Read idoma 1 UTÍMŌTI 1 Bible Online

1 UTÍMŌTI 1 - idoma bible

1 UTÍMŌTI 1

¹Ami Upɔ́lu, ɔ̄cocɛ̄hɔ̄ kú Ohɔ́nyɛtá jísɔ̄s nɛ̄ Ɔwɔicō fu ŋmá lɛ ɔ́da kú nū mɛ́mla ákú Ohɔ́nyɛtá Ujísɔ̄si nɛ̄ alɔ lɔtūce ā.

²N tɔ́ɔkpá nyā fú Utímōti ɔyí um o he um ɔtū ipú ocɛ̄ɛ̄lā kú ācɔ̄lóhɔ́nyɛtá. N gbɔ̄ɔkɔ lɛ Ɔwɔicō ádā alɔ mɛ́mla Ohɔ́nyɛtá Ujísɔ̄si, Óndú alɔ kéē hɔ́hā ce uwɔ, kéē gbonɛnɛ gā uwɔ, kéē klla je oōgbɛhi ipú alelékwū gā uwɔ.

³Eko nɛ̄ n yɔ i ga Umasɛdónīya ā, n da uwɔ ka ā klá Ɛ́fēsɔsi. Ācɛ ōhī bá abɔ́ɔ nēe bá ge nwū ɔdā ɛ̄kɛ̄mgbɛ̄. N dɔɔ̄kā ká ā lɛ ɔcí hɛ́ lɛ uwa kú e mā.

⁴Le ka lɛ ācɛ onwū ɔdā ɛ̄kɛ̄mgbɛ̄ ā kéē le eko kú uwā taajɛ yɔ̄ ī cā ɔcā mɛ́mla o le ka ɛma nɛ̄ ó lɛ oŋmɛ́yí ŋ́, aɔ́dā ɛ́gɔ́ɔmā ī bī áafú wɛ̄ɛcɛ. É kē lɛ ɔdā dúú olɔhi o yá lɛ ɔdā nɛ̄ Ɔwɔicō miya táajɛ lɛ alɔ nɛ̄ alɔ lɔfú jé ŋmá o cɛ̄ɛ̄lā ā ŋ́.

⁵Ɛyí kú ukɔ́ kú um ā wɛ o yá kú alɔ yíihɔtū tá ɔ́mpa alɔ ŋmá ɔtū oyēŋēē, mla ɔtū nōó gáā ŋmó alɔ ɛ̄pɔ̄bí kú ɔdobɔ̄bí dóódu ŋ́ mɛ́mla o yá kú aá cɛ̄ɛ̄lā kú Ohɔ́nyɛtá Ujísɔ̄si ɔwɛ ɔkwɔ̄ɔ̄kwɛ̄yi.

⁶Ācɛ ōhī le pɛ kwúcē igbīhi ŋmá aɔ́dā nēe bá nyā ā, anɔ́ɔ é le pɛ gebí ipú áafú ō tá kú olílā.

⁷E dɔɔ̄kā kéē je pīya ācɛ onwū íne kú Umósīsi, amáŋ é jɛɛyi kú ɛla ká abɔ̄yī uwā ɛ́ɛ́ ŋ́, Amáŋ koō jɛ́yí kú ɔdā nēé i kɛlā ohígbū nū mla ɔtū ékpó ŋ́.

⁸Alɔ jé ka íne kú Umósīsi ā lɔhi ɔ́dāŋ ka é bī ɔ̄ le yúklɔ́ ɔwɛ nōo cíkā a.

⁹Aá ī bla ka, é tū íne ā ohígbū ācɛ o yá ɔdā olɔhi ŋ́, amáŋ ohígbū ācɛ nɛ̄ ē ī lɛ íne tū ŋ́ mɛ́mla ācɛ o yíkpɛ̄yí olɔfu, ācɛ nēé ī yúufi Ɔwɔicō ŋ́ mɛ́mla ācɛ o bīyíne, ācɛ nēé gē lɛ ojīlīmā ce Ɔwɔicō ámáŋ ka ɔdā ō tīihɔ ŋ́. É yá íne a lɛ ācɛ o ŋmó ɔ̄cɛ.

¹⁰Ohígbū ācɛ nēe lɛ ucē obɔ̄bí yá, ācɛnyīlɔ o cikpɔ́ ācɛnyīlɔ ɔ́mpa uwā ámāŋ́ ka ācɛnyā ō cikpó ācɛnya ɔ́mpa uwā. Ācɛ o kwú ācɛ je lá, ācɛ o kɛ̄mgbɛ̄ mɛ́mla ācɛ ogbɔkpá ɛ̄kɛ̄mgbɛ̄. E yá íne ā ohígbū ɔdā dúúmā nōo ge bɛ́yí kwu ɔdā okpaakpa nēé gē nwū ācɛ ā.

