ō kpó yíífi ā kpó kú abɔ̄yī uwā. É kwú uwā ú kpó uwī klla le ɛ̄kɛ̄mgbɛ̄ kā lɛyíkwu ɔ́. É klla kwú ɔ́ ú kpó tū ipú iyó kú uwá.

¹²Ɛ̄nyā wɛ ɔdā nōo yá ɛ́ɛ́ nɛ̄ ācɛ kú Ísrɛ̄lu í háyi iyɔ̄bū aólɛlā kú uwá nuunu tá uwā glá ŋ́ má. É le pɛ́kwu ŋmá ɛgiyí aólɛlā kú uwā, ohígbū ka é kwú pīya ɔdā kú ífi ɛɛ́. N klla gáā yɔ̄ mla aá ɛ́ɛ́ gɛ ŋ́, jāā gbéeko nɛ̄ aá lɛ ɔdēelihɔ ā kpó yíífi ŋmá ipú aá.

¹³Cāŋjɛ. Ká ā lɛ ācɛ ā iyē gwu, cɛ́ɛ́ kú ā lɛ uwá tútū, gbó óócí, ohígbū ka, ɛ̄nyā wɛ ɔdā nɛ̄ ami Óndú, Ɔwɔicō kú Ísrɛ̄lu ka á. Ɔdēlihɔ yɔ̄ ipú aá, ācɛ Ísrɛ̄lu, aá gáā māháyi iyɔ̄bū aólɛlā kú aá glá ŋ́, jāā gbéeko nɛ̄ aá kwú ɔdēlihɔ ā ú ŋmá ipú aá.”

¹⁴Óócí, é géē kpó ipɔ́ɔma éyééye kú aá wā iyɔ̄bū Ɔwɔicō, ipɔ́ɔma nɛ̄ ami nōo wɛ Óndú ā í fu ā géē wā iyɔ̄bū nū ipɔ́ɔnū ipɔ́ɔnū nɛ̄ n kē í je ā, ɔ̄cɛ éyééye géē ŋmá ipɔ́ɔnū ɔ́ɔmā wā iyɔ̄bū um.

¹⁵Ɔ̄cɛ nēé í kwú klla í má ɔdēlihɔ ā ɔlɛ́ nū ā, é géē je anú mɛ́mla odúúdú aɔ́dā nōó lɛ kpɛ́mm ā kpó yɔlá ŋmá ajɛ dúúdú. Ohígbū ka, ó lɛ íne kú Óndú ā nyílá, klla lɛ ɔdā uwēyī yá Ísrɛ̄lu.”

¹⁶Anɔ́ɔ Ujóssuwa cāŋjɛ ɔ̄cɔ̄ɔ̄cī, anɔ́ɔ ó le ācɛ kpó wā iyɔ̄bū Óndú ā ipɔ́ɔma éyééye á. Anɔ́ɔ é le ipɔ́ɔma kú Ujúda fu,

¹⁷anɔ́ɔ ó le aípɔ́ɔnū kú ipɔ́ɔma kú Ujúda jila á, anɔ́ɔ é kwú ipɔ́ɔnū kú Uséra ú á. Anɔ́ɔ é le ipɔ́ɔnū kú Uséra kpó wɛ̄ɛcɛ ipíiniinu, anɔ́ɔ é le abɔ̄ kwu ipínu kú Usábi á wɛ̄ɛcɛ á.

¹⁸É le ipíinu kú Usábi kpó wɛ̄ɛcɛ ipíiniinu, anɔ́ɔ é le abɔ̄ kwu Ákan ɔyí kú Ukámi mɛ́mla ɔyɔ́ɔ́yí kú Usábi, nōo ŋmá ipɔ́ɔma kú Ujúda ā tɛ́ɛcɛ á.

