Read idoma UJÓSSUWA 8 Bible Online

UJÓSSUWA 8 - idoma bible

UJÓSSUWA 8

¹Óndú ā da Ujóssuwa kahíníī, “Lɛ odúúdú aícɔ́ɔja kú uwɔ kpó, káā nyɔ̄ ga ajɛ kú Ái. Aá híī yúufi ācɛ ā, ɛ́ɛ́ nɛ̄ ɔtū ge gbenyi lɛ aá ŋ́. N géē cɛ̄ lɛ aá í yá ɔcɛ́ kú uwā lé ɔgbɛ́fú. Cɛ́ɛ́ ācɛ ɔlɛ́ nū, mɛ́mla igelī nɛ̄hi kú nū mɛ́mla ajɛ kú ɔlɛ́ nū géē je pīya ákú aá.

²A géē yá Ái, ɔdā nɛ̄ aá yá Ujérīko mɛ́mla ɔcɛ́ kú uwā a. Amáŋ, igbɛ́nyā ā, aá géē kpó aɔ́dā olɔhi dóódu kú ipú ɔlɛ́ ā tū lɛ īyī aá. Kwu aɛ́na kú uwá. Lɛ tútū káā nyɔ̄ í lɛ ɔfú kpó kwu igelī nɛ̄hi ɔ́ɔmā igbledū ŋmá igbīhi.

³Anɔ́ɔ Ujóssuwa le tútū ō ga ajɛ kú Ái mɛ́mla odúúdu aícɔ́ɔja kú nū á. Ó lɛ aícɔ́ɔja olɔfú nɛ̄hi kú nū nēe wɛ, úlā ofɛtá cigwɛ́hɔ̄ ā kpó tɛ̄hɔ̄ nyɔ̄ ɔgbɛ́fú otú.

⁴Ó da uwá kahíníī, “Aá má tayínū āyā ɔhá kú igelī nɛ̄hi ā, amáŋ aá tayínū ligbó nɛ̄hi hɛ̄ igelī nɛ̄hi ā tá ŋ́. Cɛ́ɛ́ aá le tútū kú aá kpɛ́fú.

⁵Ami mɛ́mla aícɔ́ɔja o hile ā géē bá i wā ipú igelī nɛ̄hi ā. Eko nɛ̄ ācɛ kú Ái lɛ pɛ́ wɛ̄ɛcɛ gáā nuunu tá alɔ, alɔ géē kwúcē igbīhi géē gbɔɔ́ ō kwinya, ɛ́gɛ́nɛ̄ alɔ yá aflɛ́yí ā.

⁶É géē bá í nū alɔ inya jāā gbéeko nɛ̄ alɔ cɛ̄ lɛ uwá lɛ pɛ́ ŋmá ɔlɛ́ uwá. É kē í gbɛlá ka, alɔ ɔ́ɔ bá í kwu hɛ̄ aá tá, ɛ́gɛ́nɛ̄ alɔ kwu aflɛ́yí ā.

⁷Cɛ́ɛ́ aá géē bɛ̄cɛ ŋmá ɛga nɛ̄ aá tayínū ā, wā í mīyɛ igelī nɛ̄hi kú uwā ā. Óndú ā, Ɔwɔicō kú aá géē je igelī nɛ̄hi ā lɛ aá.

⁸Ɔkwɔɔkwu nɛ̄ aá mīyɛ ipú igelī nɛ̄hi ā, aá lɛ ɔ́ tɔ̄lá ɛ́gɛ́nɛ̄ Óndú ā je íne lɛ ā. Ɛ̄nyā wɛ ɔ́da nɛ̄ n je lɛ aá a.”

⁹Ujóssuwa le uwá tɛ̄hɔ̄ ga ɛcɛ, anɔ́ɔ é nyɔ̄ í tayínū ba ī gbēyī, abɔ́ɔ ɛnɔ̄ɔ̄nɛ̄ kú Ái, ɔtāhɛ̄ kú Ái mɛ́mla Ubɛ́tɛlu. Anɔ́ɔ Ujóssuwa le gbo ipú áklɔ̄kpɛ gbɔ́ɔ̄cī á.

¹⁰Ɔ̄cɔ̄ɔ̄cī ā, Ujóssuwa cāŋjɛ lɛ aícɔ́ɔja ā kpó hīgwú tɔ̄há. Anɔ́ɔ anú mɛ́mla anyākwɔ́cɛ kú Ísrɛ̄lu ā le uwá bī tá ga Ái.

¹¹Aícɔ́ɔja nɛ̄ bá mla anú lɛ eyī pīya kwu odūngwɔ̄wɛ kú igá kú igelī nɛ̄hi kú Ái ā. É lɛ ádɛ́fú kú uwá gwó ɛhícō kú ajɛ ā abɔ́ɔ, ɔpɛ́ kú ɔtāhɛ̄ uwá mla ācɛ kú Ái.

