Read idoma 1 UTÍMŌTI 2 Bible Online

1 UTÍMŌTI 2 - idoma bible

1 UTÍMŌTI 2

¹Ɔdā aflɛ́yí nɛ̄ n géē da uwɔ ā wɛ ka ā gbɔ̄ɔka lɛ Ɔwɔicō ohígbū ɛjɛ̄ɛ̄jī ācɛ. Ba Ɔwɔicō kóō yá aɔ́dā olɔhi dóódu lɛ uwá, kóō klla tá uwā abɔ̄. A klla í tá Ɔwɔicō ahínyá ohígbū éyééye kú ācɛ ā.

²A klla í gbɔ̄ɔkɔ lɛ Ɔwɔicō ohígbū aɔ́cɛ́ mɛ́mla ācɛ dóódu nēe bī igabɔ̄ éyi ámāŋ́ ka ɔhá. Cɛ́ɛ́ kú alɔ nēe wɛ ācɔ̄lóhɔ́nyɛtá ā géē bá ɛbɔ́ cíí. Ká ālɔ̄ yɔ̄ gē lɛ ojīlīmā nɛ̄hi ce Ɔwɔicō, ká ālɔ̄ yá ucē olɔhi.

³Ɛ̄nyā lɔhi, ó kē he Ɔwɔicō nōo nya alɔ tá ā ɔtu.

⁴Anú nōo tine kú odúúdú ācɛ kéē lɛ ɛlā ɔkwɛyi ā jé, cɛ́ɛ́ kóō géē lɛ uwa nyatá.

⁵Ohígbū ka Ɔwɔicō ékpónú yɔ̄ á, ó ke lɛ ɔ̄cɛ éyi nōo bī ācɛ jé ɔwɛ ga ɛgiyí nū, iyē kú nū kē wɛ Ohɔ́nyɛtá Ujísɔ̄si.

⁶Ɔ̄cɛ nōo kwú oyēeyī kú nū í tónū o yá ɛ́ɛ́ kóō lɛ odúúdú ācɛ hɛ́tá ŋmá íne nēé bīya ā. Ó kwú iyī nū ú gwɛ́ɛya kó ō le mafu ka eko okpaakpa nɛ̄ Ɔwɔicō tine kó ō nya odúúdú ācɛ tá.

⁷ Ɔ́ɔmā yá ɛ́ɛ́ nēe fu um ɔ̄cocɛ̄hɔ̄ mɛ́mla otɔ́ɔna kú Ɔ̄kōolɔhi ā lɛ aílɔ́wá, ká n̄ nwū uwā ɛlā ɔkwɛyi mɛ́mla ɛlā ō cɛ̄ kú ācɔ̄lóhɔ́nyɛtá. N yɔ̄ ī kɛlā ɔkwɛ̄yi ā nɛ̄ n, ń kɛ̄mgbɛ̄ nóó.

⁸Ipú icɔ́ɔci dóódu eyī yúm ka ācɛnyīlɔ í gbɔ̄ɔkɔ lɛ Ɔwɔicō á. É í wɛ ācɔ̄lóhɔ́nyɛtá nēe lɛ eko kú uwā táajɛ lɛ Ɔwɔicō piíí, é í je abɔ̄ kú uwā gicō kéē gbɔ̄ɔkɔ nōó gáā cɔ̄nū ámāŋ ka o gbaáfú ɔtāhɛ̄ uwā ŋ́.

⁹ N tíne ká ācɛnyā kéē bī ohílīpú le yíifa ukpɛ̄nū ukpɛ̄nū, kéē yíífa ɔwɛ okpaakpa. Óō híī wɛ ɛyi ō gbō jūū ŋ́, ámāŋ́ ka, ugóolu, mɛ́mla aɔ́dā ōgbɔɔ́lá dóódu ō kpó kla iye ŋ́.

¹⁰Ikɔkɔ ɔ́ɔmā, ācɛ cíkā ō hɔ́ɔkɔ ācɔ̄lóhɔ́nyɛtá o ŋmá lɛ ɔdā olɔhi nēé gē yá ā. Ɛnya ā le kpaakpa lɛ ācɛnyā nēe hī iyi uwā ka ācɔ̄lóhɔ́nyɛtá.

¹¹Ācɛnyā cíkā o jāhɔ̄ klla bá cíí, kéē kē tɛ́yí wāajɛ dúúdú abɔ̄ nēé bá gē jé odée ā a.

¹²Ń je ɛga lɛ ācɛnyā dúúmā kéē lɛ ikwu īkpɛ́yí ācɛnyīlɔ ŋ́, ámāŋ́ ka o nwū ɔdā dúú ipú icɔ́ɔci ŋ́. Kéē bá cíí ipú icɔ́ɔci.

¹³Ohígbū ka Ádām nɛ̄ Ɔwɔicō yá aflɛ́yí ɛ́ɛ́ nɛ̄ ó yá Ífu á.

¹⁴ Ó wɛ Ádām nɛ̄ ebilíi plla a ŋ́, ɔnya nɛ̄ ebilíi plla cɛ̄ lɛ ɔ́ bīya íne kú Ɔwɔicō á.

¹⁵Amáŋ é géē hɛ́ ɔ̄cɛnyā tá ŋmá lɛ ɔyí nɛ̄ ó í ma ā, ɔdāŋ́ ka ó yɔ̄ ī cɛ̄ɛ̄lā kú Ohɔ́nyɛtá, ge yíihɔtū tá ācɔ̄lóhɔ́nyɛtá aɔ́mpa nū. Nɛ̄ ó klla lɛ ɔtu oyēŋēē, ohílīpú mɛ́mla ucē olɔhi.