¹¹Ɛlā nēé nwū nyā yɔ̄ ipú ɔ̄kōolɔhi nɛ̄ Ɔwɔicō nɛ̄ odúúdú ācɛ í wóófu iye nū piíí ā, je tū n abɔ̄ ka n̄ le tɔ́ɔna lɛ ācɛ ā.

¹²N tá Ohɔ́nyɛtá Ujísɔ̄si Óndú alɔ ahínyá, anú nōo je ɔfú gā um kú um yúklɔ́ kú um ā. N tá ɔ̄ ahínyá ohígbū ka ó lɛ um fu ka n cíkā ō cɛ̄ ɔ̄ ɛhɔ̄.

¹³Nááná nɛ̄ n tɛtɛ gē ka obɔ̄bí kú nū, yá ɔ̄ ōwē nɛ̄ɛ̄nɛ̄hi klla kōō cá ɔ̄ ɛcá bɔ̄bíbɔ̄bí dúú. Amáŋ Ɔwɔicō le eyīnyinyi um má ohígbū ka ń cɛ̄ɛ̄lā kú nū eko ɔ́ɔmā ɛ́ɛ́ ŋ́, anɔ́ɔ ń kē jé ɔdā nɛ̄ n yɔ̄ gē yá ā ŋ́

¹⁴Anɔ́ɔ Óndú alɔ lɛ ihɔtū nɛ̄hi kú nū ā cē klá um gbɔɔ, anɔ́ɔ ó ŋmá ihɔtū nɛ̄hi nyā a, nɛ̄ n miyɛ ɔtōōce nōo wɛ ákú alɔ ipú opiyatɔha mla Ohɔ́nyɛtá Ujísɔ̄si.

¹⁵Ɛlā nēé ka nyā wɛ ɔkwɛ̄yi nɛ̄ n. Ācɛ cíkā ō mīyɛ ɛlā ā cɛ ka Ohɔ́nyɛtá Ujísɔ̄si wā ipú ɛcɛ nyā kóō wā í nyā ācobīyíne tá. Ami a kē wɛ otrɛ̄yí kú uwā á.

¹⁶Amáŋ Ɔwɔicō lɛ eyīnyinyi um má, o yá ká Ohɔ́nyɛtá Ujísɔ̄si kóō ményinyi um eko nōó yɔ̄ ī yá mla um, ɔ̄cɛ nōo bīyíne fíyɛ́ dúú ā. Cɛ́ɛ́ ká n̄ kwú pīya ɔdā ocābɔ̄ lɛ ācɛ nōo ŋmá abālɔbányā géē cɛ̄ɛ̄lā kú Ujísɔ̄si, cɛ́ɛ́ kéē mīyɛ oyēeyī opiyoo.

¹⁷Ojīlīmā mɛ́mla ofu kóō yɔ̄ lɛ ɔcɛ́ oyēeyī piyóó, nɛ̄ ó ī kwú ŋ́ mɛ́mla ɛ̄nɛ̄ eyī í má ɔ́ glá ŋ́, anú ofūnū wɛ Ɔwɔicō eko dóódu! Aamí.

¹⁸Utímōti, ɔyí um ipú ācɔ̄lóhɔ́nyɛtá ukɔ́ nēé tū wɔ nōo ŋmá lɛ ɛlā kú ɛbɛ nēé tɛtɛ má uwɔ a, ká ɛlā ā kóō lɛ ɔfú tū uwɔ iyē ká ā nuunu kú Óndú ā lɔhi.

¹⁹Lɛ abɔ̄ flá tū ɔtōoce kú uwɔ mɛ́mla ɔtū nɛ̄ ó gáā ŋmó uwɔ ɛpɔ̄bí kú ɔdōbɔ̄bi nāa yá ŋ́, ācɛ ōhī í ge jahɔ ɔ́dāŋ́ ka ɔtū kú uwa ge ŋmó uwá ɛpɔ̄bí ŋ́, anɔ́ɔ é le yá kú ɔtōōce kú uwa kú o le gbliífi.

²⁰Uhimɛnáyɔsi mɛ́mla Alesáŋda wɛ ocabɔ̄ kú ācɛ ɛ́gɔ́ɔmā. N kwú uwā ú tū Ebilíi abɔ̄ kú ō yá uwā itala ohígbū obɔ̄bí kú Ɔwɔicō nēé ge ka ā.