¹⁹Ujóssuwa da Ákan kahíníi, “Ɔyí um, lɛ ojīlīma je lɛ iyē kú Óndú, Ɔwɔicō kú Ísrɛ̄lu, cɛ́ɛ́ ká ā cɛ̄tra anú. Kóocōō, da um abālɔbányā ɔdā nāa yá ā. A híī je ɔ́ tayínū ŋmá ɛgiyí um ŋ́.”

²⁰Anɔ́ɔ Ákan tá ɔ ohi kahíníi, “Ákú ɔ̄kwɛ̄yi ā, n le íne kú Óndú, Ɔwɔicō kú Ísrɛ̄lu bīya. Ɔdā nɛ̄ n kē yá ā yɔ̄ á.

²¹Oŋmá ipú aɔ́dā nɛ̄ alɔ kpó ā, n má īlī kú ācɛ Ubábīlɔn, īkpō oje nɛ̄hɛ́ ofigwó, mɛ́mla ogbló kú ugóolu (oje ɔdɔ) nōo gbɛnú bɛ̄ɛka ákú īkpō ugóolu (oje ɔdɔ) ofɛpa cigwó ā. É le he um eyī fuú nɛ̄hi, anɔ́ɔ n kwú uwā ú kpó á. N le uwá kpó nyi ipú áklɔ̄kpɛ kú ɔlɛ́ um, oje nɛ̄hɛ́ ā tá ɛháajɛ kú nū.”

²²Anɔ́ɔ Ujóssuwa lɛ ācɛ tɛ̄hɔ̄ ga ipú áklɔ̄kpɛ kú ɔlɛ́ nū ā, anɔ́ɔ é le aɔ́dā ā má abɔ̄ nēé wɛ oōnyi ajɛ, nɛ̄ oje nɛ̄hɛ́ ā, tá ɛháajɛ nū ɛ́gɛ́nɛ̄ o ka lɛ ā ɔkwɛ̄yi.

²³Anɔ́ɔ é lɛ uwá kpó gé lɛ Ujóssuwa, mɛ́ma odúúdú ācɛ kú Ísrɛ̄lu ā. Anɔ́ɔ é kwu uwá u kpó bá iyɔ̄bū Óndú ā á.

²⁴Ujóssuwa mɛ́mla odúúdú ācɛ kú Ísrɛ̄lu ā kwú Ákan ú mla, īlī, oje nɛ̄hɛ́ ā, mɛ́mla ogbló kú ugóolu (oje ɔdɔ) ā, mɛ́mla ayí kú Ákan, aɛ́na, aíjakī mɛ́mla aálá kú nū, ɔlɛ́ nū mɛ́mla ɔdā dóódu nɛ̄ ó lɛ ā. Anɔ́ɔ ó le uwá kpó ga ɔpɛ́ kú unwalu á.

²⁵Anɔ́ɔ Ujóssuwa da ɔ́ kahíníī, “Ɔdíyá nāa bī unwalu wā í klā alɔ ā? Óndú ā kóō lɛ unwalu bī wā í klá awɔ ícɛ”. Anɔ́ɔ odúúdú ācɛ kú Ísrɛ̄lu gbɔɔ́ ō tá ɛcɔ̄ fīyɛ̄ Ákan mɛ́mla ayí nū, mɛ́mla aɔ́dā dóódu nɛ̄ ó lɛ á. É le ɛjɛ̄ɛ̄jī ɔdā nɛ̄ ó lɛ kpɛ́m ā kpó yɔlá.

²⁶É le ɛcɔ̄ ā tīkwū klá uwá. Ɛcɔ̄ ā wɛ oō tīkwū klá gónóó abɔ́ɔ kwu eko nēé tɔ́kpá nyā ā. Ɔdā nōo yá ɛ́ɛ́ nēé hī abɔ́ɔ ka, ɔpɛ́ kú unwalu ā yɔ̄ á. Anɔ́ɔ Óndú ā í klla cɔ̄nū mla ācɛ kú Ísrɛ̄lu gɛ ŋ́ má.