¹²Ó lɛ aícɔ́ɔja nēe lɛbɛ̄ɛka úlā igwɛ́ɛpa ā, kpó tayínū ɛnɔ̄ɔ̄nɛ̄ ɔtāhɛ̄ kú Ái mla Ubɛ́tɛlu.

¹³Aícɔ́ɔja ā, le tútū kéē kpɛ́fú ɛhícō mɛ́mla ɛháajɛ. Ujóssuwa kē le gbo ɔpɛ́ abɔ́ɔ otú ɔ́ɔmā.

¹⁴Eko nɛ̄ ɔcɛ́ kú Ái lɛ ācɛ kɔlɛ́ Ujóssuwa ā má abɔ́ɔ ā, é le tútū fíyaa. Anú mɛ́mla ācɛ ɔlɛ́ nū le pɛ́ tɛ́ɛcɛ ga ɔpɛ́ abɔ́ɔ kéē nuunu tá ācɛ kú Ísrɛ̄lu. Ɛga ékpónú nēé tɛtɛ nuunu tá uwá ā. Ó kē jé kéē géē nuunu tá anúɔ ŋmá igbīhi gɛ ŋ́.

¹⁵Anɔ́ɔ Ujóssuwa mɛ́mla ācɛ ɔlɛ́ nū gbɔ́ɔ ō yá ula bɛ̄ɛka ɔdā nēé gē kwinya ŋmá ɛgiyí uwā a, jāā gbéeko nēe lɛ uwá já wā ajɛ íkpákplā.

¹⁶É lɛ odúúdú ācɛ nēe bá ipú igelī nɛ̄hi ā kpó hīgwú wɛ̄ɛcɛ kéē í nū ācɛ Ísrɛ̄lu inya. Abɔ̄ nēé kē bá í nū Ujóssuwā inya ā, ɛ́gɔ́ɔmā nēé bá ī yɛ ligbó ŋmá ɔlɛ́ uwá ɛmɛɛma lɛ á.

¹⁷Odúúdú ācɛ kú Ái[1] le bɛ̄cɛ wā í nū ācɛ kú Ísrɛ̄lu inya. Ɔlɛ́ uwá má tá áncā, ɔ̄cɛ dúúmā í yɔ̄ nōo gē gbō ɔlɛ́ uwá gɛ ŋ́.

¹⁸Anɔ́ɔ Óndú ā da Ujóssuwa kahíníi, “Lɛ óbō kú uwɔ miya kwu Ái. N géē je ɔ́ ga uwɔ.” Anɔ́ɔ Ujóssuwa le yá ɛ́gɛ́nɛ̄ Óndú ā da ɔ́ á.

¹⁹Ikpííkpó nɛ̄ ó kwú abɔ̄ kú nū í gicō ā, aícɔ́ɔja nēe húmáyī ī tayínū ā, le bɛ̄cɛ fíya gaá mīyɛ igelī nɛ̄hi ā, klla kwú ɔlá ú hɛ́ kwu ɔ́ bōōbū.

²⁰Eko nɛ̄ ācɛ kú Ái pīyeyī má igbīhi ā, é má ódūdū kú ɔlɛ́ uwā ɔkpáncō. Ɔwɛ dóódu í yɔ̄ lɛ uwá néē gē kwu gɛ ŋ́. Ācɛ kú Ísrɛ̄lu nēe bá ī kwinya ā, kwú pīyeyī gbɔɔ́ ō kpɛ́fú tá uwā.

²¹Eko nɛ̄ Ujóssuwa má ka, ācɛ o hile ā mīyɛ igelī nɛ̄hi ā, klla kwú ɔ̄ ú tɔ̄lá ɛɛ́ mā, é kwúcē igbīhi gbɔɔ́ ō ŋmó ācɛ kú Ái.

²²Ācɛ kú Ísrɛ̄lu nēe bá igelī nɛ̄hi ā, le pɛ́ wā kéē gaá kpɛ́fú ā dúú. Anɔ́ɔ ācɛ kú Ái le má ka ācɛ kú Ísrɛ̄lu ɔ́ɔ lɛ aá yɛ jīla tá ɛɛ́. Anɔ́ɔ ācɛ kú Ísrɛ̄lu le uwá kpó ŋmó á. Ɔ̄cɛ kú Ái dúúmā í hile oyēeyī ŋ́.

²³Ayíka ɔcɛ́ kú Ái nēé kwú oyēeyī je gé lɛ Ujóssuwa ā nɛ.

²⁴Ísrɛ̄lu lɛ odúúdú aólɛlā kú uwá kpó ŋmó ígbíli abɔ́ɔ, ɛga nēé nu uwa inya wā ā. É klla, kwúcē ga igelī nɛ̄hi kú Ái gaá lɛ ācɛ o hile ā kpó ŋmó.

²⁵Ujóssuwa kē lɛ óbō kú nū miya kwu Ái jāā gbéeko nēe lɛ ācɛ kú Ái dóódu kpó ŋmó.

