Read idoma UJÓSSUWA 9 Bible Online

UJÓSSUWA 9 - idoma bible

UJÓSSUWA 9

¹Eko nɛ̄ odúúdú aɔ́cɛ́ nēe lā ogbeé kú Ujɔ́dan, kwu aɛ́nɛ̄ e lā ɛyí ɛfu, ikpó ɛfu, mɛ́mla ɔpɛ́ ā jāā kwu aɛ́nɛ̄ ē la pī ísu kú Umeditarénīya ā ga ɛhícō kú Ulɛ́bānɔn ā, lɛ ɔ̄kā, kú ācɛ Ái nɛ̄ Ujóssuwa yálé ā pó. Aɔ́cɛ́ nēe pó ā bá yɔ̄ á: ɔcɛ́ kú Uhɛ́ti, Ámɔn, Ukénan, Upɛ́risi, ācɛ Uhám, mɛ́mla ācɛ Ujébūsi.

²Aɔ́cɛ́ nēe bá ā le pīya tɔ̄há kéē gaá kpɛ́fú tá Ujóssuwa mɛ́mla, ācɛ kú Ísrɛ̄lu.

³Amáŋ, ācɛ kú Ugíbeyɔn kē pó ɔ̄kā ɔdā nɛ̄ Ujóssuwa yá ācɛ kú Ujérīko mɛ́mla Ái ā.

⁴Anɔ́ɔ, é tíne ō bī ula lɛ Ujóssuwa plla. É nyɔ̄ í lɛ ɔdōlé tútū, le iyó gwó ce ijakī kú uwā. Iyó ā wɛ áhingílí, mɛ́mla ɛkpa nɛ̄ncɛ̄, mɛ́mla ɔjá ɔkpɛ́bɛ́ nɛ̄ncɛ̄.

⁵É le áhingílí, mɛ́mla áblákpá nēe le hɛ́, nēé lɛ ɔ́ kpó gɔ́ ā, kpó wu ikpó lɛ ifa yá. Igbō nɛ̄ uwá bī mla īyī uwā ā, le ŋmó klla í témúká.

⁶Anɔ́ɔ é gā, ɛgiyí Ujóssuwa Ugígalu, gaá da anú mɛ́mla ācɛ kú Ísrɛ̄lu ka, aá ŋmá ɛga oligbó, ka aá tíne kéē lɛ okónu ce mla aá.

⁷Amáŋ, ācɛ kú Ísrɛ̄lu ā kē da uwá kahíníī, “Ɔdíyá nɛ̄ aá géē cokónu mla uwá ā, ekōhí ŋ́ aá kē lā kwu alɔ ajaajɛ.

⁸Anɔ́ɔ, é da Ujóssuwa ka, aá wɛ aɔ́fiyɛ kú nū nɛ. Ujóssuwa kē tá uwā ohi ka, ānyɛ nēé wɛ ā? Iní nēé ŋmá wā āa?

⁹Anɔ́ɔ ē da Ujóssuwa kahíníī, “Alɔ ŋmá ɛga oligbó nɛ̄hi éyi. Alɔ kē pɛ́ wā ohígbū ɔ̄kā ɛ́gɛ́nɛ̄ Óndú, Ɔwɔicō kú uwɔ lóofu lɛ ā. Alɔ kē klla pó ɔdā dóódu nɛ́ Óndú, Ɔwɔicō kú uwā yá ajɛ kú Íjīpiti ā,

¹⁰mɛ́mla ɔdā nɛ̄ ó yá aɔ́cɛ́ ɛpa kú Ámɔn nēe lā ajɛ ɛnɔ̄ɔ̄nɛ̄ kú Ujɔ́dan ā, ɔcɛ́ Usíhɔn kú Uhɛ́ssibɔn mɛ́mla Ógu kú Ubássan, ɛ̄nɛ̄ o lā Ásstārɔtu ā.

¹¹Anɔ́ɔ, anyākwɔ́cɛ kú alɔ mɛ́mla odúúdú ācɛ ɔlɛ́ alɔ ka alɔ lɛ ɔdōlé tútū kú alɔ gaá tá aá.” É kahíníī, “Ālɔ̄ ɔ́ kwú īyī alɔ í yá aɔ́fiyɛ kú aá, cɛ́ɛ́ kú aá lɛ okónu ce mla alɔ.

¹²Aá má igbō kú alɔ, ó kwɔ́lá gbɔɔgbɔ eko nɛ̄ alɔ gbɔɔ́ ŋmá ɔlɛ́ ī wā ɛgiyí aá ā, amáŋ abālɔbányā ó kwū blínyī klla í témúká ɛɛ́.

¹³Eko nɛ̄ aá le ejé tū ɔjá ā, ó wɛ ɛ̄yīpɛ̄, amáŋ ó kwú lé ɛɛ́. Īlī kú alɔ mɛ́mla áblákpá kú alɔ klla kwú kpó lé ohígbū iyāwu nɛ̄ alɔ yɛ ŋmá ɛga olígbó ā.”