²⁶Odúúdú ācɛ kú Ái nēé ŋmó ɛ̄cī ɔ́ɔmā a, kwu ācɛnyā mɛ́mla ācɛnyīlɔ ā wɛ úlā ofu ce igwó.

²⁷Aɛ́na mɛ́mla aɔ́dā olɔhi ɔhá dóódu nɛ̄ ācɛ kú Ísrɛ̄lu kpó ŋmá Ái ā, é bī ákú īyī uwā, ɛ́gɛ́nɛ̄ Óndú ā da Ujóssuwa lɛ ā.

²⁸Ujóssuwa lɛ Ái tɔ̄lá klla kwú ɔ̄ ú tá alácɛ̄ jāā kwu eko nēé tɔ́kpá nyā ā.

²⁹Ó kwú ɔcɛ́ kú Ái ā ú tōlī. Okwū kú nū kē playi icō ɔcí ā jāā gbó ɔ̄nɔ̄ɔ̄nɛ̄. Abɔ̄ ɛnɔ yɔ̄ ī ga ajɛ ā, ó lɛ ɔ́da je kéē kwú okwū ā ú wā ajɛ. Anɔ́ɔ e kwú ɔ̄ ú tɛ́cɔ̄ tá okónɔɔwɛ igá kú igelī nɛ̄hi ā. É lɛ ɛcɔ̄ tīkwū klá anú, īkwū kú ɛcɔ̄ ā, kē yɔ̄ abɔ́ɔ jāā kwu eko nēé tɔ́kpá nyā ā.

³⁰Anɔ́ɔ Ujóssuwa lɛ ede gwó ɛyí ɛfu kú Ébalu lɛ Óndú ā, Ɔwɔicō kú Ísrɛ̄lu

³¹Ó gwó ede ā, ɛ́gɛ́nɛ̄ íne nɛ̄ Umósīsi, ɔ̄cocɛ̄hɔ̄ kú Ɔwɔicō ā je lɛyíkwu oōgwó kú ede ā lɛ ā. “Aá géē bī ɛcɔ̄ nēé bī ɔdā dúúmā ŋ́ mā lɛ gbā ɔ̄ ŋ́ mā lɛ gwó ede ga um.” É géē gwɛ́ɛya o yɔlá dúúdú ɛyi ede ā, lɛ Óndú ā, é klla í je ɛhi kú ɛbɔ́ kú uwā abɔ́ɔ

³²Abɔ́ɔ ipéeyī kú ācɛ ā, Ujóssuwa le íne nɛ̄ Umósīsi tɛtɛ je lɛ uwá ā, tá tū ɛcɔ̄ éyi nēé lɛ oje o bī gbɛ̄ɛcɔ̄ kwu ɔ́ ŋ́.

³³Odúúdú ācɛ kú Ísrɛ̄lu, kwu aótrɛ̄yí kwu aéwɔhá, mɛ́mla ācɛ nēé ma ɔlɛ́ uwá, anyākwɔ́cɛ kú uwā, ācɛ ohɛ́pɔ̄ kú uwá háyi áklō eyī kú ikpati kú okónu ōce kú Óndú ā, iyɔ̄bū kú ācogwɛ́ɛya nēe gē bī ikpati kú okónu ōce kú Óndú ā. Āyā ɔhá kú uwā háyi iyɔ̄bu kú ɛfu kú Ugɛ́rīsim, āyā ɔhá háyi iyɔ̄bū ɛfu kú Ɛ́balu, ɛ́gɛ́nɛ̄ Umósīsi, ɔ̄cocɛ̄hɔ̄ kú Óndú ā tɛtɛ je íne lɛ uwá lɛ ā. Kéē hɔ́hā ce ācɛ kú Ísrɛ̄lu ā.

³⁴Igbīhāajɛ ajɛ ā, ó le odúúdú ɛlā kú íne a jé tɛ́ɛcɛ, kwu ɔhā mɛ́mla okónu ōtá kú nū, ɛ́gɛ́nɛ̄ ɔdā dóódu nēé tá tū ipú íne ā lɛ ā.

³⁵Ɛlā dóódu í yɔ̄ nɛ̄ Umósīsi tá tāajɛ nɛ̄ Ujóssuwa í jé ɔ̄ lɛ ācɛ kú Ísrɛ̄lu ŋ́ nɛɛ ŋ́. Ó jé ɔ̄ iyɔ̄bū odúúdú ójila kú Ísrɛ̄lu. Kwu ācɛnyā mɛ́mla ācɛnyīlɔ, ayípɛ̄ mɛ́mla anyākwɔ́cɛ, kwu aéwɔhá mɛ́mla ɔ̄cɛ dóódu nōo lā Ísrɛ̄lu yɔ̄ abɔ́ɔ eko nɛ̄ Ujóssuwa yɔ̄ i jé ɔkpá kú íne nyā.