¹⁴Anɔ́ɔ ācɛ kú Ísrɛ̄lu mīyɛ ɔdōlé ā ŋmá abɔ̄ uwá, anɔ́ɔ é kē da Óndú ā ɔ̄kā lɛyíkwu uwá ŋ́ má.

¹⁵Anɔ́ɔ Ujóssuwa lɛ okónu kú oklóbīya ce mla ācɛ kú Ugíbīyɔn ka aá í gáā ŋmó uwá ŋ́. Aígabɔ̄ kú Ísrɛ̄lu ka aá ɔ́ɔ géē lɛ okónu nɛ̄ aá ce ā tū.

¹⁶Ɛ̄cī ɔmɛtá le gla kú eko nɛ̄ ācɛ kú Ísrɛ̄lu cokónu lɛ uwá ā, é le jé ka ācɛ ā ɔ́ɔ lā kwu aá ajaajɛ.

¹⁷Ācɛ kú Ísrɛ̄lu gbɔɔ́ lɛyíkwu aígelī nɛ̄hi kú ɔlɛ́ uwā ɛ̄cī ɔ́mɛtá ā. Aígelī nɛ̄hi kú ɔlɛ́ uwā bá yɔ̄ ā: Ugíbiyɔn, Ucēfɛra, Ubéerɔ̄tu, Ukɛrīyat, Ujeyarím.

¹⁸Amáŋ, ācɛ kú Ísrɛ̄lu í ŋmó uwá ŋ́, ohígbū okónu nɛ̄ aótrɛ̄yí kú uwā bī iyē kú Óndú, Ɔwɔicō kú Ísrɛ̄lu ce mla uwá ā. Odúúdú ācɛ kú Ísrɛ̄lu le ɛ̄pɔ̄ kú ɛlā nyā kpó lɛ aótrɛ̄yí ā.

¹⁹Amáŋ, é tá uwá ohi ka, aá le okónu ce lɛ uwá lɔfú, iyē kú Óndú, Ɔwɔicō kú Ísrɛ̄lu, ka aá í gáā yá uwā ɔdā dúúmā glá gɛ ŋ́.

²⁰É ka aá géē mā uwá tá kéē bá ohígbū okónu nɛ̄ aá ce lɛ uwá ā, ámāŋ, ka Ɔwɔicō ɔ́ɔ géē yá uwā italā.

²¹Kéē yēeyī, amáŋ é gēe yɔ̄ í ce ɛfú lɛ aá klla í hɛ́ éŋkpɔ̄ lɛ aá.” Ɛ̄nyā wɛ ohi nɛ̄ aótrɛ̄yí kú Ísrɛ̄lu tá á.

²²Ujóssuwa kéē lɛ ācɛ kú Ugíbeyɔn ā kpó gé lɛ anúɔ. Anɔ́ɔ ó le ɔ̄kā da uwá ka ɔdíyá ɛɛ́ nɛ́ɛ plla aá ā? Ohígbū ka ɛ́ɛ da aá ka, aá lā ɛga olígbó, amáŋ ɛ́ɛ kē lā ajaajɛ amānyā ā?

²³Óndú ā lɛ aá ŋmɛ́pɔ̄bí ɛɛ́, ohígbū ɔdā nɛ̄ aá yá nyā. Ācɛ ɔlɛ́ aá géē wɛ aɔ́fiyɛ piyóó, é géē bá ī ce ɛfú klla í hɛ́ éŋkpɔ̄ kú Agblīihɔ-nɛ̄hi kú Ɔwɔicō kú anúɔ.

²⁴Anɔ́ɔ, ē tá ohi ka aá ɔ́ɔ yá lɛ ā ɔkwɛyi. Ohígbū ka aá jé ka, Óndú, Ɔwɔicō kú uwā le da Umósīsi, ɔ̄cocɛ̄hɔ̄ kú nū ká ɔ̄ kwú odúúdú ajɛ ā ú lɛ aá, cɛ́ɛ́ kéē lɛ ācɛ nēe lā ipú nū ā kpó ŋmó. É ka aá yá ɔdā nɛ̄ aá yá ā, ohígbū ufi uwā mɛ́mla ufi kú oyēeyī kú aá nɛ̄ aá yá ā nɛ n.

²⁵Ācɛ kú ɔlɛ́ aá bá abɔ̄ kú ɔfú kú uwā mɛ́ɛnɛ, ka ɔdā dúú nɛ̄ ó he uwá ɔtū ā kéē yá aá.

²⁶Ɔdā nɛ̄ Ujóssuwa yá ā yɔ̄ á, ó le oyēeyī kú uwā tū. Ó cɛ̄ lɛ ācɛ kú Ísrɛ̄lu ŋmó uwá ŋ́.

²⁷Amáŋ ó kwu uwā ú pīya ɔfiyɛ. Cɛ́ɛ́ kéē ce ɛfú klla hɛ́ éŋkpɔ̄ lɛ ācɛ kú Ísrɛ̄lu mɛ́mla o bī yúklɔ́ kú ɛyí ede kú Óndú ā. Jāā kwu eko nēé tɔ́kpá nyā, é gē yúklɔ́ nyā ipú Agblīihɔ-nɛ̄hi kú Óndú ā.